Bìoball air-loidhne

Filemɔɔ 1 - GOD - u2

Pɔlʋ bhää Filemɔɔ ‑yä 'cɔcɩnyʋa
( 2 Timo 1.1‑5 ; 3 Zään 2 , 6 )

¹ ‑Wawa‑bheli Filemɔɔ‑, ‑mɔɔ mɔ ‑a ‑yɔsɔ nʋʋ lä Kwlienyɔɔ' lebhee 'kʋ nä, ‑amʋ Pɔlʋ, ‑ɔ 'plöö‑ lä Zozi Klisöö 'ŋnöö ‑za ‑jɩnyɔɔ' nä, n ‑yä bheli‑ Timotee 'sɔ, ‑anyɩ‑ jɩjlä‑ä lä 'bɔɔgʋnʋ.

² 'Nɩ bhɛŋnɔ Apɩa, ɩyä bheli‑ Asipʋ, ‑ɔ ‑yä‑anyɩ 'sɔ nää‑ 'nɩ ‑a ‑mʋ lä Kwlienyɔɔ' 'Nägädöö' ‑za 'kʋ bhlää ‑kää nä, ‑a jɩjlʋwa 'sɩɩ 'bɔɔgʋnʋ. 'Cɔcɩnyʋa 'fɩɩn ‑wa 'wlää lä ‑naa daa 'wlu nä, ‑a jɩjlʋwa 'sɩɩ 'bɔɔgʋnʋ.

³ Laagɔɔ ‑ʋ plöö‑ lä ‑a 'Bä nä, ɩyä ‑yä Kwlienyɔɔ Zozi Klisöö' 'ŋnöö 'mnö, 'nyupälɩ ŋënö'anyɩ 'kʋ ‑yä a 'ni 'kʋ wɔtɔlɩ.

Pɔlʋ bhää Laagɔ Filemɔɔ' ‑wawʋʋ' ‑za

⁴ 'Tänyɩɩ 'fɩɩn 'mnö n bhibhie lä nä, ‑mɔɔ Filemɔɔ, kä n luë ‑naa dä 'kʋ, 'nɩ n bhään 'naa Laagɔ.

⁵ N nu ‑naa yëkuu' ‑dläfʋɛ. Wlä kä ‑n ‑kä kpänyɩ 'cɔcɩɩ‑bhelia ‑yä bhɛŋwnɩaa' ‑wawʋ. 'Nɩ ‑n ‑yi 'nɩ ‑n ‑kä Kwlienyɔ Zozii' pɔlötɛtɛ.

⁶ N bhibhie ‑naa 'wlu Laagɔ ‑yä pɔlötɛtɛɛ ‑ɛ 'jɛnyɩnö‑anyɩ lä 'nɩ ‑n ‑kä lä nä, ɛ 'kä 'nägäsä 'mʋ 'tɛmä. Ɩyä 'klüü 'fɩɩn ‑ɩ nää‑ lä 'nɩ ‑a yi lä pana Klisöö' ‑gänʋlɩɩ' 'mnö nä, ‑n 'gɩɩ nʋ.

⁷ Nä ‑wawʋʋ ‑n ‑kä lä nä, bheli‑, ʋ ‑gbä 'nɩ 'cɔcɩnyʋa 'fɩɩn plɛ yä bhlü. Ɩ ‑kä 'ŋnö nä, 'naa ‑jäkaa ‑zumë 'nɩ n nii‑ 'tɛtɩ.

Pɔlʋ lä Filemɔɔ tlaa Onezimö wlɩ
( Kolɔ 4.7‑9 ; 1 Kolɛ 13.4‑7 )

⁸ Klisöö' 'ŋnöö 'mnö, n yi bhä mii 'nɩ n yi‑i bhä soo nynä Filemɔɔ‑, ‑n ni wälɩklënä 'mä ‑n 'gä lä nʋ!

⁹ ‑Mä ‑wawʋʋ ‑ʋ ‑kʋ‑anyɩ lä pää nä, ʋmʋʋ‑ gbä ylä 'nɩ n tlä‑ä ylä wälɩklënä. ‑Ɛɛɛ! ‑Amʋ Pɔlʋ lä! 'Naa 'kɔgwlɛlɔɔ 'nɩ wa ŋʋʋ'ʋ lä Zozi Klisöö' ‑za ‑jɩɩ'.

¹⁰ ‑Amʋʋ‑ 'ylänö‑ö lä wälɩklënä. 'Yunɔ ‑ɔ plöö‑ lä Onezimö nä, ɔɔ' ‑za, kä n klä‑ä lä bho, 'nɩ n bhibhie‑e lä. Ɔ ‑glö yɩ 'naa 'yu. ‑Mää ‑jɩɩ' ‑säklönö 'mnö, ‑mɔɔ n ‑kʋ 'nɩ n ‑gänöɔ lä.

¹¹ Onezimö nä, 'tänyɩɛ ‑ɛ yä lä 'plö nä, ɔɔ' bhɛ ‑pɛɛ gba ‑kä ‑naa ‑za. ‑Mä ‑zɩkä nä, ɔ ‑kä yɩ gba. Ɔ ‑kä yɩ ‑pɛɛ gba ‑naa ‑za, 'nɩ ɔ ‑kä yɩ gba 'naa ‑za.

¹² Nä, kä n 'ylɩbhɔɔ ylä. Kä n lä‑ä mɔ lä ‑mä, ‑n yibhë yɩ sɔɔ nynä ɔ ‑kʋ yɩ nynä 'naa 'yɛkɛɛ 'pɛlʋ.

¹³ ‑Amʋ nä, n ‑waa bhɛ 'flɛ nynä ‑mä ɔ kʋ'ʋ ‑mää yëku. Ɩyä 'tänyɩɩ n ‑kʋ lä ‑mää ‑jɩɩ' Klisöö' 'Nägädöö' ‑za nä, ɔ kä'ä ‑naa bhlëë' ‑gä nʋ.

¹⁴ ‑Mä ɩ ‑ŋwa 'kʋ nynä n 'nu 'fɩa ‑naa nëë'. Ɩɩ' kä ‑kɛ kʋ nynä ‑mä, kä n klä‑ä nyepi nyepi nynä ‑n nʋ 'nägägbɩ nä, sä ‑n nii lä 'yi nä, ‑n klɩɩ sɔɔ.

¹⁵ Onezimö nä, kɔ 'nä yi‑i bhlä gwë ‑sä 'pɛpɛ, ɩyä 'tänyɩ kä bhɛ ‑lɔɔ kʋ ‑yä ɔ 'kä‑ä bhɛ yëku yi 'fɩɔ 'fɩɔ.

¹⁶ Ɔɔ' yi yɩɔ nynä geyu. Ɔ ‑zi yɩ geyu 'kʋ. Ɔ ‑glö yɩ ‑anyɩa ‑wawa‑bheli. ‑Amʋ 'tasɩɛ, ɔ känö'ö yɩ kpänyɩ gbʋ. 'Nɩ ‑mɔɔ ‑mä 'sɩɩ, ɩ ‑ŋwa 'kʋ nynä ‑mä ɔ kamänö‑ö yɩ sää gbʋ kpänyɩ. Ɔ plöö‑ yɩ ‑anyɩa bheli 'yɛkɛɛ 'mnö, 'nɩ ɔ plöö‑ yɩ ‑anyɩa 'cɔcɩɩ' bheli.

¹⁷ Nä, Filemɔɔ‑, ‑n gä 'zaazɩ sɔɔ ‑yi nynä ‑mä, n plöö‑ ‑naa 'nagɔ nä, ‑n tlaa Onezimö wlɩ. ‑N klɔɔ nynä ‑n ‑näsä ‑amʋ ‑n klä bhlä nä.

¹⁸ Wälɩ‑nyenyii' 'cënänä ɔ yi‑i bhä nʋ ‑o, ‑naa lʋʋ 'titi ɔ yi bhä 'kʋ 'bhlü ‑o, ‑lɔɔ' gbʋʋ nä, ‑amʋʋ‑ ‑lä känʋ yɩ.

¹⁹ ‑Amʋ Pɔlʋ, ‑amʋ 'titii‑ jɩjlä ylä wälɩklënä, 'nɩ n ci lä nynä ‑mä, n yi‑i ‑lɔɔ' dluu plʋʋ. 'Nɩ nn' yɩɔ 'sɩɩ ‑kä ‑yä n 'kä‑ä luë. ‑Mä ‑mɔɔ 'titi ‑n ‑yi sɔɔ nynä ‑mä ‑n ‑kä 'sɩɩ 'naa dlu. Ʋmʋʋ‑ plöö‑ lä nynä ‑mä, ‑naa zëkpëa ‑glö 'naa laa.

²⁰ Bheli‑, n bhibhie‑e kpänyɩ! ‑N 'pä Kwlienyɔ plɛkʋ ‑yä ‑n yi'i 'kʋ. ‑A ‑yä Klisö 'sɔ 'jɛnyɩlɩɩ ‑za, ‑n gbä ‑yä 'naa plɛ 'kä bhlü.

²¹ N yi sɔɔ nynä ‑mä, 'tänyɩɩ n jɩjlä‑ä lä 'bɔɔgʋnʋ nä, 'naa 'klʋkpaa' ‑za, wälɩnɩ n 'ylänö‑ö lä nä, ‑n yii nʋ 'nɩ, ‑n yii nëkʋ 'tɔtɔ.

²² Anyɩa' bhibhielɩɩ' ‑bɔɔ, n bhobho nynä kä wa kä'ä ylä 'yi ‑taa nä, wa kä'ä 'yi ‑taa nä, n yi'anyɩ ‑mɔɔ yëku yi. Nä bheeje bheli‑, ‑n tään 'naa pudä!

Bhlüüdää' bhää‑wälɩ

²³ 'Naa ‑jɩɩ' 'kʋ 'wläänyɔ Epaflasö, ɔ lɔ bhänö‑ö. Zozi Klisöö' ‑za, wa ŋʋʋ‑anyɩ lä ‑mää ‑jɩɩ' ‑anyɩ 'sɔ.

²⁴ 'Naa lebhee' 'kʋ nʋʋnyʋa Makö, ‑yä Alisötakö, ‑yä Demasö, ‑yä Lukö, wlä wa bhänö‑ö 'sɩɩ.

²⁵ Kwlienyɔ Zozi Klisöö' 'nyupälɩɩ ŋënö'anyɩ 'kʋ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan