Bìoball air-loidhne

Wlɔmʋ‑dunyʋä 8 - GOD - u2

Laagɔɔ' 'Wugɔɔ 'mnö nämnölɩ
( Gala 3.13‑14 ; 5.16‑25 )

¹ Nä ‑pɛpɛɛ nä, ‑wa ‑kʋ lä Zozi Klisö 'mnö nä, waa' yɩɔ Laagɔ dëlü gbäylɩ‑sälɩɩ' dlu ‑kä.

² A ni 'yi naa, Kplɔɔkplɔɔ‑wugɔɔ ‑ʋ nyɛ lä 'pʋpʋɛɛ Zozi Klisö 'mnö nä, ʋ yä'ä nyenyii ‑yä 'kwiee ‑jlämaa nëë' ‑sä.

³ ‑Nɩnɩ nä, Moyizöö' ‑Jlämaa' ‑lä bhɔɔ ɩɩ' nʋlɩ mii‑. ‑Ɔnöza bhä? 'Yɛkɛɛ' bhɔɔ 'cʋcʋ ‑kä nä, ɛɛ' minöa bhɔɔ. ‑Mä Laagɔ mii‑ 'nɩ ʋ ‑nʋɩ. Ʋ ‑lobho ʋ ‑Yowli 'nɩ ɔ ‑yii 'yɛkɛɛ 'mnö nynä nyenyinyɔ ɩyä ɔ 'kä nyenyinyʋa ‑lɔɔ nëë' ‑sä. Kɩ plöö‑ ylä nynä ‑mä Laagɔ ‑yä 'ylʋzɔkʋnyʋää' nyenyii sɩä.

⁴ Kʋ ‑nʋ lä sɔɔ ‑yä ‑a 'gä mii ‑a 'gä sä ‑Jlämaa ylä lä nä nëë' bhɩä. Ɩ ‑kä 'ŋnö nä, nyɩkpasä bhobholɩɩ 'mɩ ‑ɩɩ 'tienö‑anyɩ yɩɔ ‑mä Kplɔɔkplɔɔ‑wugɔɔ 'mʋʋ‑ 'tienö‑anyɩ ylä.

⁵ A ni 'yi naa, nyɩkpaa' ‑lʋa ‑wa nää lä sä waa' bhobhowluu sonʋwa lä nä, ‑lʋʋ wa ‑waa lä nä, ʋmʋ wa nʋ lä. ‑Mä nyɩkpaa' ‑lʋa Kplɔɔkplɔɔ‑wugɔɔ 'tie lä nä, sä 'Wugɔɔ ylä lä nä, sɔɔ wa nää.

⁶ 'Yɛkɛɛ nʋnʋsaa nä, kä sɔɔ fään 'kwie 'yii, ‑mä Kplɔɔkplɔɔ‑wugɔɔ kʋ bhɛɛ‑ 'pʋpʋɛ ‑yä 'kʋ wɔtɔlɩ.

⁷ Kä 'yɛkɛɛ nʋnʋsaa fä Laagɔ zɔgblö. 'Yɛkɛɛ 'ŋʋ ‑wʋ Laagɔɔ' ‑Jlämaa 'klʋkpää, 'nɩ ɛɛ' minöa ‑wʋ 'sɩɩ.

⁸ Nyɩkpaa' ‑lʋa 'yɛkɛɛ nʋnʋsaa gbii‑ lä 'wlu nä, ‑waa' ‑lä Laagɔ ‑gä namä.

⁹ ‑Mä anyɩ nä, sa ‑kä ylä Laagɔɔ' 'Wugɔɔ nä, 'yɛkɛɛ 'mɛɛ‑ 'tienö'anyɩ yɩɔ ‑mä Kplɔɔkplɔɔ‑wugɔɔ 'mʋʋ 'tienö'anyɩ ylä. Nyɩkpɔ 'nö Klisöö' 'Wugɔɔ ‑kä nä, ɔɔ' ‑wʋ Klisöö' lɔɔ plöö‑.

¹⁰ 'Nɩ Klisö ka'anyɩ 'mnö ‑kʋ nä, 'zaazɩ, 'yɛkɛɛ plöö‑ 'flɛ 'kwiee lɛɛ nyenyii' ‑za, ‑mä sa plöö‑ ylä 'yigënyʋä nä, Kplɔɔkplɔɔ‑wugɔɔ yi'anyɩ 'pʋpʋɛ 'nyɛ.

¹¹ Ɩ ‑kä yɩ 'ŋnö nä, Laagɔɔ ‑ʋ ‑gälɩä lä Zozii 'kuëë nä, ʋʋ' 'Wugɔɔ ka'anyɩ 'mnö ‑kʋ nä, sä ʋ ‑gälɩä lä Zozi Klisö 'kuëë nä, ʋ yi 'sɩɩ gbä 'nɩ anyɩa' 'kukuyɛkɛɛ yi 'pʋpʋɛ.

¹² Bhelie ‑yä bhɛŋwnɩänyɩ‑, kɩ plöö‑ ylä nynä ‑mä ‑a ‑kä dlu. ‑Mä ‑anyɩa 'yɛkɛɛ' dluu‑ ‑aa ‑wʋ ‑kä 'nɩ sɛ ‑waa lä nä, ‑a 'gä ‑lätee sɔɔ nää.

¹³ Sä 'yɛkɛɛ ‑waa lä nä, sɔɔ a kä ‑lätee nää nä, a yii 'kwiee 'nii. ‑Mä sä Kplɔɔkplɔɔ‑wugɔɔ ylä lä nä, sɔɔ a kä nää nä, a yi 'yɛkɛɛ' nʋnʋgbɩɩ 'bhlä, 'nɩ a yi 'pʋpʋɛ 'ni.

¹⁴ A ni 'yi naa, nyɩkpaa 'fɩɩn Laagɔɔ' 'Wugɔɔ 'tie lä nä, wa ‑glö Laagɔɔ' 'yuë.

¹⁵ 'Nɩ 'Wugɔɔ a ‑kä lä nä, ʋʋ' plüënö'anyɩ ‑wʋ geyuëë' 'nɩ ‑ŋänö 'kanyɩ 'kɔɔkɔ pleyii kʋ ‑mä kʋ gbä 'nɩ a plöö‑ yɩ Laagɔɔ' 'yuë. Ʋmʋʋ‑ gbä 'nɩ ‑a gä lä Laagɔ laa 'nɩ ‑a ci lä nynä ‑mä, Aba! ‑A 'Bä!

¹⁶ Kplɔɔkplɔɔ‑wugɔɔ 'titi, ʋ lü ‑dläfʋɛ 'nɩ ʋ soo ‑anyɩa 'wugɔɔ nynä ‑mä, ‑a ‑glö Laagɔɔ' 'yuë.

¹⁷ Nä sä ‑a plöö‑ lä Laagɔɔ' yuë nä, ‑a ‑glö 'sɩɩ ʋʋ' jaa‑lünyʋä. ‑A ‑yä Klisö 'sɔ yi Laagɔɔ' jaa 'kʋ lüü. ‑Ɔnöza bhää? Sä ‑a 'nimʋ lä Klisöö' 'kwlɩkabhɩa nä, kɩ plöö‑ lä nynä ‑mä ‑a yi 'sɩɩ ɔɔ' 'klʋagba 'mnö kʋmʋ.

'Klʋagbaa yi ‑mɔɔ 'yikʋ
( Zään 10.27‑30 )

¹⁸ 'Tänyɩnɛ 'mnö 'kwlɩkabhɩa ‑a ni lä nä, a ‑ya nyäkanöa yɩ ‑laa 'klʋagbaa‑ Laagɔ 'ka‑anyɩ lä 'nyɛ nä 'kʋ.

¹⁹ ‑Ɔnöza bhää? Laagɔɔ' 'yuaa' 'klʋagbaa' pana ylʋʋ nä, ʋmʋ 'kɔɔnʋ ‑bɛɛ lä 'nɩ pleyii 'kpɛtɩʋ lä.

²⁰ 'Päwaa' laa‑ ‑wʋ lä gba ‑kä nä, amää‑ ŋʋʋ‑ lä 'kɔɔnʋ geylüü'. 'Nɩ 'kɔɔn 'titii‑ ‑wʋ ‑lɔɔ' geylüü ylää‑ ‑mä ‑ɔ pɩänʋ lä 'kʋ nä, ɔmɔɔ‑ cii‑ lä nynä ‑mä ɩ kʋ sɔɔ nä, 'ɩɩ ‑zä ɩ ‑kʋ lä sɔɔ. 'Nɩ ɩ kʋ yɩ 'flɛ sɔɔ ‑mä, 'kɔɔnʋ ‑känɩ plɛkʋ nynä ‑mä,

²¹ geylüü ʋ ‑kʋ lä 'mnö 'nɩ ʋ bhusu lä nä, ʋ yii 'mnö ‑bha 'nɩ ʋ yi Laagɔɔ' 'yuaa 'kʋ wɔtɔlɩɩ ‑yä waa' 'klʋagbaa 'mnö plämʋ.

²² ‑A ‑yi sɔɔ nynä ‑mä 'kɔɔn 'mnö ‑lɩɩ 'fɩɩn Laagɔ ‑nʋ lä nä, kɩ zlʋ ylä 'tänyɩnɛ 'mnö. Ɩ ‑kʋ yɩ gälʋʋ' 'kwlɩkabhɩa 'mnö.

²³ 'Nɩ ‑ɛɛ ‑wʋ 'kɔɔn ‑bhlo ‑mä ‑anyɩ ‑mä 'sɩɩ, ‑anyɩmɔɔ‑ nii‑ lä Kplɔɔkplɔɔ‑wugɔɔ' tɛɛtɛɛlɩɩ 'ni nä, ka ‑a zlʋ lä ‑mɔɔ ‑anyɩa pɔlöö 'yii, 'nɩ ‑a ‑bɛɛ lä ‑yä ‑a 'gä 'mʋ kplɩɔ ‑yä ‑a 'gä Laagɔɔ' 'yuë 'plö 'fɩɔ 'fɩɔ.

²⁴ ‑Ɛɛɛ, kɩ ‑kʋ ylä nynä ‑mä ‑a yä ‑lɔɔ nëë' ‑bha 'nɩ ‑a ‑bɛɛ ylä Laagɔ. ‑Mä ‑lʋʋ ‑a 'tɛɛ‑ lä dë nä, ‑a niu ylä 'sɩɩ 'yi wɩa nä, ɩɩ' ‑läyɩɔ 'plö nynä ‑mä kä ‑a 'tɛnʋ dë. ‑A niu ‑kɛ ‑pɛɛ 'yi nä, sɩ yi bhä bʋkʋ 'plö nynä ‑mä kä ‑a 'tɛnʋ dëë?

²⁵ ‑Mä ‑a gä lʋʋ dë 'tɛɛ 'nɩ ‑a 'nʋʋ ‑wʋ lä 'yi nä, ka ‑a 'tɛmä lä plɛkʋ 'nɩ ‑a bɛɛnʋ.

²⁶ Bʋkʋ 'nɩ Kplɔɔkplɔɔ‑wugɔɔ yi 'nɩ ʋ klänö‑anyɩ sa ‑aa ‑wʋ lä ‑cʋcʋ ‑kä nä. ‑Ɔnöza bhä? ‑Aa ‑wʋ 'nägäsä bhibhiesä ‑yi ‑mä Kplɔɔkplɔɔ‑wugɔɔ bhibhie ‑anyɩa ‑za. Ciciwälɩɩ' lɩɩ nyɩkpɔɔ' ‑lä lä cilɩ mii nä, ʋ zlʋnɩ 'mʋ 'nɩ ʋ zözlää Laagɔ dëlü ‑anyɩa ‑za.

²⁷ ‑Mä Laagɔɔ‑ ni lä ‑mɔɔ ‑anyɩa pleyii 'yi nä, ʋ ‑yi sä 'Wugɔɔ zözlä lä nä. Sä Laagɔ ‑waa lä nä, sɔɔ ʋʋ' 'Wugɔɔ ‑zla lä ʋʋ' kplɔɔkplɔɔ‑yuaa' ‑za.

²⁸ 'Nɩ ‑a ‑yi 'sɩɩ sɔɔ nynä ‑mä, sä wälɩ 'nëyi kʋmɔ ‑kʋmɔ ‑kaa nä, kä Laagɔ gbä 'nɩ nyɩkpaa' ‑lʋa ‑wa ‑wʋʋ lä nä, wa 'ninɩ 'nää 'mnö. 'Wugɔɔ 'mnö nä, kä Laagɔ ŋʋwa‑ waa' dä.

²⁹ A ni 'yi naa, nyɩkpaa' ‑lʋa Laagɔ yä bhɛ lä ‑sä nä, kʋ ŋʋʋ‑ nynä ‑mä wa yi ʋ ‑Yowli 'bhisäkʋ kʋ. Ɩyä ʋ ‑Yowli 'kä ʋʋ' 'yuë ‑gbʋgbʋzɛɛ' tɛɛtɛɛyu 'plö.

³⁰ Nyɩkpaa' ‑lʋa Laagɔ yä bhlä ‑sä nä, ʋ yiwa 'sɩɩ gbʋʋ' ‑sä. 'Nɩ ‑lʋa ʋ ‑sä lä gbʋʋ' nä, ʋ nyɩwa‑ 'sɩɩ 'klʋagba.

³¹ Sä n yi bhä bʋkʋ cii? 'Nɩ Laagɔ kä ‑anyɩa pɛlʋʋ ‑kʋʋ nä, ‑ɔ yi‑anyɩ bhä zɔbhlɛmä?

³² Ʋ ‑Yowli 'titi ʋ 'nöɔ ‑wʋ 'kʋ ‑bhlää ‑mä kʋ ‑sɔɔ ‑anyɩ 'fɩɩn ‑anyɩa 'wluu, nä sɩ yi bhä kʋ 'nɩ ʋʋ' ‑lä bhä ʋ ‑Yowlio 'kʋ ghlää ‑yä ʋ 'ka‑anyɩ ‑lɩɩ 'fɩɩn 'nyɛɛ?

³³ Laagɔɔ' 'yua ʋ ‑sä 'nɩ ʋ ‑gboguë‑ lä nä, ‑ɔ yiwa bhä gbʋ klaa 'a? Kä Laagɔ sʋwa gbʋʋ!

³⁴ ‑Ɔ yiwa bhä gbʋ klaa? Zozi Klisö kuu‑ 'nɩ ɔ ‑glɔɔ 'sɩɩ 'kuëë 'nɩ ɔ ‑kʋ Laagɔɔ' lüüklä 'kʋ 'nɩ ɔ zözlä anyɩa ‑za!

³⁵ Nä, ‑ɔ yi bhä gbä 'nɩ ‑wawʋʋ Klisö ‑kä lä ‑anyɩa ‑za nä, ‑a yiu bhä gwë ‑sää? 'Kwlɩkaabhɩä bhä ‑a? Plɛɛ' beliolɩ bhä ‑a? Sä nyɩkpa klä‑anyɩ nyenyisä nä, ɩɩ' ‑za bhä ‑a? ‑Gbugbee' ‑za bhä ‑a? ‑Mä ŋäzöö' ‑za bhä ‑a? ‑A ‑mie nä, ɩɩ' ‑za bhä ‑a? ‑Mä 'kwiee ‑vluu 'kʋ ‑a ‑kʋ nä, ɩɩ' ‑za bhä ‑a?

³⁶ Kɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nynä ‑mä, ‑Naa ‑zä wa bhlä‑anyɩ lä ylɩɩ 'fɩɩn 'kʋ! Wa kla‑anyɩ nynä 'bhabhlö lɩɩ wa fä 'bhlä 'kää nä!

³⁷ ‑Mä ‑nɩnɩ 'fɩɩn 'mnö nä, ‑a ghlää ‑mɔɔ 'nɩ ‑ɔ ‑wamänö‑anyɩ lä nä ɔ gbä 'nɩ ‑a sɩwa sää 'titi.

³⁸ ‑Ɛɛɛ! N ‑känɩ plɛkʋ nynä ‑mä, 'kwie ‑o, zëkpë ‑o, ‑Laagɔzizi ‑o, ‑zizinyenyi ‑o, ‑pɛpɛɛ' ‑o, ‑zee ‑o, 'päwö‑kälɩɩ ‑o,

³⁹ 'wlu tlʋnɔlɩɩ 'tɛtɩ ‑o, 'mʋ tlʋnɔlɩɩ 'tɛtɩ ‑o, ɩyä nʋnʋlʋʋ' 'cënänä ‑o. Lʋʋ ‑wʋ ‑kʋ 'nɩ ʋ ka'anyɩ Laagɔɔ' ‑wawʋʋ gwë ‑sä. Laagɔɔ' ‑wawʋnʋ nä, Zozi Klisö, anyɩa Kwlienyɔɔ, ɔmɔ 'mnö ʋ ‑ghlää 'nɩ ʋ ‑kʋ lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan