Bìoball air-loidhne

Nʋnʋgbɩɩ 11 - GOD - u2

Pɩɛlö sää ‑mɔɔ Zolizalɛmʋduu' 'cɔcɩnyʋa 'dö

¹ Zozii' lobho lobhonyʋa ‑yä bhelia ‑wa ‑kʋ bhlä Zudee‑lëkpëa 'mnö nä, wa nuu‑ lɔɔ' 'döö nynä nyɩkpaa' ‑lʋwa ‑waa ‑wʋ lä 'Zufʋnyʋä plöö‑ nä, wa nuu‑ Laagɔwälɩɩ 'nɩ wa ŋonɩ‑ 'kʋ.

² ‑Maa, 'tänyɩɩ Pɩɛlö 'ylɩbhɔ‑ ylä Zolizalɛmʋduu' nä, ‑mɔɔ' 'Zufʋnyʋa ‑wa ŋoo‑ lä Zozii' 'Nägädöö 'kʋ nä, kä wa ‑fɔɔ nëkʋ.

³ Wlä nyɩkpaa' lʋä ‑waa ‑wʋ lä 'kʋ döö‑ nynä 'Zufʋnyʋä nä, kä ‑n ‑plä waa' 'gbüü 'mnö, 'nɩ ‑n ‑yʋwa 'sɔ ‑lüü 'kʋ!

⁴ 'Nɩ Pɩɛlö yiwa wälɩɩ 'mʋ ‑säsä 'nɩä 'nɩä.

⁵ Ɔ lä n ‑kʋ bhä Zopeeduu', 'nɩ n bhibhie bhä, 'nɩ Laagɔɔ' 'päwa kwlinö'ö 'kʋ 'nɩ wälɩ ‑ghlä'ä 'yii. N nii‑ ‑laagɔɔ' 'yi 'nɩ lʋʋ ‑bha ‑mɔɔ. Ʋ ‑kʋ bhä nynä 'taplee 'kädɛ. Ɛɛ' 'kwëtüü ‑mɔɔnä ‑kä bhä sä 'nɩ, ɛ kwlii‑ ‑aaa, 'nɩ ɛ yi'i yëku 'mɛ.

⁶ N ‑wloo lä 'taplee ‑plɩɩ nä, n nii‑ ɛɛ' 'mnö mnaa' laa ‑a nämnö lä bhɩ ‑mɔɔnä 'yii nä. N nii‑ 'sɩɩ ‑mɔɔ 'klää mna, ‑yä bɩbɛ bɩbɛ‑mna, 'nɩ n nii‑ mɔɔ ŋɔkʋʋ' nümnü.

⁷ 'Nɩ n nuu‑ 'sɩɩ nuwälɩ 'nɩ ɩ ci bhä, ɩ lä Pɩɛlö‑, ‑n ‑bha 'kʋ, ɩyä ‑n 'bhlä ‑yä ‑n lü!

⁸ 'Nɩ n yi ci nynä ‑mä, ‑ɔ! Kwlienyɔ‑, 'nn ‑läzä 'naa 'gbä lü. 'Nɩ, lülülʋʋ lʋʋ‑ ‑kä lä ‑gesi yëku nä, n 'nʋ ‑läzä 'naa nënä 'mnö 'ŋʋ.

⁹ 'Nɩ nuwälɩɩ yi bʋkʋ ‑laagɔɔ' ghlää, 'nɩ ɩ yi ci, ɩ lä lʋʋ' lʋʋ Laagɔ cii‑ lä nynä ‑mä kʋʋ ‑kplɔɔ nä, ‑naa 'ŋʋʋ ‑lä ‑gesi yëku!

¹⁰ ‑Mä nuwälɩnɩ, ɩ cinöɔ 'ci taa 'fɩa, 'nɩ ‑lɩɩ 'fɩɩn n ni bhlä 'yi nä, ɩ yi ‑laagɔɔ' ‑gblää.

¹¹ 'Tänyɩɛ ‑bhlobhlo 'mnö 'nɩ nyɩkpa taa yi 'kʋ ghlä. Nyɩkpɔ ‑bhlo ‑lobhuwa bhlä 'naa ‑za. Wa bha bhä Sezaleeduu'. 'Nɩ 'gbëa n ‑kʋ bhlä 'mnö nä, wa yia 'mnö plä.

¹² 'Nɩ Kplɔɔkplɔɔ‑wugɔɔ yi'i soo nynä ‑mä, n ‑yʋwa 'sɔ mʋ ‑mä 'naa cɛɛ ‑lä. Bhelienä ‑ngboplo a ni lä ‑lää 'yi nä, wamä n ‑yʋwa 'sɔ ‑mʋ lä ‑mɔɔ Sezaleeduu'. ‑Mɔɔ' nyɩkpɔ wa lɔɔ Kɔnɛyö nä, ɔɔ' ‑gbäsɩɩ, ‑mɔɔ ‑a ‑mʋ.

¹³ Kɔnɛyönɔ, 'nɩ ɔ yi‑anyɩ lä 'dö ‑sää. Ɔ lä ɔ ‑kʋ bhä ɔɔ' dää, 'nɩ ‑Laagɔzuzu ‑ghlɔɔ 'yii, 'nɩ ʋ yio soo, ʋ lä ‑n lobho nyɩkpa ‑yä wa mʋ Zopeeduu', ɩyä wa laa nyɩkpɔɔ‑ plöö‑ lä Simɔɔ 'nɩ, wa ‑zie lä Pɩɛlö nä.

¹⁴ Pɩɛlönɔ nä, ɔ yi‑i wälɩ soo, ɩmɩɩ‑ 'gä‑ä lä ‑lɔɔ nëë' ‑sä. 'Nɩ ɩmɩɩ‑ 'gä lä 'sɩɩ ‑lɔɔ ‑naa gbünyʋa 'fɩɩn nëë' ‑sä.

¹⁵ Kɔnɛyö cii‑ lä sɔɔ nä, n ‑kʋwa ‑bhɛ soo dä 'nɩ, sä Kplɔɔkplɔɔ‑wugɔɔ kwlinö‑anyɩ bhlä 'kʋ ‑mɔɔ cieda nä, wamä ‑mä 'sɩɩ, 'nɩ Kplɔɔkplɔɔ‑wugɔɔ yiwa sɔɔ 'kʋ kwlii.

¹⁶ Ɩ ‑kä 'ŋnö nä, wälɩklë ‑bhlo Kwlienyɔ cii‑ bhlä nä, kä n ‑luë aa' dä 'kʋ. Ɔ cii‑ bhä, ɔ lä Zään Badisö nä, 'nyu 'wlu ɔ ŋʋʋ‑ lä nyɩkpa. ‑Mä anyɩ nä, Kplɔɔkplɔɔ‑wugɔɔ 'mʋ Laagɔ 'kanyɩ lä 'wlu 'ŋʋ.

¹⁷ A ni 'yi ‑a! ‑A ŋoo‑ lä Kwlienyɔ Zozii' ciciwälɩɩ 'kʋ nä, ɩɩ' sä Laagɔ nyɩ‑anyɩ lä nä, sɔɔ ‑säkä ‑säkä ʋ nyɩwa‑ lä 'sɩɩ. Nä, n plöö‑ bhää ‑amʋ, 'nɩ n ‑yä Laagɔ 'sɔ yi bhä 'kʋ bhlää?

¹⁸ ‑Mä Zolizalɛmʋduu' bhelia nuu‑ lä sä Pɩɛlö cii‑ lä nä, kä waa' plɛ ‑bhlü. Wa fään bhɛ Laagɔ 'ŋnu, wlä 'zaazɩ, nyɩkpaa ‑waa ‑wʋ la 'Zufʋnyʋä plöö‑ nä, Laagɔ ‑gbä 'sɩɩ 'nɩ wa 'cɩcɩ‑, 'nɩ wa nii‑ 'pʋpʋɛ.

Atɩɔsöduu' 'cɔcɩnyʋa

¹⁹ 'Tänyɩɛ 'mnö Zozii' 'kʋgënyɔ Etɩɛnö kuu‑ lä nä, kä nyɩkpa cie‑ yɩ Zozii' 'kʋgënyʋa nyenyisää' klälɩ 'kʋ. Ɩ ‑kä 'ŋnö nä, wa ‑dloo, 'nɩ wa ‑jɛjɛ dää 'fɩɩn sä. ‑Nänʋä ‑mʋ ‑kaaa 'nɩ wa ‑ŋëë Fenisiibhlɩ 'kʋ. ‑Nänʋä ‑mʋ 'nɩ ji‑lëkpëa wa laa lä Siplö nä, wa ‑ŋëë ‑mɔɔ. ‑Nänʋä ‑mʋ 'sɩɩ 'nɩ wa ‑ŋëë Atɩɔsöduu'. Mä Kwlienyɔɔ' 'Nägädöö nä, 'Zufʋnyʋa ‑bhlo wa ‑sänɩ bhä, ‑mä waa' 'sänɩ bhɔɔ nyɩkpaa' 'fɩɩn.

²⁰ Ɩ ‑kʋ bhɛ sɔɔ ‑mä, waa' nëëdëë' nyɩkpa ‑bha ‑mɔɔ Siplö‑lëkpëa ‑yä Silɛnöduu' 'nɩ wa ‑yi ‑mɔɔ Atɩɔsöduu' 'nɩ wa yi 'Glɛkönyʋa Kwlienyɔ Zozii' 'Nägädöö ‑sää.

²¹ Kwlienyɔɔ' 'tɛtɩɩ ‑kʋwa bhlä yëku nä, ɩ ‑gbä 'nɩ nyɩkpaa ‑bhutukpä laa‑ Laagɔwälɩɩ nyaasäsä, 'nɩ wa ‑taa gbenyenyi‑zëkpëa 'yi 'nɩ wa 'ylɩbhɔ‑ 'nɩ wa yi waa' zëkpëa Kwlienyɔ wlɩɩ' 'nyɛ.

²² ‑Lää' wälɩnɩ ‑bhlüü lä Zolizalɛmʋduu' 'cɔcɩnyʋa 'nyukwli nä, kwa ‑lobho Banabasö 'nɩ, ɔ ‑mʋ Atɩɔsöduu'.

²³ ‑Mä Banabasö ‑mʋ lä 'nɩ ɔ nii‑ lä sä Laagɔ paa‑ lä ‑mɔɔ' 'kʋgënyʋa 'nyuu nä, kɩ ‑plɔɔ ‑pʋpɛɛ'. Ɩ ‑kä 'ŋnö nä, ɔ ŋʋwa‑ dɩgälɩɩ' nynä wa 'sänyɩ 'sää 'titi ‑yä wa ‑yä Kwlienyɔ 'sɔ 'jɛnyɩ 'kɔɔkɔ.

²⁴ Banabasö nä, ɔ ‑glö bhä plɛkʋ nanɩnyɔ. Laagɔɔ' Kplɔɔkplɔɔ‑wugɔɔ ‑kʋɔ bhä kpänyɩ yëku, 'nɩ ɔ ‑kä bhä Laagɔɔ' pɔlötɛtɛ kpänyɩ. ‑Mä ‑lɔɔ' 'tänyɩyɩ 'mnö nä, nyɩkpaa ‑bhutukpä 'cɩcɩ‑ 'nɩ wa ‑yii Kwlienyɔɔ' ‑blɔɔ 'kʋ.

²⁵ 'Nɩ Banabasö yi 'plö 'nɩ, ɔ yi Sɔlʋ ‑gʋʋ mʋ ‑mɔɔ Tasöduu'.

²⁶ Ɔ ‑mʋ 'nɩ ɔ nii‑ lä Sɔlʋ nä, kɔ ‑lɔɔ Atɩɔsöduu'. Wa ‑sä ‑lɔɔ' 'cɔcɩɛ 'mnö 'ylʋbä. Nyɩkpaa ‑bhutukpä 'wlää bhä ‑mɔɔ 'wlu, 'nɩ Banabasö ‑yä Sɔlʋ 'sɔ cɩwa bhä. Zozii' 'kʋgënyʋa nä, ‑mɔɔ Atɩɔsöduu', ‑mɔɔ nyɩkpa lanʋwa‑ lä tɛɛtɛɛdä Kletɩɛ‑ŋnöö.

²⁷ ‑Lɔɔ' 'tänyɩyɩ 'mnö nä, Zolizalɛmʋduu', 'plɔfɛtɩnyʋä ‑bha ‑mɔɔ, 'nɩ wa yi Atɩɔsöduu' yi.

²⁸ ‑Mä waa' nëëdëë' lɔɔ ‑bhlo, ɔmɔ wa laa Agabusö. Kplɔɔkplɔɔ‑wugɔɔ kwlinöɔ‑ 'kʋ 'nɩ ɔ cii‑ nynä ‑mä ‑gbugbe 'kädɛ yi bhä yi 'nɩ ɛ yi 'bhlɩɩ 'fɩɩn plä. 'Nɩ 'loyo 'kädɔɔ Klodö, ɔɔ' 'tänyɩɛ 'mnö nä, ‑lɔɔ' ‑gbugbe 'kädɛɛ ‑yi 'zaazɩ.

²⁹ 'Nɩ Zozii' 'kʋgënyʋa yi 'nii, wlä ‑anyɩa nëëdë nyɩkpɔ nyɩkpɔ nä, ɩ ‑ŋwa 'kʋ nynä sä ɔ yi lä 'ni nä, ɔ ‑lä 'sɔɔ ‑yä ‑a 'gä Zudee‑bhlɩɛ 'mnö 'cɔcɩnyʋa klää.

³⁰ Sä wa 'ŋʋʋ‑ bhlä 'kʋ nä, wa nii‑ sɔɔ. 'Nɩ wa yi Banabasö ‑yä Sɔlʋ 'sɔ lobho, 'nɩ ‑lɩɩ, wa yii ‑mɔɔ Zudee' 'cɔcɩɛɛ' nëkʋʋ' kʋnyʋa fä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan