Bìoball air-loidhne

Titö 1 - GOD - u2

Bhäälɩ

¹ ‑Amʋ Pɔlʋ, n ‑glö Laagɔɔ' ‑gänʋnyɔ, 'nɩ n plöö‑ Zozi Klisöö' lobho lobhonyɔ. Zozi Klisö nä, kɔ ‑lobho'o lä nynä nyɩkpaa' ‑lʋa Laagɔ ‑sä lä nä, n ‑länʋwa pɔlötɛtɛɛ' ‑blɔɔ 'kʋ. Ɩyä ‑nʋawlɛɛ ‑ɛ ‑yä 'cɔcɩ‑zëkpëa 'sɔ nää lä nä, wa 'kɛ yibhë.

² Ɩyä 'pʋpʋɛɛ‑ ‑kʋ lä 'kɔɔkɔɔ ‑za nä, wa 'kɛ 'ni. 'Kɔɔnʋ, ʋʋ' ‑lätee wlʋʋ‑ 'nɩ Laagɔ wlʋa‑ lä 'pʋpʋɛ ‑anyɩa ‑za nynä ‑mä ‑a yie bhä 'ni. 'Nɩ Laagɔɔ' ‑wʋ ‑kpläkplä ‑kä.

³ Nä 'tänyɩɛ ‑anyɩa Puënyɔɔ Laagɔ ŋʋʋ‑ bhlä nä ɛ yä ylä ‑ŋëë nä, kʋ nyɛɛ'ɛ ʋʋ' ciciwälɩɩ' ‑tëbhuu nynä n cii.

⁴ 'Bɔɔgʋnʋ nä, ‑mɔɔ Titö, ‑mɔɔ n jɩjlʋ lä. Pɔlötɛtɛɛ ‑bhlo 'jɛnyɩnö‑anyɩ lä nä ɛmɛ 'mnö, ‑mɔɔ Titö, ‑n ‑glö 'sää 'naa 'yu 'titi. ‑A 'Bä Laagɔ ɩyä Zozi Klisö, ‑anyɩa Puënyɔɔ, waa' 'nyupälɩɩ ‑yä waa' 'kʋ wɔtɔlɩɩ ŋënö‑ö 'kʋ!

Klɛtöbhlɩ 'kʋʋ 'cɔcɩgbëa yëkuu' wälɩ

⁵ Kä n të‑ë lä Klɛtö‑lëkpëa 'mnö ‑yä lebhee ‑a ‑bhɔ lä nä ‑n 'gɛ ‑zɔɔ bhɩä. Kä n ‑sonö bhlä nynä ‑mä 'dii 'mnö 'cɔcɩgbüü nä, ‑n 'ŋʋ ɩɩ' nëkʋʋ' kʋnyʋä!

⁶ 'Cɔcɩɩ' 'tienyɔ nä, sä nyɩkpaa' kɔ lä nëkʋ fä nä, ɩ ‑ŋwa 'kʋ nynä ‑mä ɔ nää sɔɔ. Ɔ 'plö 'sɩɩ nyɩkpɔɔ' lɔɔ‑ ‑kä lä 'ŋnɔ ‑bhlo nä. Ɔɔ' 'yua 'plö 'sɩɩ 'cɔcɩnyʋä. Nyɩkpɔ 'nä zɛnönʋwa ‑lä gbenyenyi 'mnö. Ɩyä waa' zɛnönʋwa ‑lä 'sɩɩ cɩcɩɔlɩɩ 'mnö.

⁷ 'Cɔcɩɩ' 'tienyɔ nä, Laagɔɔ' 'gbëë 'kʋ wloonyɔ ɔ plöö‑ lä nä, ɩ ‑ŋwa 'kʋ nynä ‑mä sä nyɩkpaa' kɔ ‑klä nëkʋ fä nä, ɔ nää sɔɔ. Ɔɔ' ‑sää ‑lä nyenyisä 'mʋ. Ɔɔ' kään ‑lä 'sɩɩ gbʋgblɛ. Ɔɔ' 'plö ‑lä 'sɩɩ nʋmnänyɔ. Ɔɔ' tään ‑lä 'sɩɩ cice. Ɩyä ɔɔ' tänö ‑lä monii gbenyenyii 'mnö.

⁸ Ɩ ‑ŋwa 'sɩɩ 'kʋ nynä ‑mä, nyɩkpaa‑ yi lä ɔɔ' 'gbëa 'mnö nä, ɔ yibhë waa' kläsä. Ɔ wamä‑ 'nää ‑yä ɔ yibhë 'sɩɩ ɔ yëkuu' kläsä. Ɔɔ' nʋnʋgbɩ gëë 'yii ‑yä ɔ kʋ Laagɔɔ' kplɔɔlɩɩ 'mnö ‑yä ɔ klä ɔ yëku ‑kpään.

⁹ 'Cɔcɩɩ' 'tienyɔ nä, sä Laagɔwälɩɩ 'ylänöɔ lä nä, ɩ ‑ŋwa 'kʋ nynä ‑mä ɔ 'sänyɩ ‑yä ɔ nää 'sɔɔ. Ɔ kä 'sɔɔ nää nä, Laagɔwälɩnɩ ‑kplɔɔ 'nɩ ɩ ‑kä lä dë 'tɛɛ sä nä, ɔ yii 'mnö ghlää 'nɩ ɔ yi nyɩkpa 'tɛtɩɩ 'ŋʋ. 'Nɩ, ‑waa bhɔɔ lä ɔɔ' wälɩ 'kʋ mɛɛ nä, ɔ yiwa pana nynä ‑mä wa yä mnɔ.

‑Kpläkplää' cɩanyʋä

¹⁰ ‑N ni 'yi naa, nyɩkpa ‑kʋ 'nɩ waa' 'ŋʋ ‑wʋ nyɩkpɔ 'klʋkpä. 'Zufʋnyʋa ‑wa 'plöö‑ lä 'cɔcɩnyʋää' nä, wamä nëëdë ‑lɔɔ' nyɩkpa‑cëa ‑kʋ lä kpänyɩ. Wa ‑kä 'flɛɛ nüglɔ 'tätä, 'nɩ wa plöö‑ sää 'titi nyɩkpaa' 'nyigënyʋä.

¹¹ Nä Titö‑, ‑n nʋ saa 'fɩɩn ‑yä wa bhlü nëkʋ! ‑Ɔnöza bhää? 'Lɔlʋkpö‑bhü wa plaa lä ‑didi. Wa cɩa wälɩɩ' lɩɩ‑ ‑wʋ lä cɩasä ‑kä nä, 'nɩ ‑lɔɔ' zoo wa ŋʋ lä sä nä, wa ghlänʋ 'mnö 'nɩ wa ni 'sɩɩ monii.

¹² Wa 'bhuyu ‑bhlo, waa' 'plɔfɛtɩ, ɔ cii‑ 'ylʋʋ ‑bhlo, ɔ lä Klɛtönyʋä ‑glö 'kɔɔkɔ ‑kpläkplönyʋä! 'Nɩ wa ‑glö 'mnö ‑nyunɔ mna! Wa ‑glö 'zɛnɔnyʋä ‑yä ‑lɛɛ 'gbi lünyʋä!

¹³ Wälɩnɩ waa' 'plɔfɛtɩɔ cii‑ lä nä, ɩ ‑glö nyaasäsä. Ɩmɩɩ‑ ‑kä 'ŋnö 'nɩ n sonö‑ö lä nynä ‑mä, ‑n fʋwa sää' 'titi nëkʋ ‑yä ɩ 'kä gbä waa' pɔlötɛtɛɛ 'kä 'yi gëë.

¹⁴ 'Zufʋnyʋaa' ‑jlibɔɔ nä waa' puu ‑lä 'nyukwli. Ɩyä nyɩkpaa ‑wa yä lä ‑nʋawlɛɛ' ‑blɔɔ kee 'täkä nä, waa' ‑jlämaa, waa' 'ŋʋa ‑lä 'klʋkpää.

¹⁵ ‑Mä nyɩkpaa ‑wa ‑kplɔɔ lä nä, kä ‑lɩɩ 'fɩɩn ‑kplɔɔ 'sɩɩ waa' ‑za. ‑Mä ‑waa ‑wʋ lä ‑kplɔɔ 'nɩ ‑waa 'ylä ‑wʋ lä nynä ‑mä wa 'kä Kwlienyɔɔ' pɔlɔtɛtɛ kään nä, ‑lʋʋ ‑wʋ waa' ‑za ‑kplɔɔ. Waa' bhobhowluu ‑yä waa' pɔlöö 'sɔ yä tutlumä nyenyii' ‑za.

¹⁶ Wa ci 'flɛ nynä wa ‑yi Laagɔ ‑mä kä waa' nʋnʋgbɩɩ pana 'yigäda ‑blɔ. Waa' ‑wʋ nyenyii' ‑za 'yikʋ 'päsä ‑kä. 'Nɩ nyɩkpɔ ‑mä waa' 'ŋʋ ‑wʋ 'sɩɩ 'klʋkpää. 'Fɩa 'nɩ waa' mii ‑wʋ 'nägälʋʋ' nʋlɩ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan