Bìoball air-loidhne

Galatɩnyʋä 5 - GOD - u2

Kä Klisöö' 'Nägädöö dö nyɩkpa 'kpɔ

¹ Kä Klisö dö‑anyɩ 'kpɔ ‑yä ‑a 'gä sää 'titiclö geylüü' ‑bha. Nä, a 'tɛmää 'mʋ ‑yä aa' ‑taa ‑läyɩɔ a yëku 'yi 'nɩ wa 'kanyɩ geylüü' 'ŋʋ bʋkʋ.

² A poo'o yɩ 'nyukwli! ‑Amʋ Pɔlʋ, kä n sonö'anyɩ lä nynä ‑mä, a kä ‑gbä 'nɩ wa ka'anyɩ 'kʋ döö‑ nä, Klisöö yɩɔ anyɩa' ‑za gba ‑kä.

³ Kä n ci 'nɩ n soo lä bʋkʋ nyɩkpɔ nyɩkpɔ nynä ‑mä nyɩkpɔɔ' ‑lɔɔ döö‑ ylä 'kʋ nä, kɔ ‑kä 'nɩ ɔ 'kä yɩ ‑Jlämaa 'fɩɩn 'klʋkpää 'ŋʋ.

⁴ Anyɩmɔɔ‑ tään lä nyna ‑mä a 'kä ‑Jläma 'mnö ghlää ‑yä a 'kä Laagɔ dëlü 'yigëënyʋä 'plö nä, a yä Klisö gwë ‑sä. 'Nää Laagɔ nyɩ'anyɩ bhlä nä, a ya të.

⁵ ‑Anyɩ nä, Laagɔɔ ‑a ‑kään lä plɛkʋ 'kʋ nä, ʋmʋʋ‑ 'gä lä gbä ‑yä ‑a 'gä 'yigëënyʋä 'plö. ‑Nɩnɩ 'mɩ ‑a ‑bɛɛ lä ‑yä Kplɔɔkplɔɔ‑wugɔɔ 'kä ‑anyɩa pɔlötɛtɛɛ 'mnö ghlää ‑yä ʋ 'kä‑anyɩ sɔɔ plüa.

⁶ Nyɩkpɔ ‑yä Zozi Klisö 'sɔ kä yɩ 'jɛnyɩ nä, ‑n döö‑ 'kʋ ‑o, ‑nn ‑wʋ 'kʋ döö‑ o, ɩɩ' ‑wʋ ɔɔ' ‑za gba ‑kä. ‑Ʋ ‑kä lä gba nä, ʋmʋʋ‑ plöö‑ lä pɔlötɛtɛɛ‑ ‑a ‑kä lä ‑wawʋʋ 'mnö nä.

⁷ A cie‑ bhɛ lä 'nää 'kʋ ʋʋ'! Nä lʋʋ ‑sä ‑kɛsɩɔnö'anyɩ bhä 'yikʋ 'nɩ ‑ʋ ‑gbä bhä 'nɩ aa' 'ŋʋ bhä ‑pɛɛ ‑nʋawlɛɛ 'klʋkpää?

⁸ 'Klü wa ‑sönö'anyɩ lä 'nɩ wa ‑sɩa'anyɩ lä nä, Laagɔɔ‑ laa'nyɩ lä nä, ʋmʋ yëku‑ ɩɩ' ‑bha ‑wʋ.

⁹ A ni 'yi naa, ɩ cio‑ nynä ‑mä 'flɔɔ' tɩtɛɛ' 'bhabha‑gwäzö nä, ɩɩ' 'pɛpɛlɩä‑ gbä lä 'nɩ 'flɔɔ tɩtɛ 'fɩɩn bha lä.

¹⁰ ‑Mä Kwlienyɔ ‑bhlü'ë plɛɛ' anyɩa' ‑za. 'Nɩ n ‑yi sɔɔ nynä ‑mä, aa' ‑lä 'sɩɩ yigädasä bhobho. ‑Mä ‑wa 'bhläbhlänö'anyɩ lä wälɩ 'wlu nä, sä wa yi kʋmɔ ‑kʋmɔ ‑kaaa nä, wa yi ‑lɔɔ' dluu plʋʋ Laagɔ dëlü.

¹¹ Bhelie ‑yä bhɛŋwnɩänyɩ‑, n kä bhä ‑lätee 'kʋ ‑döölɩɩ' wälɩ bie nynä ‑mä nyɩkpa ‑döö 'kʋ nä, ‑ɔnözä 'nɩ wa ŋʋ'ʋ ‑lätee bhä 'kwlɩkabhɩä? Kɩ 'kä bhɛ lä kʋ nynä ‑mä, Klisöö' 'kusuu 'yii 'kwiee wälɩɩ nyɩkpɔ 'nɩɩ ‑lä bhɛ ‑pɛ 'kʋ bhlää.

¹² Nä, ‑wa 'bhläbhlänö'anyɩ lä wälɩ 'wlu 'kʋ ‑döölɩɩ' ‑za nä, waa' ‑sä lä ‑lɔɔ wlɩ. 'Nɩ kä wa dö yɩ 'gää wa yëkuu' ‑zɔɔ 'fɩɩn 'kʋ!

¹³ ‑Mä anyɩ nä, bhelie ‑yä bhɛŋwnɩänyɩ‑, Laagɔ ya'anyɩ ‑lɔɔ geylüü 'mnö ‑sä nä, aa' yɩɔ geyuë plöö‑. ‑Mä aa' 'ŋʋʋ ‑lä 'sɩɩ ‑lɔɔ' 'klüü 'gëë 'nɩ sa anyɩa' 'yɛkɛɛ ‑waa lä nä, a 'kä sɔɔ nää. Nä, a ‑taa ‑wawʋʋ 'yi ‑yä ʋ 'tienö'anyɩ ‑yä a 'kä a ‑liesɩ ‑gä nʋ.

¹⁴ Moyizöö' ‑Jlämaa 'fɩɩn wälɩklë ‑bhlo 'coo a ci lä. Amää‑ plöö‑ lä nynä ‑mä, sä ‑n ‑waa lä ‑n yëku nä, ‑n wamä sɔɔ ‑n lie.

¹⁵ Nä, anyɩa' nʋnʋgbɩ kä ‑kʋ nynä 'klää mna, 'nɩ a kä mnü ‑mnü, 'nɩ a kä lü ‑lü nä, a luë ‑mä a yëku‑ a 'kä ‑klää nuë ‑a.

A ‑taa Kplɔɔkplɔɔ‑wugɔɔ 'yi ‑yä ʋ 'kanyɩ 'tie

¹⁶ Nä, a ni 'klüü n 'kanyɩ ylä soo nä, ɩ plöö‑ nynä ‑mä, a ‑taa a yëku 'yi ‑yä Kplɔɔkplɔɔ‑wugɔɔ 'kä anyɩa zëkpëa 'tie ‑mä, ‑lɔɔ aa' ‑lä ‑kä anyɩa' 'yɛkɛɛ pɔlösaa nʋ.

¹⁷ ‑Anyɩa 'yɛkɛɛ sɛ ‑waa lä nä, sɔɔ ‑yä 'Wugɔɔ 'sɔ mʋʋ ‑wʋ yëkuu'. 'Nɩ 'Wugɔɔ sʋ ‑waa lä nä, sɔɔ ‑yä ‑anyɩa 'yɛkɛɛ 'sɔɔ mʋʋ ‑wʋ yëkuu'. Kɩ ɩmɩ 'sɔ 'täkä ‑täkä lä sää 'kwläkwlä kee ‑yä sa ylä bhlä nynä a 'kä nʋ nä, aa' kä yɩ sɔɔ mii.

¹⁸ ‑Mä Kplɔɔkplɔɔ‑wugɔɔ 'mʋʋ‑ gä'anyɩ 'tie nä, ‑Jlämaa' 'kämänö'anyɩ yɩɔ.

¹⁹ ‑Anyɩa 'yɛkɛɛ gbenyenyii ɛ nʋ lä nä, kɩ nio 'yi wɩa. Ɛ ‑bhɛɛ 'klʋ 'tɛtʋ, ɛ bhɛɛ‑ plʋplälɩ, ɛ ‑waa ‑käpä ‑käpä.

²⁰ Ɛ ‑kʋ ‑zlüü' bʋbɔlɩɩ ‑yä guu' slälɩɩ 'mnö. ‑Nɩnɩ 'mɩɩ‑ gbä lä 'nɩ ‑zɔbhlɛzʋ ‑kʋ lä, 'nɩ yɔɔlɩ ‑kʋ lä, 'nɩ luëzü ‑kʋ lä. 'Nɩ gbʋgblɛɛ ‑yä 'kʋ bhläälɩɩ 'sɔ ‑zii lä nyɩkpaa 'wluu 'nɩ nyɩkpa doo lä 'mʋ 'nɩ waa' 'nunu ‑wʋ lä.

²¹ Wa ‑liesɩɩ' kääkäälɩɩ zɛlɩänʋwa 'yii. Ɩmɩɩ plöö‑ lä 'sɩɩ gbʋʋsaa' nʋmnälɩɩ, ‑lɛɛgbi lülɩɩ, 'nɩ 'klüü ‑nɩnɩ ‑kʋ ‑lätee ‑mɔɔ 'nɩ wa nʋɩ 'nɩ ɩ ‑yä ‑nɩnɩ 'sɔ mʋʋ yëkuu'. Nä, n ya'anyɩ bhɛ gblɩmä 'nɩ n gblɩmänö'anyɩ lä bʋkʋ. Nyɩkpaa' ‑lʋa ‑wa nʋ lä 'sɔɔ ‑lɩɩ nä, waa' ‑lä Laagɔɔ' 'Leyiduu 'mnö 'kʋdä 'ni.

²² ‑Mä Kplɔɔkplɔɔ‑wugɔɔ' sʋ nyɛ lä nä, sɔɔ‑ plöö‑ lä ‑wawʋ ‑yä ‑jäkä, ‑yä 'kʋ wɔtɔlɩ, ‑yä plɛkʋtɛnɔ, ‑yä plɛkʋmɛnɔ, ‑yä plɛkʋnanɔ, ‑yä Laagɔɔ' dë 'tɛɛlɩ,

²³ ‑yä pɔlöwätɛ, ‑yä yëkuu' ‑kpään klälɩ. 'Klünö nä, ‑Jlämaa' ‑sɩɩ ‑wʋ ‑lɔɔ.

²⁴ Nyɩkpaa' ‑lʋa plöö‑ ylä Zozi Klisöö' lʋä nä, wa yä wa yëkuu' 'yɛkɛɛ ‑yä ɛɛ' nʋnʋgbɩɩ ‑yä ɛɛ' bhobholɩ nyenyii 'kusuu 'yii bhoo.

²⁵ Kplɔɔkplɔɔ‑wugɔɔ ya‑anyɩ 'pʋpʋɛ 'nyɛ nä, a ‑ya ‑tanʋ 'yi ‑yä ʋ 'ka‑anyɩ 'tie.

²⁶ ‑Aa täkpɔ ‑lä ‑yä, ‑aa 'pää ‑pää ‑lä ‑bli 'kʋ, ɩyä luëzüü' ‑kʋ‑anyɩ ‑lä nëëdë!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan