Bìoball air-loidhne

Wlɔmʋ‑dunyʋä 16 - GOD - u2

Pɔlʋ bhään

¹ Bhɛŋnɔ Fëbee yi'anyɩ ‑mɔɔ yëku yi. Sankleduu' 'cɔcɩɛ 'mnö ɔ nʋ lä lebhe.

² Nä, sä wa gboo lä 'cɔcɩnyɔ 'kʋ nä, a gbonöɔ sɔɔ 'kʋ Kwlienyɔɔ' 'ŋnöö 'mnö. 'Tänyɩɩ 'fɩɩn 'mnö nä, sä ɔ ylä nynä ‑mä a klänöɔ nä, a klänöɔ sɔɔ. Ɔ ‑klää nyɩkpa ‑bhutukpä, 'nɩ ‑amʋ ‑mä 'sɩɩ ɔ ‑klänö'ö.

³ A soo Plisii ‑yä Akilasö 'sɔ nynä n bhänʋwa. Zozi Klisö 'mnö nä, wa ‑glö 'naa lebhee' 'kʋnʋʋnyʋä.

⁴ Waa' ‑wʋ 'kwie ‑guu 'nɩ wa ‑yi 'nɩ wa ‑sä'ä ‑lɔɔ nëë'. 'Nɩ ‑amʋ ‑bhlo 'coo‑ bhänʋwa ‑wʋ 'sɩɩ ‑mä 'cɔcɩnyʋa ‑waa ‑wʋ lä 'Zufʋnyʋä plöö‑ nä, wa bhänömʋwa 'sɩɩ.

⁵ 'Cɔcɩnyʋa ‑wa 'wlää lä waa' daa 'wlu nä, n bhänʋwa. N bhää n 'nagɔ Epayɩnɛtö. Epayɩnɛtö nä, ɔmɔɔ‑ ŋoo‑ lä tɛɛ Klisö 'kʋ ‑mɔɔ Azii‑bhlɩɛ 'mnö.

⁶ N bhää 'sɩɩ Malii. Ɔ ‑nʋ lebhe ‑bhutukpä anyɩa' za.

⁷ N bhää Adlonikusö ‑yä Zunia. Wa ‑glö 'naa 'lɔlʋkpönyʋä. 'Nɩ wa ‑yä ‑amʋ 'sɔ ‑nʋ 'sɩɩ ‑jɩɩ. Wa ‑glö sää 'titi Laagɔɔ' lobho lobhonyʋä 'kädʋä. Wa ‑yibhë 'fɩa Klisö 'nɩ n ‑yibhë lä Klisö.

⁸ N bhää Apliyatusö. Ɔ ‑glö 'naa 'nagɔ Kwlienyɔ 'mnö.

⁹ N bhää Ylʋbɛɛ. Ɔ ‑yä‑anyɩ sɔɔ‑ nʋʋ lä Klisöö' lebhee 'kʋ. N bhää 'sɩɩ n 'nagɔ Sakisö.

¹⁰ N bhää Apɛlɛsö. Ɔ pana sää 'titi nynä ‑mä kɔ ‑kä Klisöö' pɔlötɛtɛ. Alisötobuu 'gbëa 'mnö nyɩkpaa, n bhänʋwa 'sɩɩ.

¹¹ N bhää Elodɩɔɔ. Ɔ ‑glö 'sɩɩ 'naa 'lɔlʋkpönyɔ. Nasisöö' 'gbëa 'mnö nyɩkpa ‑wa ‑kä lä Kwlienyɔɔ' pɔlötɛtɛ nä, n bhänʋwa.

¹² N bhää bhɛŋwnɩa Tlifɛnö ‑yä Tlifozö. Wa ‑nʋ kpänyɩ Kwlienyɔɔ' lebhee. N bhää bhɛŋnɔ Pɛsidö. Ɔ ‑glö 'naa 'nagɔ. Ɔ ‑nʋ 'sɩɩ kpänyɩ kpänyɩ Kwlienyɔɔ' lebhee.

¹³ N bhää bheli Lufusö. Lufusö nä, kä Kwlienyɔ ‑sɔɔ nynä ɔ 'kɔ ‑gä nʋ. N bhää 'sɩɩ Lufusö ɔ 'nɔ. Ɔ ‑glö 'sɩɩ n 'nɔ.

¹⁴ N bhää Asɛklitö, ɩyä Flegɔɔ, ‑yä Ɛmɛsɩ, ‑yä Patlobasö ɩyä Ɛmasö. Bhelia ‑yä bhɛŋwnɩa ‑wa ‑yʋwa 'sɔ ‑kʋ lä ‑mɔɔ nä, n bhänʋwa.

¹⁵ N bhää Filolɔgö ‑yä Zulii. N bhää Nele ‑yä ɔ bhɛŋnɔ. N bhää Olɛnpasö. 'Cɔcɩnyʋa 'fɩɩn ‑wa ‑yʋwa 'sɔ ‑kʋ lä ‑mɔɔ nä, n bhänʋwa 'sɩɩ.

¹⁶ A gbënö ‑gbënö bheli‑wawʋʋ 'mnö. Klisöö' 'cɔcɩgbüü 'fɩɩn ‑kʋ lä ‑mää nä, ɩ bhänö'anyɩ.

Pɔlʋ gblɩmä 'cɔcɩnyʋa

¹⁷ Bhelie ‑yä bhɛŋwnɩänyɩ‑ nyɩkpaa' ‑lʋa ‑wa ŋʋ lä 'cɔcɩnyʋa 'mʋ doolɩ pää' nä, a luënʋwa ‑kä! 'Nägädöö' cɩalɩɩ waa' ŋonɩ ‑wʋ 'kʋ 'nɩ wa gbä 'nɩ 'cɔcɩnyʋa too nä, a ‑sʋwa gwë!

¹⁸ ‑Lɔɔ' nyɩkpa‑cëa nä, ‑anyɩa Kwlienyɔɔ, Klisö, ɔmɔ waa' nʋ ‑wʋ ‑gä. Waa' 'gwɩɩ 'mɩ wa bhlää lä 'kʋ! 'Nɩ sä wa ‑yi lä cisä 'nɩ wa mɛɛ‑ lä kpänyɩ nëë' nä, nyɩkpaa' ‑lʋa ‑wʋ lä ‑gblɩ nä, kä wa 'nyigënʋwa.

¹⁹ ‑Ɛɛɛ, 'klʋkpaa a ‑kä lä nä kä nyɩkpaa 'fɩɩn nia 'yi. ‑Nɩnɩ ‑kä 'ŋnö 'nɩ anyɩa' ‑pʋpɛ ‑kʋ'ʋ kpänyɩ pleyii. ‑Mä n ylä nynä ‑mä a kään kpänyɩ dɩgälɩ ‑yä a nʋ 'kɔɔkɔ 'nägägbɩ. Ɩyä a kplɔɔ ‑yä a ‑sä gbenyenyi gwë.

²⁰ Laagɔ ‑ʋ nyɛ lä 'kʋ wɔtɔlɩ nä, ʋ yi gbä 'nɩ a yi ‑zee 'Dëvlo 'kʋ nämnö 'nɩ a yiu 'plɩtɩä. ‑Anyɩa Kwlienyɔɔ Zozii' 'nyupälɩɩ ŋënö'anyɩ 'kʋ!

²¹ Bheli Timotee, ‑ɔ ‑yamʋ 'sɔ nʋʋ lä lebhe 'kʋ nä, ɔ lɔ bhänö'anyɩ. 'Naa 'lɔlʋkpönyʋä Lususö ‑yä Zasɔɔ, ɩyä Sosipatɛɛ, wlä wa bhänö'anyɩ 'sɩɩ.

²² ‑Amʋ Tɛtiyusö, n bhänö'anyɩ 'sɩɩ. ‑Amʋʋ‑ ‑jɩjlä lä 'bɔɔgʋnʋ. N bhänö'anyɩ Kwlienyɔɔ' 'ŋnöö 'mnö.

²³ 'Naa 'kʋplänyɔ Gayusö lɔ bhänöa'anyɩ. Ɔɔ' da 'mʋ n plä lä 'kʋ, 'nɩ ‑lɔɔ 'cɔcɩnyʋa 'fɩɩn 'wlää lä 'sɩɩ 'wlu. ‑Mää 'duu 'bhɔklɔɔ nää' klänyɔɔ Elasö, ɔ ‑yä bheli Katusö, wlä wa bhänö'anyɩ 'sɩɩ. [

²⁴ ‑Anyɩa Kwlienyɔɔ Zozi Klisö, ɔɔ' 'nyupälɩɩ ŋënö'anyɩ 'kʋ, anyɩ 'fɩɩn. Ɩ kʋ sɔɔ.]

'Kwlʋagba ŋëë Laagɔ

²⁵ A ‑ya fään Laagɔ 'ŋnu! Zozi Klisöö' 'Nägädöö n bie lä nä, Laagɔ ‑kä 'päwä 'nɩ ʋ yii 'mnö ghlää 'nɩ ʋ yi'anyɩ 'tɛtɩɩ 'nyɛ. Wälɩɩ 'fɩɩn ‑ɩ ‑zizio bhlä 'kɔɔkɔ 'kʋ nä, 'Nägädönö 'mnö Laagɔ ‑ghlää 'nɩ ʋ ‑gbä 'nɩ nyɩkpa ‑yibhënɩ lä.

²⁶ ‑Pɛpɛɛ 'tänyɩnɛ 'mnö nä, ɩ yä ‑zëlügä ghlä. Nyɩkpaa‑ ‑wʋ lä 'Zufʋnyʋä plöö‑ nä, wa yii 'plɔfɛtɩnyʋa' 'bɔɔgwɩɩ 'mnö zɛnö 'nɩ wa yii yibhë. Laagɔɔ‑ ‑kʋ lä 'kɔɔkɔɔ ‑za nä, ʋmʋʋ‑ cii‑ lä nynä ‑mä ɩ nʋɔ sɔɔ ‑yä 'ylʋzɔkʋnyʋa 'fɩɩn 'kʋʋ pɔlötɛtɛ kään ‑yä wa 'kʋʋ 'klʋkpää 'ŋʋ.

²⁷ Nä, a ‑ya fään Laagɔ 'ŋnu ‑mä, ʋmʋ ‑bhlo 'coo ‑kä lä dɩgälɩ! 'Klʋagba ghlää Zozi Klisö 'mnö ‑yä a ŋëë Laagɔ 'kɔɔkɔ ‑za! Ɩ kʋ sɔɔ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan