Bìoball air-loidhne

Matie 11 - GOD - u2

¹ 'Tänyɩɛ 'mnö Zozii ‑soo ylä ɔɔ' 'kʋgënyʋa 'kʋgbä 'sɔ nä, kɔ ‑bha ‑lɔɔ 'nɩ ɔ ‑mʋ ‑lɔɔ' 'lëkpëa 'dii 'mnö cɩa ‑kää.

Zään Badisö ‑lobho Zozii nyɩkpa yëku
( Lukö 7.18‑35 )

² ‑Mä ‑lɔɔ' 'tänyɩɩ nä, Zään Badisö ‑kʋ bhä ‑jɩɩ'. Ɔ nuu‑ lä Klisöö' lebhee' yëkuu' wälɩ nä, kɔ ‑lobho ɔɔ' 'kʋgënyʋa pää' nyɩkpa.

³ Ɔ ‑sonʋwa, ɔ lä a mʋ ‑yä a 'ylä Zozii 'nää nynä ‑mä Puënyɔɔ‑ 'gä bhlä yi nä ‑mɔɔ plöɔ‑ bhä ‑a? ‑Mä ‑a ‑bɛɛ bhä 'yigädalɔɔ ‑a?

⁴ Wa ‑mʋ 'nɩ wa ylɔɔ‑ lä nä, kä Zozii sonʋwa, ɔ lä a mʋ ‑yä sa nu lä, 'nɩ sa ni lä 'yi nä, a ‑sää sɔɔ Zään!

⁵ 'Yikpüü' kʋnyʋää' 'yi welio, 'kpläkplänyʋä nää, 'zläbhlänyʋä yamä, 'nyukwli ‑gbʋgbɔnyʋä nu, 'kudukuë glɔɔ 'kuëë, 'nɩ ŋäzönyʋa nu yɩ Laagɔduu' 'Nägädöö.

⁶ Nä, nyɩkpɔɔ' ‑lɔmɔ ‑ɔnö pɔlötɛtɛɛ' ‑lä lä 'foclo bhlü 'naa ‑za nä, ɔ yä 'pʋ!

Zozii lü Zään Badisöö' ‑dläfʋɛ

⁷ Zään' 'kʋgënyʋa ‑mʋ yɩ 'fɩa 'nɩ Zozii yi ‑jlë soo, ɔ lä a ‑mʋ bhɛ ‑mɔɔ 'popie 'mnö wloo ‑kää? Gbogwli‑nyakpɔ ‑vʋvɔlʋ 'dɩda 'mʋ nä, ʋmʋ a ‑mʋ bhɛ wloo ‑kää ‑a?

⁸ N nä, a ‑mʋ bhɛ 'titi ‑mɔɔ wloo ‑kää? Nyɩkpɔɔ' lɔɔ‑ ‑plä lä 'mʋ ‑cʋ nä, ɔmɔ a ‑mʋ bhɛ wloo ‑kä ‑a? A ni nyɩkpaa ‑wa plä lä 'nägä‑kwëti 'mʋ nä, 'loyuaa' 'gbüü 'mnö wa ‑kʋ lä!

⁹ ‑N nä, a ‑mʋ bhɛ 'titi wloo ‑kää? Laagɔɔ' 'plɔfɛtɩ ‑a? ‑Ɛɛɛ, Laagɔɔ' 'plɔfɛtɩ 'zaazɩ! ‑Mä n sonö'anyɩ 'sɩɩ nynä ɔ ‑zi Laagɔɔ' 'plɔfɛtɩ 'kʋ!

¹⁰ ‑Nɔnɔɔ' ‑za ɩ ‑jɩjlɔ lä nynä ‑mä, Laagɔ lä N yi 'naa lobho lobhonyɔ lobho ‑yä Ɔ 'kä ‑naa ‑blɔkʋ göglä.

¹¹ Kä n sonö'anyɩ ‑nʋawlɛɛ 'mnö nynä ‑mä, nyɩkpaa 'fɩɩn‑ ‑ghlää lä 'ŋnɔɔ 'mnö nä, waa' 'kʋʋ nyɩkpɔɔ' ‑wʋ 'ghlü 'nɩ ɔ 'kä Zään ‑zi! ‑Bhlɛ ‑mɔɔ Laagɔɔ' 'Leyiduu 'mnö nä, ‑ɔ plöö‑ lä ‑mɔɔ ‑lɛ 'tɩkɩɩlɛɛ nä, ɔ 'ghlü 'nɩ ɔ zi Zään.

¹² 'Bhää yɩ 'tänyɩɛ 'mnö Zään cie lä cɩalɩ 'kʋ ‑aaa, yä ‑n ŋëë yɩ ‑zɩkä nä, Laagɔɔ' 'Leyiduu kwa 'tɩtɔnʋ yɩ. Nä, nyɩkpɔɔ' lɔɔ ‑ɔ ‑yi ylä 'kʋ bhlääsä nä, ɔmɔɔ‑ 'gʋ ylä 'mnö plä.

¹³ 'Plɔfɛtɩnyʋa 'fɩɩn, 'ŋʋʋ yɩ Moyizö, kä Laagɔ cinʋwa‑ nëë' ‑aaa 'nɩ Zään' 'tänyɩɛ yi lä ŋëë.

¹⁴ A 'kɩ ylä 'mʋ 'nu nä, kä n mʋ'anyɩ yɩ soo ‑kää nynä Zään 'mɔɔ‑ plöö‑ lä Elii. Ɔmɔ wa sä bhlä nynä ‑mä ɔ yi yi.

¹⁵ Nä ‑ɔ gä 'nyukwli ‑kä nynä ‑mä ɔ 'kä 'nʋ nä, ɔ 'nu!

¹⁶ N yi bhä ‑zi 'bhlɛsʋnʋ 'mnö nyɩkpaa 'kʋ nyäka 'nä ‑a? Kwa ‑kʋ lä nynä 'yuëë‑ ‑kʋ duu' 'clɩkpää' sä 'nɩ wa soo wa ‑liesɩ nä.

¹⁷ Wlä, ‑a ‑klä ‑blɩkɔ nynä a 'kä ye, 'nɩ aa ‑wʋ ‑ye! ‑A ‑bhlɩ 'sɩɩ 'nʋgbʋlɩ nynä a 'kä 'tu, 'nɩ aa ‑wʋ tuu‑!

¹⁸ A ni Zään ‑yi lä nä, ɔɔ' lü bhɔɔ 'nɩ ɔɔ' 'mnä bhɔɔ. Ɩ ‑kä 'ŋnö 'nɩ wa ci bhä nynä ‑zuzunyënyu‑ ‑kʋɔ kätää'.

¹⁹ ‑Mä Nyɩkpɔɔ ‑Yowli ‑yi 'nɩ ɔ lü 'nɩ ɔ mnä lä nä, kwa ci lä nynä ‑mä ɔ ‑glö ‑leegbi lünyɔ ‑yä nʋmnänyɔ. Wlä ɔ plöö‑ lapoo‑ylänyʋä ‑yä gbenyenyinyʋa 'sɔ wa 'nagɔ. ‑Mä Laagɔ nä, ʋʋ' nʋnʋgbɩɩ 'mɩɩ‑ pana ʋʋ dɩgälɩɩ.

Zozii fä 'dii ‑nɩnɩ nëkʋ
( Matie 10.15 ; Lukö 10.12‑15 )

²⁰ Zozii cii‑ ylä sɔɔ nä, 'dii ɔ ‑ghlä bhlä 'mnö, 'nɩ ɔ ‑nʋ lä 'yiziziogbɩ ‑bhutukpa nä, sä ‑mɔɔ nyɩkpaa' ‑wʋ lä waa' nʋnʋgbɩɩ 'cɩcɩ‑ nä, kɔ ‑bhuwa ‑kɔkwɩ,

²¹ Ɔ lä anyɩ Kolazɛɛ‑dunyʋä, a yä mie! Anyɩ Bɛsayida‑dunyʋä ‑mä 'sɩɩ, a yä mie! ‑Ɔnöza bhää? 'Yiziziogbɩɩ Laagɔ ‑nʋ'anyɩ lä nëëdë nä, sɔɔ ɩ kä bhä Tilöbhlɩ 'kʋ ‑yä Sidɔɔbhlɩ 'kʋ ‑nʋɔ nä, ‑mɔɔ' nyɩkpaa yä wɛzä 'cɩcɩ. Wa yi bhä ‑bhɛgö ylo, 'nɩ wa yi bhä 'tɩtɔɔ' 'kplɩfɔ waa' nyenyii' ‑za.

²² 'Ɩzä n sonö'anyɩ lä nynä ‑mä, Laagɔɔ' 'tite 'kädɛɛ' pläylʋʋ 'kʋ nä, Tilöbhlɩ 'kʋ ‑yä Sidɔɔbhlɩ 'kʋʋ nyɩkpaa' 'titee, ɛ yi yɔmä 'nɩ ɛ yi anyɩa' ‑lɛɛ 'kʋ zi.

²³ 'Nɩ anyɩ, Kapɛnayumö‑dunyʋä, ka bhobho nynä a yi ‑gblää 'nɩ a yi ‑laagɔɔ' 'taa ‑a? Yio! Ka la glu plä! A yi glu plä ‑aaa, 'nɩ a yi 'kudukʋ ghlä. ‑Ɔnöza bhää? 'Yiziziogbɩɩ Laagɔ ‑nʋ'anyɩ lä nëëdë nä, sɔɔ ɩ kä bhä Sodɔmʋ‑duu ‑yä Gomɔɔ‑duu 'mnö ‑nʋɔ nä, 'diyɩ ‑kʋmʋ bhlä ‑lätee ‑zɩkä.

²⁴ N sonö'anyɩ nynä Laagɔɔ' 'tite 'kädɛɛ' pläylʋʋ 'kʋ nä, 'titee Laagɔ 'kanyɩ lä 'ŋʋ nä, Sodɔmʋ‑dunyʋä ‑yä Gomɔɔ‑dunyʋää' 'titee yi yɔmä 'nɩ ɛ yi anyɩa' ‑lɛɛ 'kʋ zi.

A yii Zozii ‑yä a 'kä 'kʋ wɔtɔlɩ 'ni
( Lukö 10.21‑22 )

²⁵ ‑Lɔɔ' tänyɩɛ ‑bhlobhlo 'mnö, Zozii cii‑, ɔ lä 'Bä, ‑laagɔ ‑yä ‑dʋdʋʋ 'sɔɔ Kwlienyɔ‑, n fänö‑ö 'ŋnu! Sä ‑n ‑zizie lä wälɩnɩ 'fɩɩn dɩgälɩ‑yibhënyʋa ‑yä 'fike 'fikenyʋa 'yii, 'nɩ 'yua 'mää‑ ‑n paanɩ‑ lä nä, ɩɩ' ‑zä n fänö‑ö lä 'ŋnu!

²⁶ ‑Ɛɛɛ, 'Bä, ‑naa plɛkʋmɛnɔɔ 'mnö nä, kä ‑n ‑waa nynä ɩ kʋ sɔɔ nä, 'ɩzä ɩ ‑kʋ lä sɔɔ.

²⁷ 'Nɩ ɔ yi bʋkʋ ci, ɔ lä kä n 'Bä nyɛɛ'ɛ ‑lɩɩ 'fɩɩn. 'Nɩ nyɩkpɔɔ' ‑wʋ 'Bäɔ ‑Yowlio ‑yi, 'nɩ ‑ɔnö 'Bäɔ ‑bhlo. 'Nɩ nyɩkpɔɔ' ‑wʋ 'sɩɩ 'Bäɔ ‑yi 'nɩ ‑ɔnö ɔ ‑Yowlio, ɩyä ‑lɔɔ ɔ ‑Yowli panöɔ‑ lä nä.

A yi a 'kä 'kʋ wɔtɔ

²⁸ Anyɩmɔ ‑ɔ ‑sluë lä 'nɩ ‑ɔ yä lä ‑sɩä nä, a yinö'ö! A yinö'ö ‑mä, n yi'anyɩ 'kʋ wɔtɔlɩ 'nyɛ!

²⁹ Lebhee n 'ylänö'anyɩ lä nä, a nʋɛ. Ɩyä sä n 'tienö'anyɩ lä nä, a nää sɔɔ! ‑Ɔnöza bhää? Amʋ nä, kä n ‑wɔtɔ plɛ, 'nɩ 'nn täkpɔ ‑wʋ 'naa pleyi. Nä, a yi ‑mä, anyɩa' 'wugɔɔ' 'kʋ wɔtɔlɩɩ a yii 'ni!

³⁰ ‑Ɛɛɛ, 'naa lebhee nä, ɛɛ ‑tëbhuu' ‑wʋ bhɛɛ yëku kään. 'Nɩ boduu n nyɩ'anyɩ lä bhɛɛdä nä, ʋʋ' ‑wʋ 'sɩɩ 'kʋ 'ŋɔɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan