Bìoball air-loidhne

Wlɔmʋ‑dunyʋä 7 - GOD - u2

'Cɔcɩnyʋa yä ‑Jlämaa' geylüü 'mnö ‑bha
( Efɛ 5.25‑31 ; Gala 2.19 , 20 )

¹ Bhelie ‑yä bhɛŋwnɩänyɩ‑, a ‑yi ylä ‑jlämaa nä, 'klüü n 'kanyɩ lä soo nä a ‑yii. A ‑yi sɔɔ nynä ‑mä ‑jlämä nä, 'tänyɩɛ 'fɩɩn 'mnö nyɩkpɔ ‑kʋ lä zëkpë 'kʋ nä, ka 'kämänöɔ.

² Kɩ ‑kʋ lä nynä ‑mä sä 'ŋnɔɔ wlunö‑zëkpëë' wälɩ ‑kʋ lä nä. 'Tänyɩɩ' ɔ ‑nyoto ‑kʋ lä ‑lätee zëkpë 'kʋ nä, kä ‑jlämaa ci lä nynä ‑mä ɔ ‑kä 'nɩ ɔ ‑yä ɔ ‑nyoto 'sɔ 'kä 'kɔɔkɔ 'kʋ kʋʋ. ‑Mä kɔ ‑nyoto kä kuu‑ nä, wlunö‑jlämaa' 'kämänöɔ yɩɔ.

³ ‑Mä 'tänyɩɩ ɔ ‑nyoto ‑yä lä ‑lätee nä, ɔ kä 'yigädawli nöö ‑kää ‑mʋ nä, ɔ yä 'wlie 'ylä. 'Ɩɩ ‑zä kä ɔ ‑nyoto kä 'fɩa kuu‑ nä, ɔɔ' yɩɔ wlunö‑jlämaa' dlu ‑kä. Ɔ kä 'yigädawli nöö‑ nä, ɔɔ' ‑wʋ 'wlie ylää‑.

⁴ 'Naa bhelie ‑yä 'naa bhɛŋwnɩänyɩ‑, anyɩmä 'sɩɩ, a ‑yä Klisö 'sɔ yä ɔɔ' 'kwie 'mnö 'jɛnyɩ 'nɩ Moyizöö' ‑Jlämaa' 'pɛlʋʋ nä, a yä 'ku. Klisö ‑ɔ ‑glɔɔ lä 'kuëë nä, a ‑glö yɩ ɔɔ' lʋä ‑yä, ‑a 'gä Laagɔ ‑gä nʋ.

⁵ 'Tänyɩ ‑anyɩa 'yɛkɛɛ 'tienö‑anyɩ bhlä nä, kɛ kpelio bhä ‑Jlämaa 'kʋ 'nɩ ‑a nʋ bhä gbenyenyii 'fɩɩn ‑a waa' bhlä nä. ‑Mä ‑lɔɔ' ‑lɩɩ 'fɩɩn 'wlusäädä plöö‑ bhlä 'kwiee.

⁶ ‑Mä ‑pɛpɛɛ nä, 'klüü 'fɩɩn ‑ɩ 'tienö‑anyɩ bhlä nä, ‑a yä yɩ ‑Jlämaa nëë' ‑bha. Kplɔɔkplɔɔ‑wugɔɔ' zëkpü ‑lëlë 'mnö ‑a ‑kʋ ylä. ‑Jlämaa' ‑laa wa ‑jɩjlä bhlä 'bɔɔgʋʋ 'nɩ ‑a yä bhlä 'kʋ bhɩä nä, amää‑ 'tienö‑anyɩ yɩɔ.

‑Jlämaa' gbaa

⁷ Sɩ sä bhä ‑zɔɔ? Kɩ plöö‑ bhä nynä ‑mä ‑Jlämaa ‑glö nyenyi ‑a? Yio! Sɔɔ ɩɩ' ‑wʋ ‑kʋ! ‑Mä kä n ci lä nynä ‑mä ‑Jlämaa nä, amää‑ gbä 'nɩ n yibhë lä nyenyi. ‑Jlämaa 'nö bhä cii‑ nynä ‑mä, ‑n ‑liee' lʋʋ 'nä zɛlɩänö‑ö ‑lä 'yii nä, nn' ‑lä bhɔɔ sɔɔ yibhë nynä n ‑liee' lʋʋ kä'ä 'yii zɛlɩä nä ɩ ‑glö nyenyi.

⁸ Nä ‑Jlämaa yi gbä 'nɩ 'yi zɛlɩälɩɩ' nyenyi yi 'naa zëkpëa 'mnö zumë. Kɩ ‑kʋ ylä nynä ‑mä, ‑jlämä 'nö ‑kʋ nä, nyenyi yä bhɩä.

⁹ ‑Amʋ nä, tɛɛtɛɛ, ‑Jlämää' bhɔɔ ‑kʋ 'nɩ n ‑kʋ bhlä. ‑Mä ‑Jlämaa ‑yi ylä nä, kä nyenyi ‑yi yɩ zëkpë 'kʋ

¹⁰ 'nɩ ‑amʋ n yi yɩ 'ku. 'Nɩ ‑Jlämaa' laa ‑a 'gä bhlä gbä ‑yä n 'kä zëkpë 'ni nä, ‑a fänö'ö yɩ 'kwie 'yii.

¹¹ Kɩ ‑kʋ ylä nynä ‑mä nyenyii nä, kɩ ‑ghlää yɩ ‑Jlämaa 'mnö 'nɩ ɩ yi'i 'nyigë. 'Nɩ ‑lɔɔ' 'klüü yi'i ylä 'kwie 'yi fään.

¹² Naa, kä ‑Jläma ‑kplɔɔ 'nɩ aa 'kämälɩ ‑kplɔɔ 'sɩɩ, 'nɩ ɩɩ' nää‑ 'nɩ ɩ gëë 'yi.

¹³ Nä kɩ plöö‑ bhä nynä ‑mä 'klüü ‑lɩɩ ‑ɩ nää‑ bhlä nä, kɩ ‑ghlää yɩ 'naa 'kwie ‑a? Yio! Sɔɔ ɩɩ' ‑wʋ ‑kʋ! Mä kɩ ‑kʋ lä nynä 'klüü‑ nää‑ bhlä nä, kä nyenyii ‑ghlänɩ 'mnö 'nɩ ɩ yi'i 'bhlä. Nä nyenyii nä, kɩ ‑ghlää ylä ‑Jlämaa 'mnö 'nɩ ɩ panö‑anyɩ ylä nynä kɩ ‑nyu kpänyɩ.

¹⁴ ‑Ɛɛɛ, ‑a ‑yi sɔɔ nynä ‑mä ‑Jlämaa nä, Laagɔ yëku a bha, ‑mä ‑amʋ sä nn' ‑wʋ 'tɛtɩ ‑kä nä, kä n ‑kʋ ylä nynä nyenyii' geyu.

¹⁵ 'Nɩ 'zaazɩ nä, 'klüü n nʋ lä nä, nn' 'nui ‑wʋ 'mʋ. Sä n ‑waa lä nynä ‑mä n 'kä nʋ nä, nn' nʋ ‑wʋ sɔɔ, ‑mä sä n ‑zɔɔ lä nä, sɔɔ n nʋ.

¹⁶ Nä sä nn' ‑wʋ lä ‑waa nä, n kä sɔɔ nʋ nä, kä n ‑yä ‑Jlämaa 'sɔ plöö‑ lä 'nɩ n ci lä nynä ‑mä ka nää‑.

¹⁷ Nä, kɩ plöö‑ lä nynä ‑mä ‑amʋ 'titii‑ nʋ yɩɔ sɔɔ ‑mä, nyenyii‑ ‑kʋ lä 'naa 'yɛkɛɛ 'mnö nä, ɩmɩɩ‑ nʋ lä sɔɔ.

¹⁸ ‑Ɔnöza bhää? N ‑yi yɩ sɔɔ nynä ‑mä 'naa 'mnöö nää' ‑wʋ ‑mɔɔ ‑kʋ. Nyɩkpasä n sää n ci lä. N ‑waa bhɛ 'flɛ nynä ‑mä n 'kä 'nää nʋ ‑mä, nn' mii‑ wʋ.

¹⁹ ‑Ɔnöza bhää? 'Nää n ylä lä nynä n 'kä nʋ nä, nn' nʋa ‑wʋ, 'nɩ nyenyii nn' 'ylä ‑wʋ lä nä, ɩmɩ n nʋ.

²⁰ Nä, sä nn' 'ylä ‑wʋ lä nä, sɔɔ n kä nʋ nä, kɩ plöö‑ ylä nynä ‑mä ‑amʋ 'titii‑ nʋ yɩɔ sɔɔ ‑mä, nyenyii ‑ɩ ‑kʋ'ʋ lä 'yɛkɛɛ nä, ɩmɩɩ‑ nʋ lä sɔɔ.

²¹ N ylä bhä nynä ‑mä n 'kä 'nää nʋ ‑mä, n mʋ ylä bɩä ‑kää nä, ‑jlämä ‑kʋ yɩ ‑lɔɔ. Amää‑ plöö‑ lä nynä ‑mä, gbenyenyii 'mɩ n mii 'nɩ n nʋ.

²² Ɛɛɛ, ‑mɔɔ 'naa plɛɛ 'yii nä, n ‑waa Laagɔɔ' ‑Jlämaa kpänyɩ,

²³ ‑mä ‑mɔɔ 'naa 'yɛkɛɛ 'mnö nä, ‑jlämaa' 'yigädala ‑kʋ ‑mɔɔ 'nɩ, ‑jlämaa' laa 'naa 'wugɔɔ ‑waa lä nä a ‑yasɔ bhlää 'kʋ. 'Nɩ nyenyii' ‑jlämaa‑ ‑kʋ lä 'naa 'yɛkɛɛ 'mnö nä, a gbä yɩ 'nɩ n plöö‑ yɩ nyenyii' geyu.

²⁴ 'Wee! N ‑yä mie! Kunʋʋ‑ fänö'ö lä 'kwiee 'yi nä, ‑ɔ yi'i 'mʋʋ bhä 'mʋ ‑sää?

²⁵ ‑Anyɩa Kwlienyɔɔ Zozi Klisö nä, n ghlänöɔ 'kʋ 'nɩ n fään yɩ Laagɔ 'ŋnu! Kɩ ‑kʋ ylä nynä ‑mä ‑mɔɔ 'naa pleyii nä, n ‑glö Laagɔɔ' ‑Jlämaa' geyu. ‑Mä 'yɛkɛɛ 'mnö nä, n ‑glö nyenyii' ‑jlämaa' geyu.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan