Bìoball air-loidhne

Wlɔmʋ‑dunyʋä 11 - GOD - u2

Laagɔɔ' ‑wʋ 'Yizlɛnyʋä cɛɛ‑

¹ Nä, kä n ylä yɩ nynä ‑mä, kä Laagɔ cɛɛ‑ bhä 'Yizlɛnyʋä ‑a? ‑Ɔ, ‑yio! Sɔɔ ɩɩ' ‑wʋ ‑kʋ! ‑Ɔnöza bhää? ‑Amʋ ‑mä 'sɩɩ, n ‑glö 'Yizlɛyu. N ‑glö Ablaamʋʋ' 'lɔlʋnyɔ. 'Nɩ n bha Bɛzamɛɛ' 'lɔlʋʋ 'mnö.

² Laagɔɔ' ‑wʋ 'Yizlɛnyʋä cɛɛ‑. Kʋ ‑sʋwa wɛzä 'nɩ ʋ ŋʋwa‑ lä waa' dä. Sɩ ‑jɩjlɔ lä Laagɔ‑bɔɔgʋʋ 'mnö nä, aa bhä sɔɔ ‑yi ‑a? Elii ‑bhʋtʋʋ bhlä Laagɔ dëlü 'Yizlɛnyʋää' ‑za nä,

³ ɔ laa Kwlienyɔ Laagɔ‑, wa yä ‑naa 'plɔfɛtɩnyʋa 'bhlä. Wa yä ‑naa 'cibhi‑sädöö 'fɩɩn wlä. ‑Amʋ ‑bhlo 'coo 'nɩ n ‑too ylä 'ylʋzɔɔ. 'Nɩ wa tänö'ö ylä 'sɩɩ nynä wa kä'ä 'bhlä!

⁴ Naa, 'tänyɩɩ Elii cii‑ lä sɔɔ nä, säsä Laagɔ ‑sonöɔ bhɛɛ? Laagɔ lä ‑N ni, n ‑sä nyɩkpaa' ‑bhɛgö ‑ngbɔɔsɔ (7.000) 'nɩ n ŋʋwa‑ waa' dä. ‑Kpläkplö ‑laagɔɔ ʋ plöö‑ lä Baalö nä, wa 'nʋ ‑läzä dëlü 'wlʋ sä glaa.

⁵ Naa, 'tänyɩnɛ ‑a ‑kʋ lä 'mnö nä, sɔɔ ‑säkä ‑säkä lä. Laagɔɔ' plɛkʋmɛnɔɔ 'mnö nä, ʋ ‑sä nyɩkpa 'nɩ ʋ ŋʋwa‑ waa' dä.

⁶ Naa, Laagɔɔ' plɛkʋmɛnɔɔ 'mnö ʋ kä yɩ ‑nɩnɩ ‑nʋʋ nä, kɩ plöö‑ lä nynä ‑mä nyɩkpɔɔ' nʋnʋ‑lebhe‑ ʋʋ' wloo ‑wʋ 'fɩa. Ɛmɛ ʋ kä bhä 'fɩa ‑wloo nä, kɩ plöö‑ bhɛ lä nynä Laagɔɔ' plɛkʋmɛnɔɔ' ‑wʋ plɛkʋmɛnɔ plöö‑.

⁷ Sɩ sä bhä ‑zɔɔ? Kɩ sä lä ‑zɔɔ nynä ‑mä, sä 'Yizlɛnyʋä tään bhlä nä, waa' ‑wʋ sɔɔ nii‑. ‑Mä nyɩkpaa' ‑lʋa Laagɔ ‑sä 'nɩ ʋ ŋʋʋ‑ lä waa' dä nä, sä wa tään bhlä nä, wa nii‑ sɔɔ. ‑Mɔɔ' ‑lʋa nä, kä Laagɔ ‑gbä 'nɩ wa 'tɛmä‑ 'nyukwli.

⁸ Ɩ ‑jɩjlɔ Laagɔ‑bɔɔgʋʋ 'mnö nynä ‑mä, Laagɔ yʋwa 'ylaa 'kʋ 'pää. Wa ‑kä 'yi klʋ ‑mä waa' ‑lä sä 'ni. Wa ‑kä 'nyukwli ‑mä waa' ‑lä 'nu. 'Nɩ ‑zɩkää 'titi nä, wa ‑kʋ ‑lätee sɔɔ.

⁹ 'Nɩ 'Loyo Davidö cii‑ 'sɩɩ, ɔ lä Waa' ‑glɩsɩɩsɩ 'kʋʋ lülülɩɩ nä, Ɩ 'plö waa' ‑gbosuu' lʋʋ‑ yiwa lä klä nä! Ɩ 'plö ‑gbɔɔ‑sokwli ‑yä ɛ klʋwa! Ɩ gbä ‑yä wa bhlü ‑zɔɔ. 'Klüü wa ‑nʋ lä nä, Ɩ gbä ‑yä 'kwlɩ 'kwa kplɔɔ!

¹⁰ Waa 'yi nä, ɩ wlɔɔ 'kʋ ‑yä waa' kä sä 'ni. ‑N gëmuwa ‑yä wa 'pä kɔmatu!

Bhɩädaa 'Zufʋnyʋa yi ‑lɔɔ nëë' ‑bha
( Matie 21.40‑43 ; Efɛ 2.7‑13 )

¹¹ Naa, kä n ylä lä nynä ‑mä, 'Zufʋnyʋä nä, kwa ‑gozo 'nɩ wa ‑bhlü ‑zɔɔ 'kwläklwä ‑a? Yio! Sɔɔ ɩɩ' ‑wʋ ‑kʋ! ‑Maa, waa' 'focloo 'mnö, ‑mɔɔ 'yigäda‑bhlɩɩ 'mnö nyɩkpaa ‑ghlää 'nɩ Laagɔ puwa‑ lä. Kä Laagɔ ‑nʋ lä sɔɔ ‑yä 'Yizlɛnyʋä 'kä luëzü plä.

¹² Nä 'Yizlɛnyʋää' 'focloo bhlülɩɩ 'mɩɩ‑ gä 'nää 'kädänä 'ylʋzɔɔ ‑lä nä, 'nɩ sä waa' ‑wʋ lä mii‑ nä, sɔɔ‑ gä yɩ 'yigädabhlɩ 'kʋʋ nyɩkpaa 'nää 'kädänä 'kʋ kwlie nä, 'tänyɩɩ wa 'kä lä 'ylɩbhɔ‑ ‑yä wa 'kä lä bʋkʋ Laagɔ ‑yii nä, 'nää Laagɔ 'kä lä kwlie nä, aa' ‑lä bhä nëkʋ 'tɔɔtɔɔ ‑a?

¹³ Nä, anyɩmɔɔ‑ ‑wʋ lä 'Zufʋnyʋä plöö‑ nä, anyɩ‑ n soo ylä. ‑Ɔnöza bhää? ‑Amʋ nä, nyɩkpaa' ‑lʋwa ‑waa ‑wʋ lä 'Zufʋnyʋä plöö‑ nä, wamä yëku Laagɔ ‑lobho'o ‑lä. Nä kä n sonö'anyɩ ylä ‑nynä ‑mä ‑tëbhuu Laagɔ nyɛɛ'ɛ lä nä, ʋ ‑kä'ä 'tʋ kpänyɩ.

¹⁴ N 'kä gbä ‑yä n 'bhunyʋä 'kä luëzü plä. Ɩ yi gbä 'nɩ n yi lʋä ‑zio ‑lɔɔ nëë' ‑sä.

¹⁵ ‑Ɛɛɛ, sä Laagɔ ‑bha lä waa' 'gbʋʋ nä, sɔɔ kä ‑gbä 'nɩ 'ylʋzɔkʋnyʋä ‑yä Laagɔ 'sɔ ‑glää nä, ‑amʋʋ‑ ‑yi ‑mɔɔ Laagɔ kwa bʋkʋ wlɩ ‑tlaa' sɩ 'kä kʋ nä! Kɩ 'kä lä kʋ nynä ‑mä 'Zufʋnyʋä ‑yä 'kwiee nëë' ‑bha wa ‑yä zëkpëkʋ yi.

¹⁶ ‑N gä 'flɔɔbhë 'klë 'kʋ ‑sä 'nɩ ‑n ga Laagɔ nyɛɛ‑ nä, 'klëa ‑a ‑too lä ‑lɔɔ nä a ‑glö yɩ 'sɩɩ Laagɔɔ' laa. ‑N gä 'sɩɩ cii‑ nynä ‑mä suu' sukplunʋ plöö‑ Laagɔɔ' lʋʋ nä, ‑lɔɔ' suu 'läbhɩɩ ‑mä 'sɩɩ, ɩ plöö‑ Laagɔɔ' lɩɩ.

¹⁷ 'Ɩzä kä suu' läbhɩ zio 'kä 'kʋ döɔ‑ 'nɩ, ‑mɔɔ, ‑mɔɔ plöö‑ lä 'kläpʋʋ' Oliviesuu' 'läbhʋ nä, wa kä‑ä Oliviesuu' 'titi 'läbhɩɩ' zio kä 'kʋ döɔ 'nɩ wa kä‑ä ɩɩ 'bhlëa 'mnö 'ŋʋʋ‑ nä, 'nɩ ʋʋ' sikplii kä ‑dʋdʋʋ 'mnö bhlʋʋ jlü 'nɩ ʋ kä‑ä 'kʋ ŋëëmʋ nä,

¹⁸ ‑nn ‑wʋ ‑kä 'nɩ ‑n 'gä suu' 'läbhɩɩ 'yii täkpɔ! ‑N gä ‑kä 'sɩɩ ‑waa nä ‑n yi ‑kä täkpɔ oo, ‑mä ‑n yibhë sɔɔ nynä ‑mä suu' sukpluu 'mʋʋ‑ bhɛnö lä ‑mä ‑mɔɔ 'nʋʋ ‑wʋ bhɛɛ‑!

¹⁹ ‑N yi 'sɩɩ ci nynä ‑mä, kwa döö‑ lä 'läbhɩ 'kʋ 'nɩ wa yi'i lä ɩɩ' bhlëë' 'ŋʋʋ!

²⁰ ‑Ɛɛɛ, 'zaazɩ ‑mä, ‑lɔɔ' 'läbhɩɩ bhɔɔ pɔlötɛtɛ ‑kä nä, ɩɩ' ‑zä ‑wa dɩɩ‑ lä 'kʋ. ‑Mä ‑mɔɔ nä, ‑naa pɔlötɛtɛ mɛɛ‑ gbä 'nɩ n ‑kä lä sä. Nä, ‑naa täkpɔ ‑lä ‑mä ‑n kää ‑ŋänö!

²¹ ‑Ɔnöza bhää? Laagɔ 'nö suu 'titii 'läbhɩɩ 'sɔɔ 'nɩ ʋ kɩ 'kʋ döö‑ nä, ‑mɔɔ mɔɔ‑ plöö‑ lä ‑gblüklëë' 'läbhʋʋ nä, ‑n fä ‑n yëku plɛ ‑mä Laagɔ 'nö‑ö ‑lä ‑kä 'sɩɩ cie!

²² ‑N yibhë sɔɔ nynä ‑mä Laagɔ nä, ʋ nää plɛkʋ ‑mä kʋ kään 'sɩɩ yëkuu'. Nyɩkpaa 'fɩɩn ‑wa yä lä ‑zɔɔ bhlü nä, kɔ ‑kamä lä waa' ‑za yëkuu'. ‑Mä ‑n gä ʋʋ' plɛkʋmɛnɔɔ' daa ‑kʋmʋ nä, kʋ namää plɛkʋ ‑naa ‑za. 'Nɩ ɩ 'nö sɔɔ kʋ nä, ‑mɔɔ ‑mä 'sɩɩ, sʋ döö‑ lä 'läbhɩɩ 'kʋ nä, ʋ yi‑i 'sɩɩ sɔɔ 'kʋ 'döö.

²³ 'Zufʋnyʋä nä, 'tänyɩ kä ‑lɔɔ ‑kʋ 'nɩ wa kä Laagɔ 'klʋ ‑tlaa 'nɩ wa kä pɔlötɛtɛɛ' ‑blɔɔ 'kʋ ‑yii nä, Laagɔ yiwa Oliviesuu 'titi ‑ya 'kplää bʋkʋ. ‑Ɔnöza bhää? Laagɔ ‑kä 'päwä 'nɩ ʋ yiwanyʋ bʋkʋ 'jɛnyɩ.

²⁴ Nä, ‑mɔɔ mɔ wa wɩä‑ lä ‑mɔɔ 'kläpʋʋ Oliviesuu 'yii nä, sä ‑nn bhɔɔ lä ‑kʋ nä, Laagɔ yä‑ä sɔɔ 'ŋʋ. Ʋ yä‑ä, Oliviesuu 'titi ‑ya 'kplää. Nä, 'Zufʋnyʋä ‑mä 'sɩɩ, ‑wa plöö‑ lä suu' 'läbhɩɩ 'titi nä, Laagɔ yiwa bʋkʋ waa' suu ‑ya 'jɛnyɩ 'nɩ wa ‑yʋsɔ yi 'kplää.

²⁵ Nä bhelie ‑yä bhɛŋwnɩänyɩ‑, 'klünö nä, kɩ ‑zizio bhä 'kʋ ‑mä n ‑waa nynä a yibhënɩ. Aa kä ‑kä a yëku wloo nynä ‑mä ka ‑yi dɩgälɩ. A ni 'yi naa, 'Yizlɛnyʋää' ‑nänʋä yi 'nyukwli 'tɛmädä kʋ ‑aaa, 'nɩ 'yigädabhlɩ 'mnö nyɩkpa 'fɩɩn yi Laagɔ yii.

²⁶ ‑Lɔɔ ‑tɛɛ 'Yizlɛnyʋa 'fɩɩn 'kä ylä ‑lɔɔ nëë' ‑bha. 'Sää ɩ ‑jɩjlɔɔ lä Laagɔ‑bɔɔgʋʋ 'mnö nynä ‑mä, Puënyɔɔ nä, Siyɔɔduu' ɔ 'kä lä ghlää. Ɔ yi Zakɔpʋʋ' 'lɔlʋnyʋa nyenyii yëku ‑sä.

²⁷ N yi waa' nyenyii 'mʋ 'kplɩ, ‑Nɩnɩ 'mɩɩ‑ plöö‑ lä 'naa mɛnʋʋ n ‑yʋwa 'sɔ 'kä lä mɛnö nä.

²⁸ Waa' ‑wʋ lä Kwlienyɔɔ' 'Nägädöö 'kʋ ŋoo nä, ɩ gbä 'nɩ wa 'plöö‑ yɩ Laagɔɔ' ‑zɔbhlɛgbänyʋä. 'Nɩ anyɩ, Laagɔ yi'anyɩ ylä ʋ yëku yëku jlüü. ‑Mä sä Laagɔ ‑sʋwa 'nɩ ʋ ŋʋwa‑ bhlä waa' dä nä, kʋ ‑wamänʋwa. Ʋ ‑wamänʋwa wa tɩtɩää' ‑za.

²⁹ Nä, Laagɔɔ' 'nää ʋ nyɛ lä nyɩkpɔ nä, ʋʋ' ‑sɔɔnya yɩɔ wlɩɩ', 'nɩ nyɩkpaa ʋ yä lä laa‑ lä nä, ʋʋ' cɛnʋwa yɩɔ.

³⁰ Kɩ ‑kʋ lä nynä ‑mä tɛɛtɛɛ nä, a yä bhɛ Laagɔ 'klʋkpää ‑sä. ‑Mä ‑pɛpɛɛ nä, 'Yizlɛnyʋä ‑sä yɩ Laagɔ 'klʋkpää' 'nɩ anyɩ Laagɔ yi'anyɩ yɩ ŋäzö yibhë.

³¹ Nä, saa ‑bhlo lä. Sä Laagɔ ‑yibhënö'anyɩ bhlä ŋäzö nä, wamä ‑mä 'sɩɩ, waa' ‑wʋ Laagɔ 'klʋkpää' ŋʋʋ‑ ‑mä, Laagɔ yiwa ŋäzö yibhë.

³² ‑Ɔnöza bhää? Kä Laagɔ ‑taa nyɩkpa 'fɩɩn yi 'nɩ wa ‑kʋ cɩcɩɔlɩɩ 'mnö ‑yä ʋ 'kä waa' ‑lefɩɩn ŋäzö yibhë.

Laagɔɔ' ‑wʋ 'ghlünɔɔ' 'bɛ

³³ ‑Ɛɛɛ! 'nää Laagɔ ‑kä lä nä, aa ‑wʋ 'kʋ mʋsä ‑kä! Ʋʋ' dɩgälɩɩ ‑yä ʋʋ' 'fikee 'sɔ ‑wʋ 'kʋ nyäka lʋʋ ‑kä! Sʋ dö lä ʋʋ' wälɩɩ nä, nyɩkpɔɔ' ‑lä sɔɔ yibhë. 'Nɩ sʋ yä lä 'ŋʋ nynä ‑mä ʋ yi nʋ nä, nyɩkpɔɔ' ‑lä 'kɔɔn sɔɔ 'mʋ 'nu.

³⁴ Laagɔ‑bɔɔgʋʋ cii‑, ʋ lä Nyɩkpɔ‑ ‑sä ‑yi bhä sä Kwlienyɔ Laagɔ bhobho lä nä yibhëë? Nyɩkpɔ ‑sä yio bhä ‑dɔɔ 'pää?

³⁵ Nyɩkpɔ ‑sä nyɛɛ‑ bhɛ tɛɛ Laagɔ 'nɩ ‑ɔnö dluu ʋ ‑kä bhää?

³⁶ ‑Lɩɩ 'fɩɩn‑ kʋ lä 'ylʋzɔɔ nä, Laagɔ‑ wlʋɩ‑. Ʋmʋʋ‑ ‑gbä 'nɩ ɩ ‑kʋ lä. 'Nɩ ɩɩ' ‑lefɩɩn plöö‑ lä 'sɩɩ Laagɔɔ' lɩɩ. Nä Laagɔ nä, 'klʋagba ŋënʋ 'kʋ, ‑pɛpɛɛ ɩyä 'kɔɔkɔɔ ‑za! Ɩ kʋ sɔɔ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan