Bìoball air-loidhne

Makö 9 - GOD - u2

¹ 'Nɩ Zozii yiwa bʋkʋ soo, ɔ lä kä n sonö'anyɩ yɩ ‑nʋawlɛɛ' nynä ‑mä nyɩkpa ‑kʋ'anyɩ ‑lää nëëdë 'nɩ waa' ‑lätee kuu, 'nɩ wa yi Laagɔɔ' 'Leyiduu 'päwaa yi 'ni.

Zozii ‑jɩjlä 'nɩ ɔ ‑yä Moyizö ‑yä Elii 'sɔ ŋʋʋ‑ 'dö
( Matie 17.1‑13 ; Lukö 9.28‑36 )

² Ylɩɩ ‑ngboplo plöö‑ ylä nä, kä Zozii bhlüü‑ Pɩɛlö, ‑yä Zakö, ‑yä Zään 'sɔ 'kʋ 'nɩ ɔ yiwa 'sää 'kükü 'kädä 'wlu fä. Ɔ ‑yʋwa 'sɔ 'cɩɩn ‑kʋ bhä ‑mɔɔ 'nɩ ɔ yi waa' 'yikʋ jɩjlä.

³ Ɔɔ' 'kwëtii plöö‑ 'sää plätätä 'nɩ ɩ lie bhä. Sɩ lie bhlä nä, nyɩkpɔ 'nɩɩ ‑lä ‑mää 'ylʋzɔɔ wɔɔ 'nɩ ɩ 'kä sɔɔ 'plö.

⁴ Wa lä wa wloo nä, ‑n ni Moyizö ‑yä Elii. Wa ‑ghlʋwa 'yi 'nɩ wa ‑yä Zozii 'sɔ ŋʋ bhä 'dö.

⁵ 'Nɩ Pɩɛlö yi Zozii soo, ɔ lä Cɩanyɔ‑, ɩ nää‑ nynä ‑mä ‑a kʋ ‑lää! ‑A 'gä ‑papö taa 'slä, ‑naa laa, Moyizöö' laa, 'nɩ Elii' laa.

⁶ Wälɩɩ 'titi Pɩɛlö ylä bhlä nynä ‑mä ɔ 'kä ci nä, ɔ 'nɩɩ ‑wʋ nii‑. Kä ‑ŋänö ‑plɔɔ ɔ ‑yä ‑mɔɔ' ‑lʋa 'sɔ.

⁷ Wa ‑kʋ ‑lɔɔ 'föö, 'nɩ 'nyukpɔ yi yi, 'nɩ ʋ yiwa 'kʋ zizie. 'Nɩ nüwälɩ yi ‑mɔɔ 'nyukpɔɔ 'mnö ghlää, ɩ lä ‑nɔnɔ 'mɔɔ‑ plöö‑ lä 'naa ‑Wawayuo! A puo 'nyukwli!

⁸ 'Kpobhuu ‑bhlo 'kʋ, 'nɩ Moyizö ‑yä Elii 'sɔ yi 'mʋmnɔ‑, 'nɩ wa ‑yä Zozii 'sɔ 'cɩɩn‑ ‑too bhɛ ‑lɔɔ.

⁹ 'Tänyɩɩ wa bha ylä ‑mɔɔ 'kükëa 'wlu nä, 'nɩ Zozii yiwa soo nynä wälɩɩ wa nii‑ lä ‑mɔɔ 'kükëa 'wlu 'yi nä, wa 'nä sonɩ ‑lä nyɩkpɔ 'fɩa ‑yä Nyɩkpɔɔ ‑Yowli 'kä 'kuëë glɔɔ.

¹⁰ Sä ɔ ‑sonʋwa bhlä nä, wa ŋʋʋ‑ sɔɔ 'klʋkpää', ‑mä wa ylä bhä wa yëku nynä 'nɩ wälɩklë ‑sä 'titiclö ɔ ylä bhä nynä ‑mä ɔ 'kä ci 'nɩ ‑a plöö‑ bhä 'kuëë glɔɔlɩɩ 'naa?

Zozii lä Elii yä wɛzä yi

¹¹ 'Nɩ wa yi Zozii 'ylä, wlä Cɩanyɔ‑, sɩ ‑kʋ bhä 'nɩ ‑Jlämöcɩanyʋa cɩa bhä nynä ‑mä 'plɔfɛtɩ Elii yi 'fɩa zëkpë 'kʋ yi 'nɩ Klisöɔ yi bhä yii?

¹² Zozii lä ‑ɛɛɛ, ɩ cio‑ 'zaazɩ sɔɔ nynä ‑mä Elii yi yi, 'nɩ ɔ yi nʋnʋgbɩɩ 'fɩɩn 'kʋ gögä. 'Nɩ ‑ɔnöza ɩ ‑jɩjlɔ bhä nynä Nyɩkpɔɔ ‑Yowli yi nyɛnɩälɩ 'kädɩ 'ni, 'nɩ nyɩkpa 'nöɔ ‑lä 'mänyɩɩ?

¹³ N mʋ'anyɩ yɩ soo ‑kää nynä Elii yä wɛzä yi, ‑mä kwa ‑klɔɔ sä wa ‑waa lä nä. Sɔɔ ‑tɛɛ ɩ ‑jɩjlɔ bhlä ɔɔ' ‑za.

Zozii ‑sä 'yu ‑zuzunyënyu kätää'
( Matie 17.14‑21 ; Lukö 9.37‑43 )

¹⁴ Zozii ‑yä ɔɔ' 'kʋgënyʋa taa ‑ŋëë ylä ɔɔ' 'kʋgënyʋa ‑wa ‑too bhlä ‑lɔɔ nä yëku nä, wa lä wa wloo nä, nyɩkpa ‑bhutukpä ‑glänʋwa 'klʋ. 'Nɩ ‑Jlämöcɩanyʋa ‑yʋwa 'sɔ bhlää bhä 'kʋ.

¹⁵ Nyɩkpaa‑ ‑kʋ bhlä ‑lɔɔ nä, waa' bhɔɔ Zozii ‑gblɩ nä kɔ vuwa‑ ‑zɔɔ. Wa nio‑ lä 'yi nä, 'nɩ wa yi paa 'nɩ wa yio bhään ‑kää yi.

¹⁶ 'Nɩ ɔ yi ɔɔ' 'kʋgënyʋa 'ylä nynä ‑mä wälɩ ‑sä wa ‑yä nyɩkpaa 'sɔ bhlää bhä 'kʋʋ?

¹⁷ Nyɩkpɔ ‑bhlo ‑kʋ bhä ‑mɔɔ ‑jlëa nëëdë 'nɩ ɔ yi Zozii soo, ɔ lä Cɩanyɔ‑, bheeje, ‑mɔɔ n ‑lä lä 'naa 'yuo! ‑Zuzunyënyu ‑kʋɔ kätää' nä, ʋ gbä 'nɩ ɔɔ' ‑sää ‑wʋ 'mʋ.

¹⁸ Dä ʋ kɔ 'flɛ kätää' sloo‑ nä, kʋ pänöɔ sä 'nɩ ʋ gbä 'nɩ 'fʋflɩɩ ghlɔ nëë', 'nɩ ɔ lü ɔɔ' glaa 'nɩ ɔ jɛ. N ‑soo ‑naa 'kʋgënyʋa nynä wa 'tlü ‑zuzunyënyuu ‑mä waa' ‑wʋ mii‑.

¹⁹ Nyɩkpɔɔ cii‑ lä sɔɔ nä, Zozii lä anyɩ nä, a ‑glö 'sää 'titiclö nyɩkpaa' lʋä ‑waa ‑wʋ lä pɔlötɛtɛ ‑kä nä! A bhobho nynä 'tänyɩ zio n yi'anyɩ bhä ‑lätee nëëdë ‑sää? Ka bhobho nynä n yi 'kɔɔkɔ sɔɔ 'mnö 'kuu 'nɩ n yi'anyɩ nëëdë kʋ ‑a? A ‑lä'ä 'yuo!

²⁰ 'Nɩ wa yionyɔ ‑lä. ‑Mä ‑zuzunyënyuu nii‑ lä 'gää Zozii 'yi nä, kʋ 'sëka ‑sëka 'yuo 'fɩtɛtɩɩ' 'nɩ ʋ yio sä pään. Ɔ 'bhisio bhä, 'nɩ ɔɔ' nëë' 'fʋflɩɩ ghlä bhä ‑mɔɔ.

²¹ 'Nɩ Zozii yi ɔ 'bä 'ylä nynä ‑mä ɩ nʋ bhä 'tänyɩ ‑zio 'nɩ ‑n ‑yowli ‑nɩnɩ ŋënöɔ bhää? Nyɩkpɔɔ lä ɔɔ' 'yuëë lɔɔ 'nɩ ‑zuzunyënyuu cio‑ lä sää' 'kʋ.

²² 'Tänyɩ kʋ ‑lɔɔ 'nɩ ʋ pänöɔ ‑kosuu', 'nɩ ʋ pänöɔ 'sɩɩ 'nyuu, 'nɩ ʋ ‑kɔ lä 'sɔɔ 'bhlä 'bhläsä nä, bheeje, ‑n yibhënö‑anyɩ ŋäzö ‑yä ‑n yi‑anyɩ 'kʋ ‑n gä mii nä!

²³ Zozii lä 'nɩ kä ‑n cii‑ lä nynä ‑mä n kä mii‑ nä! Nyɩkpɔ kä Laagɔɔ' pɔlötɛtɛ ‑kä nä, kɔ mii ‑lɩɩ 'fɩɩn!

²⁴ 'Yuo ɔ 'bä lä n ‑kä Laagɔɔ' pɔlötɛtɛ, ‑mä Cɩanyɔ‑, ‑n gbä ‑yä 'naa pɔlötɛtɛɛ 'kä 'ghlümë!

²⁵ Zozii ‑wloo lä 'nɩ nyɩkpaa ‑wa yinöɔ bhlä nä, wa zumë bhlä nä, kɔ 'ŋʋʋ‑ ‑zuzuu 'yizlɛ 'kʋ. Ɔ lä ‑zuzunyënyu‑! ‑Mɔɔ gbä 'nɩ 'yunɔɔ' 'nu ‑wʋ lä, 'nɩ ɔɔ' ‑sää ‑wʋ lä 'mʋ nä, kä n sonö‑ö yɩ nynä ‑n ‑bhɔɔ kätää' ‑yä ‑n mʋ ‑yä ‑naa yio ‑läyɩ 'kɔɔn kätää'!

²⁶ Zozii cii‑ lä sɔɔ nä, kä ‑zuzunyënyuu gaa‑ 'mʋ 'nɩ ʋ 'sëka ‑sëka 'yuo 'nɩ ʋ yio kätää' ‑bha. ‑Mä ʋ ‑bhɔɔ lä kätää' nä, ɔ ‑kʋ bhɛ nynä lɔɔ‑ kuu‑. Ɩ ‑gbä 'nɩ bhutukpä ci bhɛ nynä kɔ kuu‑.

²⁷ 'Nɩ Zozii yio ‑klɔgbä klä 'nɩ ɔ yio 'kʋ bhɛlɩä 'nɩ ɔ yi 'kʋ 'nynigo.

²⁸ Zozii ‑yä ɔɔ' 'kʋgënyʋa 'sɔ ‑yi ylä gbëë' nä, kwa 'ylänöɔ‑ gbäkö 'kʋ, wlä Cɩanyɔ‑, ‑ɔnözä 'nɩ ‑aa bhä ‑zuzunyënyuu 'yuo kätää' ‑sälɩ mii?

²⁹ Ɔ lä ‑zizinyenyii' 'cënä, bhibhielɩ [‑yä ‑gbugbe ‑goolɩ] ‑tɛɛ tlii lä.

Zozii lä ɔ yi 'ku 'nɩ ɔ yi 'kuëë glɔɔ
( Matie 17.22‑23 ; Lukö 9.43‑45 )

³⁰ Zozii ‑yä ɔɔ' 'kʋgënyʋa 'sɔ ‑bha ‑lɔɔ 'nɩ wa yi Galilee‑bhlɩɛ 'tɔɔ. Ɔɔ' bhɛ ‑waa nynä nyɩkpa yibhënöɔ dä.

³¹ Ɔ cɩa bhɛ ɔɔ' 'kʋgënyʋa, 'nɩ ɔ ‑sonʋwa bhä, ɔ lä Nyɩkpɔɔ ‑Yowli wa yio nyɩkpa wlɩɩ' pënö, 'nɩ wa yio 'bhlä. ‑Mä ɔ kä kuu‑ nä, taanaylʋʋ 'kʋ ɔ yi 'kuëë glɔɔ.

³² ‑Mä ɔ cii‑ 'flɛ sɔɔ ‑mä ɔɔ' 'kʋgënyʋa 'nöɔ ‑wʋ 'mʋ nuu. 'Nɩ wa gu bhlä 'sɩɩ nä, waa' ‑wʋ mii‑ 'nɩ wa 'kɔ ylää‑.

‑Nyɩkpaa' 'tienyɔ ‑glö ‑gänʋnyɔ
( Matie 18.1‑5 ; Lukö 9.46‑48 )

³³ Wa ‑ŋëë lä Kapɛnayumöduu' 'nɩ wa ‑plä lä gbëë' nä, 'nɩ Zozii yiwa 'ylä, ɔ lä wälɩ‑ ‑sä a bhlää bhɛ 'kʋʋ da ‑a yi lä ‑blɔkʋ nä?

³⁴ Ɔ ylʋwa‑ lä nä, waa' ‑wʋ në ‑sä. Wa yi bhlä ‑blɔkʋ nä, kwa bhlää bhä 'kʋ ‑yä wa 'kä ‑ɔ plöö‑ lä waa' nëëdëë' ‑lɛ 'kädɔ nä yibhë.

³⁵ Ɩ ‑kä 'ŋnö 'nɩ Zozii ‑kʋ sä 'nɩ ɔ ‑laa wamä 'kʋgbä 'sɔ, 'nɩ ɔ yiwa soo, ɔ lä nyɩkpɔ kä cii nynä ‑mä ɔ 'kä 'yikʋ kʋ ‑yä ɔ 'kä ɔ ‑liesɩɩ 'tienyɔ 'plö nä, ‑lɔɔ' nyɩkpɔɔ kʋ klë ‑yä ɔ nʋ nyɩkpaa 'fɩɩn ‑gä!

³⁶ 'Nɩ ɔ yi 'yulɛɛ 'kʋ 'bhlü 'nɩ ɔ yiwanyɔ nëëdë 'ŋʋ. 'Nɩ ɔ yio 'kʋ 'bhlü.

³⁷ Ɔ lä ‑ɔ gä 'yunɔ 'bhisäkʋʋ' 'yu 'nägäsä klä 'naa 'ŋnöö 'mnö nä, ‑amʋ ‑lɔɔ' nyɩkpɔɔ klä lä 'nägäsä. 'Nɩ ‑ɔ gä'ä 'sɩɩ 'nägäsä klä nä, ‑amʋ ɔɔ' ‑wʋ 'nägäsä ‑klä ‑mä ‑ɔ ‑lobho'o lä nä, ɔmɔ ɔ klä lä 'nägäsä.

‑Ɔ 'nö‑anyɩ ‑zɔɔ nä ɔ ‑glö ‑anyɩa' lɔɔ
( Lukö 9.49‑50 )

³⁸ Ɔ cii‑ lä sɔɔ nä, Zään lä Cɩanyɔ‑, dä ‑a ‑mʋ lä nä, ‑a nii‑ nyɩkpɔ 'nɩ ɔ tlü bhä ‑zizinyenyi ‑naa 'ŋnöö 'mnö ‑mä sä ɔ ‑yä‑anyɩ 'sɔɔ nää ‑wʋ lä nä, ka ‑a 'täpʋnöɔ‑.

³⁹ Zozii lä a ‑tanöɔ 'yi ‑mä nyɩkpɔɔ' ‑lä 'naa 'ŋnöö 'mnö 'yiziziogbɩ nʋ 'nɩ ɔ 'kä bʋkʋ yi ‑yä ɔ 'kä 'naa nyenyi ci.

⁴⁰ ‑Ɔ 'nö‑anyɩ ‑wʋ lä ‑zɔɔ nä, ɔ ‑glö ‑anyɩa' lɔɔ.

⁴¹ Nyɩkpɔ ka'anyɩ Klisöö' 'ŋnöö 'mnö 'nyu ‑kɔbhä nyɛɛ‑ 'nɩ a kä mnää‑ nä, ‑nʋawlɛɛ', n sonö'anyɩ nynä ‑lɔɔ' nyɩkpɔɔ Laagɔ yio bɔɔ 'pä.

Aa' gbä ‑lä 'nɩ nyɩkpɔ 'kä nyenyii' bhlüü
( Matie 18.6‑11 ; Lukö 17.1‑2 )

⁴² 'Ɩzä kä nyɩkpɔ kä ‑gbä 'nɩ 'yua‑ ‑kä lä 'naa pɔlötɛtɛ nä waa' 'kʋʋ lɔɔ ‑bhlo kä nyenyii' ‑bhlüü nä, ‑lɔɔ nyɩkpɔɔ, ɩ ‑ŋwa bhä 'kʋ nynä ‑mä wa gʋänöɔ cɛkʋ 'kädʋ ‑blɩɩ' ‑yä wa pänöɔ jiee'.

⁴³ ‑Naa ‑klɔgbä kä gbä 'nɩ ‑n gä nyenyii' bhlüü nä, ‑n ‑döa 'kʋ! Sä ‑n 'gä ‑klɔgbö 'sɔ kää ‑yä ‑n ‑nyɩ 'sɔ 'kä ‑kosu‑düdëa ‑a ŋnä lä 'kɔɔkɔ nä, aa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑n kää sɔklë ‑yä ‑n 'gä 'pʋpʋɛ 'ni. [

⁴⁴ Nɔpɔɔ ‑ʋ lü lä ‑mɔɔ' nyɩkpaa nä, ʋʋ' ‑lä 'kɔɔn 'ku, 'nɩ ‑kosuu ‑ʋ sie lä ‑mɔɔ' nyɩkpaa nä, ʋʋ' ‑lä 'kɔɔn ŋomo.]

⁴⁵ ‑Naa ‑kokokpë kä gbä 'nɩ ‑n gä nyenyii' bhlüü nä, ‑n ‑döa 'kʋ! Sä ‑n 'gä ‑kokokpü 'sɔ kää ‑yä, ‑n ‑nyɩ 'sɔ 'kä ‑kosu‑düdëa ‑a ŋnä lä 'kɔɔkɔ nä, aa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑n kää bhoklë ‑yä ‑n 'gä 'pʋpʋɛ 'ni. [

⁴⁶ Nɔpɔɔ ‑ʋ lü lä ‑mɔɔ' nyɩkpaa nä, ʋʋ' ‑lä 'kɔɔn 'ku, 'nɩ ‑kosuu ‑ʋ sie lä ‑mɔɔ' nyɩkpaa nä, ʋʋ' ‑lä 'kɔɔn ŋomo.]

⁴⁷ ‑Naa 'yie kä gbä 'nɩ ‑n gä nyenyii' bhlüü nä, ‑n ‑sɛɛ ‑mɔɔ! Sä ‑n 'gä 'yi 'sɔ kää ‑yä ‑n ‑nyɩ 'sɔ 'kä ‑kosu‑düdëa ‑a ŋnä lä 'kɔɔkɔ nä, aa' ‑zëbhuu 'mnö bhlüü nä, ɩ ‑ŋwa 'kʋ nynä ‑mä ‑n kää 'yifä ‑yä ‑n 'gä 'pʋpʋɛ 'ni.

⁴⁸ Nɔpɔɔ ‑ʋ lü lä ‑mɔɔ' nyɩkpaa nä, ʋʋ' ‑lä 'kɔɔn 'ku, 'nɩ ‑kosuu ‑ʋ sie lä ‑mɔɔ' nyɩkpaa nä, ʋʋ' ‑lä 'kɔɔn ŋomo.

⁴⁹ Sä glü mɛmä lä lülülɩɩ nä, sɔɔ nyäkälɩɩ' ‑kosuu 'kä lä nyɩkpɔ nyɩkpɔɔ' zëkpëa mɛmä.

⁵⁰ Glü nä, ɩ ‑glö ‑lɛ 'nänʋ ‑mä ɩ kä yɩ nyɔnyɔɔ' ‑bhɩä nä, ‑ɔ yii bhä nyɔnyɔɔ' 'ŋʋʋ? Nä, a kʋ nynä glü! Ɩyä nyɩkpɔ nyɩkpɔ ‑yä ɔ lie 'sɔ kʋʋ 'kʋ 'kʋwɔtɔlɩɩ 'mnö!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan