Bìoball air-loidhne

Makö 13 - GOD - u2

Zozii lä Laagɔ‑bhutu 'kädʋʋ yi wlɔɔ
( Matie 24.1‑3 ; Lukö 21.5‑7 )

¹ Zozii ‑kʋ bhlä Laagɔ‑bhutu 'kädʋʋ 'mnö ‑bha dä nä, ɔɔ' 'kʋgënyɔ ‑bhlo cii‑, ɔ lä yeeke! ‑Amʋ ‑naa cɛkwɩ‑bhutu‑! Wloo Cɩanyɔ‑, ‑bhutu 'kädʋ‑ wa slää‑ lä ‑ɛɛn!

² 'Nɩ Zozii yio soo, ɔ lä ‑bhutuu ‑n wloo lä ‑lää nä, ‑bhutu 'kädʋnʋ, ylɩɩ yi ŋëë 'nɩ wa yiu wlä 'nɩ ‑gɔgbää' ‑lä ‑gɔgbä 'kʋ too.

Zozii ‑soo ɔɔ' 'kʋgënyʋa nynä wa gblɩmä
( Matie 24.4‑8 ; Lukö 21.8‑11 )

³ 'Nɩ Zozii yi Laagɔ‑bhutu 'kädʋʋ yëkuu' Olivie‑kükëa 'wlu mʋ. Ɔ ‑kʋ bhä ‑mɔɔ sä ɔ ‑yä Pɩɛlö ‑yä Zakö ‑yä Zään ‑yä Adlee 'sɔ 'nɩ wa yio 'ylä, wlä

⁴ Cɩanyɔ‑, 'tänyɩ ‑sa 'mnö wälɩyɩ 'kä bhä 'kʋ 'plöö? Panalɩ ‑sä yi bhä gbä 'nɩ ‑a yi bhä ‑lɔɔ' 'tänyɩɛ yibhëë?

⁵ Zozii lä a kä ‑nʋ nä, a luë! Nyɩkpɔɔ' 'nyigënö'anyɩ ‑lä.

⁶ Bhutukpä yi yi, 'nɩ wa yi 'naa 'ŋnöö bhɛɛ. 'Nɩ nyɩkpɔ nyɩkpɔ yi ci nynä ‑mä ɔmɔɔ‑ plöö‑ Klisöɔ! 'Nɩ wa yi nyɩkpa ‑bhutukpä 'nyigë.

⁷ A yi tʋʋ' wälɩ 'nu 'nɩ a yi 'sɩɩ ʋʋ' kplü 'nu, ‑mä plɛɛ' belio'anyɩ ‑lä 'mʋ. Ɩ ‑ŋwa 'kʋ nynä ‑mä ‑nɩnɩ 'fɩɩn ŋëë! ‑Mä zëkpëaa' bhɩä‑tänyɩɛɛ' ‑lätee ŋëë‑.

⁸ 'Bhlɩ yi 'kʋ ‑bha 'nɩ ɛ yi ɛ lübhlɩ tʋ fä. 'Nɩ 'leyidu yi 'kʋ ‑bha 'nɩ ʋ yi ʋ lü‑leyidu tʋ fä. 'Ylʋzɔɔ' dö ‑bhutukpä, ‑dʋdʋ yi tɩtɛ, 'nɩ ‑gbugbe yi yi. ‑Mä 'kwlɩkaabhɩänä 'fɩɩn nä, ka ‑kʋ lä nynä gbadöŋnɔ kä cii ɔ 'kä gään nä ɩɩ' nyäkälɩɩ ɔ ni lä nä.

⁹ ‑Mä anyɩ kä n sonö'anyɩ yɩ nynä ‑mä a gblɩmä. Nyɩkpa yi'anyɩ tʋ kuu, wa yi'anyɩ ‑mɔɔ Laagɔ‑bhitii 'mnö klää, 'nɩ wa yi'anyɩ bhütë. Wa yi'anyɩ 'sɩɩ ‑gɔmnänyʋä ‑yä 'loyuë 'sɔ dëlü tʋ kuu 'naa 'ŋnöö ‑za. 'Nɩ a yi ‑mɔɔ 'naa ‑dläfʋɛ lüü.

¹⁰ ‑Mä ɩ ‑ŋwa 'kʋ nynä Laagɔɔ' 'Nägädöö ‑sänöɔ 'fɩa 'bhlɩɩ 'fɩɩn 'mnö.

¹¹ Wa ka'anyɩ tʋ ‑kuu nä, plɛɛ' belio'anyɩ ‑lä 'mʋ sa 'kä lä ci nää' ‑za. Wa ka'anyɩ ylää‑ nä, wälɩklëa ga'anyɩ lä 'kpobhuu ‑bhlo 'kʋ pleyi ‑bhlüü nä, a cia ‑mä Kplɔɔkplɔɔ‑wugɔɔ 'mʋʋ‑ ŋʋ'anyɩma lä nëë'.

¹² Bheli yi ɔ bheli pëë nynä wa 'bhlɔ. 'Bä yi ɔɔ' 'yu ‑sä nynä wa 'bhlɔ. 'Nɩ 'yuë yi wa 'bäsɩ ‑yä wa 'nɔsɩ 'kwie 'yii fään.

¹³ 'Nɩ nyɩkpaa 'fɩɩn yi'anyɩ zɔbhlɛmä 'naa ‑za. ‑Mä anyɩa' nëëdëë lɔɔ ‑ɔ gä plɛkʋ 'tɛmä ‑aaa 'nɩ bhɩäylʋʋ kä ‑ŋëë nä, ɔ yi ‑lɔɔ nëë' ‑bha.

Zozii lä bhɩädää' 'kwlɩkabhɩä yi yi
( Matie 24.15‑22 ; Lukö 21.20‑24 )

¹⁴ ‑Lɔɔ ‑ɔ plöö‑ lä ‑Diizienyɔɔ 'nɩ ‑ɔ bhusuë lä Laagɔ yëku nä, 'tänyɩ yi ‑lɔɔ kʋ 'nɩ a yio yi 'ni. Dä ɔɔ' ‑lä bhlä kʋ nä, ‑lɔɔ a 'kɔ 'nii. Nä ‑ɔ gä 'bɔɔgʋnʋ zɛɛ nä, ɔ 'nu yɩ 'nägäsä ɔɔ' zɛɛlɩɩ 'mʋ. A kä yɩ wälɩnɩ 'fɩɩn 'yi 'ni nä, ‑wa gä bhɛ Zudee‑bhlɩɛ 'mnö ‑kʋ nä, wa ‑guu ‑yä wa zizio 'küküü nëëdë.

¹⁵ ‑Ɔ gä bhɛ ɔɔ' ‑bhutu ‑gwlɛɛdä sä ‑kʋ nä, ɔɔ' plä ‑läyɩ ‑bhutuu' nynä ɔ 'kä lʋʋ 'kʋ 'bhlü.

¹⁶ ‑Ɔ gä bhɛ 'klää lebhenʋdä ‑kʋ 'nɩ ‑ɔ gä bhɛ 'kotuu' ‑sä nä, ɔɔ' 'ylɩbhɔ ‑läyɩ nynä ɔ 'kʋʋ 'kʋ 'bhlü.

¹⁷ Gbadöŋwnɩa ‑yä 'ŋwnɩaa‑ 'gä lä 'yüë nyɩa ‑lɔɔ' 'tänyɩyɩ 'mnö nä, wa yä mie!

¹⁸ Nä, a bhibhie Laagɔ ‑yä ‑nɩnɩ 'fɩɩn nä, ɩɩ' kä ‑kä 'nyugozo‑wätlɩɩ' 'tänyɩɛ 'mnö ŋënö.

¹⁹ ‑Lɔɔ' nyäkälɩɩ nyɩkpaa 'kä lä 'mʋ blüë nä, ɩ yi zumë kpänyɩ 'nɩ ɩ yi nyäkälɩɩ 'fɩɩn 'kʋ zi. 'Kɔɔn 'nö bhlä 'wlʋ nä, sɔɔ' nyäkälɩɩ' ‑läzä nio‑, 'nɩ ɩɩ' ‑lä 'sɩɩ 'kɔɔn nio‑.

²⁰ Kwlienyɔ Laagɔ 'nö bhä ɩɩ' ylɩɩ 'kʋ ‑tëtëë nä, nyɩkpɔɔ' ‑lä bhɔɔ 'pʋ. Nyɩkpaa 'fɩɩn Laagɔ laa‑ lä nä, waa' ‑za ʋ ‑tëtëë lä ‑lɔɔ' ylɩɩ 'kʋ.

²¹ Naa, nyɩkpɔ ka'anyɩ soo nynä ‑mä, a ni Klisöɔ 'mɔɔ‑ ‑kʋ lä ‑mää nä! ‑Ɔ! A ni ɔmɔɔ‑ ‑kʋ lä ‑mɔyɩ nä, ‑lɔɔ' nyɩkpɔɔ aa' laa ‑lä ɔɔ' ciciwälɩɩ ‑nʋawlɛ.

²² ‑Kpläkplönyʋä yi yi 'nɩ wa yi ‑kä wa yëku Klisö laa, 'nɩ ‑kpläkplö 'plɔfɛtɩnyʋä yi ‑kä 'sɩɩ 'wlʋ. Wa yi 'yiziziogbɩ ‑yä ‑daminë 'sɔ nʋ ‑yä, wa kä mii nä, nyɩkpaa 'fɩɩn Laagɔ laa‑ lä nä, wa 'kwa 'nyigë.

²³ Nä anyɩ, kä n ‑gblɩmänö'anyɩ lä ‑bhlɛ. A luë ‑kä!

Nyɩkpɔɔ ‑Yowlii' yi‑tänyɩ
( Matie 24.29‑31 ; Lukö 21.25‑28 )

²⁴ ‑Mä, ‑lɔɔ' nyäkälɩɩ' 'tänyɩɛ kä yɩ plöö‑ nä, 'ylʋkwädla yi kpëmä, 'nɩ 'cʋʋ sʋ lie bhlä nä, ʋʋ' ‑läyɩ sɔɔ lie.

²⁵ ‑Laagɔzälö yi ŋɔkʋ ‑bha 'nɩ ɩ yi bhlü, 'nɩ ŋɔkʋʋ' 'tɛtɩɩ ‑ɩ ‑kä bhlä ‑lɩɩ 'fɩɩn sä nä, ɩ yi gbʋgbɔnöɔ.

²⁶ ‑Lɔɔ a 'kä ylä Nyɩkpɔɔ ‑Yowli 'yi 'ni ‑yä ɔ 'kä 'nyukpɔɔ 'klʋ yii, ɔ ‑yä 'päwö 'kädä ‑yä 'klʋagba 'sɔ.

²⁷ Ɔ kä ‑yi nä, ‑Laagɔzizi ɔ yii zëkpëaa' kwëtüü ‑mɔɔnä 'mnö lobho, 'nɩ nyɩkpaa Laagɔ ‑sä lä 'nɩ ‑wa ‑kʋ lä 'ylʋzɔɔ' dää 'fɩɩn nä, ɩ yiwa däbhlo 'wlu 'wlää.

'Figesuu' panalɩɩ

²⁸ Wälɩklëa 'figesuu nʋnʋgbɩɩ pana lä nä, a 'nua 'mʋ ‑nä! A kä yɩ 'figesu 'yi 'ni 'nɩ ʋʋ' 'läbhɩɩ kä dögbɔlʋgbɔ nʋ nä, a ‑yi sɔɔ nynä ‑mä ‑kɔkɔylʋ yä 'mɛmɛ.

²⁹ Nä, a kä ‑nɩnɩ 'yi 'ni 'nɩ ɩ kä ylä 'kʋ 'plö nä, a yibhë 'sɩɩ sɔɔ nynä ‑mä Nyɩkpɔɔ ‑Yowlii' yi‑tänyɩɛ yä 'mɛmɛ. ‑Ɔ ‑kʋ yɩ kpëkpë 'kʋ.

³⁰ N sonö'anyɩ ‑nʋawlɛɛ 'mnö nynä ‑mä 'bhlɛsʋnʋʋ' ‑lä 'plö 'nɩ wälɩɩ 'fɩɩn n ci lä nä, ɩ yi glää.

³¹ Laagɔ ‑yä ‑dʋdʋ 'sɔ yi 'plö, ‑mä 'naa ciciwälɩɩ' ‑lä 'kɔɔn 'plö.

Bhɩändää' 'gliyee nyɩkpɔ 'nɩɛ ‑wʋ ‑yi
( Matie 24.42 ; 25.13‑15 ; Lukö 12.36‑38 ; 19.12‑13 )

³² ‑Ɔ plöö‑ lä ylʋʋ ‑yä 'gliyee 'sɔ nä, nyɩkpɔ 'nɩɩ ‑wʋ ‑yi. ‑Laagɔzizii ‑mä 'sɩɩ ɩ 'nɩɩ ‑wʋ ‑yi. 'Nɩ Laagɔ ‑Yowli 'titi ‑mä 'sɩɩ, ɔ 'nɩɩ ‑wʋ ‑yi 'nɩ ‑ɔnö 'Bäɔ ‑bhlo.

³³ Nä, aa' ‑wʋ lä ‑lɔɔ' 'tänyɩɛ ‑yi nä, aa' ŋɔɔ ‑lä ‑mä, a gblɩmä.

³⁴ Kɩ ‑kʋ lä nynä ‑n ‑näsä gbü‑käänyɔɔ mʋ lä lowluu 'nɩ ɔ të lä ɔɔ' 'gbëa ɔɔ' ‑gänʋnyʋä yëku nä. ‑Mä ɔ 'kä lä mʋ nä, ɔ nyɛɛ‑ nyɩkpɔ nyɩkpɔɔ' lebhe. Ɔ ‑soo 'sɩɩ gbüglënëa' 'klʋbɛnyɔɔ nynä ɔ dɩdɛɛ 'gbëa 'kʋ ‑mä ɔɔ' ŋɔɔ ‑lä.

³⁵ Nä anyɩ ‑mä 'sɩɩ, a gblɩmä ‑mä, ylʋʋ 'kʋ käänyɔɔ 'kä la yi nä, a 'nʋʋ ‑wʋ ‑yi! ‑A! ‑Kugbësä ɔ yi yɩ ‑o! Dodoogää' ɔ yi yɩ ‑o! Zözädä ɔ yi yɩ ‑o! Zëplü ɔ yi yɩ ‑o! Aa' ‑wʋ ‑yi.

³⁶ Kɔ kä 'kʋ vüta 'nɩ ɔ kä ‑yi nä, ɔɔ' ka'anyɩ ‑kä ŋɔɔdä ŋëë.

³⁷ Wälɩɩ n sonö'anyɩ lä ‑lää nä, nyɩkpaa 'fɩɩn n sonɩ lä nynä ‑mä wa gblɩmä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan