Bìoball air-loidhne

Makö 16 - GOD - u2

Zozii ‑glɔɔ 'kuëë
( Matie 28.1‑8 ; Lukö 24.1‑8 ; Zään 20.1‑2 )

¹ Dä Sabaa‑gwlɛylʋʋ plöö‑ ylä nä, Mali Madlɛɛ ‑yä Zakö ɔ 'nɔ Malii ‑yä Salomee wa zɔɔ‑ ‑daŋwɩɩ ‑yä wa 'kä Zozii' ‑gɛzɛɛ düda ‑kää mʋ.

² 'Sɔlɩ 'kʋ zëplü 'pii, wa ‑bha 'kʋ 'nɩ wa yi lesi 'kʋ mʋ.

³ ‑Mä wa ‑kʋ lä mʋdä nä, wa 'ylä ylää bhɛ, wlä ‑mänɩ ‑ɔ yi‑anyɩ bhä lesi‑këfëa nëkʋʋ' cɛkʋʋ ‑lɔɔ ‑gä ‑sää?

⁴ Ɩ ‑kʋwa nëë' ‑bhlɛ, wa lä wa wloo nä, cɛkʋʋ, ‑ʋ plöö‑ bhlä cɛkʋ ‑gwlikeyee nä, ʋ 'bhisio‑ 'nɩ ʋ ‑bha lesi‑këfëa nëkʋ.

⁵ Wa ‑yi ylä nä, kwa sloo‑ lesie 'mnö. ‑Mä wa la wloo waa' lüüklä 'kʋ nä, nyëblu, ɔ ‑plä ‑bänö 'päpä 'nɩ ɔ ‑kʋ ‑lɔɔ sä. Wa nio‑ lä 'yi nä, kä plɛ ‑bhʋwa 'mnö.

⁶ ‑Mä ɔ ‑bhluwa‑ plɛɛ' 'nɩ ɔ ‑sonʋwa, ɔ lä ‑ŋänö 'nä 'bhlä'anyɩ ‑lä! Zozii, Nazalɛtöö' nyɩkpɔɔ, wa ‑bhoo bhlä 'kusuu 'yii nä, ɔmɔ a tään lä. Ɔɔ' ‑wʋ ‑mää ‑kʋ ‑mä ɔ yä 'kuëë glɔɔ. A wloo, dä wa puo‑ bhlä nä, lɔɔ‑ ‑kʋ lä ‑lää.

⁷ A mʋ ‑yä a soo ɔɔ' 'kʋgënyʋa ‑yä Pɩɛlö nynä ɔ ‑bɛnö'anyɩ ‑mɔɔ Galilee'. ‑Mɔɔ a 'kɔ lä 'nii. Sɔɔ ɔ ‑sonö'anyɩ bhlä.

⁸ ‑Mä 'ŋwnɩa guu‑ 'nɩ wa ‑bha lesi 'kʋ. Waa' ‑lʋa yëku tɩtɛ bhɛ nä, wa ‑yi lä nä, waa' ‑wʋ nyɩkpɔ ‑soo ‑mä kwa nënümä ‑ŋänöö' ‑za. [

Zozii ‑glɔɔ 'kuëë 'nɩ ɔ ‑ghlä nyɩkpa 'yii

⁹ 'Sɔlɩɛ 'kʋ zëplü 'pii, Zozii ‑glɔɔ lä 'kuëë nä, Mali Madlɛɛ 'mɔ ɔ ‑ghlä tɛɛ 'yii. Mali Madlɛɛ ‑glö bhä 'ŋnɔɔ' lɔɔ Zozii ‑sä bhlä ‑zizinyenyi ‑ngbɔɔsɔ kätää' nä.

¹⁰ Ɔ ‑mʋ 'nɩ ‑lʋa ‑wa ‑yä Zozii 'sɔ nää bhlä 'nɩ ɔɔ' wälɩɩ kamä bhlä yëkuu' 'nɩ ‑wa tu bhlä ‑lätee nä, ɔ yiwa 'dö fä.

¹¹ Ɔ ‑yi lä nä, ɔ lä n nii‑ Zozii ‑mä ɔ ‑yä 'kuëë glɔɔ. ‑Mä waa' ‑wʋ ɔɔ' ciciwälɩɩ nyaasäsä laa‑.

Zozii ‑ghlä ɔɔ' 'kʋgënyʋä 'sɔ 'yii

¹² ‑Nɩnɩ plöö‑ ylä nä, Zozii ‑jöjlä 'nɩ ɔ ‑ghlä bʋkʋ ɔɔ' 'kʋgënyʋä 'sɔɔ‑ mʋ bhlä ‑bhlüdë 'kʋ nä 'yii.

¹³ Wamä ‑mä 'nɩ wa yi 'ylɩbhɔ, 'nɩ wa yi ‑mɔɔ' ‑lʋa 'dö fä. ‑Mä ‑nɩnɩ 'fɩɩn nä, wa 'nɩɩ ‑wʋ 'sɩɩ nyaasäsä laa‑.

Zozii ‑ghlä ɔɔ' 'kʋgënyʋä 'kʋgbä ‑bhlo 'yii

¹⁴ Bhɩädää nä, ɔ ‑ghlä bʋkʋ ɔɔ' 'kʋgënyʋa 'kʋgbä ‑bhlo 'yii, wa lü bhä. Ɔ ‑ŋënʋwa lä ‑lɔɔ nä, sä waa' bhɔɔ lä ɔɔ' 'kuëë glɔɔlɩɩ' pɔlötɛtɛ ‑kä nä, kɔ ‑bhuwa ‑kɔkwɩ.

¹⁵ 'Nɩ ɔ yiwa soo, ɔ lä a mʋ 'ylʋzɔɔ' dää 'fɩɩn ‑yä a ‑sää Laagɔɔ' 'Nägädöö nyɩkpaa 'fɩɩn.

¹⁶ Nyɩkpɔɔ' lɔɔ ‑ɔ gä 'Nägädöö' pɔlötɛtɛ ‑kä nä, 'nɩ ‑ɔ gä 'ɩza 'nyu 'wlu ŋʋʋ‑ nä, ɔ yi ‑lɔɔ nëë' ‑bha. ‑Mä ‑ɔnö ɩɩ' pɔlötɛtɛ ‑kä nä, Laagɔ yio gbäylö ‑sä.

¹⁷ A ni 'yiziziogbɩɩ ‑ɩyä pɔlötɛtɛɛ' käänyʋa 'sɔ 'kä lä nää nä. 'Naa 'ŋnöö 'mnö, wa yi ‑zizinyenyi 'tlü, wa yi nuwälɩ ‑leli ci.

¹⁸ Wa yi ‑leebeli wlɩɩ' ‑klää 'nɩ ɩ 'nʋwa ‑lä lʋʋ nʋ. Wa yi 'pɔyɩzɩ 'mnä 'nɩ ɛ 'nʋwa ‑lä 'bhlä. Wa yi gupanyʋa ‑klɔgbö 'kʋ gbɛɛ 'nɩ wa yi yamä.

Zozii ‑gblää ‑Laagɔɔ'

¹⁹ Kwlienyɔ Zozii ‑bhɩä lä ɔɔ' 'kʋgënyʋa soolɩ nä, kɔ gblää‑ Laagɔduu' 'nɩ ɔ yi Laagɔɔ' lüüklä 'kʋ sä kʋ.

²⁰ 'Nɩ ɔɔ' 'kʋgënyʋa ‑mä, wa yi Laagɔɔ' 'Nägädönö dää 'fɩɩn bie ‑kää mʋ. ‑Mä Kwlienyɔ klänʋwa bhä lebhee 'fɩɩn 'mnö, 'nɩ 'yiziziogbɩ nʋɔ bhä 'nɩ ɩ pana bhä 'Nägädöö' nyaasäsä.]

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan