Bìoball air-loidhne

Wlɔmʋ‑dunyʋä 2 - GOD - u2

Laagɔɔ' 'titee kɛ gëë‑ 'yii
( Matie 7.1‑5 ; Zakö 2.12‑13 )

¹ ‑Mɔɔ mɔɔ‑ 'wɛɛ lä ‑n ‑lie nä, sä ‑n yi kʋmɔ ‑kʋmɔ ‑kaaa nä, ‑nn ‑wʋ ciesä ‑kä. ‑Mɔɔ ‑mä 'sɩɩ wa yii 'wɛɛ. ‑Ɔnöza bhää? Wälɩɩ ‑ɩnözä ‑n 'wɛɛ lä ‑n ‑liesɩ nä, ‑mɔɔ ‑mä 'sɩɩ ‑n nʋmʋɩ.

² ‑Ɛɛɛ, ‑a ‑yi sɔɔ nynä ‑mä ‑lɔɔ nyɩkpa‑cëa nä, 'titee Laagɔ ŋʋwa lä nä ɛɛ' ‑blɔɔ 'mʋʋ‑ ‑kʋ ‑lɔɔ.

³ ‑N 'wɛɛ ‑n ‑liesɩ 'nɩ ‑n ‑kʋmʋ lä wamä 'bhisäkʋ nä, kä n bhobho nynä ‑mä Laagɔɔ' 'titee yi‑i wlɩ 'sɛpɩ ‑a?

⁴ ‑Aaa nä, ‑mɔɔ, sä Laagɔ ‑kʋ lä nä, kä ‑nn 'mänyɩ ‑wʋ lä sɔɔ nä? Laagɔ nä kʋ nää‑ kpänyɩ plɛkʋ, 'nɩ ʋ ‑yi plɛkʋ 'tɛmä sä, 'nɩ ʋ ‑yi ‑bɛɛsä. 'Nɩ ʋʋ' plɛkʋmɛnɔɔ 'mnö ‑n 'gä lä ghlää ‑yä ‑naa zëkpëa 'kä 'cɩcɩ nä, ‑lɔɔ' 'klüü ‑n 'nɩɩ bhä ‑yi ‑a?

⁵ ‑Mɔɔ nä, kä ‑n 'tɛ lä 'nyukwli kpänyɩ, 'nɩ ‑nn ylä ‑wʋ lä nynä ‑mä ‑n 'gä 'cɩcɩ. Nä ‑naa nʋnʋsa 'mnö Laagɔɔ' ‑gbʋgblɛ 'mɛ ‑n vʋglʋmä lä. Ɩ yi gbä 'nɩ ylʋʋ yi ‑lɔɔ kʋ 'nɩ Laagɔ yi‑i 'tite 'ŋʋ. 'Nɩ ‑lɔɔ' 'titee ‑ŋwa ‑lɔɔ 'kʋ.

⁶ Nä sä nyɩkpɔ nää lä ‑mää 'ylʋzɔɔ nä, ‑lɔɔ' ylʋʋyɩ 'kʋ ɔ yi ɩɩ' dluu' plʋʋlɩ 'ni.

⁷ Nyɩkpaa' ‑lʋa ‑wa nämnö lä 'kɔɔkɔ 'nägägbɩɩ nʋlɩɩ 'mnö nä, 'nɩ wa tään lä 'klʋagbaa, 'nɩ wa tään lä 'klʋkpää ‑yä zëkpë ‑Laagɔ dëlü nä, 'pʋpʋɛɛ‑ ‑kʋ lä 'kɔɔkɔɔ ‑za nä, wa yie 'ni.

⁸ ‑Mä nyɩkpaa' ‑lʋa cɩcɩɔ lä Laagɔ 'yii nä, 'nɩ ‑waa 'ŋʋ ‑wʋ lä ‑nʋawlɛɛ 'klʋkpää nä, 'nɩ ‑wa taa lä wa yëku 'yi 'nɩ gbenyenyii 'tie lä nä, plɛkʋ yi Laagɔ si 'nɩ ʋ yiwa ʋʋ' gbʋgblɛɛ 'kʋ fään.

⁹ Nyɩkpaa' ‑lefɩɩn ‑wa nʋ lä gbenyenyii nä, wa yi nyäkälɩ 'kädɩ 'ni, 'nɩ 'ŋänö yiwa plä. 'Zufʋnyʋä 'kʋ ɩ 'kä lä cie, ‑yä ɩ 'kä 'Glɛkönyʋä 'kʋ ŋëë.

¹⁰ Nyɩkpaa' ‑wa nʋ lä 'nää nä, 'klʋagbaa ‑yä 'ŋnumʋlɩ ‑yä 'kʋ wɔtɔlɩɩ, ɩmɩ Laagɔ nyɩwa lä. 'Zufʋnyʋä 'kʋ Laagɔ cie‑ 'nɩ ʋ ‑ŋëë lä lowubhlɩ 'kʋʋ nyɩkpaa 'kʋ.

¹¹ Nä kɩ plöö‑ lä nynä ‑mä Laagɔɔ' gbäzö ‑wʋ nyɩkpa 'mʋ.

¹² Nyɩkpaa ‑wa ‑nʋ lä nyenyii 'nɩ ‑waa ‑wʋ lä Moyizöö ‑Jläma ‑yi nä, wa kä kuu‑ nä, ‑Jlämaa 'nʋwa lä gbʋ klaa. ‑Mä ‑wa ‑yi lä Moyizöö' ‑Jlämaa 'nɩ ‑wa ‑kʋ lä nyenyii' nä, ‑Jlämaa 'mää‑ 'gwa lä gbʋ klaa.

¹³ A ni 'yi naa, ɩɩ' ‑wʋ plöö‑ nynä ‑mä nyɩkpaa 'fɩɩn‑ poo lä ‑Jlämaa 'nyukwli nä, kwa gëë‑ 'yi Laagɔ dëlü. ‑Mä nyɩkpaa' ‑lʋa ŋʋwa lä 'klʋkpää nä, wamä ‑Jlämaa 'kä lä gbʋʋ' ‑sä.

¹⁴ A ni 'yi nä, nyɩkpaa' ‑lʋa ‑wʋ lä 'Zufʋnyʋä plöö‑ 'nɩ ‑waa ‑wʋ lä ‑Jlämaa ‑yi nä, waa' nʋnʋgbɩɩ ‑yä ‑Jlämaa 'sɔ kä yëkuu mʋʋ nä, waa' bhɔɔ ‑Jlämaa ‑yi nä, wamä 'titii‑ plöö‑ bhlä wa yëkuu' ‑Jlämä.

¹⁵ Kwa pana lä nynä ‑mä, sä ‑Jläma ylä lä nä, sɔɔ ‑jɩjlɔ ‑mɔɔ waa' pɔlöö 'yii. 'Nɩ waa' bhobhowluu pana ‑lɔɔ' ‑dläfʋɛ. Ʋ mii 'nɩ ʋ bhuwa ‑kɔkwɩ, 'nɩ ʋ bhlänʋwa 'sɩɩ 'kʋ.

¹⁶ ‑Nɩnɩ 'fɩɩn nä, 'Tite 'Kadɛɛ pläylʋʋ 'kʋ, ɩ yi zëkpë 'kʋ ŋʋɔ. 'Nägädöö n bie lä nä, ɩ ci nynä ‑mä ylʋʋyɩ 'kʋ nä, Laagɔ yi gbä 'nɩ nyɩkpa 'fɩɩn nʋnʋgbɩɩ‑ ‑zizio bhlä 'kʋ nä, Zozi Klisö yii ‑zɔɔ wlʋa 'nɩ ɔ yiwa 'tite 'ŋʋ.

'Zufʋnyʋä ‑yä ‑Jlämaa 'sɔ

¹⁷ ‑Mɔɔ ci lä nynä ‑mä 'Zufʋyu ‑n plöö‑ 'nɩ ‑n kpelio lä ‑Jläma 'kʋ 'nɩ ‑n täkpɔ lä Laagɔɔ' nä,

¹⁸ ‑mɔɔ mɔɔ‑ ‑yi lä sä Laagɔ ylä lä nä, 'nɩ ‑mɔɔ mɔ ‑Jläma yä lä cɩa 'nɩ ‑ɔ ‑yi ylä 'mʋ gbäzö sä nä,

¹⁹ ‑mɔɔ ‑känɩ lä plɛkʋ nynä ‑mä ‑n yi mii 'nɩ ‑n yi 'yikpüü' kʋnyʋä 'tie, 'nɩ nyɩkpaa' ‑lʋa ‑kʋ lä 'cucuu 'mnö nä, ‑n yi waa' zëlü plö nä,

²⁰ ‑mɔɔ mɔɔ‑ plöö‑ lä ‑waa ‑wʋ lä 'fika nä waa' cɩanyɔ nä, 'nɩ ‑n plöö‑ lä 'sɩɩ 'yuë 'tɩkɩɩlɩa' cɩanyɔ nä, ‑n ‑yi ‑Jlämaa' dɩgälɩɩ ‑yä aa' ‑nʋawlɛɛ.

²¹ 'Nɩ sɩ ‑kʋ bhä 'nɩ ‑mɔɔ mɔɔ‑ cɩa lä ‑n ‑liesɩ nä, ‑nn mii bhä 'nɩ ‑n 'gä bhä ‑n yëku cɩa? ‑Mɔɔ pä lä 'tɔgɩsɩ nynä ‑mä nyɩkpɔɔ' ghlü ‑lä, ‑bhlɛ ‑n ghlü!

²² ‑Mɔɔ ci lä nynä ‑mä nyɩkpɔɔ' 'ylä ‑lä ɔ ‑liee' 'ŋnɔ, ‑bhlɛ ‑n ylä ‑n ‑liesɩɩ' 'ŋwnɩä! ‑N ci nynä wa 'nä bʋbɔ lä zlüü, ‑bhlɛ ‑zlüü' ‑kʋkwɔɔ 'mnö ‑lɩɩ ‑mɔɔ ghlii lä!

²³ ‑N täkpɔɔ lä ‑Jlämaa 'mʋ 'nɩ ‑nn 'ŋʋa ‑wʋ lä 'klʋkpää nä, Laagɔɔ' 'ŋnö ‑n nyima lä.

²⁴ Ɩ ‑jɩjlɔ Laagɔ‑bɔɔgʋʋ 'mnö nynä ‑mä, 'yigädabhlɩ 'kʋʋ nyɩkpaa nëëdë nä, Laagɔɔ' 'ŋnöö ‑yä ‑mɔɔ bhusu anyɩa' nʋnʋgbɩɩ' ‑za.

²⁵ ‑Ɛɛɛ, 'zaazɩ! Sä ‑Jlämaa ylä lä nä ‑n gä sɔɔ nʋ nä, sä ‑n döö‑ lä 'kʋ aa' ‑za nä, sɔɔ ‑kä gba. ‑Mä ‑n 'nöa yɩ 'klʋkpää 'ŋʋ nä, kä ‑n ‑kʋ lä nynä nyɩkpɔɔ' lɔɔ ‑wʋ döö‑.

²⁶ Nyɩkpɔɔ' lɔɔ‑ ‑wʋ lä 'kʋ döö‑ nä, ɔ kä ‑Jlämaa 'klʋkpää' 'ŋʋ nä, ɔɔ' ‑wʋ 'zaazɩ 'kʋ döö‑ oo ‑mä, wa 'nöɔ ‑lä wloo nynä ‑mä lɔɔ‑ döö‑ ‑a?

²⁷ ‑Lɔɔ' nyɩkpɔɔ nä, ɔɔ' ‑wʋ 'kʋ döö‑ 'yɛkɛɛ 'mnö, ‑mä sä ɔ nää lä ‑Jlämaa' saa nä, ‑mɔɔ mɔ ‑ɔɔ ‑kä lä ‑Jlämaa' 'bɔɔgʋʋ 'nɩ ‑ɔɔ 'ŋʋa ‑wʋ lä 'klʋkpää' 'nɩ ‑ɔ döö‑ lä 'kʋ nä, ɔmɔɔ‑ 'gä‑ä lä 'tite 'ŋʋ ‑zee.

²⁸ 'Nɩ ‑ɔ plöö‑ bhä 'titi 'Zufʋyu 'naa ‑a? Nyɩkpɔɔ' lɔɔ‑ tla lä ɔ yëku nynä ‑mä 'Zufʋyu ɔ plöö‑ nä, ɔmɔɔ‑ ‑klä 'Zufʋyu plöö‑! 'Nɩ 'yɛkɛɛ 'mnö 'kʋ döölɩɩ 'mɩɩ‑ ‑wʋ 'sɩɩ 'kʋ ‑döölɩɩ 'titi plöö‑.

²⁹ 'Zufʋ‑plölɩ nä pleyii ‑ɩ ‑kʋ lä, 'nɩ 'kʋ döölɩɩ 'titi plöö‑ lä pleyii 'kʋ ‑döölɩ. 'Wugɔɔ 'mnö ‑nɩnɩ bha lä ‑mä 'bɔɔgʋʋ' ɩɩ' ‑bha ‑wʋ. 'Zufʋyu 'titi nä, nyɩkpaa‑ fänöɔ ‑wʋ 'ŋnu ‑mä Laagɔ fänöɔ 'ŋnu.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan