Bìoball air-loidhne

Wlɔmʋ‑dunyʋä 15 - GOD - u2

A 'plö 'nägä‑nyɩkpa a ‑liesɩɩ' ‑za

¹ ‑Anyɩmɔɔ‑ ‑kä lä pɔlötɛtɛɛ 'mnö 'tɛtɩ nä, nyɩkpaa' ‑lʋa ‑wʋ lä pɔlötɛtɛɛ 'mnö 'tɛtɩ ‑kä nä, ‑a ‑kä 'nɩ ‑a 'gwa klää. Nä ‑aa nʋ lä sä ‑a ‑waa lä nä.

² Nyɩkpɔ nyɩkpɔ nä, ɔ tään nynä ‑mä ɔ ‑lie 'kɔ wamä ɔɔ' 'nää nʋlɩɩ' ‑za. Ɩ yi gbä 'nɩ 'cɔcɩnyʋa yi 'tɛtɩ 'ni.

³ ‑Ɔnöza bhää? Klisö nä, ɔɔ' ‑wʋ ‑tään nynä ‑mä ɔ 'kä sɔ ‑waa lä nä nʋ. Kɩ ‑jɩjlɔ lä Laagɔ‑bɔɔgʋʋ 'mnö nynä ‑mä, ‑wa 'bhɩsɛ‑ɛ lä nä, ‑amʋ ‑wa 'bhɩsɛ‑ lä.

⁴ Wälɩɩ‑ ‑jɩjlɔ bhlä ‑mɔɔ Laagɔ‑bɔɔgʋʋ 'mnö tɛɛtɛɛ nä, kɩ ‑jɩjlɔ bhlä ‑mɔɔ ‑yä ɩ 'ka‑anyɩ cɩa. Ɩ yi gbä 'nɩ ‑a yi 'kɔɔkɔ ‑bɛɛsä yibhë 'nɩ ‑anyɩa plɛ yi bhlü. 'Nɩ ɩ yi gbä 'nɩ ‑a yi Laagɔ dë 'tɛɛ.

⁵ Nä Laagɔ, ‑bɛɛsää' yibhëlɩɩ' Laagɔɔ ‑ʋ bhlüa lä plɛɛ' nä, ʋ gbä ‑yä a kään bhobhowlu ‑bhlo. A 'gë Zozi Klisöö' 'sëploo 'kʋ.

⁶ Ɩ 'kä gbä ‑yä, a 'kä 'mʋ 'nunu, ɩyä a 'kä në ‑bhlo ci, ɩyä ‑anyɩa Kwlienyɔɔ Zozi Klisö ɔ 'Bä, a 'kɔ 'ŋnu fään.

⁷ A yibhë a liesɩɩ' 'kʋ gboosä ‑yä Laagɔ 'kä 'ŋnu mʋ ‑mä, sɔɔ Klisö ‑gbonö'anyɩ lä 'kʋ.

Klisö ‑glö nyɩkpaa 'fɩɩn ‑gänʋnyɔ
( Efɛ 2.11‑19 )

⁸ ‑Ɛɛɛ, kä n ci lä nynä ‑mä, 'Zufʋnyʋä nä, kä Klisö 'plöö‑ lä waa' ‑gänʋnyɔɔ' ‑yä ɔ 'kä pana nynä ‑mä sä Laagɔ ci lä nä kʋ nʋ sɔɔ. Nä sʋ ‑soo bhlä ‑a tɩtɩä nä, Klisö 'kʋ ʋ ‑ghlää 'nɩ ʋ ‑nʋ lä sɔɔ 'zaazɩ.

⁹ 'Nɩ nyɩkpaa' ‑lʋa ‑wa ‑wʋ lä 'Zufʋnyʋä plöö‑ nä, Laagɔɔ' plɛkʋmɛnɔɔ' ‑zä wa fäänʋ ylä 'ŋnu. Ɩ ‑jɩjlɔ Laagɔ‑bɔɔgʋʋ 'mnö nynä ‑mä, ‑Nɩnɩ ‑kä ylä 'ŋnö nä, n yi‑i 'ŋnu fään 'bhlɩɩ 'fɩɩn 'mnö. 'Nɩ n yi ‑naa lɔlɔ bhlɩ ‑naa 'ŋnöö ‑za.

¹⁰ Ʋ cii‑ 'sɩɩ nynä ‑mä, Anyɩ 'ylʋzɔkʋnyʋä nä, a ‑yä Laagɔɔ' 'yua 'sɔ nʋ ‑jäkä!

¹¹ 'Nɩ ʋ cii‑ bʋkʋ nynä A fään Kwlienyɔ Laagɔ 'ŋnu anyɩ 'ylʋzɔkʋnyʋa 'fɩɩn, ɩyä a bhlɩ ɔɔ' lɔlɔ anyɩ 'fɩɩn.

¹² 'Plɔfɛtɩ Ezayii cii‑ 'sɩɩ nynä ‑mä, Yizayii' 'lɔlʋnyɔ yi yi. Ɔmɔɔ‑ 'gä lä 'bhlɩɩ 'fɩɩn 'kämä. 'Nɩ 'bhlɩɩ 'fɩɩn yio 'sɩɩ dë 'tɛɛ.

Laagɔ paa‑ Ablaamʋ 'nyu

¹³ Nä Laagɔ ‑ʋ nyɛ lä plɛkʋ 'tɛnɔ nä, ʋ ŋʋ'anyɩ ‑jäkä bhutukpä ‑yä 'kʋwɔtɔlɩ pleyii anyɩa' pɔlötɛtɛɛ' ‑za, ɩyä Kplɔɔkplɔɔ‑wugɔɔ' 'päwä 'mnö, a 'kä kpänyɩ Laagɔɔ' dë 'tɛɛ sä yibhë!

Pɔlʋʋ' lowluu' mʋlɩɩ' wälɩ
( 2 Kolɛ 10.13‑18 )

¹⁴ Bhelie ‑yä bhɛŋwnɩänyɩ‑, ‑amʋ nä, n ‑känɩ plɛkʋ nynä ‑mä, ka ‑ghlɩlɩ 'kɔɔkɔ ‑yä a 'kä 'nägägbɩ nʋ, 'nɩ saa 'fɩɩn‑ ‑ŋwa lä 'kʋ nynä ‑mä nyɩkpɔ yibhë nä, a ‑yi 'sɩɩ sɔɔ. 'Nɩ n ‑yi sɔɔ nynä ‑mä a yi mii 'nɩ a yi dɩgälɩɩ' 'ŋʋŋʋʋ.

¹⁵ ‑Mä ɩ ‑kʋ sɔɔ 'nɩ 'bɔɔgʋnʋ 'mnö, 'klüü ‑nɩnɩ ‑kʋ ‑mɔɔ, 'nɩ n 'ŋʋnö'anyɩ lä 'yizlɛ 'kʋ ‑yä, sä wa cɩa'anyɩ lä nä, a 'kä sɔɔ dä 'kʋ luë. Kä n ‑jɩjlä'anyɩ lä sɔɔ, ‑ɔnöza bhää? Laagɔɔ' plɛkʋmɛnɔɔ 'mnö nä,

¹⁶ ʋ ‑gbä 'nɩ n plö yɩ Zozi Klisöö' ‑gänʋnyɔɔ' lɔɔ ɔ ‑lobho lä nyɩkpaa' ‑lʋa ‑waa ‑wʋ lä 'Zufʋnyʋä plöö nä 'kʋ. Laagɔɔ' sʋ 'ylänö'ö lä nä, sɔɔ n nʋʋ lä ‑gä 'nɩ n bie lä ʋʋ' 'Nägädöö. Ɩ 'kä gbä ‑yä ‑waa ‑wʋ lä 'Zufʋnyʋä plöö‑ nä, lʋʋ nyɩkpɔ nyɛ lä Laagɔ 'nɩ ʋ kamä lä Laagɔ 'tʋ nä, wa 'kä ‑lɔɔ ‑lʋʋ 'plö. Kplɔɔkplɔɔ‑wugɔɔ 'mʋʋ 'gwa lä Laagɔ dëlü kpɔlʋä.

¹⁷ Nä, n ‑kä 'nɩ n yi Zozi Klisö 'mʋ täkpɔ nynä Laagɔɔ' lebhee 'mɛ n nʋ lä.

¹⁸ Wälɩɩ 'fɩɩn Klisö ‑gbä 'nɩ n ‑nʋ lä nä, ɩmɩ ‑bhlo 'coo n 'kä lä 'dö 'kʋ ‑sää. Kɔ ‑ghlänö'ö lä 'kʋ ‑yä nyɩkpaa 'fɩɩn‑ ‑wʋ lä 'Zufʋnyʋä plöö‑ nä, n 'kä gbä ‑yä wa 'kä Laagɔ 'klʋkpää' 'ŋʋ. 'Naa ciciwälɩɩ ‑yä 'naa nʋnʋgbɩɩ 'mnö Klisö ‑ghlää lä 'nɩ ɔ ‑nʋ lä sɔɔ.

¹⁹ 'Nɩ Laagɔɔ' 'Wugɔɔ 'päwaa ‑klänö'ö 'nɩ n ‑nʋ 'yiziziogbɩ ‑yä plɛkʋ 'niniegbɩ. Nä ‑a cie‑ yɩ Zolizalɛmʋduu' ‑aaa, ‑yä ‑a ŋëë yɩ Yililibhlɩ 'kʋ nä, kä n ‑sää ‑mɔɔ Klisöö' 'Nägädöö kpänyɩ.

²⁰ 'Bhlɩɩ 'fɩɩn 'mnö ‑gbäsɩɩ nyɩkpaa' ‑lä bhlä tee Klisö ‑yibhe nä, kä n ŋʋʋ‑ sää 'titi nynä n 'kä a ‑mɔɔ 'Nägädöö bie ‑kää mʋ. Kɩ plöö‑ lä sɔɔ 'kʋ ‑yä dä 'yigäda‑nyɩkpɔ yä bhɛ lä ‑bhutu glu pään nä, 'nn kä ‑kä ‑lɔɔ 'slää.

²¹ Sä ɩ ‑jɩjlɔ lä Laagɔ‑bɔɔgʋʋ 'mnö nä, sɔɔ n nʋ lä. Ɩ ‑jɩjlɔ nynä ‑mä, Nyɩkpaa' ‑lʋa waa' bhɔɔ lä 'dö ‑fä nä, Wa 'yii yi welio 'nɩ ‑wa yi sä 'ni. 'Nɩ ‑waa bhɔɔ lä ɔɔ' yëkuu' 'dö nuu‑ nä, Wa yii 'mʋ 'nu.

²² 'Klünö nä, ɩmɩɩ‑ gbä 'nɩ nn' mii ‑wʋ lä 'nɩ n 'kanyɩ yëku yi.

²³ ‑Mä ‑pɛpɛɛ nä, n yä ‑mää 'bhlɩnɩ 'mnö lebhe ‑zɔɔ bhɩä. Ɩ nʋ yɩ 'ylʋbɔ ‑bhutukpä 'nɩ n tään lä nynä ‑mä n 'kanyɩ 'yi 'ni kää yi.

²⁴ Nä, n kä Esöpanyɩbhlɩ 'kʋ mʋdä ‑kʋ nä, n yi'anyɩ 'kʋ ghlää. 'Nɩ n 'tɛnö'anyɩ dë nynä ‑mä a yi'i klää 'nɩ n yi ‑mɔɔ ŋëë. N yi'anyɩ yëku kʋ ylɩɩ zioo' ‑za.

²⁵ ‑Pɛpɛɛ nä, kä n mʋ ylä Zolizalɛmʋduu', ‑mɔɔ 'cɔcɩnyʋaa' ‑za.

²⁶ ‑Ɔnöza bhää? Masedʋanöbhlɩ 'kʋ, ɩyä Akayiibhlɩ 'kʋʋ 'cɔcɩnyʋa, wa ‑bʋʋ kwänɩsɩ Zolizalɛmʋduu' 'cɔcɩnyʋa nëëdëë' ŋäzönyʋaa' ‑za.

²⁷ Wamä 'titii‑ ‑gbään plɛkʋ 'nɩ wa ‑sä lä ‑lɔɔ' kwänɩsɩɛ. ‑Ɛɛɛ, ‑mänɩ wa ‑kä bhä 'sɩɩ 'nɩ wa yi bhä ‑lɔɔ' kwänɩsɩɛ ‑sä. ‑Ɔnöza bhää? Nyɩkpaa' ‑lʋa ‑wʋ lä 'Zufʋnyʋä plöö‑ nä, 'Zufʋnyʋää' ‑jlɔɔ 'mnö Laagɔ ‑ghlä 'nɩ ʋ pʋwa‑ lä 'nyuu 'wugɔɔ 'mnö nä, wa ‑kä 'nɩ wa 'kwa 'kʋ yi waa' 'ylʋzɔɔ' kääkäälɩɩ 'mnö.

²⁸ Naa, n kä yɩ ‑nɩnɩ ‑zɔɔ bhɩä 'nɩ n kä yɩ kwänɩsɩɛ Zolizalɛmʋduu' ‑fä nä, n yi Esöpanyö bhlɩkʋ mʋ, ‑mä anyɩ 'kʋ n 'kä lä ghlää.

²⁹ N ‑yi sɔɔ nynä ‑mä, n yi'anyɩ lä yëku nä, n bhɛɛ‑ Klisöö' 'nyupälɩ 'kädɩ 'nɩ n yi lä.

³⁰ ‑Mä 'klüü n 'ylänö'anyɩ lä ‑anyɩa Kwlienyɔɔ Zozi Klisöö' 'ŋnöö 'mnö ɩyä Kplɔɔkplɔɔ‑wugɔɔ ‑waawʋʋ 'mnö nä, bhelie ‑yä bhɛŋwnɩänyɩ‑, ɩmɩɩ‑ plöö‑ lä nynä ‑mä, a yi'i 'kʋ ‑ya bhlää däbhloo' 'kʋ bhibhielɩɩ 'mnö 'naa ‑za ‑yä,

³¹ Zudee‑lëkpëa 'mnö 'nyuklwi 'tɛtɩnyʋa, n 'kwa nëë' ‑bha. Ɩyä kwänɩsɩɛ n fä lä Zolizalɛmʋduu' nä, ‑mɔɔ 'cɔcɩnyʋa 'kɛ 'nägäsä 'kʋ gboo.

³² Ɩ yi gbä 'nɩ ‑pʋpɛɛ 'mnö n yi'anyɩ ‑mɔɔ yëku yi Laagɔ kä ŋoo nä, 'nɩ n yi 'kʋ wɔtɔ 'pɛpɛlɩä.

³³ Laagɔɔ ‑ʋ nyɛ lä 'kʋ wɔtɔlɩɩ nä, ʋ kʋ'anyɩ yëku anyɩ 'fɩɩn! Ɩ kʋ sɔɔ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan