Biblia Todo Logo
Bìoball air-loidhne

- Sanasan -

Nʋnʋgbɩɩ 8 - GOD - u2


Sɔlʋ ŋʋ 'cɔcɩnyʋa nyäkälɩ 'kädɩ

1 Nyɩkpɔɔ ‑ɔ plöö‑ bhlä Sɔlʋ nä, wa bhlää‑ lä Etɩɛnö nä, kɔ ‑wamä sɔɔ. ‑Lɔɔ' ylʋʋyɩ 'kʋ, ‑lɔɔ Zolizalɛmʋduu' 'cɔcɩnyʋa cie‑ lä sää 'titi nyɛnɩälɩ 'kʋ. 'Cɔcɩnyʋa 'fɩɩn ‑dloo 'nɩ wa ‑jɛjɛ Zudee‑lëkpëa ‑yä Samalii‑lëkpëa 'mnö sä. ‑Mä Zozii' lobho lobhonyʋa nä, waa' ‑wʋ ‑guumʋ.

2 Etɩɛnö kuu‑ lä nä, Laagɔ‑bʋbɔnyʋä 'kädʋa tuo‑ 'sää 'titi kpänyɩ. Wamää‑ ‑zizie ɔɔ' ‑gɛzɛɛ.

3 ‑Maa, Sɔlʋ nä, ɔ ylä bhlä 'sää 'titi nynä ‑mä ɔ 'kä 'cɔcɩnyʋa nuë nä, ɔ plä bhä nyɩkpaa' 'gbüü 'mnö, 'nɩ ɔ klʋwa bhä. Ɔ 'ŋʋʋ 'ŋwnɩä ‑yä ŋwadie 'nɩ ɔ ŋʋwa bhä ‑jɩɩ'.


Filipʋ ‑mʋ Samaliibhlɩ 'kʋ 'Nägädöö bie ‑kää

4 'Cɔcɩnyʋa ‑wa ‑jɛjɛ bhɛlä sä nä, wa mʋ bhä dää 'fɩɩn 'nɩ wa sää bhä Kwlienyɔɔ' 'Nägädöö.

5 ‑Nɩnɩ 'mnö, Filipʋ ‑mʋ Samaliibhlɩ 'kʋʋ 'du ‑bhlo 'kʋ 'nɩ ɔ cii‑ ‑mɔɔ Klisöö' yëkuu' wälɩ.

6 ‑Mä 'yiziziogbɩɩ Filipʋ ‑nʋ lä ‑mɔɔ nä, 'nyɩkpaa 'fɩɩn‑ nu bhlä ɩɩ' wälɩɩ 'nɩ ‑wa nii bhlä 'sɩɩ 'yi nä, wa fään bhɛ kpänyɩ Filipʋʋ' ciciwälɩɩ plɛ yëku.

7 ‑Zizinyenyii bha bhä nyɩkpa ‑bhutukpä kätää'. Ɩ pä bhä 'saglö 'nɩ ɩ bhʋwa bhä kätää'. 'Nɩ 'kpläkplänyʋä ‑yä 'bhlʋlɛ ‑käänyʋä ‑bhutukpä yamä bhä 'sɩɩ.

8 Ɩ ‑kä 'ŋnö nä, 'duu 'mnö nyɩkpaa 'fɩɩn, ‑pʋpɛ bhlʋwa‑ kpänyɩ.

9 ‑Maa, nyɩkpɔ ‑bhlo ‑kʋ bhä ‑lɔɔ' duu 'mnö. Ɔmɔ wa laa bhä Simoo. Ɩ nʋ bhɛ 'tänyɩ 'nɩ ɔ ‑kʋ bhlä ‑mɔɔ 'nɩ ɔ nʋ bhlä guu' ‑daminë. ‑Daminënä ɔ nʋ bhlä nä, a slaa bhä kpänyɩ Samaliinyʋä nükpëë'. Simoo nä, kɔ laa bhä ɔ yëku nyɩkpa 'kädɔ.

10 'Nɩ 'duu 'mnö ‑mä 'sɩɩ nä, 'bhää 'yua 'kʋ ‑aaa ‑yä ŋëë 'kɔgwlɛnyʋa 'kʋ nä, kä wa puo bhä 'nyukwli kpänyɩ. 'Nɩ wa ci bhä wlä Laagɔɔ' 'Päwaa wa laa lä 'Päwö 'Kädaa nä, nyɩkpɔnɔ 'mɔɔ‑ plöa lä.

11 Ɩ ‑nʋ bhɛ 'sää 'titi 'tänyɩ 'nɩ Simoo bhlü bhlä ɔɔ' guu ‑daminëa 'kʋ, 'nɩ ɔ 'niniwa bhlä plɛkʋ. Ɩmɩɩ‑ ‑kä 'ŋnö 'nɩ wa ‑känöɔ bhlä plɛkʋ.

12 ‑Maa, Laagɔɔ' 'Leyiduu ɩyä Zozi Klisöö' yëkuu' 'Nägädöö Filipʋ ‑sänʋwa bhɛ lä nä, ɩ ‑kä 'ŋnö 'nɩ 'ŋʋʋ 'ŋwnɩä ‑yä ŋwadie‑, wa ŋʋʋ‑ 'nyu 'wlu.

13 'Nɩ Simoo 'titi ŋoo‑ Laagɔwälɩɩ 'kʋ 'nɩ ɔ yi 'sɩɩ 'nyu 'wlu 'ŋʋmʋ. Ɩ ‑kä 'ŋnö 'nɩ ɔɔ' ‑sä bhɛ ‑pɛɛ Filipʋ gwë. 'Nɩ ‑daminëa ‑yä 'Yiziziogbɩɩ 'kädɩɩ Laagɔ gbä 'nɩ Filipʋ nʋ bhlä nä, ɩ 'ninio bhä kpänyɩ plɛkʋ.

14 Zozii' lobho lobhonyʋa ‑wa ‑kʋ bhlä Zolizalɛmʋduu' nä, wa nuu‑ lä nynä ‑mä Samaliinyʋä ‑yä Laagɔwälɩɩ 'kʋ ŋoo nä, kä wa ‑lobho ‑mɔɔ Pɩɛlö ‑yä Zään 'sɔ.

15 Pɩɛlö ‑yä Zään 'sɔ ‑ŋëë ylä Samalii' nä, wa ‑bhibhie ‑mɔɔ 'cɔcɩnyʋaa' 'wlu ‑yä, Kplɔɔkplɔɔ‑wugɔɔ 'kwa 'kʋ kwlii.

16 Kplɔɔkplɔɔ‑wugɔɔ' ‑lä bhä tee ‑mɔɔ' 'cɔcɩnyɔ 'kʋ kwlii. Kwlienyɔ Zozii' 'ŋnöö ‑bhlo 'mnö wa 'ŋʋnʋwa‑ bhlä 'nyu 'wlu.

17 Ɩ ‑kä 'ŋnö nä, kä Pɩɛlö ‑yä Zään 'sɔ ‑gbɩwa ‑klɔgbö 'kʋ 'nɩ Kplɔɔkplɔɔ‑wugɔɔ yiwa 'kʋ kwlii.

18 ‑Mä Simoo nii‑ lä 'yi nynä ‑mä Pɩɛlö ‑yä Zään 'sɔ ‑gbɛɛ nyɩkpaa ‑klɔgbö 'kʋ 'nɩ Kplɔɔkplɔɔ‑wugɔɔ kwlinʋwa‑ 'kʋ nä, kɔ ‑lä monii 'nɩ ɔ yiwa soo,

19 ɔ lä a 'nyɛmʋ'ʋ ‑lɔɔ 'päwaa ‑yä n kä nyɩkpa ‑klɔgbä 'kʋ ‑gbɛɛ nä, Kplɔɔkplɔɔ‑wugɔɔ 'kwa 'kʋ kwlii.

20 ‑Mä Pɩɛlö ‑soo Simoo, ɔ lä ‑lʋʋ Laagɔ nyɛ lä 'flɛ nä, ʋmʋ ‑mɔɔ ‑n tään lä nynä ‑mä ‑n 'gä monii' zɔmʋ ‑a! ‑Naa monie ‑yä ‑mɔɔ 'sɔ 'zɛnö dä ‑bhloo'!

21 ‑Nɩnɩ ‑ɩ nʋɔ lä ‑lää nä, ɩɩ' ‑wʋ ‑naa lɩɩ plöö‑. 'Nɩ ‑naa walɩ 'nɩ ‑wʋ 'sɩɩ 'mnö ‑kʋ. ‑Naa plɛɛ nä, kɛ ‑nyu Laagɔ dëlü!

22 ‑N nʋ lä 'nɩ ‑ɩ ‑nyuu lä nä, ‑n ‑bha ɩɩ' gbʋʋ' ‑yä ‑n bhibhie yɩ Kwlienyɔ. Ɩ kä ‑kʋ nynä ‑mä ɔ yi‑i cie nä, ɔ 'kä‑ä cie.

23 N ni 'yi nynä ‑mä, gbenyenyii ‑kʋ kpänyɩ ‑naa plɛɛ 'yii, 'nɩ ɩ yä‑ä yɩ ‑säklöö' 'ŋʋ!

24 'Nɩ Simoo yi Pɩɛlö soo, ɔ lä anyɩ 'titi a bhibhie Kwlienyɔ 'naa ‑za ‑yä, sä a ci lä ‑lɔyɩ nä, sɔɔ' wälɩɩ' kä'ä ‑kä ŋëë.

25 Pɩɛlö ‑yä Zään 'sɔ ‑lü ylä 'fɩa Kwlienyɔɔ' ‑dläfʋɛɛ nä, kwa 'ylɩbhɔ‑ yɩ Zolizalɛmʋduu'. Wa ‑kʋ lä 'ylɩbhɔdä nä, Samalii‑bhlɩɛɛ' 'di bhutukpä 'mnö nyɩkpaa, wa ‑sänʋwa 'sɩɩ Kwlienyɔɔ' 'Nägädöö.


Filipʋ ‑yä Etiopiibhlɩ 'kʋʋ nyɩkpa 'kädɔ

26 Filipʋ nä, 'tänyɩ ‑kʋ ‑lɔɔ 'nɩ Kwlienyɔɔ' ‑Laagɔzuzu ‑ghlɔɔ 'yii 'nɩ ʋ ‑sonöɔ, ʋ lä Filipʋ‑, ‑n ‑bha 'kʋ ‑yä, ‑n mʋʋ ‑mɔɔ jiee' ‑zɔɔ ‑gbäsɩ! ‑Kpomuu ‑ʋ bha lä Zolizalɛmʋduu' 'nɩ ‑ʋ mʋʋ lä Gazaduu' nä, nyɩkpɔɔ' 'plöö yɩɔ ‑mɔɔ ‑mä, ‑n mʋʋ ‑mɔɔ!

27 ‑Laagɔzuzuu cii‑ lä sɔɔ nä, kä Filipʋ ‑bha 'kʋ 'nɩ ɔ yi ‑mɔɔ mʋ. Nä, Etiopiibhlɩ 'kʋʋ nyɩkpɔ ‑bhlo, kä wa ‑bhɔtʋɔ bhä nä, ɔɔ' bhɛ ŋwadi plöö‑, ‑mä ɔ ‑glö bhä Etiopiibhlɩ 'kʋʋ 'govlaa' nyɩkpa 'kädɔ. ‑Mɔɔ' 'leyi‑ŋnɔɔ wa laa bhlä Kadasö nä, nyɩkpɔyɩ, ɔmɔɔ‑ plöö‑ bhlä ɔɔ' leylüü' 'fɩɩn 'kʋ wloonyʋa' 'kämänyɔ. Ɔ ‑yi bhä Zolizalɛmʋduu' Laagɔ bʋbɔ ‑kää

28 nä, kɔ 'ylɩbhɔ bhɛ lä Etiopiibhlɩ 'kʋ. Nä, ɔ ‑kʋ bhɛ ɔɔ' ‑kpängwɩjlü‑tomobie 'mnö sä, 'nɩ ɔ zɛɛ bhä 'plɔfɛtɩ Ezayii' 'bɔɔgʋʋ.

29 'Nɩ Kplɔɔkplɔɔ‑wugɔɔ yi Filipʋ soo, ʋ lä Filipʋ‑, ‑n mʋ ‑yä ŋëë ‑kpängwɩjlü‑tomobii 'yɩ yëku!

30 'Nɩ Filipʋ yi 'kʋ pɩäpɩä, 'nɩ ɔ yie yëku ŋëë. Ɔ lɔ poo 'nyukwli nä, Etiopii‑yuo zɛɛ 'plɔfɛtɩ Ezayii' 'bɔɔgʋʋ. 'Nɩ ɔ yio 'ylä, ɔ lä ‑aawli, 'bɔɔgʋʋ ‑n zɛɛ lä nä, ‑n nuu 'mʋ ‑a?

31 Nyɩkpɔɔ lä 'nɩ nyɩkpɔɔ' ‑wʋ ‑kʋ ‑yä ɔ kä'ä 'mʋʋ ‑zɔɔ ‑sä nä, säsä n yiu bhä 'mʋ 'nuu? Ɔ cii‑ lä sɔɔ nä, 'nɩ ɔ yi Filipʋ soo nynä ɔ gblää ‑kpängwɩjlü‑tomobie 'mnö ‑yä ɔ kʋɔ yëku sä.

32 A ni Ezayii 'bɔɔgʋʋ' dä ɔ zɛɛ bhlä nä, ‑lɔɔ ci bhä nynä ‑mä Wa ‑klɔ nynä 'bhablɛɛ' lɛɛ Wa fä lä 'bhlä 'kää nä! 'Nɩ ‑n ‑näsä 'bhabhlöyuo kʋ lä ‑plɩɩ 'nɩ, Wa slüo lä nyɩɩ nä, Ɔɔ' ‑wʋ 'sää në ‑sä.

33 Wa ‑sʋkpɔ! 'Nɩ wa ‑yi 'nɩ Wa ‑sɔɔ 'gë ‑kpläkplösä nä, ‑Ɔ yi bhä ‑pɛɛ ɔɔ' 'lɔlʋʋ yëkuu' wälɩ cii? ‑Mää 'ylʋzɔɔ nä, Kä wa ‑nuë lä ɔɔ' zëkpëa.

34 'Nɩ nyɩkpɔɔ yi Filipʋ 'ylä, ɔ lä bheeje ‑kä ‑mä, ‑aawli, nyɩkpɔ‑ ‑sä 'plɔfɛtɩɔ sä bhä? Ɔ yëku ‑ɔ sä bhä ‑a, ‑mä 'yigäda‑nyɩkpɔ ɔ sä bhä ‑a?

35 'Nɩ Filipʋ yi bʋkʋ nuwälɩ 'kʋ 'bhlü. Ɔ 'bhää‑ yɩ Ezayii' 'bɔɔgʋnʋ 'mnö wälɩɩ 'kʋ, 'nɩ ɔ yi nyɩkpɔɔ Zozii 'Nägädöö ‑sää.

36 Wa ‑kʋ bhɛ lä mʋdä nä, wa ‑ŋëë 'nyibhlë. 'Nɩ nyɩkpɔɔ yi Filipʋ soo, ɔ lä ‑n ni 'nyie! 'Klü ‑sä yi bhä ‑pɛɛ 'ŋnö kää 'nɩ, 'nn ‑lä bhä 'nyu 'wlu ŋʋʋ? [

37 Filipʋ lä ‑n gä ‑mɔɔ ‑naa pleyii Zozi Klisöö' pɔlötɛtɛ ‑kä nä, n yi‑i 'nyu 'wlu 'ŋʋ. Nyɩkpɔɔ lä n ‑kä pɔlötɛtɛ. N ‑känɩ plɛkʋ nynä Zozi Klisö 'mɔɔ‑ plöö‑ lä Laagɔ ‑Yowli.]

38 'Nɩ ɔ yi ɔɔ' ‑kpängwɩjlü‑tomobie 'nyniguë. 'Nɩ Filipʋ ‑yɔsɔ yi 'nyiee kwli, 'nɩ ɔ yio 'nyu 'wlu 'ŋʋ.

39 Maa, wa ‑bha lä 'gää 'nyiee nä, kä Kwlienyɔɔ' 'Wugɔɔ bhlüü‑ Filipʋ 'kʋ, 'nɩ ʋ yio fämʋ. Nä, Etiopiiyuo 'nio bhɛ. Ɔɔ' lɔɔ ‑pʋpɛ bhlä bhɛ lä nä, kɔ gëë‑ ɔɔ' ‑blɔɔ 'yi 'nɩ ɔ yi mʋ.

40 ‑Mä Filipʋ nä, Azɔtöduu' ɔ ‑ghlää 'kʋ. Ɔ bhlü bhä 'dii 'nɩ ɔ sää bhä ‑mɔɔ Laagɔɔ' 'Nägädöö. Ɔ ‑kʋ sɔɔ ‑aaa 'nɩ ɔ yi Sezaleeduu' ŋëë.

© (Active), Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan