Bìoball air-loidhne

Wlɔmʋ‑dunyʋä 9 - GOD - u2

Laagɔ ‑sä 'Yizlɛnyʋä nynä wa 'kʋ 'yuë 'plö
( Gala 4.22‑31 )

¹ N ‑yä Klisöö' 'sɔ 'jɛnyɩlɩɩ ‑za nä, ‑nʋawlɛɛ n ci lä. Nn' gë ‑wʋ yio. 'Nɩ ‑mɔɔ 'naa 'wuga 'mnö nä, Kplɔɔkplɔɔ‑wugɔɔ lü ‑lɔɔ' ‑dläfʋɛ.

² Wälɩklë kamänö'ö kpänyɩ yëku 'nɩ a gbä 'nɩ n nyɛnɩä 'kɔɔkɔ.

³ ‑Ɛɛɛ, n ‑waa bhä 'sää nynä ‑mä Laagɔ ‑bha 'naa gbʋʋ' ‑yä n ‑sä Klisö gwë 'fɩɔ 'fɩɔ, 'naa bhelia ‑yä 'naa bhɛŋwnɩaa' ‑wa plöö‑ lä n 'bhunyʋä 'zufʋnyʋä nä, waa' ‑za.

⁴ Wa plöö‑ 'Yizlɛnyʋä 'nɩ Laagɔ lʋwa‑ lä ʋʋ' 'yuë 'nɩ ʋ panʋwa‑ lä ʋʋ' 'klʋagbaa, 'nɩ ʋ ‑yʋwa 'sɔ ‑mɛnö 'ci bhutukpä 'kʋ. 'Nɩ ʋ nyɩwa‑ lä ‑Jläma 'nɩ ʋ panʋwa‑ sä wa 'kʋ lä bʋbɔ nä. 'Nɩ sʋ 'kä lä ‑zee waa' ‑za nʋ nä, ʋ cii‑ sɔɔ.

⁵ Wa plöö‑ bhä tɩtɩää' ‑lʋa mʋ bhlä 'ŋnu nä, waa' 'lɔlʋnyʋä. 'Nɩ 'lɔlʋnʋ 'mnö, ‑mɔɔ wa ‑gänö lä Klisö. Klisönɔ nä, kɔ ‑zi 'kʋ ‑lɩɩ 'fɩɩn 'mnö. 'Nɩ ɔ ‑yi 'nɩ ɔ plöö‑ 'sɩɩ Laagɔ, 'nɩ ɔ ‑kä 'nyupälɩ 'kɔɔkɔɔ ‑za. Ɩ kʋ sɔɔ!

⁶ Ɩɩ' ‑wʋ plöö‑ nynä ‑mä sä Laagɔ cii‑ bhlä nä, sɔɔ ‑läyɩɔ ‑glää. Kɩ ci lä nynä ‑mä nyɩkpaa' ‑lefɩɩn‑ ‑ghlää lä Yizlayɛɛ 'mnö nä, waa' ‑lefɩɩn‑ ‑wʋ 'Yizlɛnyʋa 'titi plöö‑.

⁷ 'Nɩ nyɩkpaa' 'fɩɩn‑ ‑ghlää lä Ablaamʋ 'mnö nä, wamä 'fɩɩn‑ ‑wʋ ɔɔ' 'yuë plöö‑. Kä Laagɔ ‑soo Ablaamʋ, ʋ lä Yizaköö' 'lɔlʋnyʋä, wamä wa 'kä lä ‑naa 'lɔlʋnyʋä laa.

⁸ Kɩ sä lä ‑zɔɔ nynä ‑mä, 'yua wa ‑gänö lä 'yɛkɛɛ 'mnö nä, wamää‑ ‑wʋ Laagɔɔ' 'yuë plöö‑. ‑Mä 'yua ‑wanö wälɩ Ʋ ‑soo lä Ablaamʋ nä, wamää‑ plöö‑ lä ʋʋ' 'lɔlʋnyʋä.

⁹ A ni wälɩklëa Laagɔ cii‑ bhlä nynä ‑mä ʋ yi nʋ nä. Kʋ cii‑ bhlä nynä ‑mä, 'solio, lionʋʋ' ‑säkä ‑säkä 'mnö nä, n yi bʋkʋ yi, ‑mä n kä ‑yi nä Salaa yi 'yuŋwadi bhɛɛ.

¹⁰ 'Nɩ ʋʋ' ‑wʋ 'sɩɩ ‑lɔɔ bhloo ‑mä ɩ ‑ŋëë ‑a natɔ Lebeka 'kʋ 'nɩ ɔ ‑yä ‑a tötɔ Yizakö 'sɔ ‑gään 'yuë 'sɔ.

¹¹ 'Nɩ sä ɔɔ' ‑lä bhlä tee 'yua ‑gään nä, 'yuënää' ‑lä bhä tee nyenyi ‑yä 'nää 'sɔ ‑nʋ. ‑Mä kɩ ‑nʋɔ lä sɔɔ ‑yä sä Laagɔ ylä lä nä, sɔɔ 'kä glää. Laagɔ nä, sʋ ‑waa lä nä, sɔɔ ʋ nʋ.

¹² Nyɩkpɔɔ' nʋnʋgbɩɩ 'mɩɩ‑ nʋɔ ‑wʋ ‑mä Laagɔ, ʋ laa lä nyɩkpɔ nä, ʋmʋʋ‑ cii‑ lä sɔɔ, ʋ lä 'yuo‑ ‑n 'gä lä tɛɛ gään nä, ɔɔ' bʋkʋ ‑lɔɔ 'mɔɔ‑ 'gɔ lä 'kämä.

¹³ Kɩ ‑jɩjlɔɔ lä Laagɔ‑bɔɔgʋʋ 'mnö nynä ‑mä, n ‑wamä Zakɔpʋ, 'nɩ n cɛɛ‑ Ezayu.

¹⁴ Sɩ sä bhä ‑zɔɔ? Kɩ plöö‑ bhä nynä ‑mä sä Laagɔɔ ‑nʋ lä nä, sɔɔ bhä 'yi gëë‑ ‑a? Yio! Sɔɔ ɩɩ' ‑wʋ ‑kʋ!

¹⁵ A ni Laagɔ ‑soo Moyizö ʋ lä Nyɩkpɔɔ' lɔɔ n ‑waa lä nynä ‑mä n yi ŋäzö yibhë nä, Ɔmɔ n yibhë lä ŋäzö. 'Nɩ nyɩkpɔɔ' lɔɔ n ‑waa lä nynä ‑mä n 'kä 'nää nʋ nä, Ɔmɔ n nʋ lä 'nää.

¹⁶ Nä nyɩkpɔɔ' sä ɔ ylä lä nä, ɩyä nʋnʋgbɩɩ ɔ nʋ lä nä, ɩmɩɩ‑ nʋ ‑wʋ sɔɔ ‑mä Laagɔɔ' ŋäzöplɛɛ' nʋnʋgbɩ‑ ‑kʋ lä ‑lɔɔ.

¹⁷ ‑Nɩnɩ 'mɩɩ‑ ‑jɩjlɔ lä ‑mɔɔ Laagɔ‑bɔɔgʋʋ 'mnö. Kä Laagɔ ‑soo 'loyo Falaɔɔ ʋ lä kä n wlʋä‑ä lä ‑yä n 'kä‑ä 'kʋ ghlää ‑yä n 'kä 'naa 'päwaa 'ylʋzɔkʋnyʋä pana ‑yä 'ylʋzɔɔ' dää 'fɩɩn, 'naa 'ŋnö 'kä mʋ.

¹⁸ Nä nyɩkpɔɔ' lɔɔ Laagɔ ‑waa lä nynä ʋ yi ŋäzö yibhë nä, ɔmɔ ʋ yibhë ŋäzö. 'Nɩ lɔɔ ʋ ‑waa lä nynä ‑mä ʋ yi 'nyukwli 'tɛmä nä, ʋ gbä 'nɩ ɔ 'tɛmä 'nyukwli.

¹⁹ ‑N yi'i soo nynä‑mä 'nɩ 'klü ‑saa 'kʋ Laagɔ yi‑anyɩ bhä bʋkʋ ‑kɔkwɩ bhoo? ‑Sä Laagɔ ylä lä nä, nyɩkpɔ ‑sä yi bhä 'sɔɔ 'kʋ bhlää?

²⁰ ‑Mɔɔ, ‑n plöö‑ bhä 'nɩ ‑n ‑yä Laagɔ 'sɔ yi bhä 'kʋ bhlää? Nʋnʋlʋʋ yi bhä ʋʋ' nʋnyɔ soo nynä ‑mä sɩ ‑kʋ bhä 'nɩ ‑n ‑nʋ'ʋ bhä sää ‑a?

²¹ Nyidü‑maŋnɔ 'mɔɔ 'kämä lä ɔɔ' mɛmɛ. Yio ‑a? Ɔ bhlü maakwëa ‑bhlo 'kʋ 'nɩ ɔ maa nyidüü' nününü. Ɔ maa nyidëë' ‑nänä 'nɩ a plöö‑ 'ŋnumʋ‑nyidë. 'Nɩ ɔ maa näna 'nɩ aa ‑wʋ gbaa ‑kä. Yio ‑a?

²² Nä Laagɔ nä, ʋ yi bhä 'ylʋzɔkʋnyʋä gbʋgblɛɛ wlɩɩ pään 'nɩ ʋ yiwa bhä ʋʋ' 'tɛtɩɩ 'kʋ fään ‑mä kʋ 'kuu‑ yɩ kpänyɩ 'mnö waa' ‑za.

²³ 'Nɩ nyɩkpaa' ‑lʋa ʋ ‑sä 'nɩ ʋ laa‑ lä ʋʋ' 'klʋagbaa 'mnö nä, ʋ ‑yibhënʋwa ŋäzö 'nɩ ʋ panʋwa‑ yɩ ʋʋ' 'klʋagba 'mnö leylüü.

²⁴ ‑Anyɩ, ‑anyɩ‑ plöö‑ lä ‑lɔɔ' nyɩkpaa ʋʋ' laa‑ lä nä. 'Zufʋnyʋä nëëdëë' nyɩkpa ‑bhlo 'coo ʋʋ' ‑wʋ laa ‑mä, ʋ laamʋ 'sɩɩ 'yigädabhlɩ 'mnö nyɩkpa.

²⁵ ‑Nɩnɩ 'mɩɩ‑ cio lä ‑mɔɔ 'plɔfɛtɩ Ozee 'bɔɔgʋʋ 'mnö nynä ‑mä, 'Bhlɩɩ lɛɛ‑ bhɔɔ lä 'na lɛɛ plöö‑ nä, N yie 'naa 'bhlɩ laa. 'Nɩ nyɩkpaa' ‑lʋa bhɔɔ lä 'naa ‑wawanyʋä plöö‑ nä, N yiwa 'naa ‑wawanyʋä laa.

²⁶ 'Nɩ dɩ cio‑ bhlä 'sää 'titi nynä ‑mä aa ‑wʋ 'naa nyɩkpa plöö‑ nä, ‑Lɔɔ' nyɩkpa wa yiwa ‑Yäyä ‑Laagɔɔ' 'yuë laa.

²⁷ 'Plɔfɛtɩ Ezayii cii‑ 'sɩɩ 'Yizlɛnyʋää' ‑za nynä ‑mä, sä 'Yizlɛnyʋä yi zumë ‑zumë ‑kaaa nynä ‑zägbö ‑gɔgä nä, waa' 'klëë‑ 'gä lä ‑lɔɔ nëë' ‑bha.

²⁸ Sä Kwlienyɔ Laagɔ cii‑ lä nä, ɔ yi sɔɔ nʋ wɩa ‑mää 'ylʋzɔɔ, ɔɔ' ‑läyɩɔ bʋä.

²⁹ ‑Nɩnɩ 'mɩ Ezayii cii‑ bhlä nynä ‑mä ‑ɩ yi a ŋëë. Ɔ cii‑ bhä ɔ lä Kwlienyɔɔ, ‑anyɩa Tëvë‑Laagɔ 'nö bhä 'lɔlʋ ‑të nä, kä ‑a 'gä bhlä kʋ nynä Sodɔmʋ‑dʋnyʋä ‑yä Gomɔɔ‑dunyʋä.

³⁰ Sa ‑a yi bhä ‑zi ci 'naa? Kɩ kʋ lä nynä ‑mä nyɩkpaa' lʋa ‑waa ‑wʋ lä 'Zufʋnyʋä plöö‑ 'nɩ ‑waa tään bhɔɔ lä Laagɔɔ' 'yigëgbɩɩ' nʋlɩ 'nɩ ‑wa yä ylä 'yigënyʋä 'plö nä. Pɔlötɛtɛɛ' 'yigëgbɩ lä.

³¹ ‑Bhlɛ 'Yizlɛnyʋä nä, tään bhä ‑jlämaa' laa ‑a yiwa bhlä Laagɔ dëlü 'yigënyʋää' plüë nä, ‑mä wa 'nöa ‑wʋ nii‑.

³² ‑Ɔnöza bhää? 'Yizlɛnyʋää' 'yigëëlɩɩ wa tään bhlä nä, waa' bhobho bhɔɔ nynä ‑mä pɔlötɛtɛɛ 'mnö ɩ ‑kʋ bhä. Kwa bhobho bhä nynä nʋnʋgbɩɩ 'mnö wa 'kä bhä 'yigënyʋä 'plöö. Kwa ‑gozo lä cɛkʋʋ' ‑lʋʋ bhɛlɩɔ‑ lä 'klʋ nä.

³³ Ɩ ‑jɩjlɔɔ Laagɔ‑bɔɔgʋʋ 'mnö nynä ‑mä, A ni 'yi ‑a! Kä n ŋʋ lä Siyɔɔduu' cɛkʋ. Cɛkʋʋ' lʋʋ nyɩkpa yi lä 'kʋ dɛlɩɔ nä. ‑Lɔɔ cɛkʋʋ nä, ʋ yi nyɩkpa sä pään. Nyɩkpɔ kä ʋʋ' pɔlötɛtɛ ‑kä nä, Plɛ 'nöɔ ‑lä 'kpɔsɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan