Bìoball air-loidhne

Wlɔmʋ‑dunyʋä 14 - GOD - u2

‑Naa ci ‑lä ‑n ‑liee' nyenyi‑wälɩ
( 1 Kolɛ 4.3‑5 ; 8.1‑13 ; 10.23‑33 )

¹ Nyɩkpɔɔ' ‑lɔɔ ‑ɔnö pɔlötɛtɛɛ ‑lätee lä ‑mɔɔ ‑see nä, a yibhë ɔɔ' kläsä. Sä ɔ bhobho lä nä, a ‑yä sɔɔ 'na bhlää ‑lä 'kʋ.

² Nyɩkpɔɔ' ‑nɔnɔ ‑kʋ ‑lɔɔ 'nɩ ɔ bhobho nynä ‑mä ɔ yi mii 'nɩ ɔ yi lülülɩɩ 'fɩɩn lü. 'Nɩ nyɩkpɔɔ' lɔɔ ‑ɔɔ ‑wʋ lä pɔlötɛtɛ 'mnö sä ‑see nä, ɔ lü ‑lɛ 'tatɩ.

³ ‑N gä lü nä, ‑naa wloo lä ‑ɔɔ lü ‑wʋ lä nä ‑dʋdʋkʋ. 'Ɩzä kä nyɩkpɔ 'nö lü nä, ɔɔ' ci lä ‑ɔ lü lä nää' ɔɔ' nyenyi. ‑Ɔnöza bhää? kä Laagɔ ‑tlɔɔ wlɩ.

⁴ 'Nɩ ‑mɔɔ kpʋkpɔ lä ‑n ‑liesɩ nä, ‑n plöö‑ bhää? Kä ‑n kpʋkpɔ lä ‑n ‑liee' ‑gänʋnyɔ. Kɔ ‑bhlü ‑zɔɔ ‑o, kɔ 'nynigo 'kʋ ‑o, ɔɔ' käänyɔ ‑bhlo 'gä lä ɔɔ' yëkuu' ‑wälɩ ci. 'Nɩ sä Kwlienyɔɔ ‑kä lä 'päwä nä, ɔ yi gbä 'nɩ ɔ yi 'kʋ 'nynigolɩ mii.

⁵ Nyɩkpɔɔ' ‑nɔnɔ ‑kʋ ‑lɔɔ 'nɩ ɔ ci nynä ‑mä, ylʋʋnʋ nä, ʋmʋʋ‑ ‑zi ‑mɔɔ' ylɩɩ 'fɩɩn 'kʋ. 'Nɩ ‑nɔnɔ ci nynä ‑mä ylɩɩ 'fɩɩn kɩ ‑bhlüo. ‑Mä nyɩkpɔ nyɩkpɔɔ' sä ɔ bhobho lä nä, ɔ ‑känö sɔɔ plɛkʋ.

⁶ Nyɩkpɔ kä ylɩɩ 'mʋ gbäzö nä, Kwlienyɔɔ' ‑zä ɔ nʋ lä sɔɔ. 'Nɩ nyɩkpɔ kä 'sɩɩ lü nä, Kwlienyɔɔ' ‑zä ɔ lü lä. ‑Ɔnöza bhää? ɔ kä lü nä, ɔ bhään Laagɔ. 'Nɩ nyɩkpɔɔ' ‑lɔɔ ‑ɔɔ lü ‑wʋ lä nä, Kwlienyɔɔ ‑zä ɔɔ' lü ‑wʋ lä, 'nɩ ɔ bhään 'sɩɩ Laagɔ ɩɩ' ‑za.

⁷ A ni 'yi naa, ‑anyɩa nëëdëë' nyɩkpɔ ‑bhlo 'coo ‑wʋ kʋ 'nɩ ɔ yëkuu' zëkpëa 'kä ɔmɔ ‑bhloo' laa plöö‑. 'Nɩ nyɩkpɔɔ' 'ku ‑wʋ 'sɩɩ ɔ yëkuu' ‑za.

⁸ ‑Ɔnöza bhää? ‑A ‑kʋ lä zëkpëkʋ nä, Kwlienyɔɔ' ‑zä ‑a ‑kʋ lä. 'Nɩ kä ‑a gä 'sɩɩ kuu‑ nä, Kwlienyɔɔ' ‑zä ‑a kuu‑ lä. Nä ‑a yi 'ku ‑o, ‑aa lä 'ku ‑o, ‑a ‑glö Kwlienyɔɔ' nyɩkpa.

⁹ Klisö kuu‑ lä nä, kɔ ‑glɔɔ 'kuëë ‑yä, 'kudukuë ‑o, ‑yäyänyʋä ‑o, ɔ 'kä waa' Kwlienyɔ 'plö.

¹⁰ Nä, ‑mɔɔ, ‑ɔnözä 'nɩ ‑n ci bhä ‑n ‑liee' nyenyii? 'Nɩ ‑mɔɔ, ‑ɔ ‑kʋ bhä ‑lɔɔ 'nɩ ‑n wloo bhä ‑n ‑lie ‑dʋdʋkʋʋ? Laagɔɔ' 'titee 'kädɛɛ' ‑jlëa 'kʋ nä, ‑anyɩ 'fɩɩn yi ‑lɔɔ kʋ.

¹¹ Ɩ ‑jɩjlɔ Laagɔ‑bɔɔgʋʋ 'mnö nynä ‑mä, ‑Amʋ Kwlienyɔɔ Laagɔ nä, n ‑yä. Kä n ci ylä nynä ‑mä Kä nyɩkpaa 'fɩɩn kä'ä ‑kokoowli dëlü glu 'pä. 'Nɩ nyɩkpaa 'fɩɩn yi'i 'ŋnu fään 'sɩɩ.

¹² Nä nyɩkpɔ nyɩkpɔɔ' sä ɔ ‑nʋ lä nä, ɔ yi sɔɔ ci Laagɔ dëlüü'.

¹³ Nä, aa' ci ‑läyɩɔ a ‑liesɩɩ' nyenyi. ‑Mä a 'sänyɩ nynä ‑mä aa ‑lä a ‑liesɩ lʋʋ ‑blɔkʋ sɩä. Wa yiu 'kʋ dɛlɩɔ 'nɩ wa yi 'kʋ ‑gëbë ‑gëbë. Wa yiu 'sɩɩ ‑gozo 'nɩ wa yi ‑zɔɔ bhlü.

¹⁴ N ‑yi sɔɔ 'nɩ n ‑känɩ plɛkʋ nynä ‑mä, Kwlienyɔ Zozii' 'mnö nä, lülülʋʋ ‑wʋ ‑kʋ 'nɩ ʋ 'kä ‑gesi yëku ‑kä. ‑Mä nyɩkpɔ kä bhobho nynä ‑mä, lülülʋnʋ ‑kä ‑gesii yëku nä, ‑lɔɔ' lülülʋʋ yi ‑gesi yëku kään ɔɔ' ‑za.

¹⁵ Naa, lülülʋʋ' ‑zä ‑n gä ‑n bheli ‑yä ‑n bhɛŋnɔ 'sɔ nyäkälɩɩ' 'ŋʋ nä, ‑wawʋʋ 'mnö ‑nn nämnö yɩɔ lä. Lülülʋʋ, ʋmʋʋ‑ ‑kä ylä 'ŋnö 'nɩ ‑n nuë ylä ‑n ‑liee' zëkpë, ‑bhlɛ Klisö kuu‑ 'sɩɩ ɔɔ' ‑za.

¹⁶ ‑Lʋʋ nää‑ lä anyɩa' ‑za nä, aa' gbä ‑lä 'nɩ nyɩkpa 'kʋʋ wloo nynä ‑mä ‑lɛɛ nyonyu.

¹⁷ A ni 'yi naa, Laagɔɔ' 'Leyiduu 'mnö wälɩɩ' ‑wʋ ‑lɛɛlüwälɩ plöö, 'nɩ ɩɩ' ‑wʋ 'sɩɩ nʋmnä ‑wälɩ plöö. Ɩ ‑glö 'yigëgbɩ, ɩyä 'kʋ wɔtɔlɩ ɩyä ‑jäkä. ‑Nɩnɩ 'mɩ Kplɔɔkplɔɔ‑wugɔɔ nyɛ lä.

¹⁸ Nyɩkpɔ kä 'sɔɔ Klisö ‑gä nʋ nä, kä Laagɔ ‑waa ɔɔ' wälɩ, 'nɩ nyɩkpa ŋomänöɔ 'sɩɩ.

¹⁹ Nä, sa 'fɩɩn ‑a yi lä nʋ 'nɩ 'kʋ wɔtɔlɩ yi lä yi 'nɩ 'cɔcɩnyʋa yi lä 'tɛtɩ kään nä, ‑a ‑ya tään sɔɔ.

²⁰ Nä ‑naa 'bhlü lä lülülɩɩ' wälɩ 'kʋ 'nɩ ‑n 'gä Laagɔɔ' lebhee nyima! ‑Ɛɛɛ, 'zaazɩ nä nyɩkpɔ yi mii 'nɩ ɔ yi lülülɩɩ 'fɩɩn lü. ‑Mä ‑n gä lʋʋ lü 'nɩ ɩ kä ‑kʋ nynä ‑mä ʋ yi ‑n ‑lie nyenyi 'yii fään nä, sä ‑n nʋ lä nä, kä sɔɔ ‑wʋ lä nää‑.

²¹ Nä, ɩ ‑ŋwa yɩ 'kʋ nynä ‑mä, nyɩkpɔɔ' lü ‑läyɩɔ mnɛ, ɩyä ɔɔ' 'mnä ‑läyɩɔ 'bhlä 'bhlä nʋ. Nyɩkpɔɔ' nʋ ‑läyɩɔ lʋʋ‑ yi lä ɔ ‑lie nyenyii 'yii 'suu nä.

²² ‑N gɩ plɛkʋ ‑kään nynä ‑naa sä ‑n bhobho lä nä, sɔɔ gëë 'yi nä, ‑n ‑yä Laagɔ 'sɔ pää lɩɩ lä. ‑Ɛɛɛ, nyɩkpɔɔ' nʋnʋgbɩ 'nöɔ wälɩklë yëku fä nä, ɔ yä 'pʋ.

²³ ‑Mä nyɩkpɔ kä lʋʋ lü 'nɩ ɔɔ' plɛ 'nö bhlü ‑lɔɔ' ‑lʋʋ' ‑za nä, ‑lɔɔ' nyɩkpɔɔ nä, kä ɔɔ' nʋ ‑wʋ lä 'nää, ɔ yii ‑jämɩ 'mnö 'nii. ‑Ɔnöza bhää? ‑Lɔɔ' nyɩkpɔɔ' nʋnʋsa ‑yä pɔlötɛtɛɛ 'sɔɔ mʋʋ ‑wʋ yëkuu'. Nyɩkpɔ kä lʋʋ nʋ 'nɩ ɔɔ' plɛ 'nö ‑lɔɔ' ‑lʋʋ' ‑za bhlü nä, ɩ ‑glö nyenyi.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan