Bìoball air-loidhne

Titö 3 - GOD - u2

Pɔlʋ lä Titö luë 'cɔcɩnyʋa ‑yä wa 'kä 'nää nää

¹ 'Cɔcɩnyʋa 'fɩɩn ‑n luënʋwa nynä ‑mä, wa 'ŋʋ 'bhlɩɛ 'tienyʋa ‑yä 'cifinyʋa 'klʋkpää'. Wa nʋ sɔɔ ‑yä 'klüü ‑lɩɩ nää lä nä, wa ‑ghlɩlɩ 'kɔɔkɔ wa 'kɩ nʋ.

² Waa' 'bhɩsɛ ‑lä nyɩkpɔ. Wa ‑sä yɔyɔ‑gbɩɩ gwë, wa namä plɛkʋ ‑yä wa wɔtɔmä plɛ nyɩkpaa 'fɩɩn ‑za.

³ ‑N ni 'yi naa, ‑anyɩ ‑mä 'sɩɩ ‑anyɩa tɛɛtɛɛdää' zëkpëa 'mnö nä, ‑aa bhɔɔ wälɩ ‑bhutukpää' gbaa ‑yi. ‑Aa 'ŋʋ bhɔɔ 'kwläkwlä 'sää Laagɔ 'klʋkpää'. Ka ‑a ‑too bhlä. Sä ‑anyɩa plɛɛ ylä bhlä nä, ɩyä gämʋʋ ‑a ‑waa bhlä nä, ʋ ŋʋ‑anyɩ bhä geylüü'. ‑A ‑kʋ bhä gbenyenyii 'mnö, 'nɩ ‑a ‑kä bhä 'sɩɩ luëzü. ‑Aa bhɔɔ 'kʋ mʋsä ‑kä, 'nɩ ‑a ‑zɔɔ ‑zɔɔ bhä.

⁴ ‑Mä sä ‑anyɩa Puënyɔ Laagɔɔ' pana ylä ɔɔ' plɛkʋnanɔɔ ‑yä ɔɔ' ‑wawʋʋ 'ylʋzɔkʋnyʋä nä,

⁵ kɔ ‑sanyɩ ‑lɔɔ nëë'. ‑Ɛɛ ‑wʋ nynä ‑mä kä ‑anyɩa nʋnʋgbɩ gëë‑ 'yi nä ɩɩ' ‑za, ‑mä kɔ ‑yibhënö‑anyɩ lä ŋäzö. Kä Laagɔ Kplɔɔkplɔɔ‑wugɔɔ ‑yi 'nɩ ʋ ‑büdü‑anyɩ lä nä, ɩmɩɩ‑ plöö‑ lä ‑anyɩa 'ci 'sɔɔ gänölɩ. Ʋ ‑gbä yɩ 'nɩ ‑anyɩa zëkpëa yi 'cɩcɩ 'nɩ a yi ‑lɛɛ lëlëë' 'plöö.

⁶ Kplɔɔkplɔɔ‑wugɔnʋ nä, ‑anyɩa Puënyɔɔ Zozi Klisö, ɔmɔ Laagɔ ‑ghlää lä 'kʋ 'nɩ ɔ kwlienö‑anyɩmʋ lä 'kʋ 'sää ‑jɛjɛsä.

⁷ Naa, Laagɔɔ' plɛkʋmɛnɔɔ 'mnö, sä ʋ ‑gbä 'nɩ ‑a plöö‑ ylä 'yigënyʋä nä, ʋʋ' 'pʋpʋɛɛ ‑ɛɛ ‑wʋ lä bhɩäsa ‑kä nä, ‑a ‑känɩ 'sɩɩ plɛkʋ nynä ‑mä ‑a yie jaa 'kʋ lüü.

⁸ Nä Titö‑ ‑lää' 'klünö ɩ ‑kä dë 'tɛɛ sä. N ylä nynä ‑mä ‑n pɩänɩ 'kʋ ‑yä ‑n cii. Ɩyä ‑wa ŋʋʋ‑ lä waa' pɔlötɛtɛɛ Laagɔ 'kʋ nä, wa 'kä saa 'fɩɩn nʋ ‑yä wa 'kä 'nägägbɩ nʋ. ‑Nɩnɩ 'mɩɩ‑ nää 'nɩ ‑ɩ ‑ŋwa lä ‑lɔɔ 'kʋ nyɩkpaa 'fɩɩn ‑za.

⁹ ‑Mä ‑ɔ plöö lä 'flɛflɛsaa' 'kʋ bhläälɩɩ nä, ɩyä nyɩkpaa' 'lälɩɩ' zɛlɩɩ nä, 'nɩ ‑ɔ plöö‑ lä 'sɩɩ cicee ‑yä Moyizöö' ‑Jlämaa' 'kʋ bhläälɩɩ nä, ‑mɔɔ Titö, ‑n ‑sɩɩ gwë! Ɩ ‑glö 'flɛ, 'nɩ ɩɩ' ‑wʋ gba ‑kä.

¹⁰ Nä, nyɩkpɔ kä ‑lɔɔ ‑kʋ 'nɩ ɔ kä 'cɔcɩnyʋa pää' 'mʋ‑doolɩ ‑lä nä, ‑n fɔɔ nëkʋ. ‑N fɔɔ nëkʋ 'ci ‑bhlo ‑yä 'ci 'sɔɔ. Ɔ 'nö yɩ ŋoo nä, ‑n ‑sɔɔ ‑n yëku yëku.

¹¹ 'Nɩ ‑n ‑yi sɔɔ nynä nyɩkpɔɔ' ‑lɔɔ ‑ɔ nʋ lä sɔɔ nä, ‑blɔɔ ‑nyënyu ɔ bhlü lä. Kɔ klaa lä ɔ yëku gbʋ Laagɔ dëlüü.

Bhlüüdä
( 1 Kolɛ 16.20‑24 )

¹² N yi‑i bheli ‑bhlo yëku lobho. ‑Ɔ 'nö Atemasö nä, Tisikö n 'kä lä lobho. Ɔ kä 'gää ‑mɔɔ ŋëë nä, ‑mɔɔ ‑mä 'sɩɩ ‑n yi. ‑N nʋ saa 'fɩɩn ‑yä ‑n ŋënö'ö Nikopolisö‑duu'. ‑Lɔɔ n 'kä lä kʋ ‑aaa ‑yä 'nyugozo‑wätlɩɩ' 'tanyɩɛ 'kä lä 'plö.

¹³ ‑Maa, ‑lɔɔ‑cinyɔɔ Zenasö, ɔ ‑yä Apolɔsʋ 'sɔ, ‑n klänʋwa ‑kaaa ‑yä wa 'kä mʋ. ‑N nʋ saa 'fɩɩn ‑yä waa' bɔɔ lä lʋʋ.

¹⁴ ‑Ɛɛɛ, ɩ ‑ŋwa 'kʋ nynä ‑anyɩa 'cɔcɩnyʋa ‑mä 'sɩɩ wa 'cɩä kpänyɩ 'nää nʋlɩ. Ɩmɩɩ‑ 'gä lä gbä ‑yä 'klüü ‑lɩɩ ‑ɩ kää lä 'sää 'titi gbʋ ‑Laagɔ‑lebhee 'mnö nä, wa 'ka‑anyɩ 'kʋ yi ‑yä ɩ 'kä nʋɔ. ‑Lɔɔ ɩ 'kä lä yi nio nynä ‑mä wa ‑nʋ lʋʋ.

¹⁵ 'Cɔcɩnyʋa 'fɩɩn ‑wa ‑yä ‑amʋ 'sɔ ‑kʋ lä ‑mää nä, wlä wa bhänö‑ö. Ɩyä bhelia ‑yä bhɛŋwnɩa ‑wa ‑waanyɩ lä pɔlötɛtɛɛ 'mnö nä, ‑n bhänʋwa 'sɩɩ ‑anyɩa ‑za. Laagɔɔ' 'nyupälɩɩ kʋ anyɩ 'fɩɩn yëku.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan