Bìoball air-loidhne

Wlɔmʋ‑dunyʋä 4 - GOD - u2

Ablaamʋʋ' pɔlötɛtɛɛ 'mɛɛ‑ ‑sɔɔ lä gbʋʋ' Laagɔ dëlüü
( Gala 3.6‑9 , 29 ; Lɔlɔ 32 )

¹ Sä ‑a yi bhä ‑a tötɔ Ablaamʋʋ' ‑za cii? Lʋʋ' ‑sä ɔ 'nii‑ bhä ɔmɔ 'titi ɔɔ' 'tɛtɩɩ 'mnö?

² A ni 'yi naa, Ablaamʋʋ' nʋnʋgbɩɩ 'mɩɩ‑ gä ‑gbä 'nɩ Laagɔ kɔ bhä gbʋʋ' ‑sä nä, Ablaamʋ yi bhä mii 'nɩ ɔ yi bhä täkpɔ. ‑Mä ɔɔ' ‑lä Laagɔ 'yikʋ täkpɔ!

³ Säsä Laagɔ‑bɔɔgʋʋ ci bhä 'titi 'na ‑a? Ʋ laa, kä Ablaamʋ ‑kä bhä Laagɔɔ' pɔlötɛtɛ nä, ɔɔ' pɔlötɛtɛnɛ 'mɛ Laagɔ ‑wloo 'nɩ ʋ lɔɔ‑ lä 'yigëënyɔ.

⁴ Nyɩkpɔ kä lebhe nʋ nynä ‑mä ɔ 'kɛ ‑bʋzʋɛɛ' 'nii nä, kɔ ni ‑lɔɔ' lebhee' ‑bʋzʋɛɛ. Lɔɔ' nyɩkpɔɔ nä, wa 'nöɔ ‑wʋ 'flɛ nyɛɛ‑ ‑mä kɩ ‑kʋ lä nynä ɔɔ' dluu wa ‑kä.

⁵ ‑Mä nyɩkpɔ kä ‑lɔɔ ‑kʋ 'nɩ ɔ 'nö ‑zi lebhee' 'cënä nä ‑nʋ ‑o, 'nɩ ɔ kä pɔlötɛtɛ ‑kä nynä ‑mä Laagɔ sä gbenyenyinyɔ gbʋʋ' nä, ‑lɔɔ' nyɩkpɔɔ' pɔlötɛtɛɛ 'mɛɛ gbä 'nɩ ɔ kʋ lä nynä ‑mä 'yigëënyɔ.

⁶ Nyɩkpɔɔ ‑lɔmɔ ‑ɔnö nʋnʋgbɩ‑ Laagɔɔ' wloo ‑wʋ lä 'fɩa, 'nɩ ʋ plüë lä 'yigëënyɔ nä, kä ‑a tötɔ Davidö ‑nʋ ‑lɔɔ' nyɩkpɔɔ' ‑pʋpɛ nynä ɔ yä ‑jlɔɔ 'ni. Ɔ lä

⁷ Anyɩmɔ ‑ɔnö gbenyenyii‑ yä lä cienöɔ nä, 'Nɩ ‑ɔnö nyenyi‑ yä lä 'kʋ 'tütlüo‑ nä, a yä 'pʋ!

⁸ Nyɩkpɔɔ' ‑lɔmɔ ‑ɔnö nyenyi Kwlienyɔ Laagɔɔ' zɛɛ yɩɔ lä nä, ɔ yä 'pʋ!

⁹ ‑Jlɔnʋ ‑ʋnö wälɩ ɔ ci lä nä, 'Zufʋnyʋä ‑bhloo' lʋʋ bhä ‑a? ‑mä ‑mɔɔ' bhlɩɩ 'mnö nyɩkpaa ‑kämʋʋ bhä ‑a? ‑Anyɩ nä, kä ‑a ci lä nynä ‑mä ‑a tötɔ Ablaamʋ, ɔɔ' pɔlötɛtɛɛ 'mnö Laagɔ ‑ghlä 'nɩ ʋ lɔɔ‑ 'yigëënyɔ.

¹⁰ ‑Mä 'tänyɩ ‑saa' Laagɔ cii‑ bhä nynä ‑mä Ablaamʋ ‑glö 'yigëënyɔɔ? Kä Ablaamʋ döö‑ bhɛ 'kʋ ‑a? ‑mä ɔɔ' bhɛ 'kʋ döö‑ ‑a? ‑Ɛɛɛ, ɔɔ' ‑lä tee 'kʋ döö‑ 'nɩ Laagɔ cii‑ lä sɔɔ!

¹¹ 'Fɩa ‑yä Ablaamʋ 'kä 'kʋ ‑döö nä, pɔlötɛtɛɛ ɔ ‑kä bhlä Laagɔɔ ‑za nä, ɛmɛɛ‑ ‑gbä 'nɩ ɔ plöö‑ bhlä 'yigëënyɔ. 'Nɩ 'tänyɩ ‑ŋëë 'nɩ ɔ yi ylä 'kʋ ‑döö. Naa, 'kʋ ‑döölɩɩ' 'bɩɩ kɩ pana lä nynä ‑mä kä Laagɔ ŋʋɔ yibhëdä ɔɔ' pɔlötɛtɛɛ' ‑za nynä ɔ ‑glö yɩ 'yigëënyɔ. Nä nyɩkpaa 'fɩɩn‑ ‑wʋ lä 'kʋ döö‑ 'nɩ ‑wa ‑kä lä Laagɔɔ' pɔlötɛtɛ nä, Ablaamʋ plöö‑ ylä waa' ‑lefɩɩn wa 'bä. Ɩ ‑kä 'ŋnö nä, wa ‑glö yɩ 'yigënyʋä Laagɔ dëlü.

¹² 'Nɩ ‑wa döö‑ lä 'kʋ nä, Ablaamʋ plöö‑ lä 'sɩɩ wa 'bä. ‑Mä ɩ ‑ŋwa 'kʋ nynä ‑mä wa nämnö 'sɩɩ Ablaamʋʋ' pɔlötɛtɛɛ' 'sëploo 'mnö. Ɔ ‑kä bhä 'fɩa Laagɔɔ' pɔlötɛtɛ 'nɩ ɔ yi lä 'kʋ ‑döö.

¹³ Kä Laagɔ cii‑ lä nynä ‑mä Ablaamʋ ‑yä ɔɔ' 'lɔlʋnyʋä 'sɔ nä, wa yi 'pʋpʋnʋ jaa 'kʋ lüü. Nä Laagɔ ci lä sɔɔ nä, ‑Jlämaa 'mä ʋʋ' ‑wʋ 'gë 'ŋʋʋ‑. ‑Mä pɔlötɛtɛɛ ‑ɛ gbä lä 'nɩ nyɩkpɔ plö lä 'yigënyɔ nä, ɛmɛ ʋ 'ŋʋʋ‑ lä 'gëë.

¹⁴ Nä, kɩ kä bhä ‑kʋ nynä ‑mä ‑Jlämaa 'klʋkpä‑ŋʋlɩɩ 'mnö ‑mɔɔ nyɩkpɔ 'kä ghlää ‑yä ‑lɔɔ' jaa ɔ ka lü nä, pɔlötɛtɛɛ nyɩkpɔ yi lä Laagɔɔ' ‑za kään nä, ɛ bhɛ ‑pɛɛ gba ‑kä. 'Nɩ sä Laagɔ cii‑ lä nynä ‑mä ʋ yi pɔlötɛtö‑käänyɔɔ' ‑za nʋ nä, ʋʋ' ‑lä bhɛ sɔɔ nʋ.

¹⁵ A ni ‑jlämä ka ‑yä gbʋgblɛ 'sɔ nää 'kɔɔkɔ. Dä ‑jlämää' ‑wʋ lä ‑kʋ nä, ‑jlämää' mnɔlɩɩ' ‑wʋ ‑lɔɔ ‑kʋ.

¹⁶ Nä pɔlötɛtɛɛ 'mnö, ‑mɔɔ nyɩkpɔ ghlää lä 'nɩ sä Laagɔ cii‑ lä nynä ‑mä ʋ yio 'nyɛ nä, 'nɩ ɔ ni lä sɔɔ. Kɩ sä lä ‑zɔɔ nynä ‑mä kä Laagɔ nyɛ lä nyɩkpɔ 'flɛ. 'Nää ʋ nyɛ lä nä, Ablaamʋʋ' 'lɔlʋnyʋa 'fɩɩn wamä ʋ nyɩa lä. Nyɩkpaa ‑wa nämnö‑ lä ‑Jlämaa 'mnö nä, wa ‑yä ‑lʋa ‑wa nämnö lä pɔlötɛtɛɛ 'mnö Ablaamʋ 'bhisäkʋ nä, waa' ‑lefɩɩn, waa' 'nää lä. Ablaamʋ nä, kɔ plöö‑ ‑anyɩ 'fɩɩn ‑a 'bä.

¹⁷ ‑Ɛɛɛ! Kɩ ‑jɩjlɔ lä Laagɔ‑bɔɔgʋʋ 'mnö nynä ‑mä, ‑mɔɔ nä, n yä gbä 'nɩ ‑n yä 'bhlɩ ‑bhutukpä 'bä plö. ‑Ɛɛɛ, Ablaamʋ naa, Laagɔɔ ‑ʋnö pɔlötɛtɛɛ ɔ ‑kä lä nä, ʋmʋ dëlü nä, ɔ ‑glö ‑a 'bä. ‑Lɔɔ' Laagɔɔ nä, ʋmʋʋ‑ sä lä 'kudukuë 'kwie nëë' 'nɩ ‑ʋ lʋwa lä zëkpë 'kʋ. Lʋʋ‑ ‑wʋ lä zëkpë 'kʋ ‑kʋ nä, ɔmɔɔ‑ lʋʋ lä zëkpë 'kʋ.

¹⁸ Wälɩklëë' bhɔɔ ‑kʋ 'nɩ a 'kä dë 'tɛɛ sä ‑kä, ‑mä ɩ ‑kʋ sɔɔ 'nɩ Ablaamʋ 'tɛɛ‑ bhä Laagɔ dë. Ɔ ‑kä bhä ʋʋ' pɔlötɛtɛ. Ɩmɩɩ‑ ‑gbä 'nɩ ɔ plöö‑ ylä 'bhlɩ ‑bhutukpä 'bä. Ɩmɩ Laagɔ cii‑ bhlä nynä ‑mä, ‑naa 'lɔlʋnyʋä yi kpänyɩ zumë.

¹⁹ Ablaamʋ nä, ɔɔ' ‑wʋ ɔ yëkuu' yɛkɛɛ' 'kɔglwɛɛ ‑wloo, 'nɩ sä ɔ 'ŋnɔ Salaa' gään bhɔɔ nä, ɔɔ' ‑wʋ sɔɔ plɛkʋ paa‑ ‑yä plɛ 'kɔ 'kpɔsɔ‑. ‑Bhlɛ ɔ ‑kä bhä yiosä 'ylʋbɔɔ' gwlɩ ‑ngbü (100) nä, 'kwiee‑ fämʋɔ bhɛ lä.

²⁰ Sä Laagɔ ‑sonöɔ bhlä nynä ‑mä ʋ yi ɔɔ' ‑za nʋ nä, ɔɔ' ‑wʋ sɔɔ plɛ bʋkʋ ‑sä ‑mä, kɔ 'tɛnɩ‑ a kpänyɩ dë 'nɩ ɔ fään a Laagɔ 'ŋnu.

²¹ Ɔ ‑känɩ bhä plɛkʋ nynä ‑mä, sä Laagɔ cii‑ lä nynä ʋ yi nʋ nä, ʋ ‑kä 'päwä ‑yä ʋ 'kä sɔɔ nʋ.

²² ‑Nɩnɩ 'mɩɩ‑ ‑kä lä 'ŋnö 'nɩ Laagɔ laa‑ lä Ablaamʋ 'yigëënyɔ.

²³ ‑Maa, 'klünö ‑ɩ ‑jɩjlɔ lä nynä ‑mä ɔ ‑glö 'yigëënyɔ nä, ɔmɔ ‑bhloo' zä ɩɩ' ‑wʋ ‑jɩjlɔ.

²⁴ ‑Anyɩ ‑mä 'sɩɩ, ‑anyɩa ‑za ɩ ‑jɩjlɔ lä. ‑Ɔ ‑gälɩä ‑anyɩa Kwlienyɔɔ Zozii 'kuëë nä, ‑a gä ɔɔ' pɔlötɛtɛ ‑kä nä, ɔ yi‑anyɩ 'yigëënyʋa nëëdë zɛnö.

²⁵ Zozii nä, kä Laagɔ ‑sɔɔ ‑anyɩa nyenyii' ‑za, 'nɩ ɔ yi lä 'kuëë glɔɔ ‑yä ɔ 'ka‑anyɩ gbʋʋ' ‑sä ‑a 'gä 'yigëënyʋä 'plö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan