Bìoball air-loidhne

Nʋnʋgbɩɩ 16 - GOD - u2

Pɔlʋ ‑yä Silasö ‑yä Timotee 'sɔ nää

¹ 'Nɩ Pɔlʋ yi Dɛböduu' mʋ, 'nɩ ɔ yi 'sɩɩ Lislöduu' ŋëë. ‑Lɔɔ Lislöduu' nä, Zozii' 'kʋgënyɔ ‑bhlo ‑kʋ bhä ‑lɔɔ 'nɩ wa lɔɔ bhä Timotee. 'Zufʋ‑ylʋkwlä ‑bhlo plöö‑ bhlä 'cɔcɩŋnɔ nä, ɔɔ 'yu, ɔmɔɔ‑ plöö‑ bhlä Timotee. Ɔ 'bä ‑glö bhä 'Glɛköyu.

² 'Cɔcɩɩ' bhelia 'fɩɩn ‑wa ‑kʋ bhlä Lislöduu' ‑yä Yikonɩɔmʋduu' nä, wa ci bhä kpänyɩ ɔɔ' 'nää.

³ Timotee nä, Pɔlʋ ylä bhlä nynä ɔ ‑yɔsɔ 'kä nää nä, 'Zufʋnyʋa ‑wa ‑kʋ bhlä ‑lɔɔ 'bhlɩɛ 'mnö nä, waa' ‑za, kä Pɔlʋ ‑gbä 'nɩ wa döɔ 'kʋ. Waa' lefɩɩn ‑yi bhä sɔɔ nynä ɔ 'bä ‑glö bhä 'Glɛköyu.

⁴ 'Dii 'fɩɩn 'mnö Pɔlʋ ghlää bhlä nä, ɔ sää bhä Zolizalɛmʋduu' 'dö. Wälɩɩ 'fɩɩn lobho lobhonyʋa ‑yä Zolizalɛmʋduu' 'cɔcɩɛɛ' nëkʋʋ' kʋnyʋa 'sɔ 'ŋʋʋ‑ bhlä 'kʋ nä, ɔ sänʋwanyɩ bhä. 'Nɩ ɔ sonʋwa bhä nynä wa 'ŋʋɩ 'klʋkpää'.

⁵ Ɩ ‑kä 'ŋnö nä, 'cɔcɩnyʋaa' pɔlötɛtɛɛ 'ŋʋnöɔ bhɛ kpänyɩ 'kʋ. 'Nɩ ylɩɩ 'fɩɩn 'kʋ nä, nyɩkpaa' ‑zunɔɔ 'ŋʋnöɔ bhä 'sɩɩ 'kʋ.

Masedʋanöbhlɩ 'kʋʋ nyɩkpɔ ‑ghlä Pɔlʋ 'yii

⁶ ‑Mä Pɔlʋ ‑mʋ lä Aziibhlɩ 'kʋ nä, Kplɔɔkplɔɔ‑wugɔɔ 'nöɔ ‑wʋ 'casɩ nyɛɛ‑ nynä ɔ cii‑ ‑mɔɔ Laagɔwälɩ. Ɩ ‑kä 'ŋnö nä, kwa tɔɔ‑ Flizii ‑yä Galatɩ‑bhlɩɛ.

⁷ Wa ‑ŋëë lä Mizii‑bhlɩɛ yëku nä, wa ‑tää nynä wa 'kä Bitiniibhlɩ 'kʋ mʋʋ, ‑mä Zozii' 'Wugɔɔ 'nʋwa ‑wʋ 'casɩ nyɛɛ‑.

⁸ Ɩ ‑kä 'ŋnö nä, kä wa tɔɔ Mizii‑bhlɩɛ 'nɩ wa yi Tlʋwasöduu' plä.

⁹ ‑Maa, 'ylʋ ‑bhlü ylä nä, wälɩklë ‑ghlä Pɔlʋ 'yii. 'Bhlɩɛ wa laa lä Masedʋanö nä, ɛɛ' 'mnö nyɩkpɔ, ɔ ‑ghlä Pɔlʋ 'yii. Ɔ 'nynigo‑ 'nɩ ɔ yi Pɔlʋ 'wlu slä, ɔ lä bheeje, ‑n yi‑anyɩ 'kʋ! ‑N ghlää ‑mää Masedʋanöbhlɩ 'kʋ ‑yä ‑n 'ga‑anyɩ klää!

¹⁰ Wälɩnɩ ‑ghlä lä 'gää Pɔlʋ 'yii nä, ‑anyɩ kä ‑a ‑tään yɩ nynä ‑a 'gä Masedʋanöbhlɩ 'kʋ mʋ. ‑Anyɩa plɛ yä bhɛ bhlü nynä ‑mɔɔ Masedʋanöö', ‑mɔɔ Laagɔ ‑waa bhlä nynä ‑a mʋʋ ‑yä, ‑a 'gä ‑mɔɔ' 'lëkpëa 'mnö nyɩkpaa Kwlienyɔɔ' 'Nägädöö ‑sää.

Lidii ‑yä Kwlienyɔ Zozii 'kʋ ŋoo

¹¹ 'Nɩ ‑lɔɔ Tlʋwasöduu', ‑a yi 'mɩɩ plä, 'nɩ jiee' 'lëkpëa wa laa lä Samotlasö nä, ‑a yi aa' ‑gbäsɩɩ' ‑blɔ 'yi gëë. Zeli ‑ze lä nä, 'nɩ ‑a yi Nɩapolisöduu' mʋ.

¹² ‑A ‑bha lä ‑lɔɔ nä, 'nɩ ‑a yi Filipʋduu' mʋ. Filipʋ‑duu nä, ʋmʋʋ‑ plöö‑ lä Masedʋanöbhlɩ 'kʋʋ 'di 'kädɩɩ tɛɛtɛɛlʋʋ. ‑Mä Wlomɛɛnyʋä ‑kʋ bhä ‑mɔɔ nä, wamää‑ 'kämänʋwa bhlä. 'Duyɩ 'mnö, ‑a sä ‑mɔɔ ylɩɩ zio.

¹³ Sabaa‑gwlɛylʋʋ 'kʋ, kä ‑a ‑bha duu' 'nɩ ‑a ‑mʋ 'nyie yëku. ‑A bhobho bhɛ nynä ‑a yi ‑lɔɔ 'Zufʋnyʋää' bhibhiedä 'nii. ‑A ‑mʋ lä ‑lɔɔ nä, 'ŋwnɩa 'wlää‑ bhlä ‑lɔɔ 'wlu nä, kä ‑a ‑kʋ ‑lɔɔ sä 'nɩ ‑a yiwa Laagɔwälɩ soo.

¹⁴ ‑Mä 'ŋwnɩaa' nëëdëë' lɔɔ ‑bhlo, wa lɔɔ bhä Lidii. Ɔ ‑glö bhä Tɩatiiduu' 'ylʋkwlä. 'Ŋnɔnɔ nä, 'ŋnumʋ‑lokwü ‑zälöö, ɩmɩ ɔ ŋʋ bhä 'kpä. ‑Mä 'Zufʋnyʋaa' Laagɔɔ 'mʋ ɔ bʋbɔ bhä. Ɔ ‑kʋ 'nyukwli poo dä 'nɩ Kwlienyɔ yi ɔɔ' plɛɛ 'klʋ kään ‑yä wälɩɩ Pɔlʋ ci bhlä nä, ɔ 'kɩ plɛ yëku fään.

¹⁵ 'Nɩ ɔ yi 'nyu 'wlu 'ŋʋ, ɔ ‑yä ɔɔ' 'lɔlʋkpönyʋä 'sɔ. 'Nɩ ɔ yi‑anyɩ laa, 'nɩ ɔ yi‑anyɩ soo, ɔ lä a kɩ 'zaazɩ plɛkʋ ‑kää nynä ‑mä, 'naa zëkpëa n nyɩa‑ Kwlienyɔ wlɩɩ' nä, a yi 'naa dää ‑yä a plä ‑lɔɔ 'kʋ. ‑Mä 'ŋnɔnɔ ‑klanyɩ kutu kutu nynä ‑a ‑kʋ ɔɔ' daa.

Wa ŋʋʋ‑ Pɔlʋ ‑yä Silasö 'sɔ ‑jɩɩ' ‑mɔɔ Filipʋduu'

¹⁶ Ylʋʋ ‑bhlo 'kʋ, ‑a mʋ bhä bhibhie ‑kää 'nɩ, nyɩkpɔɔ' ‑gänʋŋnɔ ‑bhlo ‑yi‑anyɩ ‑blɔkʋ. 'Ŋnɔɔ nä, ‑zuzunyënyu ‑kʋɔ bhä kätää' 'nɩ ʋ gbä 'nɩ ɔ ni bhä sä. 'Nɩ ɔɔ' sënilɩɩ nä, ɔɔ' käänyʋä 'ninɩɩ bhä monii ‑bhutukpää'.

¹⁷ ‑Mä Pɔlʋ ‑yä ‑anyɩ 'sɔ, 'ŋnɔɔ gü‑anyɩ 'kʋ 'nɩ ɔ woo bhä. Ɔ ci bhä ɔ lä nyɩkpanä, wa ‑glö 'Kʋzi Laagɔɔ' ‑gänʋnyʋä! Nyɩkpa 'kä ‑lɔɔ nëë' ‑bha nä, ɩɩ' ‑blɔɔ 'mʋ wa ‑yi'anyɩ lä paa ‑kää!

¹⁸ Ɔ ‑woo sɔɔ ‑aaa, 'nɩ ɩ ‑nʋ ylɩɩ bhutukpä. ‑Maa, 'ŋnɔɔ nʋnʋsaa ‑sie Pɔlʋ plɛkʋ, 'nɩ ɔ 'ylɩbhɔ‑ 'nɩ ɔ yi ‑zuzunyënyuu 'yizlɛ 'kʋ 'ŋʋʋ. Ɔ lä Zozi Klisöö' 'ŋnöö 'mnö, n sonö‑ö nynä ‑mä, ‑n ‑bha yɩ 'ŋnɔ 'yɩ kätää'! 'Nɩ 'kpobhuu ‑bhlo 'kʋ, ‑zuzunyënyuu yi 'ŋnɔɔ kätää' ‑bha.

¹⁹ ‑Maa, 'ŋnɔɔ käänyʋä nä, wa ni bhlä 'yi nynä ‑mä ‑bʋzʋɛ wa 'ninöɔ bhlä 'mʋ nä, wa 'nɩɛ ‑lä bhɛ 'ni nä, kwa ‑klä Pɔlʋ ‑yä Silasö 'sɔ. Wa ‑gbisiwa ‑jlünëdëa ‑aaa 'nɩ wa yiwa 'cifinyʋa 'kädʋa dëlü fä.

²⁰ 'Nɩ wa yiwa Wlomɛɛnyʋaa' 'zuzunyʋa dëlü fä, 'nɩ wa yiwa soo, wlä nyɩkpanä, kwa nyima lä ‑anyɩa 'duu!

²¹ ‑Jlämaa' laa ‑aa wʋ lä 'kʋ ‑ŋwa nynä ‑anyɩ Wlomɛɛnyʋä ‑a 'ŋʋ 'klʋkpää' ‑yä ‑a nʋ nä, amä wa cɩa lä.

²² Wa cii‑ lä sɔɔ nä, kä waa' plɛkʋ ‑si ‑jlëa. 'Nɩ Wlomɛɛnyʋaa' 'cifinyʋa, yi gbä 'nɩ wa yi Pɔlʋ ‑yä Silasö 'sɔ 'kwëtii' ‑sä. 'Nɩ wa yi nyɩkpaa soo nynä wa 'sɛpɩwa.

²³ Wa 'sɛpɩwa‑ kpänyɩ 'fɩa, 'nɩ wa yiwa ‑jɩɩ' 'pä. 'Nɩ wa yi ‑jɩgbëa' 'klʋbɛɛnyɔɔ soo nynä ɔ konöa 'nägäsä.

²⁴ Wa ‑soo ylä ‑jɩgbëa' 'klʋ ‑bɛɛnyɔɔ nä, kɔ ŋʋwa‑ ‑jɩgbëa 'mnö ‑bhutuklë ‑bhloo', 'nɩ ɔ yiwa kpë bhɩɩ' 'ŋʋ.

'Sʋjäyu yä Zozii 'kʋ ŋoo

²⁵ ‑Mä dodooga 'mnö, Pɔlʋ ‑yä Silasö 'sɔ bhibhie 'nɩ wa bhlɩ bhä ‑Laagɔlɩ, 'nɩ ‑jɩnyʋa ‑puwa 'nyukwlii'.

²⁶ ‑Mä 'kpobhuu ‑bhlo 'kʋ, ‑dʋdʋ ‑tɩtɛ 'sää kpänyɩ 'titi. 'Nɩ ‑jɩgbëa' papɩɩ ‑mä 'sɩɩ ɩ ‑tɩtɛ 'nɩ aa' 'gbüü 'fɩɩn känöɔ, 'nɩ ‑jɩnyʋa 'fɩɩn ‑abhluëköö doo‑.

²⁷ ‑Jɩgbëa' koonyɔɔ ‑glɔɔ lä nä, ɔ lɔ wloo nä, ‑jɩgbëa' kplii 'fɩɩn ‑känöɔ. Ɔ ‑luë bhä nynä kä ‑jɩnyʋa guu‑ nä, kɔ ‑kplä ‑mɔɔ ɔɔ' ‑jlɛɛ ‑yä ɔ 'kä ɔ yëku 'bhlä.

²⁸ 'Nɩ Pɔlʋ yio 'kʋ ‑gaa, ɔ lä ‑weeyia, ‑naa nʋ ‑lä ‑n yëku nyenyi ‑mä ‑anyɩ 'fɩɩn ‑a ‑kʋ ‑lä!

²⁹ 'Nɩ nyɩkpɔɔ yi ci nynä wa ŋänɩä. 'Nɩ ɔ yi 'fäfä Pɔlʋ ‑yä Silasö 'sɔ ‑mɔɔ ŋëë, yëku tɩtɛnöɔ bhɛ 'nɩ ɔ yiwa dëlü bhlüü.

³⁰ 'Nɩ ɔ yiwa ‑zɔɔ wlʋa, 'nɩ ɔ yiwa 'ylä, ɔ lä 'naa cɩanyʋänyɩ‑, säsä n yi bhä nʋ 'nɩ n yi bhä ‑lɔɔ nëë' ‑bhaa?

³¹ 'Nɩ wa yio soo, wlä ‑n kää Kwlienyɔ Zozii pɔlötɛtɛ ‑mä, ‑n yi ‑lɔɔ nëë ‑bha. ‑Mɔɔ, ɩyä ‑naa 'lɔlʋkpaa 'fɩɩn, a yi ‑lɔɔ nëë' ‑bha.

³² 'Nɩ wa yio Kwlienyɔɔ' 'Nägädöö ‑sää. 'Nɩ nyɩkpaa 'fɩɩn ‑wa ‑kʋ bhlä ɔɔ' 'gbëa 'mnö nä, wa yiwa 'sɩɩ Kwlienyɔɔ' 'Nägädöö ‑sää.

³³ 'Nɩ ‑jɩgbëa' 'klʋbɛɛnyɔɔ yi Pɔlʋ ‑yä Silasö 'sɔ 'kʋ bhlü 'nɩ, ‑lɔɔ' 'saboyɩ bhlobhlo, ɔ yi waa' 'jüü pɩä. 'Nɩ wa yi nyɩkpɔɔ ‑yä ɔɔ' 'gbëë nyɩkpaa 'fɩɩn 'nyu 'wlu 'ŋʋ.

³⁴ 'Nɩ nyɩkpɔɔ yi Pɔlʋ ‑yä Silasö 'sɔ gbëë' fä, 'nɩ ɔ yiwa lülülɩɩ 'nyɛ. Wa ‑kä bhɛ lä Laagɔɔ' pɔlötɛtɛ nä, ɩɩ' 'ŋnö 'mnö ‑pʋpɛ bhlʋwa bhɛ.

Wa yä Pɔlʋ ‑yä Silasö 'sɔ ‑jɩɩ' ‑sä

³⁵ Zeli ‑ze ylä nä, 'nɩ Wlomɛɛnyʋa 'zuzunyʋa yi 'sʋjä jɩgbëa' 'klʋbɛnyɔɔ yëku lobho nynä ɔ ‑tanʋwa 'yi.

³⁶ 'Nɩ nyɩkpɔɔ yi yi, 'nɩ ɔ yi Pɔlʋ soo, ɔ lä 'Zuzunyʋa lä n ‑tanö'anyɩ 'yi. Nä, a 'wlʋ yɩ ‑zɔɔ ‑yä, a mʋʋ 'kʋ wɔtɔlɩɩ'!

³⁷ 'Nɩ Pɔlʋ yi 'sʋjaa soo, ɔ lä wa 'nö‑anyɩ ‑wʋ 'tite ŋʋʋ‑, 'nɩ wa ŋʋ‑anyɩ ‑jlëë' 'nɩ wa 'sɛpɩ‑anyɩ. ‑Bhlɛ ‑a ‑glö Wlomɛɛnyʋä, 'nɩ wa ‑klanyɩ 'nɩ wa paa‑anyɩ ‑jɩɩ'. ‑Pɛpɛɛ' nä, kä wa tään lä nynä wa 'ka‑anyɩ 'mükü ‑müküü' 'yi ‑taa ‑a? Yio, ɩɩ' ‑lä sɔɔ 'kʋ 'plö. Wamä 'titi, wa yi ‑yä wa 'ka‑anyɩmɩ soo nynä ‑a ‑bha ‑jɩɩ'.

³⁸ 'Nɩ 'sʋjaa yi mʋ 'nɩ wa yi Wlomɛɛnyʋaa' 'zuzunyʋa wälɩnɩ ‑sää. ‑Mä wa nuu‑ lä nynä Pɔlʋ ‑yä Silasö 'sɔ ‑glö bhä Wlomɛɛnyʋä nä, kä ‑ŋänö ‑plʋwa.

³⁹ Ɩ ‑kä 'ŋnö nä, kä wa ‑yi Pɔlʋ ‑yä Silasö 'sɔ yëku. Wa ‑bhibhiwa 'fɩa, 'nɩ wa yiwa ‑jɩɩ' ‑sä. 'Nɩ wa yiwa 'wlu slä nynä wa ‑bha duu'.

⁴⁰ Pɔlʋ ‑yä Silasö 'sɔ ‑bha ylä ‑jɩɩ' nä, kä wa mʋ bhɛŋnɔ Lidii' ‑gbäsɩɩ. ‑Mɔɔ' bhelia ‑yä bhɛŋwnɩa, wa ‑mʋwa 'yi 'ni kää. Wa ‑bhlüënʋwa ylä 'fɩa plɛɛ' nä, 'nɩ wa yi duu' ‑bha.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan