Bìoball air-loidhne

Wlɔmʋ‑dunyʋä 12 - GOD - u2

‑Laagɔ‑zëkpëë' sa ‑kʋ lä nä
( Efɛ 4.1‑16 ; 1 Kolɛ 12.12‑27 )

¹ Nä bhelie ‑yä bhɛŋwnɩänyɩ‑, Laagɔɔ' ŋäzö yibhëlɩɩ' ‑za nä, n 'ylänö'anyɩ wälɩklë ‑bhlo. Amää‑ plöö‑ lä nynä ‑mä, a ‑sä a yëku ‑yä anyɩa' zëkpë Laagɔɔ' ‑za. Kɩ ‑kʋ lä nynä 'cibhii' lɛɛ‑ nää‑ kpänyɩ 'nɩ ‑ɛ ‑kplɔɔ lä Laagɔ dëlü nä. Ɩmɩɩ‑ plöö‑ lä Laagɔ dëlü bʋbɔlɩ 'titi.

² Sä a ni lä ‑mää zëkpëkʋ 'yi nä, aa' nää ‑lä sɔɔ. A ‑taa Laagɔ 'yi ‑yä ʋ 'kä anyɩa' bhobhowluu 'cɩcɩ. Ɩ yi gbä 'nɩ a yi Laagɔɔ pɔlösa yibhë. Sää‑ nää‑ lä nä, 'nɩ sää‑ ‑kä lä 'tʋ 'kʋ nä, ɩyä sää‑ ‑kplɔɔ lä nä, a yi sɔɔ yibhë.

³ Nä, Laagɔɔ' plɛkʋmɛnɔɔ 'mnö, ʋ nyɛ'ɛ 'nää, ɩmɩɩ‑ ‑kä 'ŋnö 'nɩ n sonö'anyɩ lä. Sä aa' ‑wʋ lä ‑kʋ nä, aa bhobho lä sɔɔ a yëkuu'. Nyɩkpɔ nyɩkpɔ ghlää ɔɔ' pɔlötɛtɛɛ 'mnö ‑yä ɔ 'kä ɔ yëku yibhë.

⁴ A ni 'yi naa, sä nyɩkpɔɔ' 'yɛkɛ ‑kä lä nëmü ‑bhutukpä nä, 'nɩ 'yɛkɛɛ 'mnö nëmüü' nʋ ‑wʋ lä lebhe‑cëa ‑bhlo nä,

⁵ sɔɔ ‑anyɩ, ‑a ‑zu lä 'flɛ ‑mä, Klisö 'mnö nä, ‑a ‑glö 'yɛkɛ ‑bhlo. 'Nɩ nyɩkpɔ nyɩkpɔ plöö‑ ɔ ‑liee' 'yɛkɛɛ nämö.

⁶ 'Nɩ Laagɔ paa‑ lä nyɩkpa 'nyuu nä, ʋ nyɛɛ‑ nyɩkpɔ nyɩkpɔ ɔɔ' dä. Ɩ kä plöö‑ nynä ‑mä Laagɔɔ' nüdö ‑n yi ‑sää nä, ‑lɔɔ' nüdöö ‑yä pɔlötɛtɛɛ 'sɔ mʋʋ yëkuu'.

⁷ Kɩ kä plöö‑ nynä ‑mä ‑mɔɔ 'gä 'cɔcɩnyʋä ‑gä nʋ nä, ‑n nʋwa ‑gä! Kɩ kä plöö‑ nynä ‑mä ‑mɔɔ yi 'cɔcɩnyʋa cɩa nä, ‑n cɩwa!

⁸ Kɩ kä plöö‑ nynä ‑mä ‑mɔɔ 'gä 'cɔcɩnyʋä plɛɛ' bhlüa nä, ‑n bhluwa plɛɛ! Kɩ kä plöö‑ nynä ‑mä ‑mɔɔ 'gä wlɩɩ' ‑sä ‑yä ‑n 'gä ‑n ‑liesɩ 'nyɛ nä, ‑n 'nyɛnʋwa plɛkʋmɛnɔɔ 'mnö! Kɩ kä plöö‑ nynä ‑mä ‑mɔɔ 'gä 'cɔcɩnyʋä 'tie nä, ‑n 'köka ‑yä ‑n nʋ ‑lɔɔ' lebhee. Kɩ kä plöö‑ nynä ‑mä ‑mɔɔ yi ŋäzönyʋä klää nä, ‑n kläänʋwa ‑pʋpɛɛ 'mnö!

⁹ Anyɩa ‑wawʋʋ nä, ʋ 'plö nyaasäsä ‑waawʋ. A zɔbhlɛmä gbenyenyi ‑yä a 'nä sɩä lä 'nää nʋlɩ 'kʋ.

¹⁰ A wamä ‑wamä anyɩa' pɔlöö 'yi nynä 'cɔcɩɩ' bhelie ‑yä bhɛŋwnɩä. A 'ŋʋŋʋ kpänyɩ 'klʋkpää.

¹¹ A 'köka ‑yä a nʋ Kwlienyɔɔ ‑gä. A nʋɔ ‑gä ‑mɔɔ anyɩa' pɔlöö 'yii ‑yä aa' 'ŋʋɩ ‑lä 'zɛnɔɔ'.

¹² Anyɩa' Kwlienyɔɔ' dë 'tɛɛlɩɩ nʋ anyɩa' ‑jäkä. A kä mielɩɩ' ‑kʋ nä, a yibhë ‑bɛɛsä, ɩyä a bhibhie 'kɔɔkɔ!

¹³ 'Cɔcɩnyʋaa' ‑lʋa ‑ŋwa lä kläälɩ 'kʋ nä, a klänʋwa. Nyɩkpaa' ‑lʋwa ‑wa pla'anyɩ lä 'kʋ nä, a klʋwa 'nää.

¹⁴ ‑Wa sa'anyɩ lä gbäylö nä, a 'pʋwa 'nyu. A 'pä 'nyuu ‑mä aa gbütë ‑lä.

¹⁵ ‑Wa nʋ lä ‑pʋpɛ nä, a ‑yʋwa 'sɔ nʋ ‑pʋpɛ. ‑Wa tu lä nä, a ‑yʋwa 'sɔ 'tu.

¹⁶ A 'nunu 'mʋ anyɩ ‑bhlobhlo pää. Aa' tään ‑lä ‑lɛkädɩɩ käälɩ ‑mä a wamä ‑ɩɩ ‑wʋ lä 'mʋ täkpɔsä ‑kä nä. Aa' bhobhoo ‑lä a yëku dɩgälɩ‑käänyʋää'.

¹⁷ Nyɩkpɔ ka'anyɩ nyenyi ‑nʋ nä aa' nʋɔ lä nyenyi. A tään 'nää nʋlɩ nyɩkpa 'fɩɩn 'yikʋ.

¹⁸ Ɩ kä ‑kʋ nynä ‑mä a yii mii nä, anyɩ wlɩɩ ɩ ‑kʋ lä. A ‑yä nyɩkpaa 'fɩɩn 'sɔ pää 'kʋ wɔtɔlɩ kʋ ‑mɔɔ.

¹⁹ 'Naa ‑wawanyʋänyɩ‑, a 'nä ‑sä lä a yëkuu' kpä ‑mä, a ‑taa Laagɔ 'yi ʋmʋʋ‑ 'gä anyɩa' 'wlu gbʋgblɛ 'pä. ‑Ɔnöza bhää? Ɩ ‑jɩjlɔ Laagɔ‑bɔɔgʋʋ 'mnö nynä ‑mä, Kwlienyɔ Laagɔ lä ‑Amʋʋ‑ 'gä lä gbʋgblɛ 'pä, Sä nyɩkpɔ nyɩkpɔ ‑ŋwa lä 'kʋ nä, ‑Amʋʋ‑ 'gɔɔ lä sɔɔ plʋʋ.

²⁰ ‑Mä ‑mɔɔ nä, ‑Naa ‑zɔbhlɛgbänyɔ ‑gbugbe kɔ 'bhlä nä, ‑N 'nyɩɔ lülülɩɩ yä ɔ lü. 'Mnätʋ kɔ 'bhlä nä, ‑N 'nyɩɔ 'nyu ‑yä ɔ 'mnä. ‑N gä sɔɔ ‑nʋ nä, Kɩ ‑kʋ lä nynä ‑mä kä ‑n gbɔtɔnöɔ ‑kapo 'wluu.

²¹ ‑Na ‑taa lä ‑n yëku 'yi 'nɩ gbenyenyii 'kä‑ä sɩä. ‑Naa 'nägägbɩɩ ‑n 'bhlii 'kʋ ‑yä ‑n sɩä gbenyenyi.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan