Bìoball air-loidhne

Nʋnʋgbɩɩ 9 - GOD - u2

Sɔlʋ yä ɔɔ' zëkpëa Kwlienyɔ Zozii 'nyɛ
( Nʋnʋ 22.6‑16 ; 26.12‑18 ; Gala 1.11‑16 )

¹ ‑Lɔɔ' 'tänyɩɛ 'mnö nä, kä Sɔlʋ 'sänyɩ‑ bhä 'sää 'titi 'clöö nynä Kwlienyɔɔ' 'kʋgënyʋa ɔ 'kwa klä ‑yä ɔ 'kwa 'bhlä. Ɩ ‑kä 'ŋnö nä, ɔ ‑mʋ 'Cibhisänyɔ 'kädɔɔ yëku,

² 'nɩ ɔ yio soo nynä ‑mä ɔ jɩjlä Damasöduu' Laagɔ‑bhitii' 'bɔɔgwɩ ‑yä ‑lɔɔ' 'bɔɔgwɩɩ' 'nyɩɔ ‑tëbhu ‑yä, nyɩkpaa' ‑lʋa ‑wa nämnö lä Kwlienyɔɔ' ‑Blɔɔ 'kʋ nä, ɔ 'kwa 'kʋ bhlü. Wa yi ŋwadie 'plö ‑o, wa yi 'ŋwnɩä 'plö ‑o, ɔ 'kwa klä ‑yä, ɔ 'kwa gʋä ɔ 'kwa Zolizalɛmʋduu' ‑lä.

³ Nä Sɔlʋ ‑kʋ bhɛ lä mʋdä nä, ɔ mɛ bhɛ Damasö‑duu yëku 'nɩ 'kpobhu ‑bhlo 'kʋ, zëlü ‑ghlä ‑laagɔɔ' 'nɩ ɩ yio 'kʋ ŋänɩä. Ɩ ‑nʋ 'sää ‑düdë 'nɩ a ‑binöɔ 'kʋ.

⁴ 'Nɩ ɔ yi ‑zɔɔ bhlü. Ɔ ‑bhlü lä ‑zɔɔ nä, ɔ nuu‑ nuwälɩ 'nɩ ɩ ‑sonöɔ, ɩ lä Sɔlʋ‑! Sɔlʋ‑! ‑Ɔnözä 'nɩ ‑n nyɛɛ'ɛ bhä nyäkälɩɩ?

⁵ Sɔlʋ lä Kwlienyɔ‑, ‑naa 'ŋnö bhää? Nuwälɩɩ lä ‑amʋ Zozii lä. ‑Amʋ ‑n ŋʋ lä nyäkälɩɩ'.

⁶ ‑N ‑bha 'kʋ ‑yä ‑n plä duu' ‑mä, sä n 'gä lä nʋ nä, wa yi‑i sɔɔ paa.

⁷ ‑Mä nyɩkpaa‑ ‑yä Sɔlʋ 'sɔ nää‑ bhlä nä, wa 'nynigo‑ 'nɩ nükpëë' ‑slʋwa. Waa ‑wʋ gbʋ ‑döölɩ mii. Wa nu bhä nuwälɩɩ ‑mä waa' 'ni bhɔɔ nyɩkpɔ 'yi.

⁸ 'Nɩ Sɔlʋ yi 'kʋ ‑bha. Ɔɔ' 'yii welio‑ bhɛ 'flɛ ‑mä, ɔɔ' 'ni bhɛ sä. Kä wa ‑klɔɔ sɔ 'nɩ wa yio Damasöduu' fä.

⁹ ‑Mä ɩ ‑nʋ ylɩɩ taa, Sɔlʋʋ' ‑wʋ sä nii‑. Ɔ ‑wʋ 'sɩɩ ‑lü, 'nɩ ɔɔ' ‑wʋ mnää‑.

Zozii ‑soo Ananɩasö nynä ɔ mʋ ɔ 'ni Sɔlʋ 'yi

¹⁰ ‑Mɔɔ Damasöduu' nä, Kwlienyɔɔ' 'kʋgënyɔ ‑bhlo ‑kʋ bhä ‑mɔɔ 'nɩ wa lɔɔ bhä Ananɩasö. Kwlienyɔ ‑ghlɔ 'yi 'nɩ ɔ lɔɔ‑. Ɔ lä Ananɩasö‑! Ananɩasö lä Kwlienyɔ‑, ‑n ni ‑amʋ!

¹¹ 'Nɩ Kwlienyɔ yio soo, ɔ lä ‑n ‑bha 'kʋ! Ɩyä 'tliee wa laa lä 'Yigëë ‑Kpomuu nä, ‑n bhlie! ‑N mʋ Zudasöö' 'gbëa 'mnö ‑mä, nyɩkpɔ ‑bhlo ‑kʋ ‑mɔɔ wa lɔɔ Sɔlʋ, ɔ ‑glö Tasöduu' nyɩkpɔ. ‑N mʋ ‑yä ‑n 'ylɔɔ bʋkʋ. ‑A gbää lä ‑lää 'kʋ nä, ɔ bhibhie.

¹² Wälɩ ‑ghlɔɔ 'yii 'nɩ ɔ nii‑ nyɩkpɔ 'yi, ɔmɔ wa laa Ananɩasö 'nɩ ɔ ‑plä 'nɩ ɔ yio ‑klɔgbö 'wlu gbɛɛ ‑yä ɔ 'kä sä 'ni.

¹³ Ananɩasö lä Kwlienyɔ‑, n nuu‑ 'nɩ nyɩkpaa ‑bhutukpä cii‑ nynä ‑mä nyɩkpɔyɩ nä, kɔ ‑nʋ kpänyɩ ‑mɔɔ Zolizalɛmʋduu' ‑naa 'kʋgënyʋa nyenyi.

¹⁴ 'Nɩ ‑mänömö nä, 'Cibhisänyʋaa' 'cifinyʋa nyɩɔ‑ ‑tëbhu nynä ‑mä nyɩkpaa 'fɩɩn‑ bhibhie lä ‑naa 'ŋnöö 'mnö nä, ɔ bhluwa 'kʋ.

¹⁵ Ɔ cii‑ lä sɔɔ nä, 'nɩ Kwlienyɔɔ yio soo, ɔ lä ‑n mʋ ‑mä nyɩkpɔyɩ nä, kä n ‑sɔɔ 'nɩ n ŋʋɔ ɔɔ' dä ‑yä, n 'kɔ 'kʋ ghlää ɔ 'kä lowubhlɩɩ bhlü ‑yä ɔ 'kä gbä ‑mɔɔ' nyɩkpaa ‑yä waa' 'loyua wa 'kä 'naa 'ŋnö yibhë. Ɔ 'kä 'sɩɩ gbä ‑yä 'Yizlɛnyʋä kä'ä yibhë.

¹⁶ Sä 'kwlɩ 'kɔ lä bhɩä 'naa ‑za nä, ‑amʋ 'titi yio sɔɔ paa.

¹⁷ Ɔ cii‑ lä sɔɔ nä, 'nɩ Ananɩasö yi mʋ. Ɔ ‑ŋëë lä 'nɩ ɔ plä lä ‑bhutuu' nä, kɔ ‑gbɛɛ Sɔlʋ ‑klɔgbö 'kʋ. 'Nɩ ɔ yio soo, ɔ lä bheli Sɔlʋ‑, Kwlienyɔ Zozii, ‑ɔ ‑ghlä‑ä lä ‑blɔkʋ 'yii dä ‑n yi lä nä, ɔmɔɔ‑ ‑lobho'o lä ‑yä ‑naa 'yii 'kä welio, ‑yä n 'gä sä 'ni, ɩyä Kplɔɔkplɔɔ‑wugɔɔ 'kä‑ä 'sɩɩ kpänyɩ 'kʋ kwlii.

¹⁸ Ɔ cii‑ lä sɔɔ nä, 'kpobhuu ‑bhlobhlo 'kʋ, kä kʋkwɩ ‑bha Sɔlʋʋ 'yii, ɩ gboto‑ 'nɩ ɔɔ' 'yii yi welio. Ɔ ‑bha 'kʋ 'nɩ ɔ yi mʋ 'nɩ wa yio 'nyu 'wlu 'ŋʋ.

¹⁹ 'Nɩ ɔ yi lülülʋʋ lü 'nɩ nyämʋ yio 'mnö yi. Sɔlʋ ‑sä ylɩɩ ‑zio Damasöduu' 'cɔcɩnyʋa yëku.

Sɔlʋ sää Damasöduu' Kwlienyɔɔ' 'Nägädöö

²⁰ Ɔɔ' yɩɔ ‑bʋä ‑mä kɔ cie‑ yɩ ‑mɔɔ' Laagɔ‑bhitii 'mnö nyɩkpaa' cɩalɩ 'kʋ. Ɔ sonʋwa bhä, ɔ lä Zozii 'mɔɔ‑ plöö‑ lä Laagɔ ‑Yowli.

²¹ ‑Mä nyɩkpaa 'fɩɩn ‑wa ‑poo bhlä Sɔlʋ 'nyukwli nä, kä nükpëë' ‑slʋwa. Wlä ‑mä nyɩkpɔnɔ nä, Zolizalɛmʋduu' 'cɔcɩnyʋa ‑wa bhibhie lä Zozii' 'ŋnöö 'mnö nä, ɔmɔɔ‑ nʋwa bhɔɔ nyenyii ‑a? Kä ɔɔ' bhä ‑mää ‑yi 'kpokposä ‑yä ɔ 'kä 'cɔcɩnyʋa klä ɔ 'kwa ‑säklöö' 'ŋʋ ‑yä ɔ 'kwa Zolizalɛmʋduu' 'Cibhisänyʋaa' 'cifinyʋa dëlü fä ‑a?

²² ‑Mä Sɔlʋʋ' ciciwälɩɩ ‑kä bhɛ dë 'tɛɛsä. 'Nɩ ɔ yi Damasöduu' 'Zufʋnyʋa sɩä ciciwälɩɩ 'mnö. Ɔ sä bhä ɔɔ' ciciwälɩɩ ‑zɔɔ 'pɛlɩ 'pɛlɩ, 'nɩ ɔ sonʋwa bhä nynä ‑mä Zozii 'mɔɔ‑ plöö‑ Klisöɔ.

²³ Ɩ ‑nʋ 'tänyɩ 'nɩ 'Zufʋnyʋa yi 'mʋ 'nunu nynä wa 'kɔ 'bhlä.

²⁴ ‑Mä sä wa 'ŋʋʋ‑ bhlä 'kʋ nä, Sɔlʋ nii‑ 'sɔɔ 'yi. ‑Gägäzëlü ‑yä 'sabo nä, wa koo bhä 'duu ‑zɔɔ 'wlʋʋ ‑döö 'fɩɩn ‑yä wa 'kä Sɔlʋ klä wa 'kɔ 'bhlä.

²⁵ ‑Maa, 'tänyɩ ‑bhloo' 'sää 'sabo, Sɔlʋʋ' 'kʋnämʋnyʋa ŋʋɔ‑ ‑takwëë' 'nɩ wa yio 'duu' gbü ‑papʋʋ 'wluu ghlää, 'nɩ wa yio ʋʋ' klë kwlie.

Sɔlʋ ‑kʋ Zolizalɛmʋduu'

²⁶ 'Nɩ Sɔlʋ yi Zolizalɛmʋduu' mʋ. Ɔ ‑ŋëë lä ‑mɔɔ nä, ɔ ‑tää nynä ‑mä ɔ 'kä 'cɔcɩnyʋa nëëdë yi ‑mä, waa' ‑lefɩɩn ‑guunöɔ bhä. Waa' ‑lä bhä tee ɔɔ' pɔlötɛtɛ ‑kä nynä ɔ plöö‑ 'zaazɩ 'cɔcɩnyɔ.

²⁷ Ɩ ‑kä 'ŋnö nä, kä Banabasö bhlüo‑ 'kʋ 'nɩ, ɔ yio Zozii' lobho lobhonyʋa yëku fä. 'Nɩ, ‑mɔɔ Damasöduu' ‑blɔɔ 'kʋ, sä Kwlienyɔɔ ‑ghlä lä Sɔlʋ 'yi 'nɩ sä Kwlienyɔɔ ‑sonöɔ lä nä, ‑lɔɔ' wälɩɩ 'fɩɩn ɔ yiwanyɩ ‑sää. 'Nɩ sä Sɔlʋ bhlüü‑ lä pɔlötɛtɛ 'kʋ 'nɩ, ɔ cɩa‑ lä ‑mɔɔ Damasöduu' Zozii' 'ŋnöö 'mnö nä, Banabasö ‑sänʋwa 'sɩɩ 'sɔɔ 'dö.

²⁸ 'Bhää bhɛ ‑lɔɔ' 'tänyɩɛ 'mnö 'kʋ nä, kä Sɔlʋ ‑yä Zozii' lobho lobhonyʋa 'sɔ nämnö bhɛ 'kʋ, ‑mɔɔ Zolizalɛmʋduu'. Ɔ ‑kä bhä 'tɛtɩ 'nɩ, Kwlienyɔɔ' 'ŋnöö 'mnö ɔ sää bhä Laagɔɔ' 'Nägädöö.

²⁹ 'Zufʋnyʋa ‑wa ci bhlä 'Glɛköwälɩɩ nä, ɔ ‑yʋwa 'sɔ bhlää bhä wälɩklüü' ‑nɩnɩ 'kʋ. Mä wamä nä, kwa tään bhä nynä ‑mä wa 'kɔ 'bhlä.

³⁰ 'Cɔcɩnyʋa nuu‑ lä wälɩɩ nä, kwa ‑fä Sɔlʋ Sezaleeduu'. Wa ‑ghlää ‑mɔɔ 'nɩ wa yio Tasöduu' fä.

³¹ ‑Lɔɔ' 'tänyɩɛ 'mnö nä, 'cɔcɩgbüü 'mnö ‑wɔtɔ bhɛ 'kʋ. Zudee‑bhlɩɛ 'mnö, ‑yä Galilee‑bhlɩɛ 'mnö, ɩyä Samalii‑bhlɩɛ 'mnö 'cɔcɩgbüü ‑wɔtɔ bhɛ 'kʋ. 'Cɔcɩnyʋa 'fɩɩn ‑kä bhɛ 'tɛtɩɩ. Wa ŋʋ bhɛ kpänyɩ Kwlienyɔ 'klʋkpää'. 'Nɩ Kplɔɔkplɔɔ‑wugɔɔ gbä 'nɩ waa' ‑zunɔɔ 'ŋʋnöɔ bhä 'kʋ 'kɔɔkɔ.

Pɩɛlö ‑yamä Enee Zozii' 'ŋnö 'mnö

³² Nä Pɩɛlö ‑bhlü 'bhlɩɛ 'nɩ ɔ ‑mʋ ‑kaaa 'nɩ ɔ ‑ŋëë Lidaduu'. Ɔ ‑mʋ ‑mɔɔ' 'cɔcɩnyʋa yëku.

³³ Ɔ ‑ŋëë lä nä, ɔ nii‑ nyɩkpɔ ‑bhlo, ɔmɔ wa laa bhä Enee, ‑mä kɔ kplää‑ bhä. Ɔ puu‑ lä gupa‑gbëtü 'kʋ nä, ɩ nʋ bhɛ 'ylʋbɔ ‑ngbaatä.

³⁴ ‑Mä Pɩɛlö ‑sonöɔ ɔ lä Enee‑, Zozi Klisö yä‑ä yamä! ‑N ‑bha 'kʋ ‑yä ‑mɔɔ 'titi lʋlʋ ‑naa ‑bɔɔgɩɛ! Ɔ cii‑ lä sɔɔ nä, 'nɩ 'vlikiti, Enee yi 'kʋ ‑bha.

³⁵ ‑Mä Lidaduu' ‑yä Salɔɔduu' nyɩkpaa 'fɩɩn, wa nii‑ lä wälɩ 'yi nä, kwa nyɛɛ‑ waa' zëkpëa Kwlienyɔ wlɩɩ'.

Tabita kuu‑ 'nɩ ɔ ‑glɔɔ 'kuëë

³⁶ 'Duu' wa laa bhlä Zopee nä, 'cɔcɩŋnɔ ‑bhlo ‑kʋ bhä ‑mɔɔ 'nɩ, wa lɔɔ bhä Tabita. 'Glɛkönyʋa, Dlɔkasö wa lɔɔ bhä. Dlɔkasö‑ŋnöö sä ‑zɔɔ nynä ‑mä 'lue. 'Ŋnɔnɔ nä, ɔ nʋ bhä kpänyɩ nyɩkpa 'nää, 'nɩ ɔ klää bhä ŋäzönyʋä.

³⁷ ‑Mä ylʋʋ ‑kʋ ‑lɔɔ 'nɩ gu ‑klɔɔ, 'nɩ ɔ yi 'ku. 'Nɩ wa yi ɔɔ' ‑gɛzɛɛ büda, 'nɩ wa yie 'tasɩ‑bhutuklë 'mnö puë.

³⁸ ‑Mä ‑mɔɔ Zopeeduu' 'cɔcɩnyʋa nuu‑ bhä nynä Pɩɛlö ‑kʋ Lidaduu'. 'Nɩ Lidaduu' bhɔɔ 'sɩɩ Zopee‑duu dä ‑tlʋ. Ɩ ‑kä 'ŋnö 'nɩ wa ‑lobho ‑mɔɔ nyɩkpa 'sɔ. Wlä wa sonöɔ nynä ‑mä bheeje, ɔɔ' bʋä ‑lä ‑mä, ɔ yi fäfä!

³⁹ ‑Mä wa ‑soo lä 'gää Pɩɛlö nä kɔ ‑yʋwa 'sɔ ‑yii ‑mɔɔ yëkuu'. Ɔ ‑ŋëë lä 'nɩ wa yio 'tasɩ‑bhutuklë 'mnö fä. ‑Mä 'kuzëlü‑ŋwnɩa 'fɩɩn ‑yio yëku 'nɩ wa tu bhä. 'Tänyɩɩ Tabita ‑yä bhlä nä, ɩɩ' 'kwëtii ‑yä ‑bänöö ɔ kplä bhlä nä, 'nɩ wa yii Pɩɛlö paa.

⁴⁰ ‑Mä Pɩɛlö ‑gbä 'nɩ nyɩkpaa 'fɩɩn yi ‑zɔɔ wlʋʋ. 'Nɩ ɔ yi ‑kokoowli glu 'pä 'nɩ ɔ yi bhibhie. 'Nɩ ɔ yi ‑gɛzɛɛ 'klʋ tlaa, ɔ lä Tabita, ‑n ‑bha 'kʋ! Ɔ cii‑ lä 'gää 'sɔɔ nä, kä 'ŋnɔɔ welie‑ 'yii. Ɔ nii‑ lä Pɩɛlö 'yi 'nɩ, ɔ yi 'kʋ gögä 'nɩ ɔ yi sä kʋ.

⁴¹ Pɩɛlö ‑klɔɔ sɔ 'nɩ ɔ yio 'kʋ bhɛlɩä. 'Nɩ ɔ yi 'cɔcɩnyʋa ‑yä 'kuzëlüŋwnɩa 'sɔ laa, 'nɩ ɔ yiwa Tabita tlaa. Ɔ yä bhɛ 'kuëë glɔɔ.

⁴² Tabitaa' 'kuëë glɔɔ‑wälɩɩ nä, kä Zopeeduu' nyɩkpaa 'fɩɩn nui‑. Ɩ ‑gbä 'nɩ nyɩkpa ‑bhutukpä ‑kä bhɛ Kwlienyɔɔ' pɔlötɛtɛ.

⁴³ Pɩɛlö ‑gwlɛ 'pɛpɛlɩä ‑mɔɔ Zopeeduu'. Mnɛkwi‑bhlänyɔ Simɔɔ' dää ‑lɔɔ ɔ ‑plä bhä 'kʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan