Bìoball air-loidhne

Matie 13 - GOD - u2

‑Lɛɛgonyɔɔ' nyädlaa
( Makö 4.1‑9 ; Lukö 8.4‑8 )

¹ ‑Lɔɔ ylʋʋ 'kʋ, Zozii wlʋʋ‑ ‑zɔɔ 'nɩ ɔ ‑mʋ 'nyie yëku 'nɩ ɔ ‑kʋ ‑mɔɔ sä.

² ‑Mä nyɩkpa ‑bhutukpä ‑yi 'nɩ wa 'wlänöɔ bhɛ yëku 'wlu. Ɩ ‑kä 'ŋnö 'nɩ ɔ gblää‑ 'gokpëë' 'nɩ ɔ yi sä kʋ. 'Nɩ nyɩkpaa 'nynigo‑ bhä 'nyi‑kpʋkpʋʋ 'kʋ.

³ ‑Mä ɔ bhlüü‑ ‑nyädlö 'kʋ 'nɩ ɔ ‑sonʋwa wälɩ ‑bhutukpä. Ɔ lä a ni, ‑lɛɛgonyɔ ‑bhlo, ɔmɔɔ‑ ‑mʋ lä ‑lɛɛgoo ‑kää.

⁴ Ɔ ‑kʋ lä goodä nä ‑lɛɛyʋʋ ɔ goo bhlä nä, ʋʋ' 'klë ‑bhlüü ‑blɔ ‑gbäkö. 'Nɩ nümnüü ‑yi 'nɩ ɩ yiu lü.

⁵ 'Yigädalʋʋ ‑bhlüü cɛkwɩ‑dʋdʋ 'mnö, dä ‑dʋdʋʋ' bhɔɔ lä ‑zu nä. Sä ‑lɔɔ' ‑dʋdʋʋ' bhɛ lä 'mʋ ‑tlʋ nä, ‑lɩɩ ɔ ‑goo lä nä, ɩ wlʋʋ‑ bhɛ 'flɛ sisio

⁶ ‑mä, 'ylʋʋ 'tɛmä‑ lä 'mʋ nä, ɩɩ' sikplii' ‑wʋ glu klä 'nɩ ɩ yi 'kʋ si.

⁷ 'Yʋʋ ‑nʋnʋ ‑bhlüü nünëë' 'nɩ ʋ wlʋʋ‑ 'flɛ ‑ma, nünëa bhʋä‑ 'nɩ a gbiu‑ 'wlu.

⁸ ‑Nʋnʋ ‑bhlüü 'nägä‑dʋdʋʋ 'mnö 'nɩ ʋ ‑tlʋ. 'Vöö ‑nɩnɩ ‑tlʋ 'yʋyii' gwlɩ ‑ngbü (100), ‑nɩnɩ ‑tlʋ 'yʋyii' gwlɩ taa, 'nɩ ‑nɩnɩ ‑tlʋ 'yʋyii' glʋ 'nɩ 'kʋgbä.

⁹ 'Nɩ Zozii yi ci, ɔ lä ‑ɔ gä 'nyukwli ‑kä nynä ɔ 'kä 'nu nä, ɔ 'nu!

Zozii sonö nyɩkpa ‑nyädlöö'
( Makö 4.10‑12 ; Lukö 8.9‑10 )

¹⁰ 'Nɩ ɔɔ' 'kʋgënyʋa yi yi, 'nɩ wa yio 'ylä. Wlä Cɩanyɔ‑, ‑ɔnözä 'nɩ ‑n sonönʋwa bhä ‑nyädlöö'?

¹¹ Zozii lä ɩ ‑ŋwa 'kʋ nynä ‑mä anyɩ, Laagɔ panö'anyɩ ʋʋ' 'Leyiduu 'mnö 'yiziziogbɩɩ' ‑zɔɔ. ‑Mä ‑mɔɔ' ‑lʋa nä, wa 'nʋwa ‑lä paa.

¹² Nyɩkpɔɔ' yi lä kään nä, wa yio bʋkʋ 'nyɛ 'nɩ ɔɔ' dä yi zumë. ‑Mä ‑ɔɔ ‑wʋ lä ‑kä nä, dä ɔ ‑kä bhlä nä, wa yio ‑lɔɔ ‑sä.

¹³ A ni 'klüü ‑kä 'ŋnö 'nɩ n sonönʋwa lä ‑nyädlöö' nä. ‑Nänʋä nä, wa wloo ‑mä waa' 'ni ‑wʋ sä. Wa poo 'nyukwli ‑mä waa' 'nu wʋ.

¹⁴ 'Plɔfɛtɩ Ezayii' ciciwälɩɩ 'mɩɩ‑ glää lä waa' ‑za. Ezayii lä Laagɔ lä, A yi 'flɛ 'nyukwli poo ‑Mä aa' ‑lä 'kɔɔn 'nu! A yi 'flɛ sä wloo ‑Mä aa' ‑lä 'kɔɔn sä 'ni!

¹⁵ ‑Ɔnöza bhää? 'Bhlɩnɛ 'mnö nyɩkpaa nä, Waa' pɔlöö yä tutlumä. Kwa 'tɛmä lä 'nyukwli ‑yä Waa' kä ‑kä waa' 'nyukwlii 'mnö 'nuu. 'Nɩ wa ŋwɛɛ‑ lä 'sɩɩ 'yikʋ ‑yä Waa kä ‑kä waa' 'yii 'mnö sä 'nii. Kwa ‑nʋ lä sɔɔ ‑yä Waa pɔlöö' kä ‑kä 'klʋ känöɔ, Waa' kä ‑kä 'ylɩbhɔ ‑yä waa' kä'ä ‑kä yii, Ɩyä nn' kwa ‑kä yamä.

¹⁶ ‑Mä anyɩ nä, a yä 'pʋ! ‑Ɔnöza bhää? Anyɩa' 'yii ni sä, 'nɩ anyɩa 'nyukwlii nu.

¹⁷ N sonö'anyɩ ‑nʋawlɛɛ 'mnö nynä ‑mä 'plɔfɛtɩnyʋa ‑yä Laagɔ dëlü 'yigëënyʋä ‑bhutukpä, wa ‑tään nynä ‑nɩnɩ 'fɩɩn a ni lä ‑lää 'yi nä, wa 'kɩ 'yi 'nimʋ, ‑mä wa 'nɩɩ ‑wʋ 'yi nii‑. Wälɩnɩ a nu lä ‑lää nä, wa ‑tään nynä wa 'kɩ 'numʋ, ‑mä wa 'nɩɩ ‑wʋ nuu‑.

Zozii sä ‑lɛɛgonyɔɔ' ‑nyädlaa ‑zɔɔ
( Makö 4.13‑20 ; Lukö 8.11‑15 )

¹⁸ 'Nɩ Zozii yiwa soo, ɔ lä a poo 'nyukwli ‑yä n 'kä ‑lɛɛgonyɔɔ' ‑nyädla ‑zɔɔ ‑sä.

¹⁹ Nyɩkpɔ kä Laagɔɔ' 'Leyiduu 'mnö wälɩɩ 'nyukwli poo, 'nɩ ɔ 'nɩɩ 'mʋ 'nu nä, kɔ ‑kʋ lä nynä gogolɩɩ ‑ɩ ‑bhlüü lä ‑blɔ ‑gbäkö nä. ‑Lɔɔ' nyɩkpa‑cëa nä, Laagɔwälɩɩ wa sonʋwa lä nä, kä 'Dëvlo yi 'nɩ ʋ sʋwanyɩ pleyii.

²⁰ Nyɩkpaa' ‑nänʋä ‑kʋ 'sɩɩ nynä cɛkwɩ‑dʋdʋʋ gogolɩɩ ‑bhlüü lä 'mnö nä. ‑Lɔɔ' nyɩkpa‑cëa nä, sä wa nu lä 'gää Laagɔwälɩ nä, wa 'bhlünɩ ‑pʋpɛɛ' 'kʋ.

²¹ ‑Mä waa' Laagɔwälɩɩ' 'ŋʋ ‑wʋ sikplii. Ɩɩ' gwlɛɛ ‑wʋ 'mʋ 'nɩ wa bha Laagɔɔ' ‑blɔɔ 'kʋ. 'Kwlɩkabhɩä ‑yä nyäkälɩ kwa Laagɔwälɩɩ' ‑za ŋëë nä, kwa sä sisio Laagɔ gwë.

²² Nyɩkpaa' ‑nänʋä ‑kʋ 'sɩɩ nynä nünë‑dʋdʋʋ gogolɩɩ ‑bhlüü lä 'mnö nä. ‑Lɔɔ' nyɩkpa‑cëa nä, wa poo 'flɛ Laagɔwälɩɩ 'nyukwli, ‑mä 'ylʋzɔɔ' bhobholɩɩ ‑yä ‑mɔɔ' leylüü' ‑zɔɔpälɩɩ gbi Laagɔwälɩɩ 'wlu, 'nɩ ɩɩ' ŋëë ‑wʋ dä.

²³ Nyɩkpaa' ‑nänʋä ‑kʋ 'sɩɩ nynä 'nägä‑dʋdʋʋ gogolɩɩ ‑bhlüü lä 'mnö nä. ‑Lɔɔ' nyɩkpa‑cëa nä, wa kä Laagɔwälɩɩ 'nyukwli ‑poo nä, wa nui 'nɩ wa tlʋ 'bhü. ‑Nänʋä bhɛɛ 'bhüü gwlɩ ‑ngbü (100). ‑Nänʋä bhɛɛ 'bhüü gwlɩ taa. 'Nɩ ‑nänʋä bhɛɛ 'bhüü glʋ 'nɩ 'kʋgbä.

‑Piti nyenyii' ‑nyädlaa

²⁴ 'Nɩ Zozii yiwa bʋkʋ ‑nyädlä soo. Ɔ lä a ni Laagɔɔ' 'Leyiduu nä, kʋ ‑kʋ lä nynä wälɩklënä. Nyɩkpɔ 'mɔɔ‑ ‑goo lä ‑lɛɛyʋ 'nänʋ ɔɔ' 'klä 'mnö.

²⁵ ‑Mä 'ylʋ ‑bhlü 'nɩ nyɩkpa ‑kʋ lä ŋɔɔdä nä, ɔɔ' ‑zɔbhlɛgbänyɔ ‑yi 'nɩ ɔ ‑goo 'klaa 'mnö ‑pitii' ‑lɛɛ nyenyi, 'nɩ ɔ yi 'plö 'nɩ ɔ yi mʋ.

²⁶ Gogolɩɩ' 'nägälɩɩ wlʋʋ‑ 'nɩ ɩ ‑füto ‑mä, kä ‑pitii' ‑lɛɛ nyenyii 'wlʋmʋ‑ 'sɩɩ.

²⁷ 'Tänyɩ ‑kʋ ‑lɔɔ 'nɩ 'klaa käänyɔɔ' ‑gänʋnyʋa ‑yi 'nɩ wa yio soo, wlä käänyɔ‑, gogolɩɩ 'titi ‑nn bhɛ ‑mɔɔ ‑naa 'klaa 'mnö ‑goo ‑a? 'Nɩ sɩ ‑kʋ bhä 'nɩ ‑pitii' ‑lɛɛ nyenyi 'wlʋmʋ bhä 'sɩɩ ‑mɔɔ?

²⁸ 'Klaa käänyɔ lä 'naa ‑zɔbhlɛgbänyɔ ‑nʋ lä sɔɔ. 'Nɩ ‑gänʋnyʋa yio 'ylä, wlä ‑mä ‑n ‑waa nynä ‑a mʋ ‑yä ‑a ‑sä ‑piti nyenyii glu ‑a?

²⁹ 'Klaa käänyɔ lä 'nn! A 'nä nʋ ‑lä sɔɔ! A kä ‑pitii nyenyii ‑sädä ‑kʋ nä, a yi ‑kä mnɔ 'nɩ a yi 'sɩɩ gogolɩɩ 'titi glu ‑sämʋ.

³⁰ Nä, a ‑tanɩ 'yi ‑yä, ɩ ‑yä gogolɩɩ 'titi 'sɔ 'bhʋä däbhlo ‑mä ‑dööda kä ‑ŋëë nä, n yi lebhe‑nʋnyʋa soo nynä a ‑sä 'fɩa ‑pitii nyenyii glu ‑yä a gʋɩ 'pi 'pi 'pi ‑yä a sii. Ɩyä lülülɩɩ a 'ŋʋɩ 'naa wëlüü 'klü.

Mutadöyee' ‑nyädlaa
( Makö 4.30‑32 ; Lukö 13.18‑19 )

³¹ 'Nɩ Zozii yiwa bʋkʋ ‑nyädlä soo, ɔ lä Laagɔɔ' 'Leyiduu kʋ ‑kʋ lä nynä ‑n ‑näsä nyɩkpɔ ‑goo lä ɔɔ' 'klää suyʋyee wa laa lä mutadö nä.

³² Suyʋʋ 'fɩɩn‑ ‑kʋ lä 'ylʋzɔɔ nä, mutadöye 'mɛɛ‑ plöö‑ lä ɩɩ' nëëdëë' ‑lɛ 'tɩkɩɩlɛɛ. ‑Mä mutadöye kä wlʋʋ‑ nä, kä ɛɛ' 'vaa zii ‑gboo 'mnö gogolɩɩ 'fɩɩn 'wlu, 'nɩ a 'plöö suu'. Ɩ ‑kä 'ŋnö nä, ŋɔkʋʋ' nümnüü yi 'nɩ ɩ 'slää aa' 'läbhɩɩ 'mnö ‑nünü.

'Flɔɔ 'bhabha‑gwäzöö' ‑nyädla
( Lukö 13.20‑21 )

³³ Zozii cii‑ lä sɔɔ nä, 'nɩ ɔ yiwa bʋkʋ 'yigäda ‑nyädlä soo, ɔ lä Laagɔɔ' 'Leyiduu kʋ ‑kʋ lä 'sɩɩ nynä 'flɔɔ 'bhabha‑gwäzö 'mɩ 'ŋnɔ ŋʋʋ‑ 'flɔɔ' tɩtɛ ‑bhutukpä 'mnö. ‑Mä 'flɔɔ 'bhabha‑gwäzönö ‑kʋ tɩtɛɛ 'mnö ‑aaa 'nɩ ɩ gbä 'nɩ ɛ ‑lefɩɩn bhaa‑.

‑Ɔnözä 'nɩ Zozii cii lä ‑nyädlöö nä
( Makö 4.33‑34 )

³⁴ Wälɩɩ 'fɩɩn Zozii ‑soo lä ‑jlüü nä, ‑nyädlöö' ɔ cinɩɩ bhä.

³⁵ Ɩyä wälɩklëa Laagɔ ŋʋʋ‑ bhlä ʋʋ' 'plɔfɛtɩɔ nëë' nä, a 'kä glää. 'Plɔfɛtɩɔ cii‑ bhä, ɔ lä Laagɔlä N kä cii‑ nynä n 'kwa soo nä, ‑Nyädlöö' n 'kwa sonö. Sä 'kɔɔ 'nö bhlä 'wlʋ nä, Ɩɩ' wälɩɩ ‑ɩ ‑zizio lä 'kʋ, 'Nɩ nyɩkpɔɔ' 'nu ‑wʋ lä 'mʋ nä, Ɩmɩ n nä n 'kä ci.

Zozii sä ‑piti nyenyii' ‑nyädlaa ‑zɔɔ

³⁶ 'Nɩ Zozii yi nyɩkpaa yëku ‑bha 'nɩ ɔ yi gbëë' yi. 'Nɩ ɔɔ' 'kʋgënyʋa ‑yio yëku yi 'nɩ wa yio soo, wlä Cɩanyɔ‑, ‑piti nyeyii wa ‑goo lä 'klaa 'mnö nä, ɩɩ' ‑nyädla, ‑n ‑sanyɩma ‑zɔɔ!

³⁷ Zozii lä ‑ɔ ‑goo lä ‑lɛɛyʋʋ 'nänʋʋ nä, Nyɩkpɔɔ ‑Yowli lä.

³⁸ 'Klaa 'mää‑ plöö‑ lä 'pʋpʋʋ. Nyɩkpaa' ‑lʋa ‑kʋ lä Laagɔɔ' 'Leyiduu' ‑blɔɔ 'kʋ nä, wamää‑ plöö‑ lä gogolɩ 'nänɩɩ. ‑Pitii ‑zɔbhlɛgbänyɔɔ ‑goo lä 'klaa 'mnö nä, ɩmɩɩ‑ plöö‑ lä nyɩkpaa‑ ŋʋ lä 'Dëvlo 'klʋkpää' nä.

³⁹ ‑Zɔbhlɛgbänyɔɔ‑ ‑goo lä 'klaa 'mnö ‑pitii nä, 'Dëvlo lä. ‑Dööda 'tänyɩɛ 'mɛɛ‑ plöö‑ lä zëkpëa' bhɩäylʋʋ. Nyɩkpaa‑ 'gä lä ‑döö ‑kää yi nä, ‑Laagɔzizii lä.

⁴⁰ Nä, zëkpëa' bhɩäylʋʋ 'kʋ, sä wa sä lä 'klä 'mnö ‑piti 'nɩ wa pɩɩ lä ‑kosuu' nä, sɔɔ ‑säkä ‑säkä ɩ 'kä lä 'kʋ 'plö.

⁴¹ Bhɩäylʋʋ 'kʋ nä, nyɩkpaa 'fɩɩn wa gbä lä 'nɩ wa ‑liesɩ bha lä Laagɔɔ' ‑blɔɔ 'kʋ nä, ɩyä ‑lʋwa ‑wa ‑kʋ lä 'sɩɩ gbenyenyii 'mnö nä, waa' ‑za, Nyɩkpɔɔ ‑Yowli yi ɔɔ' ‑Laagɔzizii lobho 'nɩ ɩ yiwa ɔɔ' 'Leyiduu 'mnö 'tlü

⁴² 'nɩ ɩ yiwa ‑kosu‑düdë 'kädaa 'mnö 'pä. Wa yi ‑mɔɔ kʋ 'nɩ wa yi 'tu, 'nɩ wa yi gläwli mnü.

⁴³ Ɩyä nyɩkpaa ‑wa ‑nämnö lä Laagɔɔ' ‑blɔɔ 'kʋ nä, wa 'kä wa 'Bä Laagɔɔ' 'Leyiduu 'mnö kʋ ‑yä wa 'kä ‑mɔɔ lie nynä 'ylʋkwädlä. Naa, ‑ɔ ‑gä 'nyukwli ‑kä nynä ‑mä ɔ 'kä 'nu nä, ɔ 'nu!

'Nää ‑a ‑zizio lä nää' ‑nyädlaa

⁴⁴ 'Nɩ Zozii yiwa bʋkʋ soo, ɔ lä Laagɔɔ' 'Leyiduu kʋ ‑kʋ lä nynä leylüü' lɩɩ ‑ɩ ‑zizio lä 'klää 'nɩ nyɩkpɔ 'wlʋʋ‑ lä 'kʋ nä. Nyɩkpɔɔ 'wlʋʋ‑ lä leylüü 'kʋ nä, kɔ ‑zizii bʋkʋ ‑mɔɔ 'klaa 'mnö. 'Nɩ ɔɔ' ‑lɔɔ ‑pʋpɛ bhlä lä nä, ɔ ‑mʋ 'nɩ ɔ ŋʋʋ‑ ɔɔ' kääkäälɩɩ 'fɩɩn 'kpä 'nɩ ɔ yi ‑lɔɔ 'klaa zɔɔ.

‑Sikaa ‑gbälɩɩ' 'kpä‑ŋʋnyɔɔ' ‑nyädlaa

⁴⁵ Laagɔɔ' 'Leyiduu nä, kʋ ‑kʋ lä 'sɩɩ nynä 'kwäsɛylänyɔɔ' lɔɔ ‑ɔ tään lä 'ŋnumʋ bɔlöyʋʋ nä.

⁴⁶ ‑Mä nyɩkpɔɔ nii‑ 'ŋnumʋ‑sikaa' bɔlöyʋʋ 'nɩ ɔ yi mʋ 'nɩ ɔ yi ɔɔ' kääkäälɩɩ 'fɩɩn 'kpä 'ŋʋ 'nɩ ɔ yi 'ŋnumʋ‑sikaa bɔlöyʋʋ zɔɔ.

'Nyie ‑dädaa' ‑nyädlä

⁴⁷ Laagɔɔ' 'Leyiduu nä, kʋ ‑kʋ lä 'sɩɩ nynä ‑dädää' laa wa paa‑ 'nyiee nä. ‑Lɔɔ' ‑dädaa klä zlüü' nü nü nü.

⁴⁸ A kä yɩ sɔɔ zlüü ‑klä 'nɩ wa jlünöa 'klä 'wlu 'nɩ ‑lɔɔ 'nyi‑kpʋkpʋ 'kʋ, wa gbäzö aa' 'mnö 'nägä‑zlüü 'mʋ 'nɩ wa ŋʋɩ‑ ‑takwüü' 'nɩ zlüü‑ ‑wʋ lä nää‑ nä wa pɩɩ 'klää.

⁴⁹ Zëkpëa' bhɩäylʋʋ 'kʋ nä, sɔɔ ‑säkä ‑säkä ɩ 'kä lä 'kʋ 'plö. Nyɩkpaa' ‑lʋwa ‑wanö gbɩɩ‑ gëë‑ lä 'yii nä, wa ‑yä gbenyenyinyʋa 'sɔ, ‑Laagɔzizii yi yi 'nɩ ɩ yiwa ‑säsä.

⁵⁰ 'Nɩ gbenyenyinyʋa, ɩ yiwa ‑kosu‑düdë 'kädaa 'mnö 'pä. Wa yi ‑mɔɔ kʋ 'nɩ wa yi 'tu, 'nɩ wa yi gläwli mnü.

⁵¹ Zozii ‑bhɩä lä cilɩ nä kä ɔ ylʋwa, ɔ lä wälɩɩ 'fɩɩn n cii‑ lä nä, a nui ‑a? Wlä ‑ɛɛɛ, ‑a nui.

⁵² Ɔ lä ‑Jlämöcɩanyɔ kä Laagɔɔ' 'Leyiduu' yëkuu' wälɩ ‑yi 'nägäsä nä, kɔ ‑kʋ lä nynä gbükänyɔɔ' lɔɔ ‑ɔ ‑klää lä ɔɔ' 'lokwle 'mnö leylü 'nää nä. Ɔ sä ‑mɔɔ ‑lɛɛ leylüü' ‑lɛɛ leli, 'nɩ ɔ sä 'sɩɩ mɔɔ 'kɔgɔbhlää' leylü.

Zozii ‑kʋ Nazalɛtöduu'
( Makö 6.1‑6 ; Lukö 4.16‑30 )

⁵³ ‑Mä Zozii 'pänʋwa ylä ‑dɔɔ 'fɩɩn nä, kɔ ‑bha ‑lɔɔ 'nɩ

⁵⁴ 'duu ɔ 'bhʋä‑ lä 'mnö nä, ɔ yiu 'mnö mʋ. Ɔ ‑kʋ ‑mɔɔ 'nɩ ɔ mʋ bhä ‑mɔɔ' Laagɔ‑bhutuu 'mnö cɩa ‑kää. ‑Mä nyɩkpaa‑ puo bhlä 'nyukwli nä, ɔɔ' cɩalɩɩ 'niniwa bhä plɛkʋ. Ɩ ‑kä 'ŋnö nä, wa ci bhä, wlä ‑mä 'nɩ dä ɔ ‑sä bhä sää 'fikee? Säsä ɔ mii bhä 'nɩ ɔ nʋ bhä 'yiziziogbɩnɩ 'fɩɩn?

⁵⁵ 'Kämnɩnyɔɔ' 'yuo 'mɔɔ‑ bhä ‑lɔɔ ‑kʋ ‑a? Ɔ 'nɔɔ‑ bhä Malii plöö‑ ‑a? Ɔ bhelie‑ plöö‑ ylä Zakö, ‑yä Zozɛfʋ, ‑yä Simɔɔ, ‑yä Zudö!

⁵⁶ Ɔ bhɛŋwnɩä, 'nö‑anyɩ bhä ‑lää nëëdë ‑kʋ ‑a? 'Päwaa ɔ ‑kä lä nä, dä sä ɔ ‑saa bhää?

⁵⁷ ‑Mä ‑nɩnɩ 'fɩɩn gbä bhɛ lä nä, kä wa paa‑ ɔɔ' wälɩɩ 'klä. 'Nɩ Zozii yiwa soo, ɔ lä dää 'fɩɩn 'plɔfɛtɩ yi lä mʋ nä, kä wa ŋʋɔ 'klʋkpää, ‑mä ɔ kä ɔ 'bhlɩ ‑yi nä, ɔ 'bhunyʋä ‑yä ɔɔ' gbünyʋää' 'mänyɩnöɔ ‑wʋ.

⁵⁸ ‑Maa, Nazalɛtöduu' nyɩkpaa' 'nyukwli 'tɛnɔɔ' ‑za, Zozii' ‑wʋ ‑mɔɔ 'yiziziogbɩ ‑bhutukpä ‑nʋʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan