Bìoball air-loidhne

Makö 10 - GOD - u2

Nyɩkpɔɔ' cɛɛ lä ɔ 'ŋnɔ
( Matie 19.1‑9 ; Lukö 16.18 )

¹ Zozii ‑bha lä ‑lɔɔ nä, kɔ ‑mʋ Zudee‑bhlɩɛ 'mnö. ‑Mɔɔ Zludɛɛ‑nyie klë, ɔ ‑kʋ ‑mɔɔ 'nɩ nyɩkpaa' ‑lɛ bhutukpä ‑yi 'nɩ wa yio bʋkʋ yëku 'wlu 'wlää. Ɔmɔ ‑mä ɔɔ' 'bhlɛ bhɛ lä nä, 'nɩ ɔ yiwa cɩalɩ 'kʋ cie.

² ‑Mä Falizɩɛnyʋä ‑yi 'nɩ wa tään bhä nynä wa 'kɔ ‑zɔɔ ‑sä. 'Nɩ wa yio 'ylä, wlä Cɩanyɔ‑, nyɩkpɔ yi bhä mii 'nɩ ɔ yi bhä ɔ 'ŋnɔ cɛɛ ‑a?

³ 'Nɩ Zozii yiwa 'ylä, ɔ lä säsä Moyizöö' ‑Jlämaa ci bhää?

⁴ Wlä Moyizöö' ‑Jlämaa lä nyɩkpɔ kä cii‑ ɔ 'kä ɔ 'ŋnɔ cɛɛ nä, ɔ gbɩɔ 'bɔɔgʋ 'kʋ nynä ɔɔ' 'ylɔɔ yɩɔ.

⁵ Zozii lä anyɩa' 'nyukwli 'tɛnɔɔ' ‑zä Moyizö ‑jɩjlä lä wälɩklë 'yɩ.

⁶ Kä Laagɔ‑bɔɔgʋʋ ci lä nynä ‑mä ‑bhɔɔdää nä, Laagɔ ‑nʋ ŋwadi 'nɩ ʋ ‑nʋ 'ŋnɔ.

⁷ Ɩ ‑kä 'ŋnö nä, ŋwadi yi ɔ 'bä ‑yä ɔ 'nɔ 'sɔ yëku ‑bha 'nɩ ɔ ‑yä ɔ 'ŋnɔ 'sɔ yi 'jɛnyɩ

⁸ 'nɩ wa yi 'yɛkɛ ‑bhlo 'plö. Waa' ‑läyɩɔ 'sɔ ‑bhlü, ‑mä ‑bhlo wa plöö‑ yɩ.

⁹ Nä, Laagɔ kä yɩ 'lʋʋ 'jɛnyɩ‑ nä, nyɩkpɔɔ' yi ‑lä 'nɩ ɔ 'kʋ yɩ ‑säsä!

¹⁰ Zozii ‑yä ɔɔ' 'kʋgënyʋa 'sɔ ‑mʋ lä gbëë' nä, 'nɩ wälɩklëa Falizɩɛnyʋa ylɔɔ‑ bhlä 'kʋ nä, aa ‑säkä ‑säkä, wa yionya 'kʋ 'ylä.

¹¹ 'Nɩ ɔ yiwa soo, ɔ lä nyɩkpɔ kä ɔ 'ŋnɔ cɛɛ‑ 'nɩ ɔ kä 'yigädalɔɔ nöö‑ nä, n sonö'anyɩ nynä ‑mä ‑lɔɔ' nyɩkpɔɔ yä 'ŋnɔ 'ylä.

¹² 'Ɩzä 'ŋnɔɔ 'mɔɔ‑ gä ɔ ‑nyoto yëku ‑bha 'nɩ ‑ɔ gä 'yigädawli nöö‑ nä, ‑lɔɔ 'ŋnɔɔ yä 'wlie 'ylä.

Zozii lä wa ‑taa 'yua 'yi ‑yä wa yinöɔ
( Matie 19.13‑15 ; Lukö 18.15‑17 )

¹³ 'Tänyɩ ‑kʋ ‑lɔɔ 'nɩ nyɩkpa ‑lä 'yuë Zozii yëku nynä ɔ 'kwa 'taa. ‑Mä ɔɔ' 'kʋgënyʋa fä bhä nyɩkpaa nëkʋ.

¹⁴ Ɔ nii‑ lä wälɩɩ 'yi nä, ɩ 'nöɔ ‑wʋ 'tʋ ‑kamä. 'Nɩ ɔ yiwa soo, ɔ lä a ‑taa 'yuëlɩa 'yi ‑yä wa yinö'ö ‑mä aa' 'tluwa ‑lä. Laagɔɔ' 'Leyiduu nä, nyɩkpaa‑ ‑kʋ lä nynä 'yuëlɩä nä, waa' lʋʋ lä.

¹⁵ ‑Nʋawlɛɛ, n sonö'anyɩ nynä ‑mä nyɩkpɔ 'nö Laagɔɔ' 'Leyiduu' yëkuu' wälɩɩ klä nynä 'yulɛɛ nä, ɔɔ' ‑lä 'kɔɔn mii 'nɩ ɔ 'kä ‑mɔɔ plä.

¹⁶ 'Nɩ Zozii yi 'yua 'kʋ 'bhlü, 'nɩ ɔ yiwa ‑klɔgbö 'wlu gbɛɛ, 'nɩ ɔ yiwa 'nyu 'pä.

Lɛkäänyɔ ‑yi Zozii 'ylä kää
( Matie 19.16‑30 ; Lukö 18.18‑30 )

¹⁷ Ɔ 'kä bhɛ lä mʋ nä, nyɩkpɔ ‑bhlo ‑yi 'nɩ ɔ yio ‑kokoowli dëlü glu 'pä, 'nɩ ɔ yio 'ylä, ɔ lä Cɩanyɔ‑, ‑n ‑glö cɩanyɔɔ' 'nägälɔɔ nä, ‑n sonö'ö ‑wʋ saa, 'pʋpʋɛɛ‑ ‑kʋ lä 'kɔɔkɔɔ ‑za nä, säsä n kä bhä ‑nʋ 'nɩ n yie bhä 'nii?

¹⁸ Zozii lä sɩ ‑kʋ bhä 'nɩ ‑n ci bhä nynä ‑mä kä n nää‑? Nyɩkpɔɔ' ‑wʋ 'ylʋnʋ ‑zɔɔ ‑kʋ 'nɩ ɔ 'kä nää 'nɩ ‑ɔ 'nö Laagɔ ‑bhlo.

¹⁹ 'Nɩ ‑n ‑yi ylä Laagɔɔ' ‑Jlämaa! Ka ci lä nynä ‑mä, ‑naa 'bhlä ‑lä ‑n ‑lie, ‑naa 'ylä ‑lä ‑n ‑liee' 'wli ɩyä ‑naa 'ylä ‑lä ‑n ‑liee' 'ŋnɔ, ‑naa ghlü ‑lä, ‑naa lü ‑lä ‑kpläkplö ‑dläfʋɛ, ‑naa nʋ lä ‑n lie nyenyi, ‑n 'ŋʋ ‑n 'bä ‑yä ‑n ‑nɔɔ 'klʋkpää!

²⁰ 'Nɩ nyɩkpɔɔ yi Zozii soo, ɔ lä Cɩanyɔ‑, 'bhää 'naa nyëbliduu' ‑aaa ‑yä ŋëë yɩ ‑zɩkä nä, kä n ŋʋʋ‑ ‑Jlämaa 'klʋkpää' 'nɩ n ‑glänöa 'klʋ.

²¹ ‑Mä Zozii ‑wloo nyɩkpɔɔ, 'nɩ ɔɔ' wälɩɩ ‑kamänöɔ 'tʋ. 'Nɩ ɔ yio soo, ɔ lä wälɩklë ‑bhlo ‑too ‑mɔɔ nä, amä ‑nn ‑lätee lä ‑nʋ. ‑N mʋ ‑yä ‑n 'ŋʋ ‑naa kääkäälɩɩ 'fɩɩn 'kpä ‑yä ‑n dëë ɩɩ' moniee ŋäzönyʋä, ‑mä ‑mɔɔ Laagɔduu' nä, ‑n yi ‑mɔɔ leylü kään. Ɩyä ‑n yi ‑yä ‑n gë'ë 'kʋ!

²² ‑Mä nyɩkpɔɔ nuu‑ lä wälɩɩ nä, ɔ ‑glö bhlä lɛkäänyɔ 'kädɔ nä, kä wälɩɩ ‑kamänöɔ kpänyɩ yëkuu'. Nä, ɔ ‑kʋ bhɛ ‑cʋʋn 'nɩ ɔ yi mʋ.

Laagɔɔ' 'Leyiduu 'mnö plädä kä ‑lɔɔ 'tɛ

²³ 'Nɩ Zozii yi ɔɔ' 'kʋgënyʋa ‑wa ‑glänöɔ bhlä 'klʋ nä ‑wloo, 'nɩ ɔ yiwa soo, ɔ lä 'wee! Lɛkäänyɔ 'kä Laagɔɔ' 'Leyiduu 'mnö plä nä, ɩ yi 'tɛmä ‑ɛɛn!

²⁴ Ɔ cii‑ lä sɔɔ nä, ɩ beliwa bhɛ plɛɛ'. 'Nɩ ɔ yiwa bʋkʋ soo, ɔ lä 'naa 'yuënyɩ‑, n sonö'anyɩ nynä ‑mä Laagɔɔ' 'Leyiduu 'mnö pläda nä, kä ‑lɔɔ 'tɛ!

²⁵ Lɛkäänyɔ 'kä Laagɔɔ' 'Leyiduu 'mnö plä nä, ɩ 'tɛ 'nɩ ɩ ‑zi sä mnɛgwli 'kä kwɛɛ' këfë nëë' blüë nä 'kʋ.

²⁶ ‑Mä ɔɔ' 'kʋgënyʋa wälɩɩ ‑slʋwa bhɛ lä nükpëë' nä, wa ylä bhä wa yëku, wlä 'aaa! Nä, ɩ kä yɩ sää ‑kʋ nä, nyɩkpɔ ‑sä yi bhä ‑lɔɔ nëë' ‑bhaa?

²⁷ 'Nɩ Zozii yiwa wloo, 'nɩ yi ci, ɔ lä lʋʋ lʋʋ' nyɩkpɔɔ' ‑lä lä mii nä, kä Laagɔ miinʋ. Laagɔ nä, kʋ mii ‑lɩɩ 'fɩɩn.

²⁸ 'Nɩ Pɩɛlö yio soo, ɔ lä Cɩanyɔ‑, 'nɩ ‑anyɩ! Ka ‑bha ‑anyɩa ‑lɩɩ 'fɩɩn gbʋʋ' 'nɩ ‑a yi‑i lä 'kʋ 'gë.

²⁹ Zozii lä ‑nʋawlɛɛ 'mnö n sonö'anyɩ nynä ‑mä 'naa ‑za, ɩyä Laagɔɔ' 'Nägädöö' ‑za, nyɩkpɔ kä ɔɔ' 'gbë yëku ‑bha nä, ɔ yi ɔ bhelie yëku ‑bha ‑o, ɔ yi ɔ bhɛŋwnɩä yëku ‑bha ‑o, ɔ yi ɔ 'nɔ yëku ‑bha ‑o, ɔ yi ɔ 'bä yëku ‑bha ‑o, ɔ yi ɔɔ' 'yuë yëku ‑bha ‑o, ɔ yi ɔɔ' 'kälö yëku ‑bha ‑o,

³⁰ ‑lɩɩ 'fɩɩn ɔ ‑bha lä yëku nä, 'tänyɩɛ 'mnö ɔ ‑kʋ lä ‑lätee ‑mää zëkpë 'kʋ nä, ɔ yi ɩɩ' 'ci gwlɩ ‑ngbü 'ni. Ɔ yi ‑bhiti 'ni, ɔ yi bhelie 'ni, ɔ yi bhɛŋwnɩä 'ni, ɔ yi 'nɔsɩ 'ni, ɔ yi 'yuë 'ni, ɔ yi 'kälö 'ni, 'nɩ ɔ yi 'sɩɩ ‑zɔɔpälɩ 'ni. 'Fɩa 'nɩ ‑zee, ‑lɔɔ' nyɩkpɔɔ yi 'kɔɔkɔɔ' ‑za 'pʋpʋɛ 'ni.

³¹ ‑Wa ‑kʋ lä ‑pɛpɛɛ 'yikʋ nä waa' bhutukpä yi klë 'plöö, 'nɩ ‑wa ‑kʋ lä klë nä, waa' bhutukpä yi 'yikʋ 'plöö.

Zozii ci ɔɔ' 'kwiee ‑yä ɔɔ' 'kuëë glɔɔlɩɩ' wälɩ
( Matie 20.17‑19 ; Lukö 18.31‑34 )

³² Zozii ‑yä ɔɔ' 'kʋgënyʋa ‑kʋ Zolizalɛmʋduu' mʋdä 'nɩ ɔ ‑gään 'yikʋ 'nɩ wa güo‑ bhä 'kʋ. ‑Mä plɛɛ beliwa bhä 'mʋ 'nɩ ‑ŋänö bhlʋwa bhä. ‑Mä Zozii 'wlää‑ wamä 'kʋgbä 'sɔ 'wlu, 'nɩ wälɩɩ‑ 'gɔ bhlä ŋëë nä, ɔ yiwanyɩ soo.

³³ Ɔ lä a ni, ‑a gä Zolizalɛmʋduu' ‑mʋ nä, Nyɩkpɔɔ ‑Yowli, wa yio 'Cibhisänyʋaa' 'cifinyʋa ‑yä ‑Jlämöcɩanyʋa wlɩɩ' pënö. Wa yio ‑sä ‑yä wa 'kɔ 'bhlä 'nɩ wa yio lowie wlɩɩ' pënö.

³⁴ Wa yio nyɩä, wa yio ‑dlɛɛ 'klʋ ŋwna, wa yio ‑gblɩyee' bhütë, 'nɩ wa yio 'bhlä 'nɩ ɔ yi 'ku. ‑Mä ɔ kä kuu‑ nä, taanaylʋʋ 'kʋ, ɔ yi 'kuëë glɔɔ.

Zebedee ‑yowlie 'ylää Zozii wälɩklë
( Matie 20.20‑28 )

³⁵ 'Tänyɩɛ 'mnö wa ‑kʋ ylä mʋdä nä, Zebedee ‑yowlie, Zakö ‑yä Zään 'sɔ, wa ‑yi Zozii yëku 'nɩ wa yio soo, wlä Cɩanyɔ‑, wälɩklë ‑bhlo ‑a 'gä‑ä lä 'ylää nynä ‑n nʋ‑anyɩ ‑gä.

³⁶ Ɔ lä aa 'ŋnö bhää?

³⁷ Wlä 'tänyɩ ‑n 'gä lä ‑naa 'klʋagba 'mnö plä nä, ‑n gbä ‑yä ‑anyɩ 'sɔ 'tlonö‑ö yëku. ‑Bhlo kʋ ‑naa lüüklä 'kʋ ‑yä ‑bhlo kʋ ‑naa mëëcë 'kʋ!

³⁸ Ɔ lä wälɩklëa a ylä lä nä, aa ‑wʋ aa gbaa ‑yi. Nyäkälɩɩ' 'pliie n 'kä lä 'mʋ 'mnää nä, a yi mii 'nɩ a yie bhä 'mʋ mnää ‑a? A yi bhä mii‑ 'nɩ a yi ŋoo nynä 'kwlɩkabhɩa ‑a gä'ä lä 'wlu 'gbi nä, a 'gbi'anyɩ 'wlu ‑a?

³⁹ Wlä ‑ɛɛɛ, ‑a yi mii. Ɔ lä 'zaazɩ, nyäkälɩ 'pliie n 'kä lä 'mʋ 'mnää nä, a yie 'mʋ 'mnää, 'nɩ 'kwlɩkabhɩa‑ gä'ä lä 'wlu 'gbi nä, a yi'anyɩ 'wlu 'gbi.

⁴⁰ ‑Mä ‑ɔ plöö‑ lä nynä ‑nɔnɔ 'kä 'naa lüüklä 'kʋ kʋ ‑yä ‑nɔnɔ 'kä 'naa mëëcë 'kʋ kʋ nä, ‑amʋʋ‑ ‑sä ‑wʋ ‑lɔɔ' nyɩkpaa, ‑mä Laagɔ 'titii‑ sʋwa lä.

Anyɩa pää' ‑lɛ 'kädɔ ɔ 'plö anyɩa ‑gänʋnyɔ

⁴¹ ‑Mä ‑mɔɔ' 'kʋgënyʋa 'kʋgbä nuu‑ lä sä Zakö ‑yä Zään 'sɔ 'ylää‑ lä Zozii nä, wa 'nɩɩ ‑wʋ ‑wamä.

⁴² 'Nɩ ɔ yiwa laa, 'nɩ ɔ yiwa soo, ɔ lä nyɩkpaa' ‑lʋa wa wloo lä nynä 'bhlɩɩ 'kämänyʋa nä, kwa 'kämä wa ‑liesɩ ‑n ‑näsä wamää‑ ‑kʋwa lä nä. 'Nɩ nyɩkpa 'kädʋa 'mnää 'sɩɩ kpänyɩ wa ‑liesɩ 'wluu. 'Nɩ ‑nɩnɩ 'fɩɩn, a ‑yii.

⁴³ ‑Mä anyɩ nëëdë nä, ɩɩ' kʋ ‑lä sɔɔ! Anyɩa' lɔɔ‑ gä ‑waa nynä ‑mä ɔ yi ‑lɛ 'kädɔ 'plö nä, ɔ 'plö anyɩa' ‑gänʋnyɔ.

⁴⁴ Anyɩa' nëëdëë' nyɩkpɔ kä ‑waa nynä ‑mä ɔ yi 'yikʋ kʋ nä, ɩ ‑ŋwa 'kʋ nynä ‑mä ɔ nʋ'anyɩ ‑gä anyɩ 'fɩɩn nynä anyɩa' geyu.

⁴⁵ Nyɩkpɔɔ ‑Yowlii' nä, ɔɔ' ‑wʋ ‑yi ‑yä wa 'kɔ ‑gä nʋ, ‑mä kɔ ‑yi ‑yä ɔ 'kä nyɩkpa ‑gä nʋ, ɩyä ɔ 'kä ɔɔ yëkuu' zëkpë 'nyɛ ‑yä ɔɔ' 'kwiee 'kä nyɩkpa ‑bhutukpä 'mʋ 'kplɩ.

Zozii ‑yamä 'yikpüü' kʋnyɔ Batimee
( Matie 20.29‑34 ; Lukö 18.35‑43 )

⁴⁶ 'Nɩ Zozii ‑yä ɔɔ' 'kʋgënyʋa 'sɔ yi Zelikoo‑duu' ŋëë. Nä, wa ‑kʋ bhɛ lä 'duu 'mnö ‑bha dä nä, nyɩkpa ‑bhutukpä güwa‑ bhä 'kʋ. ‑Mä Nyɩkpɔ ‑bhlo ‑kʋ a ‑mɔɔ 'nɩ wa lɔɔ bhä Batimee, ɔ ‑glö bhä Timee ‑yowli. Batimee' 'ni bhɔɔ sä ‑mä ‑blɔgbäkö ɔ ‑kʋ 'nɩ ɔ zla bhä 'plöplönyʋä.

⁴⁷ Ɔ nuu‑ lä nynä ‑mä Nazalɛtöö' Zozii 'mɔɔ‑ plö nä, kɔ cie‑ woolɩ 'kʋ, ɔ lä ‑a tötɔ Davidö ‑Yowli Zozii‑, bheeje, ‑n yibhënö'ö ŋäzö!

⁴⁸ Nyɩkpa ‑bhutukpä fɔɔ bhä nëkʋ ‑yä ɔ 'kä ‑plɩɩ kʋ, ‑mä ɔɔ' 'mänyɩnʋwa‑ bhɔɔ 'nɩ ɔ woo bhä bʋkʋ kpänyɩ nynä bheeje, ‑a tötɔ Davidö ‑Yowli‑, ‑n yibhënö'ö ŋäzö!

⁴⁹ 'Nɩ Zozii yi 'nynigo, 'nɩ ɔ yi nyɩkpa soo nynä wa lɔɔ. 'Nɩ wa yi Batimee soo, wlä ‑n 'bhlü 'tɛtɩ 'kʋ ‑yä ‑n ‑bha 'kʋ ‑mä ɔ lä‑ä.

⁵⁰ ‑Mä Batimee paa‑ ɔɔ' 'kotuklëa 'klä, 'nɩ ɔ ‑bha 'kʋ 'ŋänyɩ! 'Nɩ ɔ yi Zozii yëku yi.

⁵¹ Zozii lä ‑mä lʋʋ ‑sä ‑n ‑waa bhä nynä n nʋ ‑naa ‑zaa? Batimee lä Cɩanyɔ‑, ‑n gbä ‑yä 'naa 'yii 'kä welio ‑yä n 'kä sä 'ni!

⁵² Ɔ cii‑ lä sɔɔ nä, Zozii lä ‑n mʋ ‑mä ‑naa pɔlötɛtɛɛ yä‑ä puë. 'Kpobhuu ‑bhlo 'kʋ 'nɩ Batimee' 'yii yi welio, 'nɩ ɔ yi Zozii 'kʋ 'gë.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan