Bìoball air-loidhne

'Yii Ghlä‑wälɩ 1 - GOD - u2

'Bɔɔgʋnʋʋ' bhɔlɩ

¹ 'Bɔɔgʋnʋ ‑glö Laagɔ panalɩɩ ʋ nyɛɛ‑ lä Zozi Klisö nynä ɔ ghlaa 'kʋ nä. Kä Laagɔ panɩɩ lä ‑yä zëkpëa‑ yi lä ‑mɔɔ 'yikʋ nä, aa yëkuu wälɩɩ, ʋ 'kɩ ʋʋ' ‑gänʋnyʋa pana. Kä Klisö ‑lobho lä ɔɔ' ‑Laagɔzuzuu ɔɔ' ‑gänʋnyɔ Zään yëku ‑yä ɔ 'kɔnyɩ pana.

² A ni sä Zään cii‑ lä nä. Ɔ lä 'klüü 'fɩɩn n nii‑ lä 'yi nä, ɩ ‑glö Laagɔwälɩ, 'nɩ ɩ ‑glö 'sɩɩ ‑nʋawlɛɛ' lɛɛ ‑ɛ lü lä Zozi Klisöö' ‑dläfʋɛ nä.

³ Nyɩkpɔɔ' ‑lɔɔ 'gä lä 'bɔɔgʋnʋ zɛɛ nä, ɩyä wälɩnɩɩ‑ ‑ghlää lä Laagɔɔ' nëë' nä, nyɩkpaa' ‑lʋa ‑wa yii lä 'nyukwli poo, 'nɩ wa yii lä 'klʋkpää 'ŋʋ nä, wa yä 'pʋ! 'Nɩ 'tänyɩɛ 'mnö wälɩnɩ 'fɩɩn 'kä lä ŋënö nä, ɛ yä yëku 'mɛ.

Bhäälɩ

⁴ ‑Amʋ Zään, ‑amʋʋ‑ jɩjlä lä 'bɔɔgʋnʋ Aziibhlɩ 'kʋʋ 'cɔcɩgbüü ‑ngbɔɔsɔ ‑kʋ lä ‑mɔɔ nä. Laagɔɔ ‑ʋ ‑kʋ lä, 'nɩ ‑ʋ ‑kʋ bhlä nä, 'nɩ ‑ʋ yi lä nä, ʋ 'nyɩanyɩ 'nää ‑yä 'kʋ wɔtɔlɩ! ‑Zizii ‑ngbɔɔsɔɔ‑ ‑kʋ lä Laagɔɔ' 'Leyi‑këkpëa dëlüü nä, ɩ kwlienö'anyɩ 'nää ‑yä 'kʋ wɔtɔlɩɩ 'sɔ 'kʋ!

⁵ Ɩyä Zozi Klisö 'titi, ‑ɔ plöö‑ lä Laagɔɔ' ‑dläfʋɛlünyɔ 'kɔɔkɔɔ ‑za nä, ɔ 'nyɩanyɩ ‑lɔɔ' 'nää ‑yä ‑lɔɔ' 'kʋ wɔtɔlɩɩ! Ɔmɔɔ‑ plöö‑ lä 'sɩɩ nyɩkpɔɔ' lɔɔ‑ ‑glɔɔ lä tɛɛ 'kuëë nä. 'Nɩ ɔmɔɔ‑ plöö‑ lä 'sɩɩ ‑mää 'ylʋzɔɔ 'loyua 'fɩɩn waa' 'loyo. Klisö nä, kɔ wamänö‑anyɩ 'nɩ ɔ ‑ghlää ɔɔ' doluu 'mnö 'nɩ ɔ ‑sanyɩ ‑anyɩa nyenyii' ‑säklöö 'mnö.

⁶ Ɔ ‑gbä 'nɩ ‑a plöö‑ yɩ Laagɔɔ' 'Leyiduu 'mnö nyɩkpa. 'Nɩ ɔ ‑gbä 'nɩ ‑a plöö‑ yɩ 'sɩɩ 'Cibhisänyʋä ‑yä ‑a 'gä ɔ 'Bä Laagɔ ‑gä nʋ. 'Klʋagba ‑yä 'päwaa 'fɩɩn, ɩ 'plö Zozi Klisöö' dä 'kɔɔkɔɔ ‑za! Ɩ kʋ sɔɔ!

⁷ A ni kɔ yi lä. Ɔ blüë 'nyukpɔɔ 'mnö, ɔ yi. Nyɩkpa 'fɩɩn waa' 'yii yio 'yi 'ni. Nyɩkpa 'titi ‑wa ‑bhuo lä 'kusuu 'yi nä, wa yio 'sɩɩ 'yi 'nimʋ. 'Ylʋzɔɔ' 'gbüü 'fɩɩn yio 'yi 'ni, 'nɩ ɩ yi bhʋtʋ ɔɔ' ‑za. ‑Ɛɛɛ, ɩ kʋ sɔɔ!

⁸ Kwlienyɔ Laagɔ lä ‑amʋ ‑kʋ lä Ciedä, 'nɩ ‑amʋ ‑kʋ lä Bhɩädä. ‑Amʋʋ‑ ‑kʋ lä, 'nɩ ‑ɔ ‑kʋ bhlä, 'nɩ ‑ɔ yi lä. 'Tɛtɩɩ 'fɩɩn, ‑amʋʋ‑ zii lä 'kʋ.

Klisöö' 'klʋagba 'mnö Zään 'ninöɔ ‑mɔɔ 'yi

⁹ ‑Amʋ Zään, anyɩ a bheli ‑yä anyɩa' 'kʋnämʋnyɔɔ, n ‑yä anyɩ 'sɔ 'kwlɩ bhɩänö‑anyɩ ‑mä, ‑a ‑glö Laagɔɔ' 'Leyiduu 'mnö nyɩkpa, 'nɩ ‑a ‑yä Zozii 'sɔ 'jɛnyɩ‑ 'kɔɔkɔ 'nɩ ‑a ‑yi ‑bɛɛsä. A ni wa ‑klä'ä 'nɩ ji‑lëkpëa wa laa lä Patömɔsö nä 'mnö, wa ‑fää'ä ‑mɔɔ. ‑Ɔnöza bhää? sä n ci lä Laagɔwälɩ 'nɩ n lü lä Zozii' ‑dläfʋɛ nʋawlɛɛ 'mnö nä, ɩɩ ‑za.

¹⁰ Kwlienyɔɔ' ylʋʋ ‑ŋëë ylä nä, kä Kplɔɔkplɔɔ‑wugɔɔ welie‑ 'naa 'wugɔɔ. 'Nɩ nuwälɩɩ' lɩɩ‑ ‑kä lä 'sää kpänyɩ 'tɛtɩ nynä läglɛ nä, ɩ ‑ghlänö'ö klë,

¹¹ 'nɩ ɩ cii‑, ɩ lä, 'klüü 'fɩɩn ‑n ni lä 'yi nä, ‑n jɩjlɩɩ 'bɔɔgʋʋ' ‑yä n fʋʋ 'cɔcɩ‑gbünö ‑ngbɔɔsɔ. Efɛzɩduu' 'cɔcɩɛ, Siminöduu' 'cɔcɩɛ, Pɛgamöduu' 'cɔcɩɛ, Tɩatiiduu' 'cɔcɩɛ, Sadöduu' 'cɔcɩɛ, Filadɛfiiduu' 'cɔcɩɛ, ɩyä Lawodiseeduu' 'cɔcɩɛ.

¹² ‑Maa, n 'ylɩbha‑ lä 'wlu 'nɩ n ‑wloo lä klë nynä ‑mä, ‑ɔ sonö'ö lä nä, n 'kɔ 'yi 'ni nä, n nä n wloo nä, ‑sikaa‑näpö ‑ngbɔɔsɔ, ɩ ‑bezio.

¹³ ‑Mä 'näpönö nëëdë nä, ‑Laagɔzuzu ‑kʋ bhä ‑mɔɔ 'nɩ ʋ ‑kʋ bhä nynä nyɩkpɔ. Ɔ ‑plä bhä ‑bänö ‑bolu, 'nɩ ɔ ‑gʋä bhä ‑sikaa' 'bɛtʋ 'kükle nëë'.

¹⁴ ‑Zuzuu' 'wluu ‑yä ʋʋ' 'wluu nyɩɩ pɔɔ‑ bhä nynä 'sɩslɛɛ 'pɛpɛ. 'Nɩ ‑lɔɔ' pɔɔnɔɔ 'lee lee bhä 'sɩɩ 'mʋ. 'Nɩ ‑zuzuu' 'yii 'mnö ‑zään bhä nynä ŋnäŋnä ‑kosu.

¹⁵ Ʋʋ' ‑kokokpüü ‑zään bhä nynä lätöyi ‑slo wa kplä ‑kosuu'. 'Nɩ ʋʋ' ‑blɩzɔwälɩ ‑kä bhä 'sää kpänyɩ 'tɛtɩ nynä ji‑lakwɩɩ' kplü.

¹⁶ 'Nɩ ʋʋ' lüükä ‑klɔgbaa 'mnö, ʋ bhɛɛ‑ bhä ‑mɔɔ ‑laagɔzälöyi ‑ngbɔɔsɔ. 'Nɩ ʋʋ' nëë', ‑jlɛ bha bhä ‑mɔɔ. Ɛ pɔɔ‑ 'sää 'nägäsä 'mɛnʋ, 'nɩ ɛ nɩɔ‑ bhä 'pɛlɩ 'sɔ 'kʋ. 'Nɩ ʋʋ' 'kʋtakpa lie bhä nynä 'ylʋ ‑kʋ ‑tiin 'kʋʋ 'ylʋkwädlä.

¹⁷ ‑Mä n niu‑ lä 'gää 'yi nä, kä n ‑bhlünʋ dëlü ‑zɔɔ 'nɩ n ‑kʋ bhɛ nynä lɔɔ‑ kuu‑. ‑Mä ʋ gbɛɛ'ɛ ʋʋ' lüüklä ‑klɔgbaa 'kʋ 'nɩ ʋ cii‑, ʋ lä ‑ŋänö 'naa 'bhlä‑ä ‑lä! ‑Amʋʋ‑ plöö‑ lä Tɛɛtɛɛlɔɔ ‑yä Gbäbhɩälɔɔ.

¹⁸ ‑Amʋʋ‑ plöö‑ lä ‑Yäyänyɔɔ. N kuu‑ bhɛ ‑mä, ‑n wloo yɩ! N ‑yä. 'Nɩ ‑ylʋbɔɔ 'fɩɩn 'mnö nä, n ‑yä yɩ 'kɔɔkɔɔ ‑za. N bhɛɛ‑ 'kwiee 'säfɛɛ ‑yä 'kudukʋʋ' 'säfɛɛ.

¹⁹ Nä 'klüü ‑n nii‑ lä 'yi nä, ɩyä 'klüü ‑ɩ plö lä 'tänyɩnɛ 'mnö 'kʋ nä, ɩyä ‑ɩ 'gä lä ‑mɔɔ 'yikʋ 'yi nä, ‑n jɩjlɩɩ 'bɔɔgʋʋ'.

²⁰ ‑Laagɔzälöyii ‑ngbɔɔsɔ ‑n nii‑ lä 'naa lüüklaa mnö yi nä, ɩyä ‑sikaa‑näpöö ‑ngbɔɔsɔ ɩɩ' 'mnöö wälɩklëa‑ ‑zizio lä 'kʋ nä, amää‑ plöö‑ nynä ‑mä, ‑laagɔzälöyii ‑ngbɔɔsɔ nä, ɩmɩɩ‑ plöö‑ lä 'cɔcɩgbüü ‑ngbɔɔsɔɔ' ‑Laagɔzizii. 'Nɩ 'näpöö ‑ngbɔɔsɔ plöö‑ lä 'cɔcɩgbüü ‑ngbɔɔsɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan