Bìoball air-loidhne

Titö 2 - GOD - u2

'Kɔgwlɛnyʋä ‑yä ŋnʋklö

¹ ‑Mä ‑mɔɔ nä, ‑n cɩa 'cɔcɩnyʋa sää‑ gëë‑ lä 'yi nä.

² ‑Ɔ plöö‑ lä 'kɔgwlɛnyʋa nä, ‑n sonʋwa nynä ‑mä wa klä wa yëku ‑kpään. Wa kʋ 'klʋkpää' ɩyä wa yibhë wa yëkuu' kläsä. Waa' pɔlötɛtɛɛ ‑mä 'sɩɩ, ɛ slɔɔ 'sää 'titi sä. Wa kään ‑wawʋ ‑yä wa yibhë plɛkʋ 'tɛmä sä.

³ ‑Ɔ plöö‑ lä ŋnʋklöö nä, ‑n sonʋwa nynä sää‑ yi lä Laagɔ ‑gä namä nä, wa nää sɔɔ. Waa' kpʋkpɔ ‑lä wa ‑liesɩ. Waa' kʋ lä 'sɩɩ nʋmnälɩɩ' geylüü' ‑yä wa pana 'klüü lɩɩ‑ nää‑ lä nä.

⁴ Wa cɩa ŋnʋ‑dägbö nynä wa wamä wa ‑nyetie ɩyä waa' 'yua.

⁵ Wa klä 'sɩɩ wa yëku ‑kpään ‑yä waa' wlunö‑zëkpëa kplɔɔ. Wa yibhë waa' gbünyʋää' 'kʋ wloo sä ‑yä wa namää 'sɩɩ plɛkʋ. Wa 'ŋʋ wa ‑nyetie 'klʋkpää. Wa kä sɔɔ nää nä, nyɩkpaa' ‑lä Laagɔwälɩɩ' nyenyi ci.

Nyëblii ‑yä ŋnʋgbɛnyʋa

⁶ ‑N 'ŋʋ 'sɩɩ nyëblii ‑yä ŋnʋgbɛnyʋa 'sɔ 'tɛtɩɩ ‑yä, ‑n sonʋwa nynä ‑mä nʋnʋgbɩɩ 'fɩɩn 'mnö, wa yibhë wa yëkuu' kläsä.

⁷ Titö‑, ‑mɔɔ 'titi ‑mä 'sɩɩ, sä ‑n yi lä nää nä, 'sɔɔ pana 'kɔɔkɔ 'nägägbɩ. ‑Naa cɩalɩɩ 'mnö nä, 'klüü ‑ɩ plöö‑ lä nyaasäsä, 'nɩ ‑ɩ ‑kʋ lä 'sɩɩ 'klʋkpää nä, ɩmɩ ‑n ‑nä cɩa.

⁸ ‑Naa ciciwälɩɩ gëë 'yii ‑yä nyɩkpɔɔ' kɩ ‑kä 'kʋ bhlää. ‑Lɔɔ ‑anyɩa ‑zɔbhlɛgbänyʋa' ‑lä ‑kä ‑anyɩa yëkuu' wälɩ ‑nyenyi 'ni ‑yä wa 'kä ci. Ɩ yi gbä 'nɩ zoo yiwa 'bhlä.

Geyu ‑yä ɔɔ' käänyɔ

⁹ ‑Ɔ plöö‑ lä geyua nä, ɩ ‑ŋwa 'kʋ nynä ‑mä nʋnʋgbɩɩ 'fɩɩn 'mnö, wa 'ŋʋ waa' käänyʋä 'klʋkpää. Wa gbä ‑yä waa' käänyʋä wamä waa' wälɩ. Wa ‑yʋwa 'sɔɔ' bhlää ‑lä 'kʋ.

¹⁰ Ɩyä waa' ghlü ‑lä waa' käänyʋä. Wa pana nynä ‑mä wa ‑kä dë 'tɛɛ sä. Ɩ yi gbä 'nɩ ‑anyɩa Puënyɔ Laagɔ ɔɔ' yëkuu' wälɩɩ ‑a cɩa lä nä, ɩ yi 'klʋkpää 'kʋ.

Laagɔɔ' plɛkʋmɛnɔɔ ‑gbä 'nɩ nyɩkpa ‑kplɔ yɩ

¹¹ ‑Ɛɛɛ, Laagɔ ‑yä ʋʋ' plɛkʋmɛnɔɔ nyɩkpa pana. Plɛkʋmɛnʋ ʋmʋʋ sä lä nyɩkpa 'fɩɩn ‑lɔɔ nëë'.

¹² Kʋ cɩa‑anyɩ lä nynä ‑mä, nʋnʋgbɩɩ ‑ɩɩ 'ŋʋ ‑wʋ lä Laagɔ 'klʋkpä, ɩyä ‑lɩɩ 'fɩɩn nyɩkpa ‑waa lä ‑mää 'ylʋzɔɔ 'nɩ ‑ɩ ‑nyu lä nä, ‑a cɛnɩ. ‑A yibhë ‑a yëkuu' kläsä ‑yä ‑a nämnö 'yigëë‑blɔɔ 'kʋ ɩyä ‑a 'ŋʋ 'kɔɔkɔ Laagɔ 'klʋkpä.

¹³ ‑A 'gä sɔɔ kʋ ‑aaa, ‑yä Laagɔɔ' ‑jlɔylʋʋ ‑a ‑bɛɛ lä nä, ʋ 'kä ŋëë. Ylʋʋyɩ 'kʋ nä, ‑anyɩa Puënyɔɔ Zozi Klisö ‑ɔ plöö‑ lä Laagɔ 'kädʋʋ ‑a bʋbɔ lä nä, ɔ yi ɔɔ' 'klʋagba 'mnö yii.

¹⁴ Zozi Klisö nä, kɔ ‑sä ɔ yëkuu' zëkpë ‑anyɩa ‑za ‑yä, ‑anyɩa nyenyi‑zëkpëa 'kä 'mʋ kplɩɔ. Kɔ ylä nynä ‑mä, ‑a kplɔɔ wɩa ‑yä, ‑a 'plö 'sää 'titi ɔɔ' nyɩkpaa' lʋä ‑wa ‑ghlɩlɩ lä 'kɔɔkɔ ‑yä ‑wa 'gä 'nägägbɩ nʋ nä.

¹⁵ Nä Titö‑, 'klünö, ɩmɩ ‑n ‑kä lä ‑yä ‑n 'gä cɩa. ‑Lɔɔ' ‑tëbhuu nä, ‑n 'bhlünʋ 'tɛtɩɩ 'mnö 'kʋ ‑yä, nyɩkpaa ‑n cɩa lä nä, ‑n 'ŋʋwa 'tɛtɩɩ. Kɩ kä ‑kʋ nynä ‑mä ‑n fʋwa nëkʋ nä, ‑n fʋwa 'sɩɩ nëkʋ! ‑Naa ‑taa lä nyɩkpɔ 'yi 'nɩ ɔ 'kä‑ä ‑dʋdʋkʋ wloo.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan