Bìoball air-loidhne

Matie 4 - GOD - u2

'Dëvlo nyɛɛ‑ Zozii ‑zɔɔpälɩ
( Makö 1.12‑13 ; Lukö 4.1‑13 )

¹ ‑Nɩnɩ plöö‑ ylä nä, kä Laagɔɔ' 'Wugɔɔ ‑fä Zozii ‑mɔɔ 'popie 'mnö ‑yä 'Dëvlo 'kɔ ‑zɔɔpälɩ 'nyɛ.

² Ɔ ‑kʋ ‑mɔɔ 'nɩ ɔ goo bhä ‑gbugbe. ‑Gägäzëlü ‑yä 'sabo, ɔɔ' ‑wʋ ‑lü ‑aaa, 'nɩ ɩ ‑nʋ ylɩɩ gwlɩ 'sɔ. 'Nɩ ‑gbugbe yio ‑klä.

³ ‑Mä ‑zɔɔpänyɔ 'Dëvlo 'jluo‑ yëku 'nɩ ʋ yio soo, ʋ lä ‑n gä 'zaazɩ Laagɔ ‑Yowli plöö‑ nä, ‑n gbä ‑yä cɛkwɩnɩ 'plöö‑ 'flɔɔ'!

⁴ 'Nɩ Zozii yi 'Dëvlo soo, ɔ lä ɩ ‑jɩjlɔ Laagɔ‑bɔɔgʋʋ 'mnö nynä Lülülɩɩ ‑tɛɛ 'nyɛ ‑wʋ nyɩkpɔ 'pʋpʋɛ. ‑Mä ciciwälɩɩ 'fɩɩn ‑ɩ bha lä Laagɔɔ' nëë' nä, ɩ plöö‑ 'sɩɩ ɔɔ' lülülʋʋ.

⁵ Bʋkʋ 'nɩ, ‑mɔɔ Laagɔɔ' Kplɔɔkplɔɔ‑duu 'mnö, ‑mɔɔ Zolizalɛmʋduu', 'Dëvlo yi ‑mɔɔ Zozii fä. 'Nɩ ‑mɔɔ' Laagɔ‑bhutu 'kädʋʋ 'wlu, ʋ yio ‑mɔɔ gbla.

⁶ 'Nɩ ʋ yio soo, ʋ lä ‑n gä 'zaazɩ Laagɔ ‑Yowli plöö‑ nä, ‑n ‑bha ‑mää ŋɔkʋ ‑yä ‑n bhlü ‑zɔɔ ‑mä, ɩ ‑jɩjlɔ ‑naa ‑za nynä ‑mä Laagɔ yi ʋʋ ‑zizii lobho 'Nɩ ɩ yi‑i wlɩ ‑zɔɔ tlaa ‑yä, ‑Naa ‑kokokpëë' kä cɛkʋbhë gozo.

⁷ 'Nɩ Zozii yi 'Dëvlo soo, ɔ lä ɩ ‑jɩjlɔ 'sɩɩ nynä ‑mä, Kwlienyɔ ‑naa Laagɔ, ‑naa ylɔɔ ‑lä gbɩɩ'!

⁸ 'Nɩ 'Dëvlo yio sää 'kükü 'kädä 'wlu fä. Ʋ ‑tlɔɔ 'ylʋzɔɔ' 'leyi‑bhlɩɩ 'fɩɩn, ɩyä ɩɩ' 'klʋagba.

⁹ 'Nɩ ʋ yio soo, ʋ lä wloo‑! ‑N gä'ä dëlü 'wlu sä ‑glaa, 'nɩ ‑n gä'ä ‑bʋbɔ nä, n yi‑i 'leyi‑bhlɩnɩ 'fɩɩn 'nyɛ.

¹⁰ Zozii lä ‑n ‑bhä'ä 'yikʋ, 'Dëvlo! Ɩ ‑jɩjlɔ 'sɩɩ nynä ‑mä, Kwlienyɔɔ, ‑naa Laagɔ, ɔmɔ ‑bhlo 'coo ‑n ‑kä 'nɩ 'gä bʋbɔ, ɩyä ɔmɔ ‑bhlo 'coo ‑n 'gä 'wlu sä glaa.

¹¹ Zozii cii‑ ylä sɔɔ nä, kä 'Dëvlo ‑bhɔɔ yëku. 'Nɩ ‑lɔɔ' 'tänyɩɛ ‑bhlobhlo 'mnö ‑Laagɔzizi ‑yio yëku, 'nɩ ɩ nʋɔ bhä ‑gä.

Zozii ‑mʋ Kapɛnayumöduu'
( Makö 1.14‑15 ; Lukö 4.14‑15 )

¹² ‑Mä 'tänyɩ ‑kʋ ‑lɔɔ 'nɩ Zozii nuu‑ nynä wa ŋʋʋ‑ Zään Badisö ‑jɩɩ'. Ɩ ‑kä 'ŋnö nä, ɔ ‑bha 'kʋ 'nɩ ɔ yi Galilee‑bhlɩɛ 'mnö gwë 'pää ‑kää mʋ.

¹³ Ɔ ‑bha yɩ Nazalɛtöö' 'nɩ, Zabulɔɔ ‑yä Nɛfʋtalii‑lëkpëa' 'nyie yëkuu' 'duu wa laa lä Kapɛnayumö nä, ɔ ‑mʋ ‑mɔɔ.

¹⁴ Wälɩɩ 'plɔfɛtɩ Ezayii cii‑ bhlä nä, ɩ yä bhɛ glää.

¹⁵ Kɔ cii‑ bhlä, ɔ lä ‑Mɔɔ 'nyie yëkuu' 'bhlɩɛ, ‑Mɔɔ Zludɛɛ‑nyiee klë, ‑Mɔɔ Zabulɔɔ‑lëkpëa ‑Yä Nɛfʋtalii‑lëkpëa 'mnö, Nyɩkpaa‑ ‑kʋ lä Galilee' 'Nɩ ‑waa ‑wʋ lä 'Zufʋnyʋä plöö‑ nä,

¹⁶ Wa ‑yä nyɩkpaa‑ ‑kʋ bhlä 'cucuu 'mnö nä, Wa yi zëlü 'kädö 'yi 'ni! ‑Wa ‑kʋ bhlä 'kwiee 'cucukpä‑bhlɩɛ 'mnö nä, Zëlü yʋwa 'kʋ ghlää.

¹⁷ 'Bhää bhɛ ‑lɔɔ 'kʋ nä, Zozii ‑kʋ bhɛ ‑mɔɔ 'nɩ ɔ soo bhɛ nyɩkpa ɔ lä a 'cɩcɩ anyɩa' nʋnʋgbɩɩ ‑mä Laagɔɔ' 'Leyiduu' 'tänyɩɛ yä yëku 'mɛ!

Zozii' laa‑ 'kʋgënyʋä ‑mɔɔnä
( Makö 1.16‑20 ; Lukö 5.1‑11 )

¹⁸ ‑Mä Zozii ‑kʋ bhɛ lä Galilee' 'nyiee 'kpʋkpʋʋ 'kʋ nämnödä nä, ɔ nii‑ bhelie 'sɔ. Simɔɔ‑ wa ‑zie lä Pɩɛlö nä, ɔ ‑yä ɔ bheli Adlee. Wa ‑glö bhä zlübhlänyʋä nä, wa pä bhä ‑dädö.

¹⁹ 'Nɩ ɔ yiwa soo, ɔ lä a gë'ë 'kʋ ‑yä n 'kanyɩ nyɩkpaa' jlülɩ cɩa.

²⁰ Ɔ cii‑ lä sɔɔ nä, 'kpobhuu ‑bhlo 'kʋ kä wa ‑taa waa' ‑dädöö 'yi 'nɩ wa yio 'kʋ 'gë.

²¹ Ɔ ‑mʋ 'pɛpɛlɩä 'yikʋ 'nɩ ɔ nii‑ Zebedee ‑yowlie, Zakö ‑yä Zään 'sɔ. Wa ‑yä wa 'bä Zebede 'sɔ ‑kʋ bhä 'gokpëë' 'nɩ wa sä bhä waa' ‑dädöö 'jü. 'Nɩ ɔ yiwa laa.

²² Ɔ lʋwa‑ lä 'gää nä, kä wa ‑të ‑lɔɔ wa 'bä ‑yä 'gokpëa 'nɩ wa yio 'kʋ 'gë.

Zozii cɩa 'nɩ ɔ yamä gupanyʋä

²³ ‑Mä Zozii bhlü bhä Galilee' 'bhlɩɛ 'nɩ ɔ cɩa bhä ‑mɔɔ' Laagɔ‑bhitii 'mnö nyɩkpaa. Ɔ sää bhä Laagɔɔ' 'Leyiduu' 'Nägädöö 'nɩ ɔ yamä bhä 'sɩɩ gupanyʋä ‑yä 'bhlʋlɛ‑käänyʋä.

²⁴ Ɩ ‑kä 'ŋnö nä, ɔɔ' 'ŋnö ‑mʋ ‑kaa 'nɩ, ɩ ‑bhlüü Silii‑bhlɩɛ 'fɩɩn 'kʋ. Ɩ ‑gbä 'nɩ wa lɔɔ bhä gupanyʋää' nü nü nü. Wa lɔɔ bhä nyɩkpaa' lʋä ‑zizinyenyii ‑kʋ bhlä kätää' nä, ɩyä ‑zɔɔ bhlü bhlügu ‑bhlänyʋä ‑yä 'kpläkplänyʋä 'nɩ ɔ yamänʋwa bhä.

²⁵ Nyɩkpa ‑bhutukpä gëë‑ bhä Zozii 'kʋ. ‑Nänʋä bha bhä Galilee‑bhlɩɛ 'mnö, ‑nänʋä bha bhä 'lëkpëa wa laa lä Di ‑Kakpüü 'Kʋgbä nä 'mnö. ‑Nänʋä bha bhä Zolizalɛmʋ‑duu' ‑yä Zudee‑bhlɩɛ dää 'fɩɩn ‑yä Zludɛɛ‑nyie klë.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan