Bìoball air-loidhne

Matie 27 - GOD - u2

Wa ‑fä Zozii Pilatö dëlüü
( Makö 15.1‑2 ; Lukö 22.66 ; 23.1 ; Zään 18.28 )

¹ Zeli ‑ze lä 'gä ‑jaa nä, 'Cibhisänyʋaa' 'cifinyʋa ‑yä 'bhlɩɛ 'mnö ‑Dɔɔpänyʋa kä wa 'ŋʋʋ‑ 'kʋ nynä wa 'kä Zozii 'bhlä.

² Wa ‑gʋɔ, 'nɩ wa yio ‑gɔmnä Pilatö dëlü ‑lä.

Zuda Sikalɩɔtö yä ɔ yëku ‑gblä glaa

³ ‑Mä Zudaa ‑ɔ ‑pëë bhlä Zozii nä, ɔ nii‑ lä 'yi nynä ‑mä nyɩkpaa yä Zozii' 'bhläwälɩɩ' ‑döö nä, kä wälɩɩ ‑kamänöɔ yëkuu' kpänyɩ. Nä, ‑flëëgüyii' glʋ 'nɩ 'kʋgbä 'Cibhisänyʋaa' 'cifinyʋa ‑yä ‑Dɔɔpänyʋa nyɩɔ‑ bhlä ‑yä ɔ 'kä lä Zozii pëë nä, 'kɔ 'ylɩbhɩ‑.

⁴ Ɔ ‑mʋwa yëku, ɔ lä n yä nyenyi nʋ. Nyɩkpɔɔ' ‑wʋ wälɩklü ‑nyënyë ‑nʋ 'nɩ n ‑pënöɔ lä! Zudaa cii‑ lä sɔɔ nä, nyɩkpaa lä 'nɩ ‑anyɩa wälɩ ‑sä ‑kʋɩ bhä 'mnöö? ‑Mɔɔ ‑bhlo, ‑naa 'yɛkɛɛ lɩɩ lä!

⁵ Wa cii‑ lä sɔɔ nä, kä Zudaa paa‑ monie Laagɔ‑bhutu 'kädʋʋ 'mnö. Ɔ ‑bha lä ‑lɔɔ nä, kɔ ‑mʋ 'nɩ ɔ yi ɔ yëku ‑gblä glaa.

⁶ 'Cibhisänyʋaa' 'cifinyʋa ‑tëpë lä monie nä, wlä zɛɛ' monii lä nä, doluu' monii lä. Ɩɩ' ‑wʋ 'kʋ ‑ŋwa nynä ‑mä, ‑a 'ŋʋɛ Laagɔ‑bhutuu' 'bhɔklɔɔ 'mnö.

⁷ Wa ‑tään ylä wälɩɩ nä, kwa ‑mʋ 'nɩ wa yi 'kläpɛlʋ zɔɔ. ‑Lɔɔ' 'klaa nä, nyidü‑manyɔ ‑bhloo' 'klä bhlä. Amä wa ‑nʋ lä waa' lowiaa' lesigwlëa 'kʋ.

⁸ 'Ɩzä wa laa‑ lä Doluu' 'Klä. 'Nɩ ‑zɩkä 'titi nä, wa laa ‑lätee Doluu' 'Klä.

⁹ 'Plɔfɛtɩ Zelemii' ciciwälɩɩ 'mɩɩ‑ ‑glää lä. Ɔ cii‑ bhä nynä ‑mä, ‑Flëëgüyii' glʋ 'nɩ 'kʋgbä, ɩmɩɩ‑ plöö‑ lä 'kpaa 'Yizlɛnyʋä ‑sɔɔ lä 'kʋ nä.

¹⁰ Wa bhlii‑ 'kʋ 'nɩ wa ‑mʋ, 'nɩ wa yi nyidü‑manyɔɔ' 'klaa zɔɔ. Sɔɔ Kwlienyɔɔ Laagɔ ‑sonö'ö bhlä nynä n sonʋwa.

Wa ‑lä Zozii Pilatö dëlü
( Makö 15.2‑5 ; Lukö 23.2‑5 , 9‑10 ; Zään 18.29‑38 )

¹¹ Wa ‑lä Zozii ‑gɔmnä Pilatö dëlü 'nɩ Pilatö yio 'ylä nynä ‑mä ‑mɔɔ‑ plöö‑ bhä 'Zufʋnyʋaa' 'loyoo ‑a? Zozii lä ‑mɔɔ cii lä.

¹² ‑Mä 'Cibhisänyʋaa' 'cifinyʋa ‑yä ‑Dɔɔpänyʋa 'sɔ ‑yi 'nɩ wa 'nyɛnöɔ bhä gbɩ ‑bhutukpä. ‑Mä ɔ 'nʋwa ‑wʋ gbʋ 'kʋ ‑döö.

¹³ Ɩ ‑kä 'ŋnö nä, kä ‑gɔmnä Pilatö ylɔɔ‑, ɔ laa ‑mɔɔ wa 'nyɛɛ lä gbʋ ‑bhlobhlo nä, ‑nn ‑döö ‑wʋ gbʋ ‑a?

¹⁴ 'Nɩ Zozii lä ɔ slämʋɔ ‑kä në. ‑Mä kä Pilatö plɛkʋ 'ninio‑.

Kwa kä ylä Zozii 'bhlä
( Makö 15.6‑14 ; Lukö 23.13‑23 ; Zään 18.39‑40 )

¹⁵ 'Pakö‑glɩsɩɩsöö 'fɩɩn 'kʋ nä, ‑gɔmnɔɔ 'bhlɛ bhä nä, kɔ taa ‑jɩnyʋa nëëdë' lɔɔ' ‑bhlo 'yi. ‑Jɩnyɔɔ' ‑lɔɔ ‑jlë ylä bhlä nynä ɔ ‑taa 'yi nä, kɔ tanöɔ bhä 'yi.

¹⁶ Naa, ‑jɩnyɔ ‑bhlo ‑kʋ bhä ‑mɔɔ 'nɩ ɔ mʋ bhä 'ŋnu, ɔmɔ wa laa Zezu Balabasö.

¹⁷ Nyɩkpaa 'wlää‑ bhɛ lä 'wlu nä, kä Pilatö ylää‑, ɔ lä Zozii, wa laa lä Klisöɔ nä, ɔ ‑yä Balabasö 'sɔ nä, lɔɔ ‑sä n nä n ‑taa bhä 'yii?

¹⁸ ‑Maa, Pilatö ‑yi bhä sɔɔ nynä ‑mä luëzü ‑kä 'ŋnö 'nɩ 'Cibhisänyʋaa' 'cifinyʋa ‑lɔɔ bhlä Zozii dëlü.

¹⁹ Ɔ ‑kʋ ‑lɔɔ 'titee' ‑jlë 'kʋ, 'nɩ ɔ 'ŋnɔ ‑lɔɔ 'dö. 'Ŋnɔɔ lä ‑a ‑nyoto, ‑naa plä lä nyɩkpɔnɔɔ' wälɩɩ 'mʋ. Ɔ ‑glö Laagɔ dëlü nyɩkpɔɔ' lɔɔ ‑ɔnö gbɩɩ‑ gëë‑ lä 'yi nä. Nyɩkpɔnɔɔ' ‑za, nn' ‑wʋ ‑zɩkää' 'sabonö 'nää ŋɔɔ‑. N ‑ghlä kpänyɩ nyenyi nyenyi ɔɔ' wälɩɩ' ‑za.

²⁰ 'Cibhisänyʋaa' 'cifinyʋa ‑yä ‑Dɔɔpänyʋa 'sɔ, wa pä bhä ‑jlëa plɛ ŋää ‑yä a 'kä ci nynä ɔ ‑taa Balabasö 'yi, ‑yä Zozii 'mɔ ɔ lɔ 'bhlä.

²¹ 'Nɩ ‑gɔmnä Pilatö yi bʋkʋ 'ylä, ɔ lä wamä 'sɔ pää' nä, lɔɔ ‑sä a ‑waa bhä nynä ‑mä n ‑taa 'yii? Wlä Balabasö!

²² Pilatö lä 'nɩ ‑nɔnɔ, Zozii wa laa lä Klisöɔ nä, säsä n nä n nʋɔ bhää? Ɔ ylää‑ lä sɔɔ nä, waa' ‑lefɩɩn wlä ‑n bhuo 'kusuu 'yii!

²³ Pilatö lä 'nɩ gbenyenyi ‑sä ɔ ‑nʋ bhää? 'Nɩ wa yi waa' kplüü 'mʋ 'tɛmä kpänyɩ, wlä ‑n bhuo 'kusu 'yii!

²⁴ Pilatö nii‑ lä 'yi nynä ‑mä ɔ 'nʋwa ‑lä bhɔɔ mii‑ nä, 'nɩ waa' kplüü 'ŋʋnöɔ bhlä 'kʋ 'kɔɔkɔ nä, kɔ bhlüü‑ 'nyukɔpʋ 'kʋ 'nɩ nyɩkpaa 'fɩɩn 'klʋ, ɔ yi wlɩ wɔɔ. Ɔ lä nn' ‑wʋ nyɩkpɔnɔɔ' 'bhlälɩɩ' ‑gesii 'mnö ‑kʋmʋ ‑mä anyɩ ‑bhlobhloo' wälɩ ylä.

²⁵ 'Nɩ ‑jlëa 'fɩɩn yi 'mʋ gbä, wlä ‑ɛɛɛ, ɔɔ' doluu' ‑gesii 'bhlä'anyɩ, ɩyä ɩ 'bhlä 'sɩɩ ‑anyɩa 'mnö‑gänöyua!

²⁶ Wa cii‑ lä sɔɔ nä, kä Pilatö ‑taa Balabasö 'yi. Ɔ ‑gbä 'nɩ wa 'sɛpɩɩ‑ 'fɩa Zozii ‑gblɩyee', 'nɩ ɔ yiwanyɔ 'nyɛ nynä wa bhuo 'kusu 'yii.

'Sʋjaa nyɩä Zozii
( Makö 15.16‑20 ; Lukö 23.11 ; Zään 19.2‑3 )

²⁷ ‑Mä ‑gɔmnɔɔ' 'sʋjaa ‑fä Zozii ‑mɔɔ ɔɔ' 'gbëa 'mnö, 'nɩ waa' ‑lefɩɩn yio 'klʋ glää.

²⁸ 'Nɩ wa yio 'kwëtii' ‑sä. 'Nɩ wa yio ‑bänözlä 'mʋ plaa.

²⁹ Wa ‑bhlä 'ŋocuë‑wugblë 'nɩ wa yionya 'wlu 'ŋʋ. 'Nɩ wa yio ‑yukwe lüüklää' 'ŋʋ. Wa glɔɔ bhä dëlü 'wlu sä, 'nɩ wa nyɩänöɔ bhä. Wa ci bhä nynä ‑mä ‑ayoo 'Zufʋnyʋaa' 'loyo‑!

³⁰ Wa ŋwnɔ bhä 'sɩɩ ‑dlɛɛ 'klʋ 'nɩ wa wlänöɔ bhä ‑yukwee 'wlu.

³¹ Wa ‑nyɩänöɔ ylä 'sää ‑aaa nä, kä wa ‑sɔɔ ‑bänözlaa 'mʋ 'nɩ wa yio ɔɔ' 'kwëtii 'mʋ plaa, 'nɩ wa yio fä ‑yä wa 'kɔ 'kusu 'yii bhoo.

'Sʋjaa ‑bhoo Zozii 'kusu 'yii
( Makö 15.21‑32 ; Lukö 23.26‑43 ; Zään 19.16‑24 )

³² Wa ‑kʋ lä mʋdä nä, nyɩkpɔ ‑bhlo, ɔmɔ wa laa bhä Simɔɔ. Ɔ ‑glö bhä Silɛnöduu' nyɩkpɔ. Ɔ ‑kʋ 'plödä 'nɩ wa ‑klɔɔ kutu kutu nynä ɔ bhɛɛ Zozii' 'kusuu.

³³ ‑Gbäsɩɩ wa laa lä Glogotaa nä, ‑mɔɔ wa ‑fä lä Zozii. Glogotaa‑ŋnöö nä, kɩ sä lä ‑zɔɔ nynä mä 'Wukɔfʋʋ' dä.

³⁴ ‑Mä nyɩkpaa bhlüü‑ divaa 'kʋ 'nɩ wa 'bhläbhlänöa gwäzö ‑kälöö', 'nɩ wa yi Zozii 'nyɛ nynä ɔ 'mnä. ‑Mä Zozii ylaa‑ lä nëë nä, ɔɔ' ‑wʋ 'mnägbʋ ŋoo‑.

³⁵ 'Nɩ wa yio yɩ 'kusuu 'yii bhoo. 'Nɩ 'sʋjaa‑ ‑kʋ bhlä ‑lɔɔ nä, a paa‑ ‑nügbe ‑yä a 'kä Zozii' 'kwëtii dëë.

³⁶ 'Nɩ wa yi ‑lɔɔ sä kʋ, wa ‑bɛnöɔ 'klʋ.

³⁷ Gbëgëa wa 'ŋʋʋ‑ lä 'gëë 'nɩ wa ‑bhuo lä 'kusuu 'yi nä, wa ‑jɩjla kplupä 'klʋ 'nɩ wa ‑bhua 'kusuu 'yii Zozii 'wlu 'kʋ. Wälɩklëa ci bhä nynä ‑mä ‑Nɔnɔ 'mɔɔ‑ plöö‑ lä Zozii, 'Zufʋnyʋaa' 'Loyoo!

³⁸ Dä wa ‑bhuo bhlä nä, wa ‑bhoo bhä 'sɩɩ ‑lɔɔ nyɩkpa‑bhlänyʋä 'sɔ. ‑Bhlo ‑kʋ bhä ɔɔ' lüüklä 'kʋ, 'nɩ ‑bhlo ‑kʋ bhä ɔɔ' mëëcë 'kʋ.

³⁹ ‑Mä 'plöplönyʋa 'bhɩsɩɔ bhä, 'nɩ wa bëdüë bhä 'wlu 'kʋ.

⁴⁰ Wa ci bhä wlä ‑eee! ‑Mɔɔ‑ mɔɔ‑ 'gä bhlä Laagɔ‑bhutu 'kädʋʋ wlä ‑yä ‑n 'gʋ ylɩɩ taa' 'slää nä, ‑n ‑sä yɩ ‑lɔɔ ‑n yëku nëë' ‑nä! ‑N gä 'zaazɩ Laagɔ ‑Yowli plöö‑ nä, ‑n ‑bhaa 'kusuu 'yii ‑yä ‑n kwli yɩ ‑nä!

⁴¹ 'Cibhisänyʋaa' 'cifinyʋa ‑yä ‑Jlämöcɩanyʋa ‑yä ‑Dɔɔpänyʋa 'sɔ, wa nyɩänöɔ bhä 'sɩɩ. Wa ci bhä, wlä

⁴² ɔ sä ‑lɔɔ nyɩkpa nëë' 'nɩ ɔɔ' mii ‑wʋ ‑yä ɔ 'kä ɔ yëku ‑lɔɔ nëë' ‑sä! Ɔ plöö‑ ylä 'Yizlɛnyʋää' 'loyoo nä, ɔ ‑bha 'kusuu 'yii ‑yä ɔ kwli yɩ ‑nä! ‑Lɔɔ ‑a yi ‑klää ɔɔ' pɔlötɛtɛ kään.

⁴³ Ɔ cii‑ bhä, ɔ lä ‑amʋʋ‑ plöö‑ lä Laagɔ ‑Yowli! Kɔ nyɛɛ‑ ɔ yëku Laagɔ wlɩɩ' nä, Laagɔ kɔ 'zaazɩ ‑waa nä, ʋ ‑sɔɔ yɩ ‑pɛɛ ‑lɔɔ nëë' ‑nä!

⁴⁴ Nyɩkpa‑bhlänyʋa ɔ ‑yʋwa ‑kʋ bhlä 'kusii 'yii nä, wamä ‑mä 'sɩɩ, wa 'bhɩsɩɔ bhä saa ‑bhlo.

Zozii' 'kwiee wälɩ
( Makö 15.33‑39 ; Lukö 23.44‑48 ; Zään 19.28‑30 )

⁴⁵ ‑Mä 'tänyɩɩ 'ylʋ ‑ŋëë lä ‑tiin 'kʋ nä, 'cucukpä ‑plä 'bhlɩɛ 'fɩɩn 'mnö. A ‑kʋ ‑dʋdʋkʋ ‑aaa, 'nɩ ‑kugbë‑gliyi taa ‑klä.

⁴⁶ ‑Kugbëë' 'gliyi taa ‑klä ylä nä, kä Zozii gaa‑ 'mʋ. Ɔ lä Eli! Eli! Lama sabatani! Kɩ sä lä ‑zɔɔ nynä ‑mä 'Naa Laagɔ‑! 'Naa Laagɔ‑! Sɩ ‑kʋ bhä 'nɩ ‑n ‑cienö'ö 'mʋwa bhää?

⁴⁷ ‑Nänʋä ‑kʋ bhä ‑lɔɔ 'nɩ wa nuu‑ ɔɔ' woo‑wälɩɩ, wlä a poo 'nyukwli ‑mä, ɔ laa Elii!

⁴⁸ 'Nɩ waa' nëëdëë' ‑bhlo yi paa 'nɩ ɔ yi ‑dudukwë 'kʋ 'bhlü. Ɔ ŋwaa‑ 'kälɩä kää nʋ 'mnö, 'nɩ ɔ yia ‑yukwe 'yii gʋää, 'nɩ ɔ yia Zozii 'nyɛ nynä ɔ 'mnä.

⁴⁹ ‑Nänʋä ci bhä 'sɩɩ nynä a ‑ya ‑bɛɛ ‑yä Elii kɔ ‑kɛ ‑lɔɔ nëë' ‑sä ‑kää ‑yi nä, ‑a 'gɩ 'ni.

⁵⁰ ‑Mä Zozii ‑gaa lä 'mʋ nä, kɔ pään‑ nyämʋ sä.

⁵¹ ‑Lɔɔ' 'tänyɩɛ ‑bhlobhlo 'mnö, ‑mɔɔ Laagɔ‑bhutu 'kädʋʋ 'mnö lokwi 'kädɛɛ wa ‑gla bhlä ‑mɔɔ nä, ɛ 'ŋɔtɔ‑ 'pɛlɩ 'sɔ. Ɛ cie‑ ŋɔkʋ ‑aaa, 'nɩ ɛ gëë‑ ‑dʋdʋ. ‑Mä ‑dʋdʋ ‑tɩtɛ, 'nɩ cɛkwɩ ‑kpʋkplöö 'ŋɔtɔ‑ ‑ŋɔtɔ.

⁵² 'Nɩ lesi‑këfüü ‑känöɔ 'klʋ 'nɩ kplɔɔkplɔɔnyʋa waa' bhutukpä ‑glɔɔ 'küëë.

⁵³ 'Tänyɩɛ 'mnö Zozii ‑glɔɔ ylä 'kuëë nä, ‑lɔɔ' 'kudukuë ‑bha lesigwlëë', 'nɩ wa yi kplɔɔkplɔɔ‑duu 'mnö ‑plä. Wa ‑ghlä nyɩkpaa ‑bhutukpä 'yii.

⁵⁴ Wlomɛɛnyʋaa' 'sʋjaa 'cifio ‑yä 'sʋjaa wa ‑bɛɛ bhlä Zozii 'klʋ nä, wa nii‑ lä ‑dʋdʋʋ' tɩtɛlɩɩ 'yi, 'nɩ wa nii‑ lä wälɩɩ 'fɩɩn ‑ɩ plöö‑ lä 'kʋ nä 'yi nä, kä ‑ŋänö ‑plʋwa kpänyɩ. Ɩ ‑kä 'ŋnö 'nɩ wa cii‑, wlä nyɩkpɔnɔ nä, ɔ plöö‑ bhä 'zaazɩ Laagɔɔ ‑Yowli!

⁵⁵ ‑Mä 'ŋwnɩä ‑kʋmʋ bhä 'sɩɩ ‑lɔɔ, waa' ‑lɛ bhutukpä, 'nɩ wa ‑zie gwë 'nɩ wa wloo bhä. 'Ŋwnɩänä nä, kä wa ‑yä Zozii 'sɔ nää bhä. Wa güo‑ bhä 'kʋ ‑mɔɔ Galilee‑bhlɩɛ 'mnö, 'nɩ wa nʋɔ bhä ‑gä.

⁵⁶ Malii Madlɛɛ, ɩyä Malii, Zakö ‑yä Zozɛfʋ 'sɔ wa 'nɔ, ɩyä Zebedee ‑yowlie wa 'nɔ.

Wa ŋʋʋ‑ Zozii' ‑gɛzɛɛ lesii'
( Makö 15.42‑47 ; Lukö 23.50‑56 ; Zään 19.38‑42 )

⁵⁷ ‑Kugbë‑tänyɩɩ' ‑ŋëë ylä nä, Alimatee‑duu' lɛkäänyɔ ‑bhlo, ɔmɔ wa laa bhlä Zozɛfʋ. Ɔ plöö‑ bhä 'sɩɩ Zozii' 'kʋgënyɔ.

⁵⁸ Zozɛfʋnɔ ‑mʋ 'nɩ ‑ɔ ‑soo ‑gɔmnä Pilatö nynä ɔ 'nyɩɔ Zozii' ‑gɛzɛɛ. 'Nɩ Pilatö yi gbä 'nɩ wa 'nyɩɔnyɛ 'nyɛ.

⁵⁹ ‑Mä Zozɛfʋ ‑sä ‑gɛzɛɛ 'kusuu 'yii, 'nɩ ɔ yie 'cɩclɛɛ 'pɛpɛ gbëbie.

⁶⁰ Ɔ bhlüü‑ bhä lesi cɛkʋ‑kpʋkplä 'mnö, ɔ yëku ‑za. Nä lesinɛ 'mnö, ‑mɔɔ ɔ ŋʋʋ‑ Zozii' ‑gɛzɛɛ. Ɔ 'bhisie‑ cɛkʋ, 'nɩ ɔ yi lesie në 'su. 'Nɩ ɔ yi 'plö 'nɩ ɔ yi mʋ.

⁶¹ Dä wa zizie bhlä Zozii' ‑gɛzɛɛ nä, Mali Madlɛɛ ‑yä 'yigädaŋnɔ ‑bhlo wa laa bhlä 'sɩɩ Malii nä, wa ‑kʋ bhä ‑lɔɔ lesiee' 'yi bhägälɩɩ' sä.

'Sʋjaa ‑koo Zozii' lesie

⁶² ‑Mä wa ‑bhɩä lä Sabaa‑gwlɛylʋʋ' ‑dʋdʋkʋ göglälɩ, 'nɩ zelii‑ ‑ze lä nä, 'Cibhisänyʋaa' 'cifinyʋa ‑yä Falizɩɛnyʋa 'sɔ, wa ‑mʋ 'nɩ wa ‑soo Pilatö,

⁶³ wlä 'ŋnumʋnyɔ Pilatö, ‑a yä luë. ‑Kpläkplönyɔnɔ, 'tänyɩɩ ɔ ‑yä bhlä ‑lätee nä, ɔ cii‑ bhä nynä ‑mä ɔ kä kuu‑ nä, taanaylʋʋ 'kʋ ɔ yi 'kuëë glɔɔ.

⁶⁴ Nä, ɔɔ' 'kʋgënyʋaa' kɔ ‑kä glu ‑sä, ɩyä waa' kä ‑kä 'bhlɩɛ 'mnö ci nynä ‑mä kɔ ‑glɔɔ 'kuëë nä, ‑n gbä ‑yä ‑lää ylɩɩnɩ taa 'mnö, 'sʋjä ‑bɛɛ lesie 'klʋ. ‑A gä ɔɔ' 'kʋgënyʋa 'yi ‑taa 'nɩ wa kä ‑lɔɔ' ‑kpläkplaa ‑plä nä, a yi tɛɛtɛɛ‑laa 'kʋ zi.

⁶⁵ Wa cii‑ lä sɔɔ nä, Pilatö lä a ni 'sʋjä! A mʋ ‑yä a ‑bɛɛ lesie 'klʋ sa ‑waa lä nä!

⁶⁶ 'Nɩ wa yi ‑mɔɔ lesie 'kʋ mʋ. Cɛkʋʋ ‑ʋ suu‑ bhlä lesie ‑këfëa në nä, 'nɩ wa yiu luu 'ŋʋ ‑yä ʋʋ' kä ‑kä këfëa nëë' ‑bha. 'Nɩ 'sʋjaa yi koo.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan