Bìoball air-loidhne

Galatɩnyʋä 6 - GOD - u2

'Cɔcɩnyʋä kä wa yii ‑yii 'kʋ

¹ Bhelie ‑yä bhɛŋwnɩänyɩ‑, kä nyɩkpɔ kä wälɩklü ‑nyënyë nʋ 'nɩ a kɔnyɩ 'kʋ ‑klää nä, anyɩmɔ Kplɔɔkplɔɔ‑wugɔɔ 'tie lä nä, a 'bhlü pɔlöwätɛ 'kʋ ‑yä a gbä ‑yä ɔ yii 'nägä‑blɔɔ 'kʋ. Ɩyä anyɩ ‑mä 'sɩɩ a fä a yëku plɛ ‑yä aa' kä ‑kä 'sɩɩ ‑zɔɔpälɩɩ' bhlüü.

² A klää ‑klää ‑yä nyɩkpɔ nyɩkpɔ nä, ɔ bhɛnö ɔ ‑liee' bodu. A kä sɔɔ nää nä, Klisöö' ‑Jläma 'mä a ŋʋ lä 'klʋkpää.

³ ‑Mä nyɩkpɔ kä ɔ yëkuu' ‑za bhobho nynä ‑mä kɔ ‑kä gba, ‑bhlɛ ɔɔ' ‑wʋ lä lʋʋ plöö‑ nä, ɔ yëku‑ ɔ 'nyigë lä.

⁴ Nä nyɩkpɔ nyɩkpɔ fä ɔɔ' nää nääsa plɛkʋ. Ɩyä kɩ kä ‑kʋ nynä ‑mä ɔ yi täkpɔ nä, ɔ täkpɔ ɔ yëku 'titii nʋnʋgbɩɩ 'mnö ‑mä ɔɔ' pään ‑lä ɔ yëku ɔ ‑lie 'kʋ.

⁵ ‑Ɛɛɛ, nyɩkpɔ nyɩkpɔ nä, ɔ yëkuu' nʋnʋgbɩɩ' ‑tëbhu ɔ 'kä lä bhɛ.

⁶ Nä, nyɩkpɔɔ' lɔɔ wa cɩa lä Laagɔwälɩ nä, lʋʋ ɔ ‑kä lä nä, kɔ ‑kä 'nɩ ‑ɔ cɩɔ lä nä, ɔ ‑yɔsɔ 'kʋ dëë.

⁷ 'Klünö 'kʋ nä, aa' 'nyigë ‑lä a yëku ‑mä, Laagɔ nä, waa' nyɩänʋ ‑kä! Sä nyɩkpɔ goo lä nä, sɔɔ‑ nyɩɔ lä.

⁸ Nä, sä ɔɔ' 'yɛkɛɛ ‑waa lä nä, sɔɔ ɔ kä goo nä, sä ɔ 'kä lä 'ni nä, sɔɔ‑ plöö‑ lä 'kwie. 'Ɩɩ ‑zä sä Kplɔɔkplɔɔ‑wugɔɔ ‑waa lä nä, sɔɔ ɔ kä goo nä, 'pʋpʋɛɛ‑ ‑kʋ lä 'kɔɔkɔɔ ‑za nä, ɔ yie 'ni.

⁹ Nä, a ‑ya nʋ 'kɔɔkɔ 'nää ɩyä plɛ 'nä 'kpɔsʋ‑anyɩ ‑lä! 'Nɩ plɛ 'nö‑anyɩ 'kpɔsɔ‑ 'nɩ ‑a gä sɔɔ ‑nʋ ‑aaa 'nɩ 'tänyɩɛ Laagɔ ŋʋʋ‑ lä nä, ɛ kä ŋëë nä, ‑a yi ‑lɔɔ' bɔɔpälɩɩ 'ni.

¹⁰ Nä 'tänyɩɩ 'fɩɩn 'mnö ‑a yi lä mii nä, a ‑ya nʋ nyɩkpaa 'fɩɩn 'nää. 'Cɔcɩ‑bhelia ‑yä bhɛŋwnɩa 'tasɩɛ, a ‑ya nʋwa 'nää.

Bhlüüdää' wälɩklü

¹¹ ‑Amʋ 'titii‑ jɩjlä'anyɩ ylä, a wloo ‑wʋ saa sä 'naa 'näböö 'ghlü lä nä.

¹² Nyɩkpaa' ‑lʋwa ‑wa ci lä nynä ‑mä 'sëëti a ‑döö 'kʋ nä, ‑lɔɔ nyɩkpa‑cëa, 'yɛkɛɛ 'mnö 'kʋ wloo wloogbɩ wa nʋ lä. Wälɩklëa ‑bhlo bhlʋwa lä nä, amää‑ plöö‑ lä nynä ‑mä, kwa gu lä ‑yä nyɩkpaa' kwa ‑kä 'kwlɩkabhɩää' 'ŋʋ Klisöö' 'kusuu' ‑za.

¹³ ‑Lʋa 'titi ‑wa ci lä nynä ‑mä 'sëëti nyɩkpa ‑döö 'kʋ nä, wamä 'titi waa' 'ŋʋ ‑wʋ ‑Jlämaa 'klʋkpää. Kwa ylä lä 'flɛ nynä ‑mä a ‑döö 'kʋ ‑yä wa 'kä anyɩa' 'kʋ ‑döölɩ 'mnö täkpɔ.

¹⁴ ‑Amʋ nä, wälɩklëa n yi lä 'mʋ täkpɔɔ nä, amää‑ plöö‑ lä ‑anyɩa Kwlienyɔɔ Zozi Klisöö' 'kusuu 'yii 'kwiee. Ɛɛ' ‑bɔɔ 'nɩ zëkpëkʋʋ' ‑lɩɩ yä lä 'ku 'naa ‑za. 'Nɩ ‑amʋ ‑mä 'sɩɩ n yä lä 'ku zëkpëkʋʋ' ‑lɩɩ' ‑za.

¹⁵ Naa, nyɩkpɔ yi 'kʋ ‑döö ‑o, ɔɔ' ‑lä 'kʋ döö ‑o, ‑lɔɔ ‑lɩɩ' ‑wʋ gba ‑kä. 'Klüü‑ ‑kä ylä gba nä, ɩmɩɩ‑ plöö‑ lä nynä ‑mä Laagɔ yä gbä n yä nyɩkpɔɔ' ‑lɛɛ lolo 'plö.

¹⁶ ‑Nä, 'naa cɩalɩɩ n cɩa'anyɩ lä nä, nyɩkpaa 'fɩɩn ‑wa yii lä 'klʋkpä 'ŋʋ nä, Laagɔɔ' 'kʋ wɔtɔlɩɩ ‑yä ŋäzö‑yibhëlɩ 'plö waa' dä ɩyä ɩ 'plö 'sɩɩ Laagɔɔ' 'yua 'fɩɩn dä.

¹⁷ ‑A 'bhää ylä ‑zɩkä ‑lää 'kʋ nä, nyɩkpɔ 'nä ŋʋ'ʋ ‑läyɩɔ 'kwlɩkabhɩää' ‑mä 'naa 'yɛkɛnɛ 'fɩɩn bhɛɛ‑ yɩ Zozii' 'kwlɩkabhɩa' 'bhlʋlɛɛ.

¹⁸ Bhelie ‑yä bhɛŋwnɩänyɩ‑, ‑anyɩa 'Kwlienyɔɔ, Zozi Klisö, ɔɔ' 'nyupälɩɩ ŋënö'anyɩ 'kʋ. Ɩ kʋ sɔɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan