Bìoball air-loidhne

Wlɔmʋ‑dunyʋä 13 - GOD - u2

'Bhlɩ 'kämänyʋa a 'ŋʋwa 'klʋkpä
( 1 Pɩɛ 2.13‑17 )

¹ Nyɩkpɔ nyɩkpɔ nä, ɔ 'ŋʋ 'kämänyʋä 'klʋkpää. ‑Ɔnöza bhää? Nyɩkpɔ nä, Laagɔ 'nöɔ ‑tëbhu nyɛɛ‑ nynä ‑mä ɔ 'kämä nä, ɔɔ' ‑lä 'kämä. Nä nyɩkpaa 'fɩɩn‑ 'kämä lä nä, Laagɔ nyɩwa‑ lä ‑lɔɔ' ‑tëbhuu.

² Nyɩkpɔ 'nö 'kämänyʋa 'klʋkpää 'ŋʋ nä, ‑lɔɔ' nyɩkpɔɔ, kɔ cɩcɩɔ lä. Sä Laagɔ ŋʋʋ‑ lä sä nä, sɔɔ ‑lɔɔ' nyɩkpɔɔ' ŋʋ ‑wʋ ‑lä 'klʋkpä. 'Nɩ nyɩkpɔɔ' lɔɔ ‑ɔ ‑yä Laagɔ 'sɔ bhlää lä 'kʋ nä, ɔ yëku‑ ɔ jlüü lä Laagɔɔ' gbʋgblɛɛ 'kʋ.

³ Nyɩkpɔ kä ɔɔ' zëkpëa 'mnö 'nää nʋ nä, ɔɔ' ‑guu ‑wʋ 'bhlɩɛ 'mnö 'kämänyʋa. ‑Mä nyɩkpɔ kä nyenyi nyenyi nää nä, ‑wa 'kämä lä nä, ɔ ‑kä 'nɩ ɔ 'kwa ‑guu. ‑Nn ‑wʋ ‑waa nynä ‑mä ‑n 'gä 'bhlɩɩ 'mnö 'kämänyʋä ‑guu ‑a? ‑Ɔ gä sɔɔ nä, ‑n nʋ 'nägägbɩ ‑mä wa yi‑i ‑kpacɛ klä.

⁴ ‑Ɛɛɛ, 'kämänyʋa nä, Laagɔ‑ wa nʋ lä 'sɩɩ ‑gä, ɩyä wa 'kä gbä ‑n 'gä 'nägägbɩ nʋ. Nä ‑n gä gbenyenyii 'mnö ‑kʋ nä, ‑n ‑kä 'nɩ waa' ‑ŋänö 'kä‑ä 'bhlä. Wa ‑kä 'päwä ‑yä wa 'kä‑ä gbäylɩ ‑sä. 'Nɩ wa kä‑ä 'sɩɩ gbäylɩ ‑sä nä, ‑ɛɛ ‑wʋ 'flɛɛ‑! 'Kämänyʋa kä nyɩkpa gbäylɩ ‑sä nä, ‑Laagɔ‑lebhe wa nʋ lä. ‑Agbäkɛɛ ‑wa bhɛɛ‑ lä nä, kɛ pana lä Laagɔɔ' gbʋgblɛɛ ʋ ‑kä lä gbenyenyinyɔɔ' ‑za nä.

⁵ Ɩ ‑kä ylä 'ŋnö nä, ɩ ‑ŋwa 'kʋ nynä ‑mä a 'ŋʋwa 'klʋkpää' ‑yä Laagɔɔ' gbʋgblɛɛ' ka'anyɩ ‑kä 'kʋ yii. 'Nɩ ‑anyɩa plɛ sonö‑anyɩ 'sɩɩ nynä ‑mä ‑a ‑kä 'nɩ ‑a yi sɔɔ nʋ.

⁶ Ɩmɩɩ‑ ‑kä lä 'sɩɩ 'ŋnö 'nɩ a 'pɛɛ lä ‑gɔmnää' lapoo. ‑Ɛɛɛ, ‑wa ylä lä lapoo nä, Laagɔ‑ ‑lobhuwa lä 'sɩɩ nynä wa nʋ ‑lɔɔ' lebhee.

⁷ Nä, sä a ‑kä 'nɩ a yiwa lä 'nyɛ nä, a 'nyɩwa sɔɔ. ‑Gɔmnaa' lapoo nä, a 'pɛɛnʋ. ‑Ɔnö monii a kä ‑kä nä, a 'nyɩɔnyɛ. ‑Lʋa ‑kä lä ‑guusä nä, a ‑guunʋwa. ‑Lʋa a yi lä 'klʋkpää' 'ŋʋ nä a 'ŋʋwa 'klʋkpää.

A wamä ‑wamä
( Matie 22.35‑40 ; 1 Zään 3.11‑23 )

⁸ Aa' kään ‑lä nyɩkpɔɔ' dlu. Dluu a yi lä nyɩkpɔɔ' ‑za kään nä, ʋmʋʋ‑ plöö‑ lä nynä ‑mä a wamä ‑wamä. ‑Ɔnöza bhää? Nyɩkpɔ kä ɔ ‑liesɩ ‑waa nä, ‑Jlämaa 'mä ɔ ŋʋ lä 'klʋkpää wɩa.

⁹ 'Nɩ ‑Jlämaa nä, a yia. Ka ci lä nynä ‑mä, ‑naa 'ylä ‑lä ‑n ‑liee' 'ŋnɔ, ɩyä ‑naa 'ylä lä ‑n ‑liee' 'wli. ‑Naa 'bhlä ‑lä ‑n ‑lie. ‑Naa ghlü lä. [‑Naa lü ‑lä ‑kpläkplö ‑dläfʋɛ.] ‑Naa 'yii zlaa lä ‑n ‑liee' lʋʋ. ‑Jlämönö, ɩyä ‑mɔɔ ‑lɩɩ 'fɩɩn ‑ɩ ‑too ylä ‑mɔɔ nä, ɩɩ' 'wlusäädä plöö‑ lä nynä ‑mä, sä ‑n ‑waa lä ‑n yëku nä, ‑n wamä sɔɔ ‑n ‑lie.

¹⁰ Nyɩkpɔ kä ɔ ‑liesɩ ‑waa nä, ɔɔ' nʋ yɩɔ ɔ ‑lie nyenyi. 'Nɩ ‑wawʋ nä, ʋ ‑glö ‑Jlämaa' 'nägäsää' 'klʋkpää 'ŋʋlɩ.

A ‑ya ‑ghlɩlɩ ‑mä kä Klisö yi

¹¹ A ni yi ‑a, 'tänyɩnɛ 'mnö ‑a ‑kʋ ylä nä, ɩ ‑ŋwa 'kʋ nynä ‑mä a glɔɔ yɩ. ‑Anyɩa ‑lɔɔ nëë' ‑bhalɩɩ nä, kɩ ‑sanyɩ bhä gwë, ‑mä ‑pɛpɛɛ ‑a yä ylä Klisö 'kʋ ŋoo nä, ɩ ya‑anyɩ kpänyɩ 'mɛ.

¹² 'Cucukpaa ka 'kä ylä ‑dʋdʋkʋ bhɩä, kä zëlüü yi lä nä, a ‑ya ‑sä yɩ 'cucuu 'mnö nʋnʋgbɩɩ 'fɩɩn gwë ‑yä a ‑ya plä yɩ zëlüü 'mʋ nynä tëvë‑kotu.

¹³ A ‑ya nää nynä zëlügää' nämʋnyʋä. ‑Aa 'plö ‑läyɩ ‑leegbi lünyʋä. ‑Aa 'plö lä nʋgbii' 'mnänyʋä ‑yä nʋ 'ka‑anyɩ 'bhlä. ‑Aa nʋ ‑läyɩɔ 'klʋtɛtʋgbɩ. ‑Aa nää ‑läyɩɔ ‑käpä ‑käpä. ‑A ‑taa yɩ 'kʋ bhläälɩɩ ‑yä luëzüü 'yi.

¹⁴ A kʋ yɩ nynä Kwlienyɔɔ Zozi Klisö ɩyä sä 'yɛkɛɛ ‑waa lä nä, aa cie lä sɔɔ a yëku.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan