Bìoball air-loidhne

Nʋnʋgbɩɩ 6 - GOD - u2

Nyɩkpa ‑ngbɔɔsɔ 'kä lobho lobhonyʋa ‑Laagɔ‑lebhe klää

¹ ‑Lɔɔ' 'tänyɩyɩ 'mnö nä, Kwlienyɔɔ' 'kʋgënyʋaa' ‑zunɔɔ 'ŋʋnöɔ bhä 'kɔɔkɔ 'kʋ. ‑Maa, 'cɔcɩnyʋa ‑wa ci bhlä 'Glɛköwälɩɩ nä, waa' bhɔɔ ‑mɔɔ 'cɔcɩɩ' Eblëënyʋaa' wälɩ 'kʋ mɛɛ. ‑Ɔnöza bhɛɛ? Wlä 'cɔcɩgbëë' lülülɩɩ ‑ɩ dënöɔ lä ‑mɔɔ ylɩɩ 'fɩɩn 'kʋ nä, ɩɩ' ŋëë ‑wʋ waa' 'kuzëlü‑ŋwnɩa 'kʋ.

² Ɩ ‑kä 'ŋnö nä, Zozii' lobho lobhonyʋa 'kʋgbä 'sɔ, wa 'wlää‑ 'cɔcɩnyʋa 'fɩɩn 'wlu 'nɩ wa yiwa soo, wlä ɩɩ' ‑wʋ 'kʋ ‑ŋwa nynä ‑mä ‑a ‑bha Laagɔwälɩɩ' cilɩɩ yëku ‑yä ‑a plä lülülɩɩ' dëëlɩɩ wälɩɩ'.

³ Ɩ ‑kä ylä 'ŋnö nä, bhelienyɩ‑, nyɩkpaa' lʋä ‑wanö 'nää nyɩkpa ci lä 'nɩ Kplɔɔkplɔɔ‑wugɔɔ ‑kʋ lä kpänyɩ yëku nä, 'nɩ ‑wa ‑kä lä 'sɩɩ dɩgälɩ kpänyɩ nä, a ‑sä 'sɔɔ nyɩkpa ‑ngbɔɔsɔ anyɩ nëëdë ‑yä ‑a 'gwa lülülɩɩ' dëëlɩɩ' ‑tëbhuu 'nyɛ.

⁴ Ɩyä ‑anyɩ, ‑a 'gä yɩ ‑pɛɛ ‑lɔɔ kʋ bhibhielɩ ‑yä Laagɔwälɩɩ' cilɩɩ' ‑zä.

⁵ Lobho lobhonyʋaa' ciciwälɩnɩ, kä ‑jlë ‑wamänɩ. Ɩ ‑kä 'ŋnö 'nɩ nyɩkpɔɔ wa laa bhlä Etɩɛnö nä, wa ‑sɔɔ. Etɩɛnö nä, ɔ ‑kä bhä kpänyɩ Laagɔɔ' pɔlötɛtɛ, 'nɩ Kplɔɔkplɔɔ‑wugɔɔ ‑kʋɔ bhä 'sɩɩ kpänyɩ yëku. Wa ‑sä 'sɩɩ ‑bhlo 'nɩ wa lɔɔ bhä Filipʋ, ‑bhlo wa lɔɔ bhä Plokɔɔ, ‑bhlo wa lɔɔ bhä Nikanɔɔ, ‑bhlo wa lɔɔ bhä Timɔɔ, ‑bhlo wa lɔɔ bhä Pamenasö, 'nɩ ‑bhlo wa lɔɔ bhä Nikola. Nikola nä, ɔ ‑glö bhä Atɩɔsöduu' nyɩkpɔ 'nɩ ɔ ‑plä bhlä 'Zufʋnyʋaa' Laagɔɔ.

⁶ Nyɩkpanä, 'nɩ wa yiwa Zozii' lobho lobhonyʋa yëku ‑lä. 'Nɩ lobho lobhonyʋa yiwa ‑klɔgbö 'kʋ gbɛɛ 'nɩ wa yi waa' 'wlu bhibhie.

⁷ ‑Mä Laagɔwälɩɩ cio bhɛ kpänyɩ 'nɩ Zozii' 'kʋgënyʋa zumë bhä kpänyɩ ‑mɔɔ Zolizalɛmʋduu'. 'Zufʋnyʋaa' 'Cibhisänyʋa ‑wa ‑kä bhɛlä Zozii' pɔlötɛtɛ nä, wa yä bhɛ zumë kpänyɩ.

Nyɩkpa ‑bhlü Etɩɛnö 'kʋ

⁸ Nyɩkpɔɔ wa laa bhlä Etɩɛnö nä, kä Laagɔ pɔɔ‑ bhä kpänyɩ 'nyu 'nɩ ɔ ‑kä bhä 'sɩɩ Laagɔɔ' 'päwaa. 'Nɩ Laagɔ gbä 'nɩ ɔ nʋ bhä 'yiziziogbɩ ‑yä ‑daminë 'kädɩ 'bhlɩɛ 'mnö.

⁹ ‑Mä 'tänyɩ ‑ŋëë 'nɩ nyɩkpaa' ‑nänʋä ‑yä Etɩɛnö 'sɔ bhlää bhä 'kʋ ciciwälɩɩ 'mnö. ‑Lɔɔ' nyɩkpaa nä, wa yimʋ bhä 'sɩɩ ‑mɔɔ Laagɔ‑bhutuu 'mnö. Laagɔ‑bhutuyɩ nä, ʋmʋ wa ‑zie bhä Geylü yä bhɩä. Wa nëëdëë' lʋä plöö‑ bhä Silɛnöduu' ɩyä Alɛzadliiduu' nyɩkpa. 'Nɩ nänʋä plöö‑ bhä Silisii' ‑yä Aziibhlɩ 'kʋʋ nyɩkpa, 'nɩ wa yä Etɩɛnö 'sɔ bhlää bhlä 'kʋ.

¹⁰ ‑Mä, ɔ ‑kä bhlä dɩgälɩ 'nɩ, Kplɔɔkplɔɔ‑wugɔɔ' 'tɛtɩɩ ‑kʋɔ bhlä 'sɩɩ yëku nä, wa 'nöɔ bhɔɔ nëë' ‑bhɩä.

¹¹ Ɩ ‑kä 'ŋnö nä, wa ‑plää nyɩkpa ‑zɔɔ ‑yä wa 'kä kpläkplö ‑dläfʋɛ lü. Wa 'kä ci nynä ‑mä ‑anyɩ, ‑a nuu‑ ɔɔ' nëë' 'nɩ ɔ bhusuë bhä Moyizöö' ‑yä Laagɔɔ' 'sɔɔ 'ŋnöö.

¹² Wa ‑mʋ 'nɩ wa paa‑ nyɩkpa ‑gbʋʋ plɛ ŋää. 'Zufʋnyʋa' ‑Dɔɔpänyʋa ‑yä ‑Jlämöcɩanyʋa wa pʋwa‑ 'sɩɩ plɛ ŋää. 'Nɩ wa ‑yi, 'nɩ wa yi Etɩɛnö klä, 'nɩ wa yio 'Zufʋnyʋa' 'Tütüplä‑jɛnyɩɛ dëlü fä.

¹³ Wa ‑mʋ 'nɩ wa ‑ku ‑kpläkplö ‑dläfʋɛɛ' lünyʋä 'nɩ wa ci bhä, wlä nyɩkpɔnɔ nä, ‑anyɩa Kplɔɔkplɔɔ Laagɔ‑bhutu 'kädʋnʋʋ' yëkuu' nyimalɩɩ' ‑za, ɔɔ' bhlü ‑wʋ nëkʋ 'nɩ ɔ ci ʋʋ' nyenyi nyenyi. 'Nɩ ɔ ci 'sɩɩ Moyizöö' ‑Jlämaa' nyenyi.

¹⁴ ‑A nuu‑ 'sɩɩ 'nɩ ɔ cii‑ nynä ‑mä Nazalɛtöö' Zozii yi ‑anyɩa Laagɔ‑bhutu 'kädʋʋ wlä. 'Fɩa 'nɩ Moyizöö' ‑Jlämaa, ɔ ‑tü‑anyɩ lä nä, ɔ yia 'cɩcɩ.

¹⁵ ‑Mä nyɩkpaa 'fɩɩn‑ ‑kʋ bhlä ‑lɔɔ 'Tütüplä‑jɛnyɩɛ daa nä, wa wloo bhä Etɩɛnö 'nɩ ɔɔ' 'kʋtakpa ‑jɩjlä. A ‑kʋ bhä nynä ‑Laagɔzuzuu' 'kʋtakpä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan