Bìoball air-loidhne

Wlɔmʋ‑dunyʋä 5 - GOD - u2

‑Anyɩa pɔlötɛtɛɛ ya‑anyɩ gbʋʋ' ‑sä
( 1 Pɩɛ 1.3‑9 ; 1 Zään 4.9 , 10 )

¹ Naa, ‑anyɩa' pɔlötɛtɛɛ yä gbä 'nɩ ‑a yä yɩ 'yigëënyʋä 'plö. ‑Anyɩa Kwlienyɔɔ Zozi Klisö 'kʋ ‑a ‑ghlää 'nɩ ‑a ‑yä Laagɔ 'sɔ pää' 'kʋ wɔtɔlɩ ‑kʋ ylä ‑mɔɔ.

² Ɔmɔ 'kʋ ‑a ghlää 'nɩ pɔlötɛtɛɛ 'mnö, ‑a mii 'nɩ a ni lä Laagɔɔ' 'nää. 'Nɩ 'nää nä 'mnö nä, ‑mɔɔ ‑a ‑kʋ ylä 'kɔɔkɔ. 'Nɩ ‑a gä yɩ täkpɔ nä, Laagɔɔ' 'klʋagba ‑a ‑kään lä plɛkʋ nä, amä ‑a täkpɔɔ ylä 'mʋ.

³ 'Nɩ ‑a yi 'sɩɩ 'nɩ ‑a täkpɔɔ ‑anyɩa 'kwlɩkabhɩa 'mʋ. 'Nɩ ‑a ‑yi 'sɩɩ sɔɔ nynä ‑mä 'kwlɩkabhɩä nä, ka gbä 'nɩ nyɩkpɔ yibhë ‑bɛɛsä.

⁴ 'Nɩ nyɩkpɔ kä ‑bɛɛsä ‑yi nä, sä 'kwlɩ yio bhɩämɔ ‑bhɩämɔɔ ‑kaaa nä, kɔ 'tɛmä plɛkʋ. 'Nɩ ‑lɔɔ' plɛkʋtɛnɔɔ 'mnö, gbɩɩ' ylalɩɩ ɔ ni lä nä, ɩ gbä 'nɩ ɔ 'tɛɛ Laagɔ dë.

⁵ 'Nɩ Laagɔɔ' dë 'tɛɛlɩɩ nä, ɩɩ' 'nyigë ‑wʋ. ‑Ɔnöza bhää? Laagɔ nyɩ‑anyɩ Kplɔɔkplɔɔ‑wugɔɔ 'nɩ ʋ yä gbä 'nɩ Laagɔɔ' ‑wawʋʋ yä‑anyɩ pleyii yie.

⁶ 'Nɩ dä ‑aa ‑lätee bhlä 'tɛtɩ ‑kä nä, 'tänyɩɛ Laagɔ ŋʋʋ‑ bhlä nä, ɛ ‑ŋëë ylä nä, 'nɩ Klisö yi lä gbenyenyinyʋaa' ‑za 'ku.

⁷ 'Nɩ nyɩkpɔɔ' ŋoo ‑wʋ 'flɛ 'sää nynä ‑mä, sä ɔ ‑liee nʋnʋgbɩ gëë‑ lä 'yi nä, ɔ yi ɔɔ' 'wluu 'ku. ‑Mä kä nyɩkpɔ kä 'nää nʋ nä, ɔ ‑lie yi ŋoo 'nɩ ɔ yi ɔɔ' 'wluu 'ku.

⁸ ‑Mä ‑anyɩ nä, a ni sä Laagɔ panö‑anyɩ lä ʋʋ' ‑wawʋʋ nä! ‑A plöö‑ bhä ‑lätee nyenyinyʋä 'nɩ Klisö ‑yi 'nɩ ɔ kuu‑ lä ‑anyɩa 'wlu.

⁹ ‑Pɛpɛɛ nä, ɔɔ' doluu yä gbä ‑a yä yɩ 'yigëënyʋä 'plö. 'Nɩ Klisö ya‑anyɩ 'sɩɩ Laagɔɔ' gbʋgblɛɛ nëë' ‑sä.

¹⁰ 'Tänyɩɩ ‑a plöö‑ bhlä ‑lätee Laagɔɔ' ‑zɔbhlɛgbänyʋä nä, kä ʋ ‑Yowlii' 'kwiee ‑gbä 'nɩ ‑a ‑yʋsɔ yä glää. Kɩ plöö‑ ylä nynä ‑mä sä ɔ yä‑anyɩ ylä glää nä, saa 'fɩɩn nä, ɔɔ' 'pʋpʋɛ yi‑anyɩ ‑lɔɔ nëë' ‑sä.

¹¹ 'Nɩ bʋkʋ nä, ‑anyɩa Kwlienyɔɔ Zozi Klisö, ɔmɔ 'kʋ ‑a ghlää 'nɩ ‑a täkpɔɔ lä Laagɔɔ'. Ɔmɔɔ‑ ‑gbä 'nɩ ‑pɛpɛɛ ‑a yä Laagɔ 'sɔ yi ylä glää.

Adää ‑yä Zozi Klisö
( 1 Kolɛ 15.21‑22 , 45‑49 , 56‑57 )

¹² A ni nyenyii naa, nyɩkpɔ ‑bhlo ‑gbä 'nɩ ɩ ‑yi lä 'ylʋzɔɔ. 'Nɩ nyenyi ‑gbä 'nɩ 'kwie ‑yi lä 'nɩ ɛ bhlä lä nyɩkpaa 'fɩɩn. ‑Ɔnöza bhää? Nyɩkpaa 'fɩɩn kwa ‑nʋ nyenyi.

¹³ 'Fɩa ‑yä ‑Jlämaa 'kä yi nä, nyenyi ‑kʋ bhä 'ylʋzɔɔ. ‑Mä ‑jlämä 'nö ‑kʋ nä, waa' 'mänyɩ ‑wʋ nyenyi.

¹⁴ Cie yɩ Adää 'kʋ ‑aaa ‑yä ‑n ŋëë yɩ Moyizö 'kʋ naa, 'kwie 'mɛɛ‑ nynä bhlä. 'Nɩ nyɩkpaa 'titi ‑waa bhɔɔ lä Adää 'bhisäkʋ nyenyi ‑nʋ nä, ɛ 'bhlämʋwa bhlä 'sɩɩ. ‑Mä Adäänɔ nä, nyɩkpɔɔ ‑ɔ 'gä bhlä ‑mɔɔ 'yikʋ 'yi nä, ɔɔ' panalɩ ɔ plöö‑ bhlä.

¹⁵ ‑Mä Laagɔ sʋ nyɛ lä plɛkʋmɛnɔɔ' nä, ɩyä Adää' 'focloo' bhlüülɩɩ 'sɔɔ mʋʋ ‑wʋ yëkuu'. ‑Ɔnöza bhää? Nyɩkpɔ ‑bhloo' 'foclo kä ‑gbä 'nɩ bhutukpä kä kuu‑ nä, nyɩkpɔɔ ‑bhlo plöö‑ lä, Zozi Klisö nä, Laagɔ yio 'mnö ghlää 'nɩ ʋ yi nyɩkpa ‑bhutukpä 'nyupälɩ 'kädɩ 'kʋ kwlie.

¹⁶ 'Nɩ Laagɔɔ' 'nää ʋ nyɛ lä 'sɩɩ nä, a ‑yä nyɩkpɔɔ ‑bhloo' nyenyii' ‑gesii' mʋʋ ‑wʋ yëkuu. ‑Ɔnöza bhää? Nyɩkpɔɔ ‑bhloo' nyenyii' 'wlu‑säädä plöö‑ lä 'kwlɩkabhɩa' ‑säklöö 'mnö. ‑Mä Laagɔɔ' plɛkʋmɛnɔɔ' 'wlu‑säädä plöö‑ lä nynä ‑mä, sä nyɩkpɔɔ' gbenyenyi yi zumë ‑zumë ‑kaaa nä, Laagɔ mii 'nɩ ʋ sɔɔ gbʋʋ'.

¹⁷ ‑Ɛɛɛ, nyɩkpɔ ‑bhloo' 'focloo‑ ‑gbä lä 'nɩ 'kwie ‑yi 'nɩ ɛ ‑nynä lä nyɩkpa‑bhlälɩɩ 'mnö. Mä Zozi Klisö 'mnö nä, kä Laagɔ nyɛɛ‑ 'ylʋzɔkʋnyʋä 'nää bhutukpä. Ʋ nyɩwa 'flɛ 'nɩ wa yi lä 'yigënyʋä 'plö. Wa yi Zozi Klisö 'mnö ghlää 'nɩ wa yi zëkpë 'kʋ yi ‑yä wa 'kä 'leyisä 'kämä.

¹⁸ Nä, sä nyɩkpɔ ‑bhlo 'coo 'foclo ‑gbä 'nɩ nyɩkpa 'fɩɩn gbʋ yiwa bhlä klä nä, sɔɔ ‑säkä ‑säkä nyɩkpɔ ‑bhlo 'coo 'yigëgbɩɩ ‑gbä 'nɩ nyɩkpaa 'fɩɩn yɩɔ lä 'titee' dlu ‑kä 'nɩ wa nii‑ ylä 'pʋpʋɛ.

¹⁹ Sä nyɩkpɔ ‑bhlo ‑sä lä Laagɔ 'klʋkpää' 'nɩ bhutukpä 'plöö‑ lä nyenyinyʋää' nä, sɔɔ ‑säkä ‑säkä nyɩkpɔ ‑bhlo ŋʋʋ‑ lä Laagɔ 'klʋkpää' 'nɩ bhutukpä yi lä 'yigëënyʋä 'plö.

²⁰ ‑Jlämaa ‑yi lä nä, ka ‑gbä 'nɩ gbenyenyii ‑zumë kpänyɩ. ‑Maa dä nyenyii yä bhɛ lä kpänyɩ zumë nä, ‑lɔɔ Laagɔɔ' 'nää 'mɩä yɩ 'kʋ kpänyɩ.

²¹ Nyenyi ‑kä bhä 'tɛtɩ 'nɩ ɩ bhɛɛ‑ bhä 'kwie, ‑ma ‑pɛpɛɛ nä, Laagɔɔ' 'yigëgbɩɩ 'mnö ‑mɔɔ plɛkʋmɛnɔɔ ‑ghlää 'nɩ ʋ yä lä 'pʋpʋɛ ‑lä 'kɔɔkɔɔ' ‑za.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan