Bìoball air-loidhne

Lukö 10 - GOD - u2

Zozii ‑lobho ɔɔ' 'kʋgënyʋaa' gwlɩ taa 'nɩ 'kʋgbä
( Matie 10.7‑16 )

¹ ‑Nɩnɩ 'fɩɩn plöö‑ ylä nä, Kwlienyɔɔ ‑sä bʋkʋ ɔɔ' 'kʋgënyʋää' gwlɩ taa 'nɩ 'kʋgbä, 'nɩ ɔ ‑lobhuwa. Ɔ ‑lobhuwa 'sɔ 'sɔ 'sɔ nynä ɔɔ 'yikʋʋ 'dii 'mnö ɩyä daa 'fɩɩn ɔmɔ 'titi 'kä bhlä ghlää nä, wa mʋ ‑mɔɔ.

² Ɔ ‑sonʋwa, ɔ lä ‑döödä yä ŋëë ‑mä 'klaa 'ghlü 'nɩ ‑döönyʋaa' ‑wʋ ‑zu. Nä, a bhibhie 'klaa käänyɔ ‑yä ɔ 'kä ‑döönyʋä ‑lä.

³ A ni, kä n lobhu'anyɩ lä. Ka ‑kʋ lä nynä 'bhabhlö, 'nɩ n lobhu'anyɩ lä vëvëmna nëëdë.

⁴ Aa' bhɛɛ ‑lä monii, aa' bhɛɛ ‑lä badu, aa' bhɛɛ ‑lä 'sɩɩ 'süü. A kä mʋdä ‑kʋ nä, aa' bhään ‑lä nyɩkpɔ ‑blɔkʋ.

⁵ A kä nyɩkpɔɔ' dä ‑plä nä, a bhään ‑lɔɔ nyɩkpa nynä 'pʋpʋɛ yio!

⁶ Kä nyɩkpɔ kä ‑lɔɔ ‑kʋ 'nɩ ɔ kä 'pʋpʋɛɛ' lɔɔ plöö‑ nä, anyɩa' 'pʋpʋɛ ŋënöɔ 'kʋ. 'Ɩzä a 'nö sɔɔ nyɩkpɔ nii‑ nä, anyɩa' 'pʋpʋɛɛ 'ylɩbhɔ ‑yä ɛ yi'anyɩ yëku.

⁷ Nyɩkpɔ ka'anyɩ ɔɔ' daa säkʋdä nyɛɛ‑ nä, a kʋ ‑lɔɔ! Wa ka'anyɩ 'nyuu nyɛɛ‑ nä, a 'mnä! Wa ka'anyɩ lülülʋʋ nyɛɛ‑ nä, a lü! A lü ‑mä, nyɩkpɔ kä lebhe nʋ nä, kɔ ni ɛɛ' 'mnö ‑bʋzʋɛ. Aa' ‑bha ‑lä 'gbënää' 'nɩ a 'kä 'yigädala 'mnö mʋ.

⁸ A kä 'du 'mnö ‑plä 'nɩ wa ka'anyɩ kʋdä nyɛɛ‑ nä, 'nɩ wa ka'anyɩ 'sɩɩ lülülʋʋ nyɛɛ‑ nä, a lü!

⁹ A yamä ‑mɔɔ' gupanyʋa, ɩyä a soo ‑mɔɔ' nyɩkpaa nynä, Laagɔɔ' 'Leyiduu ya'anyɩ yëku 'mɛ!

¹⁰ A kä 'du ‑ŋëë 'nɩ ‑mɔɔ' nyɩkpaa nö'anyɩ 'kʋplädä nyɛɛ‑ nä, a bhlü waa' 'clɩkpaa ‑yä a soo ‑mɔɔ' nyɩkpaa nynä ‑mä,

¹¹ anyɩa 'duu 'mnö ‑bhabhuu ‑ʋ ya‑anyɩ lä ‑kokokpü ‑zɔɔ 'mɛ nä, ʋmʋ ‑a gbɔtɔ lä! ‑Mä, a yibhë sɔɔ nynä Laagɔɔ' 'Leyiduu ya'anyɩ yëku 'mɛ!

¹² A kä sɔɔ ‑nʋ nä, n sonö'anyɩ nynä Laagɔɔ' 'tite 'kädɛɛ' pläylʋʋ 'kʋ, 'titee Laagɔ 'kä lä ‑lɔɔ' nyɩkpaa 'ŋʋ nä, Sodɔmʋ‑dunyʋää' yëkuu' 'titee ɛ yi yɔmä 'nɩ ɛ yi waa' ‑lɛɛ zi.

'Dii ‑nɩnɩɩ' ŋoo ‑wʋ Laagɔwälɩɩ 'kʋ
( Matie 11.21‑23 )

¹³ Anyɩ Kolazɛɛ‑dunyʋä nä, a yä mie! 'Nɩ anyɩ Bɛsayida‑dunyʋä ‑mä 'sɩɩ, a yä mie! ‑Ɔnöza bhää? 'Yiziziogbɩɩ Laagɔ ‑nʋ'anyɩ lä nëëdë nä, sɔɔ ɩ kä bhä Tilöbhlɩ 'kʋ ‑nʋɔ, 'nɩ ɩ kä bhä 'sɩɩ Sidɔɔbhlɩ 'kʋ ‑nʋɔ nä, ‑mɔɔ' nyɩkpaa yä wɛzä 'cɩcɩ. Wa yi bhä ‑bhɛgö ylo, 'nɩ wa yi bhä 'tɩtɔɔ' 'kplɩfɔ. 'Nɩ wa yi bhä Laagɔ dëlü bhʋtʋʋ waa' nyenyii' ‑za.

¹⁴ Ɩmɩɩ‑ ‑kä 'ŋnö 'nɩ Laagɔɔ' 'tite 'kädɛɛ' pläylʋʋ 'kʋ nä, Tilöbhlɩ 'kʋ ‑yä Sidɔɔbhlɩ 'kʋʋ nyɩkpaa' 'titee ɛ yi lä yɔmä 'nɩ ɛ yi lä anyɩa ‑lɛɛ 'kʋ zi.

¹⁵ 'Nɩ anyɩ Kapɛnayumö‑dunyʋä, ka bhobho nynä ka 'kä ‑gblää ‑yä a 'kä ‑laagɔɔ' taa ‑a? Yio! Ka la 'kä glu plä ‑aaa ‑yä, a 'kä 'kudukʋ 'kʋ ghlä.

¹⁶ 'Nɩ Zozii yi bʋkʋ ɔɔ' 'kʋgënyʋä soo, ɔ lä ‑ɔ ga'anyɩ 'nyukwli poo nä, ‑amʋ ɔ poo lä 'nyukwli. 'Ɩzä ‑ɔ ga'anyɩ cɛɛ‑ nä, ‑amʋ ɔ cɛɛ‑ lä. 'Nɩ ‑ɔ gä'ä 'sɩɩ cɛɛ‑ nä, ‑ɔ ‑lobho'o lä nä, ɔmɔ ɔ cɛɛ‑ lä.

'Kʋgënyʋaa' gwlɩ taa 'nɩ 'kʋgbä yä 'ylɩbhɔ

¹⁷ 'Kʋgënyʋaa' gwlɩ taa 'nɩ 'kʋgbä Zozii ‑lobho bhlä nä, 'tänyɩ ‑kʋ ‑lɔɔ 'nɩ wa yi 'ylɩbhɔ. Waa ‑lʋa ‑pʋpɛ bhlä nä, 'nɩ wa yi Zozii soo, wlä Kwlienyɔ‑, ‑naa 'ŋnöö 'mnö nä, kä ‑a ‑kään ‑zizinyenyii 'päwä 'kʋ.

¹⁸ Wa cii‑ lä sɔɔ nä, Zozii lä ‑ɛɛɛ, n nii‑ 'Dëvlo 'yi 'nɩ ʋ ‑bhlü ‑zɔɔ ‑n ‑näsä ŋɔkʋ wɛɛ lä nä.

¹⁹ A ni, n ya'anyɩ 'päwä 'nyɛ nynä a nämnö ‑leebeli 'kʋ. A nämnö ‑ŋnëŋnënëgbü 'kʋ. ‑Zɔbhlɛgbänyɔɔ, ɔɔ' 'päwaa 'fɩɩn, a nämnönöa 'kʋ ‑mä, wälɩ ‑nyenyi nö'anyɩ ‑lä ŋëë.

²⁰ ‑Mä ‑zizinyenyii nä, sä a ‑känɩ lä 'päwä 'kʋ nä, ‑lɔɔ wälɩɩ 'mɩɩ‑ ‑lä nʋ ‑lä anyɩa ‑pʋpɛ. ‑Ɩ 'gä lä anyɩa ‑pʋpɛ nʋ nä, ɩmɩɩ‑ plöö‑ lä nynä ‑mä, ‑mɔɔ Laagɔduu' anyɩa' 'ŋnö yä ‑mɔɔ jɩjlɔ!

‑Ɔ ‑kä lä 'yuplɛ nä ɔmɔ nu lä Laagɔɔ' 'Nägädöö 'mʋ
( Matie 11.25‑27 ; 13.16‑17 )

²¹ Zozii ‑kʋ cidä 'nɩ, Kplɔɔkplɔɔ‑wugɔɔ' ‑pʋpɛɛ ‑jɛnöɔ 'kʋ. 'Nɩ ɔ yi ci, ɔ lä 'Bä, ‑laagɔ ‑yä ‑dʋdʋʋ 'sɔɔ Kwlienyɔ‑, sä ‑n ‑zizie lä wälɩnɩ 'fɩɩn dɩgälɩ‑yibhënyʋa ‑yä 'fike 'fikenyʋa 'yii, 'nɩ 'yua 'mää‑ ‑n paanɩ‑ lä nä, ɩɩ' ‑zä n fänö‑ö lä 'ŋnu! ‑Ɛɛɛ, 'Bä, ‑naa plɛkʋmɛnɔɔ 'mnö nä, kä ‑n ‑waa lä nynä ɩ kʋ sɔɔ nä, 'ɩzä ɩ ‑kʋ lä sɔɔ.

²² 'Nɩ ɔ yi bʋkʋ ci ɔ lä n 'Bä nä, kɔ nyɛɛ'ɛ ‑lɩɩ 'fɩɩn. 'Nɩ nyɩkpɔɔ' ‑wʋ ɔ ‑Yowlio ‑yi 'nɩ ‑ɔnö 'Bäɔ ‑bhlo 'coo‑. N nyɩkpɔɔ' ‑wʋ 'sɩɩ 'Bäɔ ‑yi 'nɩ ‑ɔnö ɔ ‑Yowlio‑ ɩyä nyɩkpɔɔ' ‑lɔɔ ‑Yowlio ‑waa lä nynä ‑mä ɔ 'kä 'Bäɔ paa nä.

²³ Zozii cii‑ lä sɔɔ nä, 'nɩ ɔ yi ɔɔ' 'kʋgënyʋa ‑kotu 'kʋ sonö, ɔ lä anyɩmɔɔ‑ ni lä ‑nɩnɩ 'yi nä, a yä 'pʋ!

²⁴ N sonö'anyɩ nynä 'plɔfɛtɩnyʋä ‑yä 'loyuë ‑bhutukpä ‑tään nynä wa 'kä 'tänyɩnɛ 'yi 'nimʋ, ‑mä wa 'nɩɛ ‑wʋ 'yi nii. Wa ‑tään nynä wa 'kä wälɩnɩ 'numʋ, ‑mä wa 'nɩɩ ‑wʋ nuu‑.

Samalii‑yuo ‑ɔ nää‑ lä plɛkʋ nä ɔɔ' ‑nyädlaa

²⁵ Zozii ‑bhɩä lä cilɩ nä, ‑Jlämöcɩanyɔ ‑bhlo ‑yi ‑yä ɔ 'kɔ ‑zɔɔ ‑sä. Ɔ ‑yi lä nä, ɔ lä Cɩanyɔ‑, Laagɔɔ' pʋpʋɛɛ‑ ‑kʋ lä 'kɔɔkɔɔ' ‑za nä, säsä n kä bhä ‑nʋ 'nɩ n yie bhä 'nii?

²⁶ 'Nɩ Zozii yio 'ylä, ɔ lä ‑mä sɩ ‑jɩjlɔ bhä ‑mɔɔ ‑Jlämaa' 'bɔɔgʋʋ 'mnö? 'Klü ‑sä ‑n ‑zɛnö bhä ‑mɔɔ?

²⁷ Nyɩkpɔɔ lä kɩ ‑jɩjlɔ lä nynä ‑mä, Kwlienyɔ ‑naa Laagɔ, ‑n wamänöɔ. ‑N wamänöɔ ‑naa 'wugaa 'fɩɩn 'mnö, ‑naa 'tɛtɩɩ 'fɩɩn 'mnö ɩyä ‑naa bhobholɩɩ 'fɩɩn 'mnö. Ɩyä sä ‑n ‑waa lä ‑n yëku nä, ‑n wamä sɔɔ ‑n ‑lie.

²⁸ Ɔ cii‑ lä sɔɔ nä, Zozii lä ‑n cii‑ 'nää. ‑N gä ‑mʋ nä, ‑n nʋ sɔɔ ‑mä Laagɔɔ' pʋpʋɛɛ‑ ‑kʋ lä 'kɔɔkɔɔ' ‑za nä, ‑n yie 'ni.

²⁹ Nyɩkpɔɔ tää bhɛlä nynä ɔ 'kä 'kʋ bhlää nä, kɔ ylää‑ Zozii, ɔ lä 'nɩ ‑ɔ plöö‑ bhä n ‑liee?

³⁰ 'Nɩ Zozii yi nuwälɩ 'kʋ 'bhlü, 'nɩ ɔ yio soo, ɔ lä nyɩkpɔ ‑bhlo, ɔ bha bhä Zolizalɛmʋ‑duu' 'nɩ, ɔ mʋ bhä Zelikooduu'. ‑Mä ɔ ‑kʋ lä mʋdä nä, ɔ ‑bhlüü nyɩkpa‑bhlänyʋä nëëdë, 'nɩ wa yio ɔɔ' kääkäälɩɩ 'fɩɩn ‑sä. Wa ‑bhütüo 'nɩ, wa ‑tüo 'kwie numnu 'kʋ, 'nɩ wa yi 'plö 'nɩ wa yi mʋ.

³¹ Nä, 'cibhisänyɔ ‑bhlo ‑ɔ bhlü bhlä ‑lɔɔ' ‑blɔɔ ‑bäsaaza nä, ɔ nii‑ lä nyɩkpɔɔ 'yi nä, kɔ ‑bio 'wlu 'nɩ, ɔ yi 'plö.

³² 'Cibhisänyɔɔ' kläänyɔ ‑bhlo ghlää bhlä 'sɩɩ ‑lɔɔ' ‑blɔɔ 'kʋ nä, ɔ nii‑ lä nyɩkpɔɔ 'yi nä, kɔ ‑bio 'wlu 'nɩ ɔ yi 'plö.

³³ ‑Mä Samaliibhlɩ 'kʋʋ nyɩkpɔ ‑bhlo mʋ bhlä lowluu nä, ɔ ‑ŋëë lä ‑lɔɔ 'nɩ ɔ nii‑ lä nyɩkpɔɔ 'yi nä, kä ŋäzö ‑jɛnöɔ 'kʋ.

³⁴ 'Nɩ Samalii‑yuo yio yëku 'jloo, 'nɩ ɔ yi ɔɔ' 'jüü 'kʋ 'ŋʋ. Ɔ ‑jɛɛnɩ 'kpü ‑yä divaa 'sɔ 'kʋ, 'nɩ ɔ yio 'kʋ gʋä. Ɔ ŋʋɔ‑ ɔɔ' jakasɩɛ 'kʋ, 'nɩ ɔ yio 'kʋplädä fä ‑yä, wa 'kɔ bhɛ 'nää wlɩɩ klää.

³⁵ Zeli ‑ze ylä nä, Samalii‑yuo ‑sä ‑mɔɔ ‑flëëgüyi 'sɔ, 'nɩ ɔ yii 'kʋplänyɔɔ 'nyɛ. 'Nɩ ɔ yio soo, ɔ lä bheeje! ‑n klää nyɩkpɔnɔ wlɩɩ'! ‑Mä monii kä bʋkʋ ‑lɔɔ kätää' pää nä, n kä ‑yi nä, n yi‑i mɛ 'ylɩbha.

³⁶ Zozii cii‑ ylä sɔɔ nä, 'nɩ ɔ yi ‑Jlämöcɩanyɔɔ 'ylä, ɔ laa, nyɩkpa‑cünö taa n ‑zɛɛ lä nä, waa' nëëdëë' lɔɔ ‑sä plöö‑ bhä nyɩkpɔɔ wa bhlää‑ lä nä, ɔɔ' ‑liee?

³⁷ ‑Jlämöcɩanyɔɔ lä nyɩkpɔɔ ‑ɔ paa‑ lä ŋäzöplɛɛ nä, ɔmɔ lä. Ɔ cii‑ ylä sɔɔ nä, 'nɩ Zozii yio soo, ɔ lä ‑mɔɔ ‑mä 'sɩɩ, ‑n mʋ ‑yä ‑n nʋ sɔɔ!

Zozii ‑kʋ Matö ‑yä Malii 'sɔɔ ‑gbäsɩɩ

³⁸ Zozii ‑yä ɔɔ' 'kʋgënyʋa 'sɔ ‑kʋ mʋdä 'nɩ, wa yi 'du ‑bhlo 'kʋ ŋëë. 'Ŋnɔ ‑bhlo ‑kʋ bhä 'duu 'mnö nä, ɔmɔ wa laa bhä Matö. Ɔmɔɔ‑ nyɩwa‑ säkʋdä.

³⁹ Matö nä, ɔ ‑kä bhä bhɛŋnɔ ‑bhlo, 'nɩ wa lɔɔ bhä Malii. ‑Mä Maliinɔ, ɔ ‑yi 'nɩ ɔ ‑kʋ Kwlienyɔɔ dëlü, 'nɩ ɔ poo bhä ɔɔ' ciciwälɩɩ 'nyukwlii.

⁴⁰ 'Nɩ ɔ bhɛŋnɔ Matö pi bhä. ‑Mä lebhee yɔ bhɛ lä 'wlu zumë nä, ɔɔ' 'ni bhɛ 'casɩ. 'Nɩ ɔ yi yi, 'nɩ ɔ yi Zozii soo, ɔ lä Kwlienyɔ‑, ‑amʋ ‑bhlo nʋ lä lebhee. 'Nɩ n bhɛŋnɔɔ' yi ‑wʋ 'nɩ, ɔ kä'ä klää nä, ɩɩ' kamänö‑ö bhä yëkuu' ‑a? ‑N sonöɔ ‑yä ɔ kä'ä klää!

⁴¹ 'Nɩ Kwlienyɔ yi Matö soo, ɔ lä Matö‑! Matö‑! ‑Naa plɛɛ ‑kʋ lebhe ‑bhutukpä 'kʋ nä, ɛɛ' ‑wʋ sä ‑slɔ.

⁴² Mä ‑n ni 'yi ‑a! Lʋʋ ‑bhlo ‑kʋ ‑lɔɔ nä, ʋmʋʋ‑ kää lä gbʋ. 'Nägädaa, ‑lɔɔ Malii ‑tla lä wlɩ. 'Nɩ nyɩkpɔ 'nöɔ ‑lä 'kɔɔn ‑lɔɔ wlɩɩ' ‑sä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan