Bìoball air-loidhne

Nʋnʋgbɩɩ 7 - GOD - u2

ETƖƐNÖ CI WÄLƖ Etɩɛnö ci Ablaamʋ ‑yä Laagɔ 'sɔɔ mɛnʋʋ' yëkuu' wälɩ

¹ 'Cibhisänyɔ 'kädɔɔ ylää‑ Etɩɛnö, ɔ lä ‑maa, wälɩɩ wa ci lä ‑naa ‑zaa nä, ‑nʋawlɛ ‑a?

² Etɩɛnö lä 'bäsɩnyɩ‑! Bhelienyɩ‑! A poo'o 'nyukwli! 'Klʋagba Laagɔɔ nä, ʋ ‑ghlä ‑a tötɔ Ablaamʋ 'yii ‑mɔɔ Mezopotamii‑bhlɩɛ 'mnö 'fɩa 'nɩ ɔ ‑mʋ lä Alää‑bhlɩɛ 'mnö kʋ ‑kää.

³ Kä Laagɔ ‑sonöɔ, ʋ lä, Ablaamʋ‑, ‑n ‑bha ‑n 'bhlɩɩ! ‑N ‑bha 'lɔlʋkpä 'kʋ, ɩyä 'bhlɩɛ n 'kä‑ä lä paa nä, ‑n 'gä ‑mɔɔ mʋ.

⁴ Ɩ ‑kä bhɛ 'ŋnö 'nɩ Ablaamʋ ‑bha yɩ Kalidee‑nyʋaa' 'bhlɩɛ 'mnö 'nɩ ɔ ‑mʋ Alää‑bhlɩɛ 'mnö kʋ ‑kää. 'Tänyɩɩ ɔ 'bä kuu‑ ylä nä, ‑lɔɔ Laagɔ ‑gbä 'nɩ ɔ ‑bha lä Alääbhlɩ 'kʋ 'nɩ 'bhlɩnɛ a ‑kʋ ylä ‑zɩkä ‑lää 'mnö nä, 'nɩ ɔ yie lä 'mnö kʋ ‑kää yi.

⁵ ‑Mä Laagɔɔ' ‑wʋ Ablaamʋ ‑dʋdʋ nyɛɛ‑. ‑Dʋdʋpɛɛ' lɔɔ ɔ yi bhlä 'sää ‑kokokpë 'kʋ slüa nä, Laagɔ 'nöɔ nyɔ ‑wʋ nyɛɛ‑. Kʋ ‑sonöɔ bhä 'flɛ nynä ‑mä, ʋ yio ‑lɔɔ' 'bhlɩɛ 'nyɛ. Laagɔ cii‑ nynä ‑mä 'lälɩɩ ‑ɩ 'gɔ lä 'mnö ghlää nä, ‑lɔɔ' 'bhlɩɛ yi bhä ɩɩ' lɛɛ 'plö. ‑Bhlɛ sɔɔ ɩ ‑kʋ 'nɩ Ablaamʋʋ' bhɔɔ 'yu ‑kä.

⁶ Kä Laagɔ ‑soo Ablaamʋ, ʋ lä ‑Naa 'lɔlʋnyʋä yi lowubhlɩ 'kʋ gwë 'pää. Wa yi ‑mɔɔ geyuë 'plö. 'Nɩ wa yi ‑mɔɔ lebhe ‑klɛ nʋdä kʋ ‑aaa, 'ylʋbɔɔ' gwlɩ ‑ngbüü' 'ci ‑mɔɔnä (400).

⁷ ‑Mä Laagɔ cii‑ 'sɩɩ, ʋ lä 'bhlɩɛɛ' ‑lɛɛ ‑ɛ 'gwa lä geyusä klä nä, ‑amʋ Laagɔ, n yie 'tite 'ŋʋ. 'Nɩ 'tänyɩ yi 'sɩɩ ŋëë 'nɩ ‑naa 'lɔlʋnyʋa yi geylüü' ‑bha, 'nɩ wa yi'i 'bhlɩnɛ 'mnö bʋbɔ ‑kää yi.

⁸ 'Nɩ Laagɔ ‑yä Ablaamʋ 'sɔ yi ‑mɛnö. Mɛnʋʋ' panalɩ plöö‑ bhä nynä ‑mä, ŋwadi nä, wa ‑döɔ 'kʋ. Ɩ ‑kä bhɛ 'ŋnö 'nɩ ‑a tötɔ Ablaamʋ ‑gään 'yuŋwadi, ɔmɔ wa laa bhä Yizakö. Ɔ ‑gänöɔ lä nä, ɩɩ' ‑ngbaatäna 'ylʋʋ 'kʋ, kɔ döɔ 'kʋ. Yizakö ‑mä 'sɩɩ, ɔ ‑gään Zakɔpʋ 'nɩ, ‑ngbaatäna 'ylʋʋ 'kʋ ɔ yio 'kʋ döö. Zakɔpʋ ‑mä 'sɩɩ, ɔ ‑gään lä ɔ ‑yowlie nä, kɔ döwa‑ 'kʋ. Ɔ ‑yowlie, wamää‑ plöö‑ lä ‑a tɩtɩa 'kʋgbä 'sɔ.

Etɩɛnö ci Zozɛfʋʋ' yëkuu' wälɩ

⁹ ‑Mä ‑a tɩtɩä nä, sä wa ‑kä bhlä wa bheli Zozɛfʋ ‑zɔbhlɛzʋ nä, kä wa ŋʋɔ‑ 'kpä. Wa ‑pënöɔ nynä geyu Ejipitinyʋä wlɩɩ'. ‑Mä ‑mɔɔ Ejipiti nä, Laagɔ ‑kʋ bhä Zozɛfʋ yëku.

¹⁰ Laagɔ ‑gbä 'nɩ ɔ ‑bha nyäkälɩɩ 'fɩɩn nëë'. Ʋ nyɩɔ‑ dɩgälɩ 'nɩ, Ejipitii' 'loyoo wa laa bhlä Falaɔɔ nä, Laagɔ ‑gbä 'nɩ Zozɛfʋ yibhë‑ ɔɔ' soosä, 'nɩ 'loyoo ‑wamä 'sɩɩ kpänyɩ ɔɔ' wälɩ. Ɩ ‑kä 'ŋnö 'nɩ 'loyoo nyɛɛ‑ Zozɛfʋ Ejipitii' 'govlä‑lebhee' ‑tëbhuu. 'Nɩ ɔ nyɩɔ‑ 'sɩɩ ɔɔ' 'leyi‑gbëa 'fɩɩn 'kʋ wloodä.

¹¹ ‑Mä 'tänyɩ ‑kʋ ‑lɔɔ 'nɩ ‑gbugbe 'kädɛ ‑yi Ejipiti‑bhlɩɛ 'fɩɩn 'mnö. 'Nɩ ‑lɔɔ' ‑gbugbee ‑ŋëë 'sɩɩ 'Kenia‑bhlɩɛ 'mnö. ‑Lɔɔ' lioyɩ 'mnö nä, 'kwlɩ ‑bhɩä kpänyɩ nyɩkpa. 'Nɩ ‑a tɩtɩää' 'ni bhɔɔ lülülʋʋ ‑yä wa 'kä lü.

¹² ‑A tötɔ Zakɔpʋ nuu‑ lä nynä ‑mä ‑nyʋʋ ‑kʋ Ejipiti nä, kɔ ‑lobho ‑mɔɔ ‑a tɩtɩä. 'Nɩ wa yi ‑mɔɔ waa' tɛɛtɛɛdä mʋ.

¹³ 'Nɩ wa yi ‑mɔɔ 'sɔnadä mʋ. Wa ‑mʋ ylä ‑mɔɔ 'sɔnadä nä, 'kä ‑a tötɔ Zozɛfʋ pana‑ yɩ ɔ yëku ɔ bhelie. ‑Nɩnɩ 'mɩɩ‑ ‑gbä 'nɩ 'loyo Falaɔɔ ‑yibhë lä Zozɛfʋʋ' 'lɔlʋkpönyʋä.

¹⁴ 'Nɩ Zozɛfʋ yi nyɩkpaa 'Keniabhlɩ 'kʋ lobho nynä wa fɔɔ ɔ 'bä Zakɔpʋ ‑yä ɔɔ' 'lɔlʋkpönyʋa 'fɩɩn ‑mɔɔ Ejipiti. Waa ‑bhlü bhä nyɩkpaa' gwlɩ taa 'nɩ 'kʋgbä ‑ngbü waa' ‑lefɩɩn.

¹⁵ 'Nɩ ‑a tötɔ Zakɔpʋ ‑yä ‑a tɩtɩä 'sɔ yi lä Ejipiti mʋ. ‑Mɔɔ wa ‑kʋ ‑aaa 'nɩ ɔ kuu‑. Wamä ‑mä 'sɩɩ, wa 'kuu‑ ‑mɔɔ.

¹⁶ Wa kuu‑ lä nä, wa ‑gäzöö kwa bhɛnɩ‑ 'nɩ wa ‑fɩɩ Sisɛmʋ‑duu'. ‑Mɔɔ Sisɛmʋduu' nä, ‑a tötɔ Ablaamʋ ‑sä bhä monii, 'nɩ ɔ zɔɔ‑ bhä lesigwlë Amɔlö ‑yowlie wlɩɩ. 'Nɩ lesigwlënä 'mnö, wa yi ‑mɔɔ ‑a tɩtɩä zizie.

Etɩɛnö ci Moyizöö' yëkuu' wälɩ

¹⁷ ‑Mä Laagɔɔ' tänyɩɛ 'mɛmɛ‑ bhɛ lä ‑yä, sä ʋ ‑soo bhlä ‑a tötɔ Ablaamʋ nä, ʋ 'kä ylä 'sɔɔ nʋ nä, kä ‑abhunyʋä ‑gänö ‑gänö 'mʋ ‑aaa, 'nɩ wa yi ‑mɔɔ Ejipiti zumë.

¹⁸ ‑Mä 'tänyɩ ‑kʋ ‑lɔɔ 'nɩ 'loyoo' lɔɔ ‑ɔɔ bhɔɔ lä Zozɛfʋʋ' dä 'nii‑ nä, ɔ wlʋʋ‑, 'nɩ ɔ 'kämä bhä Ejipiti‑bhlɩɛ.

¹⁹ 'Loyoyɩ nä, kɔ 'nyigë‑ ‑abhunyʋä 'nɩ ɔ ‑klä 'sɩɩ ‑a tɩtɩä nyenyisä. Ɔ ‑gbä 'nɩ wa ‑bha waa' 'yuë ‑dɔdʋaa' gbʋʋ' nynä wa 'ku.

²⁰ ‑Lɔɔ' 'tänyɩɛ 'mnö, ‑lɔɔ wa ‑gään lä ‑a tötɔ Moyizö. 'Nɩ Moyizö nä, ɔ ‑glö bhä 'sɩɩ Laagɔ dëlü nanɩnyɔ 'titi nä, kä wa ‑lolunöɔ ɔ 'bää 'gbëa 'mnö ziziodä ‑aaa 'nɩ ɩ ‑nʋ 'cɩ taa 'fɩa,

²¹ 'nɩ sä waa' ‑lä bhɛ lä ɔɔ' zizielɩ mii nä, wa ‑bha yɩ ɔɔ' gbʋʋ'. 'Nɩ 'loyo Falaɔɔ ‑yɔŋnɔ yio lä 'kʋ 'wlʋʋ, 'nɩ ɔ yio ylä loo nynä ɔɔ' 'mnö 'yu 'titi.

²² ‑Mä Moyizö cɩä‑ Ejipitibhlɩ 'kʋʋ dɩgälɩɩ 'fɩɩn. 'Nɩ ciciwälɩɩ' ‑yä nʋnʋgbɩɩ' nä, Moyizö ‑kä bhä 'sää 'päwä 'titi.

Etɩɛnö lä Moyizö guu‑ 'nɩ ɔ ‑bha Ejipiti

²³ ‑Mä Moyizö ‑kä bhlä 'ylʋbɔɔ gwlɩ 'sɔ nä, kɔ ŋʋʋ‑ 'nɩ ɔ ‑mʋ ɔ bhelie‑ 'Yizlɛnyʋä 'yi 'ni kää.

²⁴ Ɔ lɔɔ wloo nä, Ejipitiyu nʋ bhä 'Yizlɛyu nyenyi. ‑Mä Moyizö 'plöö‑ 'Yizlɛyuo bhlëë' nynä ɔ 'kɔ kpä ‑sä 'nɩ ɔ bhlää‑ yɩ Ejipiti‑yuo 'nɩ ɔ kuu‑.

²⁵ Ɔ bhobho bhɛ nynä ‑mä ɔ bhelie‑ 'Yizlɛnyʋä, yio bhɛ 'mʋ 'nu nynä ɔmɔ Moyizö 'mɔ Laagɔ 'kä 'kʋ ghlää ‑yä ɔ 'kwa ‑lɔɔ nëë' sä. ‑Mä 'Yizlɛnyʋa 'nöɔ ‑wʋ 'mʋ nuu‑.

²⁶ Ɩ ‑kä 'ŋnö nä, ‑lɔɔ' zelie ‑ze lä nä, Moyizö lɔɔ wloo nä, 'Yizlɛnyʋä 'sɔ vë. ‑Mä kɔ ‑tään nynä ɔ 'kwa ‑säsä ‑yä, 'kʋ wɔtɔlɩ 'kwa pää' kʋ. Ɔ lä bhelienyɩ‑, a ‑glö bhelie nä, ‑ɔnözä 'nɩ a nʋnʋ bhä nyenyii?

²⁷ ‑Mä Moyizö cii‑ lä sɔɔ nä, ‑lɔɔ ‑ɔ bhütë bhlä ɔ ‑lio nä, kɔ paa‑ Moyizöö' wälɩ 'yii, 'nɩ ɔ ‑sonöɔ, ɔ lä ‑mä ‑ɔ nyɛɛ‑ɛ bhä ‑anyɩa nëëdëë' wälɩɩ' ‑tëbhu nynä ‑mɔɔ ‑lä 'kämäno‑anyɩ ‑yä ‑n ‑döö anyɩa wälɩɩ?

²⁸ Sä ‑n bhlää‑ lä ‑zekü Ejipiti‑yuo nä, ‑n gä'ä yɩ 'sɩɩ sɔɔ 'bhlä ‑a?

²⁹ ‑Maa, Moyizö nuu‑ lä sä nyɩkpɔɔ cii‑ lä nä, kɔ guu‑. Ɩ ‑kä 'ŋnö 'nɩ ɔ ‑bha yɩ Ejipiti, 'nɩ ɔ yi Madiäbhlɩ 'kʋ mʋ. Ɔ ‑kʋ ‑mɔɔ 'nɩ ɔ ‑gää 'yuŋwadië 'sɔ.

³⁰ Ɔ ‑sä ‑mɔɔ 'ylʋbɔɔ' gwlɩ 'sɔ 'fɩa, 'nɩ ‑mɔɔ 'popie 'mnö Sinayii‑kükëa 'wlu, ‑Laagɔzuzu ‑ghlɔ ‑mɔɔ 'yii. Ʋ ‑kʋ bhä ŋnäŋnä ‑kpäkä nëëdë.

³¹ Moyizö nii‑ lä ŋnäŋnä‑kpäkaa 'yi nä, kä plɛkʋ 'ninio‑. Ɩ ‑kä 'ŋnö nä ɔ 'jloo bhɛ 'yikʋ ‑yä ɔ 'ka 'nägäsä wloo. 'Nɩ ɔ yi Kwlienyɔ Laagɔɔ' nuwälɩ 'nu. Laagɔ ‑sonöɔ, ʋ lä,

³² ‑N tɩtɩä Ablaamʋ, ‑yä Yizakö, ‑yä Zakɔpʋ 'sɔ, waa' Laagɔɔ wa bʋbɔ bhlä nä, ‑amʋ lä. ‑Mä Moyizö nuu‑ lä nuwälɩnɩ nä, yëku tɩtɛnöɔ bhɛ ‑ŋänö ‑za. Ɔɔ' mii‑ bhɛ 'nɩ ɔ 'kä ŋnäŋnä ‑kpäkaa wloo.

³³ 'Nɩ Kwlienyɔ Laagɔ yio soo, ʋ lä, ‑N ‑sä ‑naa 'süü bhɩɩ' ‑mä, ‑länʋmʋ dä ‑n 'nynigo‑ lä nä, ‑lɔɔ ‑glö kplɔɔkplɔɔdä.

³⁴ ‑Mä 'kwlɩkabhɩa 'naa 'yua ‑kʋ lä ‑mɔɔ Ejipiti 'mnö nä, n ya 'yi 'ni. N yä waa' zlʋwälɩɩ 'nu nä, n yä kwli ‑yä n 'kwa ‑lɔɔ nëë' ‑sä. ‑N mʋ yɩ ‑pɛpɛɛ Ejipiti! ‑Amʋʋ‑ lobho‑o lä ‑mɔɔ.

³⁵ ‑Maa, Moyizönɔ 'Yizlɛnyʋä yä bhɛ lä cɛɛ nynä ‑mä ‑mɔɔ, ɔ cii‑ bhä nynä ‑n 'kämänö‑anyɩ ‑yä, ‑n ‑döö ‑anyɩa wälɩɩ' nä, ɔmɔ Laagɔ ‑ghlää yɩ 'kʋ, ‑mɔɔ ‑ŋnäŋnä ‑kpäkaa nëëdë, 'nɩ ʋ ‑lobhuo yɩ nynä ‑mä ɔ 'plö waa' 'tienyɔ ‑yä waa' geylüü' ‑sänyɔ.

³⁶ Moyizönɔ 'mɔɔ‑ bhɛnʋwa‑ 'nɩ wa yi lä Ejipiti geylüü' ‑bha. 'Nɩ 'ylʋbɔɔ' gwlɩ 'sɔ 'mnö nä, ‑mɔɔ jizlɛɛ 'klʋ, ɩyä ‑mɔɔ 'popie 'mnö nä, Moyizö ‑nʋʋ ‑mɔɔ ‑daminë ‑yä 'yiziziogbɩ ‑bhutukpä.

³⁷ Moyizönɔ 'mɔɔ‑ ‑soo lä 'sɩɩ 'Yizlɛnyʋä nynä ‑mä Laagɔ yi'anyɩ ‑amʋ 'bhisäkʋ 'plɔfɛtɩ ‑lä. Ɔ yi a 'bhuyu 'plö.

Etɩɛnö ci 'Yizlɛnyʋaa' 'popie 'mnö nʋnʋgbɩɩ' wälɩ

³⁸ Bʋkʋ nä, 'tänyɩɩ ‑a tɩtɩä 'Yizlɛnyʋä, 'wlää‑ bhlä ‑mɔɔ 'popie 'mnö 'wlu nä, Moyizö 'mɔɔ‑ ‑kʋ bhlä ‑mɔɔ Sinayii' 'kükëa 'wlu, 'nɩ ‑Laagɔzuzuu ‑sänöɔ lä Laagɔɔ' nüdö. Wälɩɩ lɩɩ ‑ɩ nyɛ lä nyɩkpa 'pʋpʋɛɛ nä, ɩmɩ Laagɔ ‑sonöɔ 'nɩ, ɔ yii lä ‑a tɩtɩä soo.

³⁹ ‑Mä ‑a tɩtɩää' ‑wʋ Moyizö 'klʋkpää' ŋʋʋ‑. Kä wa paa‑ ɔɔ' ciciwälɩɩ 'klä 'nɩ wa ‑tään nynä ‑mä wa 'kä Ejipiti 'ylɩbhɔ.

⁴⁰ Wa ‑soo Moyizöö' 'kʋnämʋnyɔ Alɔɔ nynä ‑mä Alɔɔ‑, ‑laagwɩɩ' lɩɩ ‑ɩ yi‑anyɩ lä 'tie nä, ‑n nʋ‑anyɩmɩ ‑gä! ‑Mä Moyizönɔ ‑ɔ ‑sanyɩ lä Ejipiti nä, wälɩɩ ‑ɩ ‑ŋënöɔ lä nä, ‑a 'nɩɩ ‑wʋ ‑yi.

⁴¹ ‑Lɔɔ' ylɩɩ 'mnö nä, wa ‑tɛɛ bhlii‑yulɛɛ. 'Nɩ wa yio bʋbɔ. ‑Bhlii‑yunɔ wa bhlüü‑ lä waa' wlɩɩ 'kʋ 'nɩ wa ‑tɛɛ bhɛ lä nä, ɔmɔ wa ‑yi dëlü 'nɩ, wa yi 'cibhi ‑sä. 'Nɩ wa yi ‑lɔɔ waa' ‑pʋpɛ nʋʋ, 'nɩ wa yi gäma.

⁴² Ɩ ‑kä 'ŋnö 'ni Laagɔ ‑bha waa' gbʋʋ'. Ʋ ‑tanʋwa 'yi 'nɩ wa yi ‑laagɔzälöö' bʋbɔlɩɩ' lebhee' plä. Wälɩnɩ 'fɩɩn, ɩ ‑jɩjlɔ ‑mɔɔ 'Plɔfɛtɩnyʋaa' 'bɔɔgʋʋ 'mnö. Ɩ ‑jɩjlɔ nynä ‑mä, 'Yizlɛnyʋänyɩ‑, A ‑lä lä anyɩa 'cibhisä‑mnaa ‑Yä ‑mɔɔ' 'cibhüü a ‑sä lä nä, ‑Amʋ a nyɩɩ‑ bhɛ ‑a? 'Ylʋbɔɔ' gwlɩ 'sɔ a ‑sä lä ‑mɔɔ 'popie 'mnö nä, ‑Amʋ yëku a ‑yi 'nɩ a ‑sä 'cibhi ‑a?

⁴³ Aa' ‑wʋ sɔɔ ‑nʋ! Ka ‑yi 'nɩ suyu ‑zlëa wa laa lä Molɔkʋ nä, Aa' bʋbɔɔ ‑papaa 'mä a bhɛɛ‑. Bʋkʋ 'nɩ, suyu ‑zlëa wa laa lä Lefaa nä, A bhɛɛ‑ bhä 'sɩɩ aa' ‑laagɔzälöyee. Suyuënä nä, wamä a ‑tɛɛ 'nɩ a bʋbɔ lä. ‑Nɩnɩ ‑kä ylä 'ŋnö nä, N yi gbä 'nɩ nyɩkpa yi'anyɩ klä, 'Nɩ ‑mɔɔ Babilɔɔ‑bhlɩɛ klë, Wa yi'anyɩ ‑mɔɔ geyulɛ 'kʋ fä.

⁴⁴ Naa, ‑mɔɔ 'popie 'mnö, ka ‑a tɩtɩä slää‑ bhä Laagɔɔ' bʋbɔdaa' 'taplee ‑papaa' laa‑ gbä 'nɩ wa luë bhlä Laagɔɔ' dä nä. ‑Lɔɔ' ‑papaa Moyizö 'mɔɔ‑ slaa‑. Sä ɔ nii‑ lä 'yi, 'nɩ sä Laagɔ panöɔ‑ lä nynä ‑mä ɔ 'slaa nä, sɔɔ ɔ slaa‑.

⁴⁵ ‑A tɩtɩää' 'bhlɛsʋʋ plöö‑ ylä nä, 'bhlɛsʋʋ‑ ‑yi lä nä, kä wa ‑tuu Laagɔɔ' bʋbɔdaa' ‑papa. ‑A tötɔ Zozue 'mɔɔ 'tienʋwa bhɛ. ‑Mä Zozuwe 'tienʋwa bhlä, 'nɩ wa sɩä bhlä 'bhlɩɩ 'fɩɩn tʋʋ 'mnö, 'nɩ wa bhlü bhlä ‑lɔɔ' 'bhlɩɩ 'kʋ nä, Laagɔɔ' 'taplee ‑papaa, wa bhɛnöa‑ bhä 'kɔɔkɔɔ ‑aaa 'nɩ wa ‑lämʋa 'bhlɩnɛ 'mnö. A ‑kʋ ‑mää ‑aaa, 'nɩ ‑a tötɔ Davidöö' 'bhlɛsʋʋ ‑ŋëë.

⁴⁶ Davidö nä, sä Laagɔ ‑waa bhlä kpänyɩ ɔɔ' wälɩ nä, kʋ nyɩɔ‑ ‑tëbhu nynä ɔ 'slä ɔ tötɔ Zakɔpʋʋ' Laagɔɔ' bʋbɔɔdä.

⁴⁷ Davidönɔ, ɔ ‑yowli Salomɔɔ, ɔmɔɔ‑ slää‑ lä Laagɔɔ' bʋbɔda.

⁴⁸ Ɩ ‑kʋ yɩ 'bhlɩ 'sɔɔ ‑mä, ‑bhutuu' lʋʋ nyɩkpɔɔ' wlɩ slää‑ lä nä, ʋmʋ 'mnö 'Kʋzi Laagɔɔ' kʋ ‑klää. 'Sɔɔ 'plɔfɛtɩɔ cii‑ lä, ɔ lä

⁴⁹ Kwlienyɔ Laagɔ lä, Ŋɔkʋʋ' 'nyukpɔ‑laagɔnʋ nä, Ʋmʋʋ‑ plöö‑ 'naa 'leyi‑këkpë, 'Nɩ ‑dʋdʋnʋ plöö‑ lä 'naa 'kʋ nämnö ‑gwädɛ. Nä, ‑bhutuu' 'cesä nyɩkpɔ yi'i bhä ‑gä 'slää? 'Nɩ dä ‑sa 'titi a yi'i bhä 'ŋʋ 'nɩ N yi bhä kʋʋ?

⁵⁰ ‑Lɩɩ 'fɩɩn‑ ‑kʋ lä nä, 'Naa wlɩɩ 'nɩɩ bhä nʋ ‑a ɩmɩ 'fɩɩn?

⁵¹ 'Nɩ Etɩɛnö yi bʋkʋ ci, ɔ lä anyɩ, 'nyukwlii' 'tɛnɔ nyʋänyɩ‑! 'Tänyɩ Laagɔ laa'anyɩ lä nä, ka gbaa anyɩaa' pɔlöö 'klʋ, 'nɩ a sʋä a yëku 'nyukwli. 'Nɩ a yi 'nɩ a ‑yä Laagɔɔ' Kplɔɔkplɔɔ‑wugɔɔ 'sɔ bhlää 'kɔɔkɔ 'kʋ! Anyɩ nä, a 'bäsɩ‑ a wlʋʋ‑ lä!

⁵² 'Plɔfɛtɩɩ' ‑sä 'titi a tɩtɩää' bhä gbenyenyisä ‑klää? 'Plɔfɛtɩnyʋa 'fɩɩn‑ ‑lä 'Yigënyɔɔ' yilɩɩ' 'döö nä, ka tɩtɩä bhlʋwa‑. 'Yigënyɔnɔ, 'mɔ a ‑pëë 'nɩ a yi lä 'bhlä.

⁵³ Kä ‑Laagɔzizi ‑la'anyɩ lä 'flɛ Laagɔɔ' ‑Jlämaa ‑mä, a 'nöa ‑wʋ 'klʋkpää' ŋʋʋ‑.

'Zufʋnyʋa bhlää‑ Etɩɛnö cɛkwɩɩ' 'nɩ ɔ kuu‑

⁵⁴ 'Tütüplä‑jɛnyɩɛ 'mnö nyɩkpaa nuu‑ lä Etɩɛnöö ciciwälɩɩ nä, kä gbʋgblɛ ‑plʋwa 'nɩ wa ‑mnü bhɛ ɔɔ' ‑za gläwlu.

⁵⁵ ‑Maa, Etɩɛnö nä, Kplɔɔkplɔɔ‑wugɔɔ ‑kʋɔ bhɛ kpänyɩ yëku 'nɩ ɔ yi ŋɔkʋ ‑wloo ‑plɩɩɩ, 'nɩ ɔ yi ‑mɔɔ Laagɔduu' 'klʋagba 'yi 'nii. Ɔ nii‑ Zozii 'yi 'nɩ ɔ 'nynigo‑ bhä Laagɔɔ' lüüklä 'kʋ.

⁵⁶ 'Nɩ Etɩɛnö yi ci, ɔ lä a ni yi ‑a! ‑Laagɔɔ' yä 'klʋ känöɔ! N ni Nyɩkpɔɔ ‑Yowli 'yi. Ɔ 'nynigo‑ Laagɔɔ' lüüklä 'kʋ!

⁵⁷ ‑Mä ɔ cii‑ lä sɔɔ nä, 'nɩ wa yio 'saglö kplää. Wa sʋä‑ bhä wa yëku 'nyukwli, 'nɩ wa yio 'kʋ buu.

⁵⁸ Wa ‑klɔɔ 'nɩ wa ‑gbisio 'nɩ wa yio duu' ‑sä. 'Nɩ wa yio cɛkwɩɩ' 'bhlälɩ 'kʋ cie. Nyɩkpaa‑ nʋ bhlä sɔɔ nä, waa' 'kwëtii, nyëblu ‑bhlo wa laa bhlä Sɔlʋ nä, ɔmɔ dëlü wa ŋʋɩ‑ bhä.

⁵⁹ ‑Mä 'tänyɩɩ wa ‑kʋ bhɛ lä Etɩɛnö cɛkwɩɩ' 'bhlädä nä, ɔ ‑bhibhie, ɔ lä Kwlienyɔ Zozii‑, ‑n tlaa 'naa 'wugaa wlɩ!

⁶⁰ 'Nɩ ɔ yi ‑kokoowli glu 'pä, 'nɩ ɔ yi 'mʋ ‑gaa, ɔ lä Kwlienyɔ‑! Nyenyinɩ wa ‑nʋ'ʋ lä nä, ‑n cienʋwa 'nyɩ! Ɔ cii‑ lä 'gää 'sɔɔ nä, kɔ pään‑ nyämʋ sä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan