Bìoball air-loidhne

Nʋnʋgbɩɩ 5 - GOD - u2

Ananɩasö ‑yä ɔ 'ŋnɔ Safilaa 'sɔɔ nʋnʋgbɩ

¹ ‑Mä nyɩkpɔ ‑bhlo, ɔmɔ wa laa bhä Ananɩasö, ɔ ‑yä ɔ 'ŋnɔ Safilaa 'sɔ, wa ŋʋʋ‑ waa' 'klä 'kpä.

² 'Nɩ ɔ ‑yä ɔ 'ŋnɔ 'sɔ 'nunu‑ 'mʋ 'nɩ moniee wa nii‑ lä nä, wa ‑klä 'klë 'nää. 'Nɩ Ananɩasö yi ‑lɔɔ' 'klëa Zozii' lobho lobhonyʋa dëlü ‑lä.

³ ‑Mä, Pɩɛlö ‑soo Ananɩasö, ɔ lä Ananɩasö‑, säsä ‑n ‑nʋmɔ ‑nʋmɔ bhä 'nɩ 'Dëvlo ‑nyimë‑ë bhä pleyii? 'Klaa' moniee ‑n nii‑ lä nä, kä n dɩɛ‑ 'mʋ 'nɩ ‑n ‑klä 'klë 'nää, 'nɩ ‑n 'nyigë Kplɔɔkplɔɔ‑wugɔɔ ‑a?

⁴ 'Klaa nä, ‑naa laa bhɛɛ. 'Nɩ ‑n ŋʋa‑ bhlä 'sɩɩ 'kpä nä, moniee ‑naa lɛɛ bhlä 'sɩɩ! Nä sɩ ‑kʋ bhä 'nɩ, ‑n ŋʋʋ‑ bhä sää' bhobholɩ ‑n yëku pleyii? 'Klüü ‑n ‑nʋ lä nä, nyɩkpaa‑ ‑nn ‑wʋ 'nyigë ‑mä Laagɔ‑ ‑n 'nyigë‑ lä.

⁵ ‑Mä Ananɩasö nuu‑ lä 'gää sä Pɩɛlö cii‑ lä nä, kɔ ‑bhlü ‑zɔɔ, 'nɩ ɔ yi 'ku. Wälɩnɩ nä, nyɩkpaa 'fɩɩn ‑wa nuii‑ lä nä, kä ‑ŋänö ‑plʋwa 'sää kpänyɩ.

⁶ Nyëbli ‑kʋ bhä ‑lɔɔ 'nɩ wa yi yi, 'nɩ wa yi Ananɩasöö' ‑gɛzɛɛ lokwi kpäpɩä 'nɩ wa yie 'kʋ 'bhlü 'nɩ wa yie zizie ‑kää fä.

⁷ ‑Mä 'gliyi taa' 'tänyɩ 'mʋ 'plö kää nä, 'nɩ Ananɩasö 'ŋnɔ yi plä. Wälɩɩ ‑ɩ ‑ŋëë lä ɔ ‑nyoto nä, ɔ 'nɩ bhɔɔ ‑yi.

⁸ 'Nɩ Pɩɛlö yi 'ŋnɔɔ 'ylä, ɔ lä ‑n sonö'ö ‑wʋ saa 'nää! 'Klaa a ŋʋʋ‑ lä 'kpä nä, moniinɛ 'mɛ a nii‑ lä 'zaazɩ ‑a? 'Ŋnɔɔ lä ‑ɛɛɛ! Ɛmɛ ‑a nii‑.

⁹ Pɩɛlö lä ‑mä sɩ ‑kʋ bhä 'nɩ a 'ŋʋʋ‑ bhä 'kʋ ‑n ‑yä ‑n ‑nyoto 'sɔ 'nɩ a gbɩä bhä ‑Kwlienyɔɔ' 'Wugɔɔ! Wloo, nyëblii‑ ‑zizie lä ‑n ‑nyotoo' ‑gɛzɛɛ nä, wa yä 'du plä nä, wa yi 'sɩɩ ‑mɔɔ ‑naa ‑gɛzɛɛ fämʋ!

¹⁰ Pɩɛlö cii‑ lä sɔɔ nä, kä 'kpobhuu ‑bhlo 'kʋ, Ananɩasö 'ŋnɔ ‑bhlü ‑lɔɔ Pɩɛlö dëlü ‑zɔɔ, 'nɩ ɔ yi 'ku. Nyëblii ‑plä lä 'gä gbëë' nä, wa lä wa wloo nä, Ananɩasö 'ŋnɔ yä 'ku. 'Nɩ wa yi 'sɩɩ ɔɔ' ‑gɛzɛɛ 'kʋ 'bhlü 'nɩ wa yie ‑zizie ‑kää fä. Wa ‑zizio ɔ ‑nyoto yëku.

¹¹ ‑Mä wälɩɩ plöö‑ ylä sää 'kʋ nä, 'cɔcɩnyʋa ‑yä nyɩkpaa 'fɩɩn wa nuu‑ lä wälɩnɩ nä, ɩ ‑kwa bhɛ kpänyɩ ‑ŋänö 'kʋ.

Zozii' lobho lobhonyʋa ‑nʋ 'yiziziogbɩ ‑bhutukpä

¹² ‑Mä Zozii' lobho lobhonyʋa nä, Laagɔ ‑gbä 'nɩ wa nʋ bhä 'yiziziogbɩ ‑bhutukpä, ɩyä ‑daminë 'sɔ 'bhlɩɛ 'mnö. Wa 'nunu bhä 'mʋ, 'nɩ ‑lɔɔ Laagɔ‑bhutu 'kädʋʋ' dä wa laa lä Salomɔɔ' ‑Tutumëa nä, wa 'wlää bhä ‑lɔɔ wlu.

¹³ 'Yigäda‑nyɩkpɔɔ' ŋoo bhɔɔ 'nɩ ɔ 'kä waa' ‑zajɛɛ 'mnö plä. ‑Bhlɛ sɔɔ ɩ ‑kʋ 'nɩ nyɩkpaa fänʋwa bhä kpänyɩ 'ŋnu.

¹⁴ 'Nɩ nyɩkpaa' lʋä ‑waa bhɛlä ‑zunɔɔ' 'bɛ nä, 'ŋʋʋ 'ŋwnɩä ‑yä ŋwadië, wa ‑kä bhɛ Kwlienyɔɔ' pɔlötɛtɛ. 'Nɩ waa' ‑zunɔɔ 'ŋʋʋ bhä 'cɔcɩnyʋaa' ‑zunɔɔ 'kʋ.

¹⁵ Nyɩkpa lä bhä gupanyʋä. Wa bhɛnönʋwa bhä ‑amäkö ‑yä ‑gbäpɩɩ', 'nɩ wa ŋʋwa bhä 'tlii 'kʋ. Wlä Pɩɛlö kä 'plödä ‑kʋ nä, ɔɔ' ‑zuzuu 'kä waa' nëëdëë' ‑bhloo' ‑kpakpa 'taa ‑yä ɔ 'kä yamä.

¹⁶ ‑Mä nyɩkpa ‑bhutukpä bha bhä 'sɩɩ Zolizalɛmʋduu' kpëkpë 'kʋʋ 'dii 'mnö, 'nɩ wa lä bhä gupanyʋä. Wa lä bhä 'sɩɩ nyɩkpaa' lʋä ‑zizinyenyi bhɩä bhlä kpänyɩ 'kwlɩ nä, 'nɩ waa' ‑lefɩɩn yamä bhä.

Wa ŋʋʋ‑ Pɩɛlö ‑yä Zään 'sɔ ‑jɩɩ'

¹⁷ Ɩ ‑kä bhɛ 'ŋnö nä, 'Cibhisänyɔ 'kädɔɔ ‑yä Sadisɩɛnyʋaa' ‑jɛnyɩɛɛ' nyɩkpaa 'fɩɩn ‑kʋɔ bhlä yëku nä, kä wa paa‑ gbʋgblɛ.

¹⁸ Wa ‑klä lä Zozii' lobho lobhonyʋa nä, kä wa ŋʋwa‑ waa' ‑jɩɩgbë 'käda 'mnö.

¹⁹ Mä, 'saboo, Kwlienyɔɔ' ‑Laagɔzuzu ‑yi 'nɩ ʋ yi ‑jɩgbëa' kplii kään 'nɩ ʋ yiwa ‑zɔɔ wlʋa 'nɩ ʋ yiwa soo, ʋ lä

²⁰ a mʋ ‑mɔɔ Laagɔ‑bhutu 'kädʋʋ 'mnö ‑yä, zëkpü ‑lëlëa' yëkuu' wälɩɩ 'fɩɩn, a sonɩ ‑mɔɔ' nyɩkpaa!

²¹ Wa ‑poo ‑Laagɔzuzuu' sʋ ‑sonʋwa bhlä nä 'nyukwli 'nɩ zëplü 'pii, wa Laagɔ‑bhutu 'kädʋʋ 'mnö plä, 'nɩ wa yi ‑mɔɔ' nyɩkpaa cɩalɩ 'kʋ cie. ‑Mä 'Cibhisänyɔ 'kädɔɔ ‑yä nyɩkpaa 'fɩɩn ‑wa ‑kʋɔ bhlä yëku nä, wa ‑yi 'nɩ wa yi 'Zufʋnyʋaa' 'Tütüplä‑jɛnyɩɛ ‑yä 'Zufʋ‑bhlɩɛ 'mnö ‑Dɔɔpänyʋa 'wlu 'wlää. 'Nɩ wa yi nyɩkpa lobho nynä wa mʋ ‑mɔɔ ‑jɩɩgbëë' ‑yä wa ‑lä Pɩɛlö ‑yä Zään 'sɔ.

²² 'Sʋjaa wa ‑lobho lä nä, wa lä wa yi ‑jɩɩgbëë' nä, Pɩɛlö ‑yä Zään 'sɔɔ ‑wʋ ‑mɔɔ ‑kʋ. 'Nɩ 'sʋjaa yi 'ylɩbhɔ 'nɩ, wa yi 'dö fä.

²³ Wlä a ‑mʋ lä nä, ‑jɩgbëa gbɔɔ‑ 'nägäsä 'nɩ, aa' 'klʋ ‑bɛɛnyʋa ‑mä 'sɩɩ wa ‑koo ‑glënüü. ‑Mä a ‑känöa lä nä, ‑aa ‑wʋ ‑mɔɔ nyɩkpɔ ‑ŋëë.

²⁴ ‑Maa, Laagɔ‑bhutu 'kädʋʋ' nëkʋ kʋnyʋaa' 'kämanyɔɔ, ɩyä 'Cibhisänyʋaa' 'cifinyʋa, wa nuu‑ lä wälɩɩ nä, kɩ 'niniwa‑ plɛkʋ. Wa ylä bhä wa yëku, wlä 'nɩ wälɩklë‑ ‑sä ‑ŋëë yɩ Zozii' lobho lobhonyʋa 'naa!

²⁵ 'Nɩ nyɩkpɔ ‑bhlo yi yi 'nɩ, ɔ yiwa soo, ɔ lä a ni 'yi! Nyɩkpaa a paa‑ bhlä ‑jɩɩ' nä, wa ‑kʋ ‑mɔɔ Laagɔ‑bhutu 'kädʋʋ wa cɩa ‑mɔɔ' nyɩkpaa Laagɔwälɩ.

²⁶ Ɩ ‑kä 'ŋnö nä, 'sʋjaa' 'kämänyɔɔ ‑yä ɔɔ' 'sʋjaa 'sɔ ‑mʋ Pɩɛlö ‑yä Zään 'sɔ ‑gʋʋ. ‑Mä wa 'nʋwa ‑wʋ 'fɩ 'kʋ ‑fä, 'nɩ wa ‑yʋwa 'sɔ yi yi. ‑Ɔnöza bhɛɛ? Wa gu bhä nynä wa kwa wlɩ 'kʋ ‑fä nä, ‑jlë yiwa këkpü 'pä.

Wa laa‑ Pɩɛlö ‑yä Zään 'sɔ 'Zufʋnyʋa tlobinaa 'kʋ

²⁷ 'Sʋjaa ‑lä Pɩɛlö ‑yä Zään 'sɔ 'nɩ wa yiwa 'Zufʋnyʋää' 'Tütüplä‑jɛnyɩɛɛ' ‑jlëa 'mnö ‑lä. 'Nɩ 'Cibhisänyɔ 'kädɔɔ yiwa 'ylä.

²⁸ Ɔ lä 'nɩ kä ‑a ‑bhu'anyɩ bhä ‑kɔkwɩ nynä aa' cɩa lä bhɛ bʋkʋ nyɩkpɔyɩ 'ŋnöö 'mnö! 'Nɩ anyɩa' cɩalɩɩ yä Zolizalɛmʋ‑duu 'fɩɩn 'kʋ 'bhlü nä, ka tään lä nynä ɔɔ' 'kwie ‑gesii 'gbi‑anyɩ 'wlu.

²⁹ ‑Mä Pɩɛlö ‑yä Zozii' ‑mɔɔ' lobho lobhonyʋa, wlä sä ‑a 'gä nyɩkpɔ 'klʋkpää 'ŋʋ nä, ɩ ‑ŋwa 'kʋ nynä ‑mä Laagɔ 'mʋ ‑a ‑la 'ŋʋ 'klʋkpää!

³⁰ A ni, Zoziinɔ a 'bhlää‑ lä 'kusuu 'yii nä, ‑a tɩtɩää' Laagɔɔ wa bʋbɔ bhlä nä, ʋmʋʋ‑ gbä 'nɩ ɔ ‑glɔɔ lä 'kuëë.

³¹ Laagɔ gblɔɔ‑ 'nɩ ʋ ‑fɔɔ ʋ yëku yëku, ʋʋ' 'päwaa 'mnö. Ʋ ‑gbä 'nɩ ɔ ‑zi 'kʋ nynä 'Loyo ‑yä Puënyɔ. Ɩ 'kä 'ŋnö kään ‑yä 'Yizlɛnyʋä 'kä waa' nʋnʋgbɩɩ 'cɩcɩ ‑yä waa' nyenyii 'kä cienöɔ.

³² Kplɔɔkplɔɔ‑wugɔɔ Laagɔ ‑lä lä ʋʋ' 'klʋkpä‑ŋʋnyʋaa' ‑za nä, ʋmʋʋ‑ ‑yanyɩ 'sɔ lü lä wälɩnɩ 'fɩɩn ‑dläfʋɛ.

³³ Mä 'Tütüplä‑jɛnyɩɛ 'mnö nyɩkpaa nuu‑ lä sä wa ci bhlä nä, kɩ ‑siwa plɛkʋ kpänyɩ. Ɩ ‑kä 'ŋnö nä, wa tään bhä nynä wa 'kwa 'bhlä.

³⁴ Maa, 'Tütüplä‑jɛnyɩɛ 'mnö, nyɩkpɔ ‑bhlo, ɔ ‑glö bhä Falizɩɛnyʋaa' ‑jɛnyɩɛɛ' nyɩkpɔ, 'nɩ ɔ plöö‑ bhä 'sɩɩ ‑Jlämöcɩanyɔɔ' lɔɔ ‑ɔ ‑kʋ bhlä kpänyɩ 'klʋkpää' nä. Ɔmɔ wa laa bhä Gamalɩɛ. Gamalɩɛ ‑bha ‑jlünëëdë 'kʋ, 'nɩ ɔ yi ci nynä wa wlʋa 'pɛpɛlɩä Zozii' lobho lobhonyʋa ‑zɔɔ.

³⁵ 'Nɩ ɔ yi ‑jlë soo, ɔ laa, anyɩ 'Yizlɛnyʋä, wälɩɩ a tään lä nynä a kä nyɩkpanä yëku fä nä, a luënɩ ‑kä!

³⁶ 'Ɩɩ ‑lä ‑kä tee 'mʋ ‑tlʋmä! Nyɩkpɔ ‑bhlo ‑yi 'bhlɩnɛɛ' ɔmɔ wa laa bhä Tëdasö. Ɔ ci bhä nynä ‑mä, ɔmɔ, ɔ ‑glö nyɩkpɔɔ' lɔɔ ‑ɔ kään lä gbʋ nä. Ɩ ‑kä 'ŋnö 'nɩ nyɩkpaa' gwlɩ ‑ngbüü' 'ci ‑mɔɔnä (400) yiosä, wa ‑mʋnöɔ 'nɩ wa ‑yɔsɔ nää bhä. ‑Mä nyɩkpa bhlɔɔ‑ 'nɩ ɔ kuu‑. Wa bhlɔɔ‑ lä nä, nyɩkpaa 'fɩɩn ‑wa ‑yɔsɔ nää bhlä nä, kwa ‑dloo, 'nɩ ɔɔ' ‑jɛnyɩɛɛ' yɩɔ lʋʋ' 'plöö‑.

³⁷ Bʋkʋ 'nɩ, lioo 'mnö 'loyo 'kädɔɔ cii‑ lä nynä ‑mä 'bhlɩnɛ 'mnö nyɩkpaa 'kä zɛnöɔ nä, Galileeyu ‑bhlo wlʋʋ‑, ɔmɔ wa laa bhä Zudasö. 'Nɩ nyɩkpaa ‑bhutukpä güo‑ bhä 'sɩɩ 'kʋ. ‑Mä Zudasö ‑mä 'sɩɩ ɔ kuu‑ lä nä, nyɩkpaa 'fɩɩn ‑wa ‑yɔsɔ nää bhlä nä, kä wa ‑dloo.

³⁸ ‑Pɛpɛɛ nä, kä n mʋ‑anyɩ yɩ soo ‑kää nynä ‑mä nyɩkpanä, a 'nä 'mänyɩnʋwa ‑läyɩɔ! A ‑tanʋwa 'yi ‑yä wa mʋ! Nyɩkpaa' plɛ ‑päsä ‑yä nyɩkpaa' nʋnʋgbɩ‑ gä ‑lɔɔ ‑kʋ nä, 'klüü 'fɩɩn wa ŋʋ lä sä nä, ɩɩ' ‑lä dä ŋëë ‑mä kɩ 'kä mnɔ.

³⁹ Ɩɩ' ‑zä Laagɔduu' ɩ kä ‑bha nä, a 'nʋwa ‑lä mii‑. Aa' kä ‑kɛ Laagɔ tʋ fä nä, a luë ‑kä! ‑Mä Gamalɩɛ cii‑ lä sɔɔ nä, kä 'Tütüplä‑jɛnyɩɛ 'mnö nyɩkpaa ‑yɔsɔ plöö‑!

⁴⁰ Wa laa‑ Zozii' lobho lobhonyʋa 'sɔ, 'nɩ wa yiwa bhütë. 'Nɩ wa yiwa ‑kɔkwɩ bho nynä waa' cɩa ‑läyɩ bʋkʋ Zozii' yëkuu' wälɩ! Wa cii‑ ylä sɔɔ nä, 'nɩ wa yiwa 'yi ‑taa.

⁴¹ 'Nɩ lobho lobhonyʋa yi 'Tütüplä‑jɛnyɩɛ yëku ‑bha. Mä wa mʋ bhlä nä, ‑pʋpɛ bhlʋwa bhä. Wlä Laagɔ ‑gbä lä 'nɩ Zozii' 'ŋnöö ‑za, nyɩkpa ‑bhütuwa lä nä, kɩ nää‑.

⁴² 'Nɩ ylɩɩ 'fɩɩn 'kʋ nä, Laagɔ‑bhutu 'kädʋʋ 'mnö, ɩyä 'gbüü 'fɩɩn 'mnö nä, wa sää bhä ‑mɔɔ Zozi Klisöö' 'Nägädöö 'nɩ wa cɩa bhä 'kɔɔkɔ nyɩkpa.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan