Bìoball air-loidhne

Wlɔmʋ‑dunyʋä 6 - GOD - u2

Laagɔɔ' plɛkʋmɛnɔɔ kʋ sä nyenyii' geylüü'
( Kolɔ 3.1‑10 )

¹ Nä sä ‑a yii bhä cii? Kɩ plöö‑ bhä nynä ‑mä ‑a yi 'kɔɔkɔ ‑anyɩa nyenyii 'mnö kʋ 'nɩ Laagɔɔ' plɛkʋmɛnɔɔ yi 'kʋ 'mɩä ‑a?

² Yio, ɩɩ' ‑wʋ sɔɔ ‑kʋ! ‑A yä wɛzä 'ku nyenyii' 'pɛlʋʋ 'mnö, nä sɩ ‑kʋ bhä ‑lɔɔ 'nɩ ‑a yi bhä ‑lätee nyenyii 'mnö kʋʋ?

³ Aa' bhä sɔɔ ‑yi nynä ‑mä ‑anyɩmɔ 'fɩɩn‑ ŋʋʋ‑ lä 'nyu 'wlu Zozi Klisö 'mnö nä, 'nyuu 'wlu‑ŋʋlɩɩ 'mnö kä ‑a ‑yɔsɔ 'jɛnyɩ‑ ɔɔ' 'kwie 'mnö ‑a?

⁴ 'Nyuu 'wlu‑ŋʋlɩnɩ 'mnö nä, kɩ ‑kʋ ylä nynä ‑mä ‑a ‑yɔsɔ yä ɔɔ' 'kwie 'mnö 'kʋ mnɔɔ. ‑Mä sä ‑A 'Bä Laagɔɔ' 'päwaa' 'klʋagba yä lä gbä 'nɩ Klisö yä lä 'kuëë glɔɔ nä, ‑anyɩ ‑mä 'sɩɩ, ‑anyɩa zëkpëa 'mnö, ‑a ‑ya nää yɩ nynä nyɩkpa ‑loluë.

⁵ Sä Zozi Klisö 'kwie 'mnö ‑a ‑yɔsɔ yä lä ‑bhlo 'plö nä, ɔɔ' 'kuëë glɔɔlɩɩ 'mnö ‑a ‑yɔsɔ yi 'sɩɩ ‑bhlo 'plö.

⁶ ‑A ‑yi sɔɔ nynä ‑mä ‑anyɩa tɛɛtɛɛ' zëkpëa nä, a yä yɩ 'kusuu 'yi bhuo a ‑yä Klisö 'sɔ. Nä, ‑anyɩa nyenyi‑yɛkɛnɛ 'kä 'ku ‑yä ‑aa kä yɩ bʋkʋ nyenyii' geylüü' kʋ.

⁷ ‑Ɔnöza bhää? Nyɩkpɔ kä yɩ kuu‑ nä, ɔɔ' yɩɔ nyenyii' dlu ‑kä.

⁸ Nä, ‑a ‑yä Klisö 'sɔ kä yɩ däbhloo' 'kuu nä, ‑a 'tɛnɩ 'sɩɩ dë nynä ‑mä ‑a ‑yɔsɔ yi zëkpë 'kʋ yi.

⁹ 'Nɩ ‑a ‑yi 'sɩɩ sɔɔ nynä ‑mä Klisöɔ ‑ɔ yä lä 'kuëë glɔɔ nä, ɔɔ' ‑läyɩɔ bʋkʋ 'ku. 'Kwie 'nöɔ yɩɔ 'pawä 'kʋ ‑kään.

¹⁰ Ɔ kuu‑ lä nä, kɔ kuu‑ ylä nyenyii' ‑za 'fɩɔ 'fɩɔ. Ɔ ‑yä lä nä, Laagɔɔ' ‑zä ɔ ‑kʋ ylä.

¹¹ Nä, anyɩ ‑mä 'sɩɩ, a wloo yɩ a yëku nynä ‑mä ka kuu‑ 'nɩ a ‑sä yɩ anyɩa nyenyii gwë. 'Nɩ Zozi Klisö 'mnö a ‑kʋ yɩ ‑lɔɔ Laagɔ ‑bhlo 'coo ‑za.

¹² Nä anyɩa' 'kukuyɛkɛnɛ nä, nyenyii' känɩɛ ‑läyɩɔ 'päwä 'kʋ, 'nɩ sɛ ‑waa lä nä, ɛ 'kanyɩ sɔɔ 'tie!

¹³ Anyɩa' 'yɛkɛɛ nä, aa' cienɩɛ ‑läyɩɔ nyenyi 'nɩ ɛ 'kä yɩ kʋ nynä ‑mä gbenyenyii' ‑zä ɛ ‑kʋ ‑lɔɔ. Laagɔ 'mʋ a la cie yɩ a yëku. Ɩ kʋ nynä ‑mä sä ka kuu‑ bhlä 'nɩ a yä lä bʋkʋ zëkpëkʋ yi nä. A 'nyɛ yɩ anyɩa 'yɛkɛɛ Laagɔ wlɩɩ' nynä ‑mä kɛ ‑kʋ ylä ‑lɔɔ ‑yä ɛ 'kä 'yigëgbɩ nʋ.

¹⁴ Nyenyi nö'anyɩ ‑läyɩɔ 'päwä 'kʋ känö. ‑Ɔnoza bhää? ‑Jlämaa 'mää‑ 'tienö'anyɩ yɩɔ ‑mä Laagɔɔ' plɛkʋmɛnɔɔ 'mnö a ‑kʋ ylä.

‑A ‑bha gbenyenyii 'mnö ‑yä ‑a nʋ Laagɔ ‑gä

¹⁵ Nä sɩ ‑kʋ bhä ‑pɛɛ? Kɩ plöö‑ bhä nynä ‑mä, sä ‑Jlämaa 'mää‑ 'tienö‑anyɩ yɩɔ lä nä, 'nɩ ‑a ‑kʋ ylä Laagɔɔ' plɛkʋmɛnɔɔ' 'mnö nä, ka ‑a 'gä yɩ 'kɔɔkɔ nyenyi nʋ ‑a? Yio! Sɔɔ ɩɩ' ‑wʋ ‑kʋ!

¹⁶ Aa bhä sɔɔ ‑yi nynä ‑mä a kä nyɩkpɔ ‑gä nʋ nynä geyu nä, ka plöö‑ 'zaazɩ ‑lɔɔ' nyɩkpɔɔ' geyu ‑a? Nyenyii' geyu‑ a kä plöö‑ nä, ɩ yi'anyɩ 'kwie 'yii fään. 'Ɩzä Laagɔ‑ a kä 'klʋkpää 'ŋʋ nä, a yi 'yigëënyʋä 'plö.

¹⁷ ‑Mä Laagɔ ‑aŋukwä! Tɛɛtɛɛ nä, nyenyii' geyuë a plöö‑ bhlä, ‑mä ‑pɛpɛɛ nä, cɩalɩɩ 'fɩɩn a cɩä‑ lä nä, ka 'bhlünɩ‑ 'nägäsä anyɩa pɔlöö 'yi 'kʋ.

¹⁸ A yä yɩ nyenyii' geylüü 'mnö ‑bha. ‑Pɛpɛɛ nä, a ‑glö yɩ 'yigëgbɩɩ' geyuë.

¹⁹ N kä 'sää ci nä, a kä'ä mʋ 'nu ɩɩ' ‑zä n sää lä 'sɔɔ 'mʋ. A cie bhlä a yëku plʋplälɩɩ ‑yä ‑käpä ‑käpaa, 'nɩ a plöö‑ bhlä ɩɩ' geyuë nä, ɩmɩɩ‑ ‑kä 'ŋnö 'nɩ a cɩcɩɔ bhlä Laagɔ 'yi. ‑Pɛpɛɛ nä, a cie yɩ a yëku 'yigëgbɩɩ ‑yä a 'plö yɩ ɩɩ' geyuë ‑yä anyɩa' kʋkʋsaa 'kä kplɔɔ.

²⁰ 'Tänyɩ a ‑kʋ bhlä ‑lätee nyenyii' geylüü' nä, aa 'mänyɩ bhɔɔ nynä a 'kä 'yigëgbɩ nʋ.

²¹ 'Nämʋ a nää bhlä nä, a 'ninʋ bhä 'mʋʋ? Kɩ ‑ka'anyɩ ylä zoo 'kʋ ‑pɛɛ. Gbɩɩ 'fɩɩn a nʋ bhlä nä, ɩɩ' 'wlusäädä plöö‑ bhlä 'kwie.

²² ‑Mä ‑pɛpɛɛ dä aa yɩɔ lä nyenyii' geyuë plöö‑ 'nɩ a yä ylä Laagɔɔ' geyuë 'plö nä, a nʋ yɩ gbɩɩ' lɩɩ Laagɔ ‑waa lä nä, ‑mä ɩɩ' ‑lefɩɩn 'wlusäädä plöö‑ lä 'pʋpʋɛɛ‑ ‑kʋ lä 'kɔɔkɔɔ ‑za nä.

²³ Naa, nyenyii' dlu ‑plʋʋlɩ plöö‑ lä 'kwie. ‑Mä ‑lʋʋ Laagɔ nyɛ lä 'flɛ nä, ʋmʋʋ‑ plöö‑ lä 'pʋpʋɛɛ‑ ‑kʋ lä 'kɔɔkɔɔ ‑za 'nɩ ‑a 'nii lä anyɩa Kwlienyɔɔ Zozi Klisö 'mnö nä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan