Bìoball air-loidhne

Wlɔmʋ‑dunyʋä 10 - GOD - u2

'Zufʋnyʋä yä 'yigädabhlɩɩ 'mnö nyɩkpa wa ‑känö Kwlienyɔɔ ‑bhlo 'kʋ

¹ Bhelie ‑yä bhɛŋwnɩänyɩ‑, sä n ylä lä ‑mɔɔ 'naa pleyi nä, ɩmɩɩ‑ plöö‑ lä nynä ‑mä, n kä 'Zufʋnyʋää' ‑za bhibhie nä, n ‑waa nynä ‑mä Laagɔ ‑sʋwa ‑lɔɔ nëë'.

² Naa, n yi waa' ‑dläfʋɛ lü nynä ‑mä, wa ‑su kpänyɩ 'kʋ Laagɔɔ' ‑za. ‑Mä wa ‑su 'kʋ 'nɩ waa' ‑wʋ dɩgälɩ ‑kä.

³ Sä Laagɔ plüë lä nyɩkpɔ 'yigëënyɔɔ' nä, waa' ‑wʋ sɔɔ ‑yi. ‑Mä kwa ‑tään wamä 'titi waa' 'yigëëblɔ. Ɩ ‑kä 'ŋnö nä, Laagɔɔ' 'yigëblɔɔ waa' 'ylʋʋ ‑wʋ.

⁴ ‑Moyizöö' ‑Jlämaa nä, aa bhɩädä‑ plöö‑ lä Klisö. Nä ‑pɛpɛɛ nä, nyɩkpɔɔ' lɔɔ‑ kä ylä Klisöö' pɔlötɛtɛ nä, ɔ ‑glö yɩ 'yigëënyɔ.

⁵ 'Yigëëlɩɩ ghlää lä ‑Jlämaa' nä, kä Moyizö ‑jɩjlä ɩɩ' ‑za. Ɔ laa, Nyɩkpɔɔ' ‑lɔmɔ ‑ɔ yi lä ‑Jlämaa 'klʋkpää' 'ŋʋ nä, ‑Jlämaa yio 'pʋpʋɛ 'nyɛ.

⁶ ‑Maa, 'yigëëlɩɩ ɩ ghlää lä pɔlötɛtɛɛ 'mnö nä, kä Moyizö cii‑ 'ɩza nynä ‑mä, ‑naa ci ‑lä ‑mɔɔ ‑naa pleyi nynä ‑mä, ‑ɔ yi bhä Laagɔɔ' ‑gblää? Kä ‑n ci ylä nynä ‑mä Klisö ‑bha Laagɔɔ' ‑yä ɔ 'kä kwli!

⁷ ‑Naa ci lä 'sɩɩ nynä ‑mä, ‑ɔ yi bhä 'kudukʋ mʋʋ? Kɩ ‑kʋ ylä nynä ‑mä kä ‑n ci nynä ‑mä Klisö glɔɔ bʋkʋ 'kwiee.

⁸ Nä sä Laagɔ‑bɔɔgʋʋ ci bhä ‑lää' 'klünö? Ɩ ‑jɩjlɔ ‑mɔɔ nynä ‑mä, ciciwälɩ nä, ɩ mɛɛ‑ yëku, 'nɩ ɩ kʋ‑ʋ nëë', 'nɩ ɩ kʋ‑ʋ pleyii. ‑Lɔɔ' ciciwälɩɩ nä, ɩmɩɩ‑ plöö‑ lä pɔlötɛtɛɛ yëkuu' wälɩɩ ‑a ci lä nä.

⁹ Nä, ‑n gä wälɩ nëë' ‑sä 'nɩ ‑n gä cii‑ nynä ‑mä Zozii plöö‑ Kwlienyɔ nä, 'nɩ ‑mɔɔ ‑naa pleyii ‑n gä pɔlötɛtɛ kä nynä ‑mä Laagɔ gbä 'nɩ ɔ ‑glɔɔ 'kuëë nä, ‑n yi ‑lɔɔ nëë ‑bha.

¹⁰ A ni 'yi naa, pɔlötɛtɛɛ nyɩkpɔɔ ‑kä lä ‑mɔɔ ɔɔ' pleyii nä, ɛmɛɛ‑ gbä lä 'nɩ ɔ plö lä 'yigëënyɔ. 'Nɩ wälɩɩ ‑lɩɩ ɩ bha lä nyɩkpɔ nëë' nä, ɩmɩɩ‑ gbä lä 'sɩɩ 'nɩ ɔ bha lä ‑lɔɔ nëë'.

¹¹ Kä Laagɔ‑bɔɔgʋʋ ci lä nynä ‑mä, Nyɩkpɔ kä ɔɔ' pɔlötɛtɛ kä nä, plɛ 'nöɔ ‑lä 'kpɔsɔ.

¹² Nä 'Zufʋnyʋä ‑yä 'Glɛkönyʋa 'sɔ nä, wa ‑glö yɩ 'cë ‑bhlo. Waa ‑lefɩɩn ‑känö yɩ Kwlienyɔɔ ‑bhlo 'kʋ. 'Nɩ Kwlienyɔ nä, nyɩkpaa' ‑lefɩɩn ‑lɔɔ lä nä, kɔ nyɩwa 'nää.

¹³ ‑Ɔnöza bhää? Nyɩkpɔɔ' ‑lɔmɔ ‑ɔ yi lä Kwlienyɔ wälɩ 'pä nä, ɔ yi ‑lɔɔ nëë' ‑bha.

¹⁴ ‑Maa sä wa yio bhä laa? sä waa' ‑wʋ lää ɔɔ' pɔlötɛtɛ ‑kä nä! 'Nɩ sä wa yi bhä ɔɔ' pɔlötɛtɛ kään 'a? sä nyɩkpɔ 'nʋwa ‑wʋ lä ɔɔ' yëkuu' wälɩ ‑soo! 'Nɩ sä wa yi bhä 'nuu? nyɩkpɔɔ' ‑wʋ ɔɔ' 'döö ‑bie!

¹⁵ 'Nɩ sä wa yi bhä ɔɔ' 'döö bie ‑kää mʋʋ? nyɩkpɔ 'nʋwa ‑kä 'gää ‑lobho. Ɩ ‑jɩjlɔ Laagɔ‑bɔɔgʋʋ 'mnö nynä ‑mä, Nyɩkpaa' ‑lʋa ‑wa bie lä 'nägädöö nä, waa' ‑kokokpüü' ‑wʋ nanɔɔ' 'bɛ!

¹⁶ ‑Mä waa' ‑lefɩɩn, waa' ‑wʋ Laagɔɔ' 'Nägädöö 'kʋ ŋoo‑. 'Plɔfɛtɩ Ezayii cii‑ nynä ‑mä, Kwlienyɔ Laagɔ‑, 'döö ‑a ‑sänʋwa lä nä, ‑ɔ ‑kä bhä ɩɩ' pɔlötɛtɛɛ?

¹⁷ Nä, sä nyɩkpɔ nuu‑ lä nä, sɔɔ‑ gbä 'nɩ ɔ kään lä pɔlötɛtɛ. 'Nɩ 'klüü ɔ ‑kä 'nɩ ɔ 'kä lä 'nu nä, Klisöö' ciciwälɩɩ 'mnö ɩ bha lä.

¹⁸ Nä, kä n ylä yɩ nynä ‑mä, 'Zufʋnyʋa' bhä wälɩnɩ nuu ‑a? Wa nuii‑ nä! Laagɔ‑bɔɔgʋʋ cii‑ 'sɩɩ nynä ‑mä, Wälɩnɩ nä, kɩ ‑ŋëë 'ylʋnʋzɔɔ' döö 'fɩɩn. Waa' ciciwälɩɩ kɩ ‑mʋ 'kɔɔn 'mnö döö 'fɩɩn.

¹⁹ Nä, kä n ylä lä nynä ‑mä, 'Yizlɛnyʋä nä waa' bhä nuu‑ ‑a? Moyizö 'mɔɔ‑ cii‑ lä tɛɛ nynä ‑mä, Laagɔ lä 'Bhlɩɩ' lɛɛ‑ ‑wʋ lä 'bhlɩ plöö‑ nä, N yi gbä 'nɩ a yi ɛɛ' luëzü plä. 'Nɩ 'bhlɩɩ lɛɛ ‑ɛnö 'mnö nyɩkpaa‑ ‑wʋ lä 'fika nä, N yi gbä 'nɩ waa' plɛkʋ yi'anyɩ si.

²⁰ 'Nɩ 'plɔfɛtɩ Ezayii ‑gbɛ lɔɔ wälɩklë, ɔ lä Laagɔ laa, Nyɩkpaa' ‑lʋa ‑waa tänö'ö bhɔɔ lä nä, wamää‑ nii'i. Nyɩkpaa' ‑lʋa ‑waa 'ylänö bhɔɔ lä lʋʋ nä, wamä n pana n yëku.

²¹ ‑Ɔ mʋ lä 'Yizlɛnyʋää' ‑za ci ‑kää nä, ɔ lä Laagɔ laa, Ylɩɩ 'fɩɩn 'kʋ nä, n tlaa 'bhlɩnɛ 'mnö nyɩkpaa wlɩ ‑mä, kwa cɩcɩɔ, 'nɩ wa ‑waa 'kʋ bhläälɩ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan