Bìoball air-loidhne

Nʋnʋgbɩɩ 10 - GOD - u2

Sezaleeduu' Laagɔ ‑ghla Kɔnɛyö wälɩ 'yii

¹ 'Duu wa laa lä Sezalee nä, ‑mɔɔ' nyɩkpɔ ‑bhlo, ɔmɔ wa laa bhä Kɔnɛyö. Wlomɛɛnyʋa 'sʋjaa ‑zajɛɛ wa laa lä Yitalii nä, ɔmɔɔ‑ 'kämänɩɛ bhlä.

² ‑Mä Kɔnɛyö nä, kɔ ŋʋ bhä kpänyɩ Laagɔ 'klʋkpää! Ɔ ‑yä ɔɔ' gbünyʋa 'sɔ ŋʋ bhä Laagɔ 'klʋkpää'. Ɔ klää bhä 'sɩɩ kpänyɩ 'bhlɩɛ 'mnö ŋäzönyʋa. 'Nɩ ɔ bhibhie bhä ylɩɩ 'fɩɩn 'kʋ Laagɔ.

³ Ylʋʋ ‑bhlo ‑kʋ ‑lɔɔ, 'sää ‑kugbësää' 'gliyi taa' 'tänyɩɩ, 'nɩ ‑Laagɔzuzu ‑ghlɔ 'yii. Ɔ niu‑ 'sää 'yi wɩa. ‑Laagɔzuzuu ‑plä Kɔnɛyöö 'gbëa 'mnö, 'nɩ ʋ yio soo, ʋ lä Kɔnɛyö‑!

⁴ ‑Mä Kɔnɛyö ‑ŋänö ‑plɔɔ 'nɩ ɔ wloo bhɛ ‑Laagɔzuzuu ‑plɩɩ. Ɔ lä Kwlienyɔ‑, wälɩ ‑sa ‑kɛ 'noo? ‑Laagɔzuzuu lä Kɔnɛyö‑, ‑naa bhibhie, ɩyä ‑naa 'nää‑ ‑n nʋ lä ‑ŋäzönyʋa nä, Laagɔ yä 'ɩɩ dä 'kʋ luë ‑mä ʋ 'nö‑ö ‑wʋ 'kʋ bë!

⁵ ‑Pɛpɛɛ nä, ‑n lobho nyɩkpa ‑yä wa mʋ Zopeeduu'. Nyɩkpɔ ‑bhlo ‑kʋ ‑mɔɔ 'nɩ wa lɔɔ Simɔɔ, ‑mä wa ‑zienöɔ 'sɩɩ Pɩɛlö. ‑N gbä ‑yä wa sonöɔ ‑yä ɔ yi.

⁶ Nyɩkpɔ ‑bhlo ‑kʋ ‑mɔɔ 'nɩ wa lɔɔ 'sɩɩ Simɔɔ 'nɩ ɔɔ' 'gbëa 'tënö jiee, ‑mä mnäkwi ɔ bhlä. ‑Lɔɔ' nyɩkpɔɔ' daa, ‑lɔɔ Pɩɛlö ‑plä lä 'kʋ.

⁷ 'Tänyɩɩ' ‑Laagɔzuzuu ‑soo lä Kɔnɛyö 'nɩ ʋ ‑mʋ ylä 'fɩa nä, kä Kɔnɛyö ‑lobho ɔɔ' ‑gänʋnyʋä 'sɔ. 'Nɩ 'sʋjaa ɔ 'kämä bhlä nä, ɔ ‑gbɩwa waa' lɔɔ ‑bhlo 'kʋ. 'Sʋjäyu 'yɩ nä, kɔ ŋʋ bhä kpänyɩ Laagɔ 'klʋkpää. Kɔ ‑yä Kɔnɛyö 'sɔ 'jɛnyɩ‑ bhä kpänyɩ 'nɩ wa nʋ bhlä lebhe.

⁸ Kɔnɛyö ‑säsänʋwa 'fɩa wälɩɩ, 'nɩ ɔ yiwa Zopeeduu' lobho.

Zopeeduu' Laagɔ ‑ghlä Pɩɛlö wälɩ 'yii

⁹ Zeli ‑ze ylä nä, nyɩkpaa Kɔnɛyö ‑lobho bhlä Zopee' nä, wa ‑kʋ bhä ‑lätee ‑blɔkʋ, ‑mä wa mɛ bhɛ Zopee‑duu yëku. 'Nɩ ‑lɔɔ' 'tänyɩɛ ‑bhlobhlo 'mnö, ‑bhutuu Pɩɛlö ‑kʋ bhlä 'mnö nä, ɔ gblää‑ ʋʋ' ‑gwlɛɛda ‑yä ɔ 'kä bhibhie. 'Ylʋ yä bhɛ yiosä ‑tiin 'kʋ ŋëë.

¹⁰ ‑Lɔɔ' 'tänyɩɩ ‑gbugbe bhlɔɔ bhä nä, ɔ ylä bhɛ nynä ‑mä ɔ 'kä lʋʋ lü. Nä wa ‑kʋ bhɛ ɔɔ' lülülɩɩ pi dä 'nɩ Laagɔɔ' 'päwa kwlinöɔ‑ 'kʋ.

¹¹ 'Nɩ wälɩ yio 'yi ghlä. Ɔ nii‑ ‑laagɔɔ' 'yi 'nɩ ‑mɔɔ ‑känöɔ 'klʋ. 'Nɩ lʋʋ ‑bha ‑mɔɔ. Ʋ ‑kʋ bhä nynä 'taplee 'nɩ ɛɛ' 'kwëtüü ‑mɔɔnä ‑kä sä. Ɛ kwlii‑ ‑aaa 'nɩ ɛ yi ‑dʋdʋʋ yëku 'mɛ.

¹² ‑Mä 'tapleenɛ 'mnö, mnaa' nü nü nü ‑kʋ bhä ‑mɔɔ. Mnaa' laa ‑a nämnö lä bhɩ ‑mɔɔnä 'yii nä, 'nɩ mnaa' laa‑ ‑a bɩbɛ lä nä, ɩyä ŋɔkʋʋ' nümnüü.

¹³ 'Nɩ nuwälɩ yi Pɩɛlö soo, ɩ lä, Pɩɛlö‑, ‑n ‑bha 'kʋ ɩyä ‑n 'bhlä ‑n 'gä lü!

¹⁴ Pɩɛlö lä ‑ɔ! Kwlienyɔ‑, 'nn ‑läzä 'naa 'gbä lü. Bʋkʋ 'nɩ, lülülʋʋ' lʋʋ‑ ‑kä lä ‑gesi yëku nä, n 'nʋʋ ‑läzä 'naa nënä 'mnö 'ŋʋ!

¹⁵ 'Nɩ nuwälɩɩ yi bʋkʋ ci, ɩ lä lʋʋ' lʋʋ Laagɔ cii‑ lä nynä ‑mä kʋ ‑kplɔɔ nä, ‑naa 'ŋʋʋ ‑lä ‑gesi yëku!

¹⁶ ‑Mä wälɩnɩ ‑ghlɔ 'yi 'ci taa 'fɩa, 'nɩ 'taplee yi ‑laagɔɔ' ‑gblää.

Nyɩkpa Kɔnɛyö ‑lobho lä nä wa yä Pɩɛlöö' daa ŋëë

¹⁷ ‑Mä Pɩɛlö wälɩɩ‑ ‑ghlɔ lä 'yi nä, ɔɔ' 'nui bhɔɔ 'mʋ. Nä, ɔ ylä bhɛ ɔ yëku. Ɔ ‑kʋɩ bhobho dä 'nɩ, ‑lɔɔ' 'tänyɩɛ ‑bhlobhlo 'mnö, nyɩkpaa Kɔnɛyö ‑lobho lä nä, wa yi Simɔɔ' daa bʋkʋ 'ylä, wa ‑kʋ bhä ɔɔ' ‑glënëa nëkʋ.

¹⁸ Wa ‑ŋëë lä ‑lɔɔ nä, wa laa‑ nyɩkpa 'nɩ wa yi 'ylä wlä ‑mä nyɩkpɔɔ wa laa lä Simɔɔ 'nɩ wa ‑zie lä Pɩɛlö nä, ‑lää ɔ ‑plä bhä 'kʋ ‑a?

¹⁹ ‑Mä ‑lɔɔ' 'tänyɩɛ 'mnö nä Pɩɛlö bhobho bhɛ 'kɔɔkɔ wälɩklëa ‑a ‑ghlɔ lä 'yii nä. 'Nɩ Laagɔɔ' 'Wugɔɔ yio soo‑, ʋ lä nyɩkpa taa ‑yi ‑mää, ‑mɔɔ wa tään lä.

²⁰ Nä, ‑n kwli ‑yä ‑n ‑yʋwa mʋ ‑mä, ‑naa 'ylä ‑lä ‑n yëku. ‑Amʋʋ‑ ‑lobhuwa lä.

²¹ 'Nɩ Pɩɛlö yi kwli 'nɩ ɔ yi nyɩkpaa soo, ɔ lä nyɩkpɔɔ a tään lä nä, ‑amʋ lä! Anyɩa bʋkʋʋ' 'dö bhää?

²² Nyɩkpaa lä Kɔnɛyö mɔɔ‑ ‑lobhu‑anyɩ lä. Ɔ ‑glö Wlomɛɛnyʋaa' 'sʋjaa 'kämänyɔ. Ɔ ‑glö nyɩkpɔɔ' lɔɔ ‑ɔnö nʋnʋgbɩ‑ gëë‑ lä 'yi nä. Ɔ ŋʋ kpänyɩ Laagɔ 'klʋkpää', 'nɩ 'Zufʋnyʋa 'fɩɩn ci ɔɔ' 'nää. Kɔnɛyönɔ 'mɔ kplɔɔkplɔɔ ‑Laagɔzuzu ‑ghlä lä 'yii. Ʋ ‑sonöɔ nynä ɔ yi‑i ‑gʋʋ ‑mä, ‑n ‑kä wälɩ ‑n 'gɔ soo.

²³ Ɩ ‑kʋ bhɛ lä sɔɔ nä, kä Pɩɛlö ‑gbä yɩ 'nɩ wa ‑plä gbëë'. ‑Lɔɔ wa ‑goo. Zeli ‑ze ylä nä, kɔ ‑bha 'kʋ, 'nɩ ɔ ‑yʋwa 'sɔ yi mʋ. ‑Mä ɔ ‑yʋwa 'sɔ mʋ lä nä, ‑mɔɔ Zopeeduu' bhelie zio ‑fänöɔ ‑blɔkʋ.

Pɩɛlö ‑mʋ Kɔnɛyöö' ‑gbäsɩɩ

²⁴ Zeli ‑ze ylä bʋkʋ nä, ‑lɔɔ wa ‑ŋëë Sezaleeduu'. Kɔnɛyö ‑bɛɛnʋwa bhä nä, ɔɔ' gbünyʋa ‑yä ɔ 'nagwɩa 'titi, ɔ 'wlänʋwa bhä 'wlu.

²⁵ Sä Pɩɛlö ‑plä lä 'gää gbëë' nä, kä Kɔnɛyö ‑yio ‑blɔkʋ, 'nɩ ɔ pɔɔ‑ dëlü ‑kokoowli glu 'nɩ ɔ yi 'wlu sä glaa ‑yä ɔ 'kɔ bhɛ bhää.

²⁶ Mä Pɩɛlö ‑klɔɔ, 'nɩ ɔ yio 'kʋ bhɛlɩä, ɔ lä ‑n ‑bha 'kʋ! ‑Amʋ nä, n ‑glö 'ylʋzɔkʋnyɔ ‑mɔɔ 'bhisäkʋ.

²⁷ Ɔ ‑yä Kɔnɛyö 'sɔ ‑kʋ cidä, 'nɩ ɔ yi ‑bhutuu' plä. Ɔ lɔ wloo nä, nyɩkpa ‑bhutukpä 'wlää‑ ‑mɔɔ 'wlu.

²⁸ 'Nɩ ɔ yiwa soo, ɔ lä anyɩ 'titi a ‑yi sɔɔ nynä ‑mä 'Zufʋyu, ɔɔ' ‑Laagɔ‑lebhee 'mnö nä, ɩɩ' ‑wʋ 'kʋ ‑ŋwa nynä ɔ ‑yä lowuyu 'sɔ nämnö‑ 'kʋ 'nɩ ɩɩ' ‑wʋ 'sɩɩ 'kʋ ‑ŋwa nynä ‑mä ɔ plä lowuyuu' ‑bhutu ‑zɔɔ. Mä, Laagɔ yä'ä wälɩklë cɩa. Ʋ panö'ö nynä ‑mä 'naa gbäzö ‑lä nyɩkpaa' ɩyä 'naa 'ŋʋ ‑lä nyɩkpɔ ‑gesi yëku nynä ‑mä ɔɔ' ‑wʋ ‑kplɔɔ.

²⁹ Ɩmɩɩ‑ ‑kä 'ŋnö 'nɩ a ‑lobho'o lä nyɩkpa 'kʋ 'nɩ n ŋoo‑ 'nɩ n ‑yi lä. Nä, lʋʋ ‑sä 'titi ‑ʋnözä a lä n yi bhä ‑zi 'naa‑?

³⁰ Kɔnɛyö lä ɩ nʋ yɩ ylɩɩ ‑taa, 'sää ‑kugbë‑gliyi taa' 'tänyɩɩ', ‑n ‑näsä 'tänyɩnɛ ‑kʋ lä ‑lää nä, n bhibhie bhä ‑mää ‑bhutuu', 'nɩ ‑bla! nyɩkpɔ yi 'kʋ ghlä 'nɩ ɔ yi'i 'yikʋ 'nynigo. Ɔ ‑plä lä 'kwëtii' lɩɩ ‑ɩ lie lä nä. 'Nɩ ɔ yi'i soo,

³¹ ɔ lä Kɔnɛyö‑, ‑naa bhibhie ‑yä ‑naa 'nää ‑n nʋ lä ‑ŋäzönyʋa nä, Laagɔ luë yɩ 'ɩɩ dä 'kʋ ‑mä ʋ 'nö‑ö ‑wʋ 'kʋ bë!

³² ‑Pɛpɛɛ nä, ‑n lobho nyɩkpa ‑yä wa mʋ Zopeeduu'. Nyɩkpɔ ‑bhlo ‑kʋ ‑mɔɔ 'nɩ wa lɔɔ Simɔɔ, ‑mä wa ‑zienöɔ Pɩɛlö. ‑N gbä ‑yä wa sonöɔ ‑yä ɔ yi. Nyɩkpɔ ‑bhlo ‑kʋ lä ‑mɔɔ 'nɩ wa laa lä 'sɩɩ Simɔɔ nä, ɔɔ' 'gbëa 'tënö jiee, ‑mä mnäkwi ɔ bhlä. ‑Lɔɔ' nyɩkpɔɔ' daa, ‑lɔɔ Simɔɔ Pɩɛlö ‑plä lä 'kʋ.

³³ Ɩmɩɩ‑ ‑kä 'ŋnö 'nɩ n ‑lobho‑o lä nyɩkpa 'kʋ. Nä, ‑n ‑yi lä nä, ‑n ‑nʋ 'nää. ‑Pɛpɛɛ' nä, ‑anyɩ 'fɩɩn yä‑ä yɩ dëlü 'wlu 'wlää nä, saa 'fɩɩn Kwlienyɔɔ nyɛɛ‑ lä nynä ‑mä ‑n ci nä, ‑n ‑sonö‑anyɩ 'sɔɔ ‑mä ‑a ‑poo 'nyukwli.

Pɩɛlö soo Kɔnɛyöö' daa' nyɩkpaa Laagɔwälɩ

³⁴ Pɩɛlö bhlüü‑ lä nuwälɩ 'kʋ nä, ɔ lä ‑pɛpɛɛ' n nu ylä nynä ‑mä Laagɔ nä, ʋʋ' gbäzö ‑wʋ 'zaazɩ nyɩkpaa'.

³⁵ 'Ylʋnʋzɔɔ, nyɩkpɔ kä ʋʋ' 'klʋkpää' ‑kä 'nɩ ɔ kä 'yigëgbɩ nʋ nä, kä Laagɔ waa ɔɔ' wälɩ.

³⁶ Laagɔ nä, kʋ ‑lä lä 'Yizlɛnyʋä 'dö. 'Nägädöö ‑ɩ nyɛ lä 'kʋ wɔtɔlɩɩ nä, kʋ ‑ghlää Zozi Klisö 'kʋ 'nɩ ɔ ‑sänʋwanyɩ. Zozi Klisö 'mɔɔ‑ plöö‑ lä nyɩkpaa 'fɩɩn Kwlienyɔ.

³⁷ Zään Badisö cii‑ lä Laagɔwälɩɩ nä, 'nɩ ɔ ŋʋʋ‑ lä nyɩkpaa 'nyu 'wlu nä, ɩɩ' wälɩɩ 'fɩɩn ‑ɩ plöö‑ lä Galilee‑bhlɩɛ 'mnö 'kʋ nä, 'nɩ ‑ɩ ‑ŋëë lä zudee‑bhlɩɛ 'mnö nä, ‑lɔɔ' wälɩɩ a ‑yii.

³⁸ A yi 'sɔɔ nynä Laagɔ nä, ʋ ‑lä Kplɔɔkplɔɔ‑wugɔɔ' 'päwa 'nɩ ʋ kwlienöa‑ Nazalɛtöö' Zozii 'kʋ. ‑Mä Zoziinɔ mʋ bhä daa 'fɩɩn 'nɩ ɔ nʋ bhä nyɩkpa 'nää. 'Nɩ nyɩkpaa 'fɩɩn‑ ‑kʋ bhlä 'Dëvloo' ‑säklöö 'mnö nä, ɔ yamänʋwa bhä. Zozii nä, kä Laagɔ ‑kʋɔ bhä yëku.

³⁹ Wälɩɩ 'fɩɩn ɔ ‑nʋ lä 'Zufʋ‑bhlɩɛ 'mnö ‑yä Zolizalɛmʋ‑duu' 'titi nä, ‑anyɩ, ‑a 'nii‑ ɩɩ' dä. Wa ‑bhuo 'kusu 'yii 'nɩ ɔ kuu‑.

⁴⁰ ‑Mä ɔ kuu‑ lä nä, tanaylʋʋ 'kʋ kä Laagɔ ‑gbä 'nɩ ɔ ‑glɔɔ 'kuëë, 'nɩ ɔ yi ɔ yëku nyɩkpa pana yä wa 'kɔ 'yi 'ni.

⁴¹ Ɔɔ' ‑wʋ ɔ yëku nyɩkpaa 'fɩɩn pana‑ ‑mä, ‑anyɩ, ‑anyɩ‑ Laagɔ ‑sä lä 'fɩa tɛɛ nynä ‑mä ‑a lü ‑lɔɔ' ‑dläfʋɛɛ. Ɔ ‑glɔɔ lä 'kuëë nä, ‑anyɩ, a ‑yɔsɔ ‑lüü 'kʋ 'nɩ ‑a 'mnää 'kʋ.

⁴² Kä Zozii ‑sono‑anyɩ nynä ‑mä, ‑a mʋ ‑yä Laagɔɔ' 'Nägädöö, ‑a ‑sänɩ 'bhlɩɛ 'mnö nyɩkpaa ‑yä, ‑a pana nynä ‑mä Zozii 'mɔ Laagɔ ‑sä ‑yä ɔ 'kä 'kudukua ‑yä ‑yäyänyʋä 'sɔɔ wälɩɩ' ‑döö.

⁴³ 'Plɔfɛtɩnyʋa 'fɩɩn cii‑ ɔɔ' ‑za nynä ‑mä nyɩkpɔɔ' lɔɔ ‑ɔ yi lä Zozii' wälɩɩ ‑nʋawlɛ laa nä, ‑lɔɔ' nyɩkpɔɔ' nyenyii yi cienöɔ ɔɔ' 'ŋnöö 'mnö.

Kplɔɔkplɔɔ‑wugɔɔ kwlii‑ Kɔnɛyöö' 'gbëa 'mnö nyɩkpa 'kʋ

⁴⁴ Pɩɛlö ‑kʋ ‑lätee cidä 'nɩ, nyɩkpaa 'fɩɩn‑ ‑puo bhlä 'nyukwli nä, Kplɔɔkplɔɔ‑wugɔɔ kwlinʋwa‑ 'kʋ.

⁴⁵ Mä sä nyɩkpa Kplɔɔkplɔɔ‑wʋgɔɔ kwlii‑ lä 'kʋ nä, waa' bhɔɔ lä 'Zufʋnyʋä plöö‑ 'nɩ ‑wa ŋoo‑ lä Kwlienyɔ 'kʋ 'nɩ wa ‑yä Pɩɛlö 'sɔ nää‑ bhlä nä, kä nükpëë' ‑slʋwa.

⁴⁶ Wa ‑poo bhä 'nyukwlii 'nɩ, Kplɔɔkplɔɔ‑wugɔɔ gbä, 'nɩ wa ci bhä lowu‑wälɩ, 'nɩ wa fään bhä Laagɔ 'ŋnu. Ɩ ‑kä 'ŋnö nä, kä Pɩɛlö cii‑ bʋkʋ,

⁴⁷ ɔ lä nyɩkpaa nä, Laagɔɔ' Kplɔɔkplɔɔ‑wugɔɔ wa yʋ 'ni ‑anyɩ 'bhisäkʋ. ‑Pɛpɛɛ' nä, waa' 'nyu 'wlu ‑ŋʋlɩɩ' yɩɔ gbʋ 'kʋ ‑kʋ. Kwa yi lä 'nyie 'nyu 'wlu ŋʋɔ.

⁴⁸ 'Nɩ Pɩɛlö yi gbä 'nɩ Zozi Klisöö' 'ŋnöö 'mnö, wa yiwa 'nyu 'wlu 'ŋʋɔ. Ɔ ŋʋwa‑ ylä 'nyu 'wlu nä, kä wa ‑sonöɔ nynä ‑mä ɔ gonʋwa yëku ylɩɩ zioo' ‑za.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan