Bìoball air-loidhne

Galatɩnyʋä 4 - GOD - u2

Aa' yɩɔ geyuë plöö‑

¹ A ni 'klëa n 'kä lä ci nä, amää‑ plöö‑ lä nynä ‑mä, jaa‑lünyɔ kä ‑läte 'yu plöö‑ nä, kɔ ‑kʋ lä 'sää nynä geyu. ‑Mä sɔɔ ɩ ‑kʋ 'nɩ ɔmɔɔ‑ plöö‑ lä jaa 'fɩɩn käänyɔ.

² Ɔ plöö‑ lä ‑lätee 'yu nä, nyɩkpa yëku ɔ ‑kʋ 'nɩ wa wluo 'kʋ 'nɩ, wa wloo 'sɩɩ ɔɔ' kääkäälɩɩ 'kʋ ‑aaa, 'tänyɩɩ ɔ 'kä ylä ɔ 'bää jaa 'kʋ 'bhlü nä, 'nɩ ‑lɔɔ ŋëë yɩ.

³ Nä, ‑anyɩmä 'sɩɩ, ka ‑a ‑kʋ bhlä tɛɛ nynä ‑mä 'yuë. 'Nɩ 'ylʋzɔɔ ‑zizinyenyii' 'tɛtɩɩ bhɛnö‑anyɩ bhlä nynä geyuë.

⁴ 'Mä 'tänyɩɛ Laagɔ ŋʋʋ‑ lä nä, ɛ ‑ŋëë ylä nä, kʋ ‑lä yɩ ʋ ‑Yowli. 'Ŋnɔɔ‑ ‑gänöɔ lä, 'nɩ ɔ 'ŋʋmʋ‑ 'sɩɩ 'Zufʋnyʋää' ‑Jläma 'klʋkpää'

⁵ ‑yä ‑lʋa ‑Jlämaa 'kämä bhlä nä, ɔ 'kwa nya nëë' ‑sä ‑yä ɔ 'kä gbä ‑a 'gä Laagɔɔ' 'yuë 'plö.

⁶ ‑Ɛɛɛ, 'nɩ 'zaazɩ, a 'plöö‑ yɩ Laagɔɔ' 'yuë. Ɩmɩɩ‑ ‑kä 'ŋnö 'nɩ Laagɔ yä‑anyɩ lä ʋ ‑Yowlii' Kplɔɔkplɔɔ‑wugɔɔ pleyii 'ŋʋ 'nɩ ʋ woo lä, ʋ lä Aba, 'oo ‑a 'Bä.

⁷ Naa, ‑n ‑glö yɩ Laagɔɔ' 'yu ‑mä ‑nn yɩɔ geyu plöö‑. 'Nɩ sä n plöö‑ lä Laagɔɔ' 'yu nä, jaa ʋ ŋʋʋ‑ bhlä ‑lɔɔ ʋʋ' 'yuaa' ‑za nä, ʋ yi‑i ma 'nyɛ.

Pɔlʋ plɛ belio 'mʋ Galatɩbhlɩ 'kʋʋ 'cɔcɩnyʋaa' ‑za

⁸ Tɛɛtɛɛ nä, aa' bhɔɔ Laagɔ ‑yi 'nɩ a plöö‑ bhä ‑kpläkplö ‑laagwɩɩ' geyuë. 'Nɩ ɩɩ' bhɔɔ 'zaazɩ Laagɔ plöö‑.

⁹ ‑Mä ‑pɛpɛɛ nä, a yi yɩ Laagɔ. 'Nɩ n bhobho 'sɩɩ nynä ‑mä Laagɔ 'mʋʋ‑ ‑yibhënö'anyɩ lä ‑pɛɛ. Nä, sɩ ‑kʋ bhä 'nɩ a 'ylɩbhɔ bhä bʋkʋ 'nɩ a yii bhä ‑lɔɔ' 'flɛflɛ ‑zizinyenyii' 'tɛtɩɩ 'mnö? A 'kä bhä bʋkʋ ɩɩ' geyuë 'plö ‑a?

¹⁰ A kä ‑lɔɔ ‑kʋ nä, a nyɛ 'sɔlɩcëa 'mnö ylɩɩ' ‑nɩnɩ gba, 'nɩ a nyɛ 'cɩɩ ‑nɩnɩ gba, 'nɩ a nyɛ lioo' nʋnʋ gba 'nɩ a nyɛ 'ylʋbɔɔ ‑nʋnʋ gba.

¹¹ Kä anyɩa' wälɩ kamänö'ö lä yëkuu'. Lebhee 'fɩɩn 'kwlɩ ‑bhɩänö'ö lä anyɩa' ‑za ‑kaaa 'nɩ n ‑nʋ lä nä, ɛ 'kä bhä 'flɛ 'plö ‑a!

¹² Bhelie ‑yä bhɛŋwnɩänyɩ‑, n slä'anyɩ 'wlu. Sä n ‑kʋ lä nä, anyɩ ‑mä 'sɩɩ a kʋmʋ 'sɩɩ sɔɔ. ‑Ɔnöza bhää? ‑amʋ ‑mä 'sɩɩ, sa ‑kʋ lä nä, sɔɔ n ‑kʋmʋ lä. A nö'ö ‑kä nyenyi ‑nʋ.

¹³ Sä 'tänyɩɛ ‑kʋ bhlä 'nɩ n ‑yi 'nɩ, n ‑sänö'anyɩ lä Kwlienyɔɔ' 'Nägädöö tɛɛtɛɛdä nä, a luë ‑lɔɔ' 'tänyɩɛɛ' dä 'kʋ ‑nä. Nn' bhɔɔ ‑yä.

¹⁴ 'Naa 'yɛkɛnɛɛ' kʋkʋsa nyɩ'anyɩ 'sää 'titi 'kwlɩkabhɩä ‑bhutukpä. ‑Mä ɩ ‑kʋ sɔɔ 'nɩ 'naa gbʋ nö'anyɩ ‑wʋ plɛkʋ ‑bha 'nɩ a nö'ö ‑wʋ 'sɩɩ cɛɛ‑ ‑mä ka ‑gbonö'ö 'kʋ 'nɩ a ‑klä'ä nynä n ‑näsä Laagɔɔ' ‑zuzu n plöö‑ bhlä nä. 'Nɩ sa 'kä bhlä Zozi Klisö 'titi klä nä, sɔɔ a ‑klä'ä.

¹⁵ Nä, anyɩa' ‑jäka ‑aa bhɔɔ lä 'kʋ mʋsä ‑kä nä, da ‑kʋ bhä ‑pɛɛ? ‑Dläfʋɛ n lü ylä anyɩa' ‑za. Kɩ kä bhä plöö‑ nynä ‑mä a yi bhä a yëku 'yi 'klʋ 'yɛlɩ 'nɩ a yi bhä 'naa ‑lɩɩ bhlëë' 'ŋʋʋ nä, a yi bhä sɔɔ nʋ.

¹⁶ 'Nɩ sɩ kʋ bhä ‑pɛɛ 'nɩ n yi bhä anyɩa' ‑zɔbhlɛgbänyɔ 'plöö? N sonö'anyɩ lä ‑nʋawlɛ nä, ɩɩ' ‑za bhä ‑a?

¹⁷ Nyɩkpaa' ‑lʋa ‑wa yinö'anyɩ lä nä, ‑nʋawlɛ 'nʋwa ‑kä pleyii ‑kʋ ‑a. 'Klüü wa tään lä nä, ɩmɩɩ‑ plöö‑ lä nynä ‑mä wa 'kanyɩ pleyi nyima ‑yä a kä'ä gwë ‑sä ‑yä a 'kwa mʋʋ.

¹⁸ 'Klüü ‑ɩ nää‑ lä nä, ɩmɩ plöö‑ lä nynä ‑mä, a tään 'kɔɔkɔ nynä a 'kä 'nää nʋ. Aa' tään ‑lä nynä ‑mä 'tänyɩ n ‑kʋ'anyɩ lä nëëdë nä, ‑lɔɔ ‑tɛɛ a 'kä 'nää nʋ.

¹⁹ 'Naa 'yuënyɩ‑, kä anyɩa 'kwlɩɩ‑ bhɩänö'ö ylä bʋkʋ. Ʋ bhɩänö'ö nynä ‑n ‑näsä 'ŋnɔ kä cii‑ ɔ 'kä gään 'nɩ 'kwlɩ bhɩänöɔ lä nä. 'Nɩ ‑lɔɔ' 'kwlɩɩ yi'i sɔɔ bhɩädä kʋ ‑aaa 'nɩ, n yi sɔɔ yibhë wɩa nynä ‑mä a yä Klisö 'mnö ‑glɛɛ.

²⁰ N ‑waa bhɛ kpänyɩ nynä ‑mä n 'kanyɩ ‑pɛpɛɛ yëku yi ‑yä n 'kanyɩ 'yigädasä soo ‑mä, sä n 'kɩ lä ‑klä nä, nn' ‑lätee sɔɔ yibhë.

Ablaamʋ 'ŋnɔ Salaa ‑yä Agaa 'sëploo

²¹ Anyɩmɔɔ‑ ‑waa lä nynä ‑mä a yi ‑lätee Moyizöö' ‑Jlämaa 'kʋ 'gë nä, a sonö'ö ‑wʋ saa. Sä ‑Jlämaa ci lä nä, aa' 'nu bhä sɔɔ ‑a?

²² ‑Jlämaa laa, Ablaamʋ ‑gään 'yuŋwadie 'sɔ. Geyuŋnɔɔ, Agaa, ɔ ‑yɔsɔ ‑gään ‑bhlo. 'Nɩ ɔ 'ŋnɔ Salaa 'titi ‑ɔɔ bhɔɔ lä geyuŋnɔ plöö‑ nä, ɔ ‑yɔsɔ ‑gään 'sɩɩ ‑bhlo.

²³ ‑Mä 'yuënä 'sɔ gälʋʋ nä, kʋ ‑kʋ lä nynä ‑mä, geyuŋnɔɔ' ‑lɔɔ nä, nyɩkpasä wa ‑gänöɔ. 'Ɩzä ɔ 'ŋnɔɔ Salaa' ‑lɔɔ nä, sä Laagɔ ylä bhlä nä, sɔɔ ɩ plöö‑ lä 'kʋ 'nɩ wa ‑gänöɔ.

²⁴ ‑Mä wälɩnɩ nä, ɩ ‑kä ‑zɔɔ ‑sälɩɩ' cikpɔ 'sɔ. 'Ŋwnɩa 'sɔ pana mɛnɩɩ' cikpɔ 'sɔ. Agaa' mɛnʋʋ ɔ pana lä nä, ʋmʋʋ‑ plöö‑ lä Sinayi‑kükëa 'wluu mɛnʋʋ. Agaa nä, geyuë ɔ gään.

²⁵ Agaa nä, ɔmɔ ‑ɔ plöö‑ lä ‑mɔɔ Aläbʋbhlɩ 'kʋʋ Sinayii‑kükëa. ‑Zɩkä nä, ɔ pana Zolizalɛmʋ‑duu ‑yä ʋʋ' 'yua 'sɔɔ geylüü wa ‑kʋ lä 'mnö nä.

²⁶ ‑Mä ‑ɔ plöö‑ lä ‑mɔɔ Laagɔduu' Zolizalɛmʋ‑duu 'nɩ ʋʋ' ‑wʋ lä geylüü' ‑kʋ nä, ʋmʋʋ‑ plöö‑ ‑a ‑nɔɔ.

²⁷ A ni Laagɔ‑bɔɔgʋʋ ci nynä ‑mä, ‑Mɔɔ mɔ ‑ɔ plöö‑ lä 'ŋnɔɔ lɔɔ‑ ‑läzä lä 'yu gää nä, ‑N nʋ yɩ ‑pʋpɛ! ‑Mɔɔ mɔ 'yugälʋʋ' 'mnöö' ‑läzä lä cɩcɩɔ nä, ‑N woo yɩ ‑jäkaa' ‑za! ‑Ɔnöza bhä? 'Ŋnɔɔ ‑lɔɔ wa cɛɛ‑ bhlä nä, Ɔ yi 'yuë bhutukpä gään 'nɩ, Ɔ yi 'ŋnɔɔ ‑lɔɔ ‑ɔ ‑nyoto ‑waa lä nä, 'kʋ zi.

²⁸ Nä anyɩ, bhelie ‑yä bhɛŋwnɩänyɩ‑, sä Laagɔ cii‑ bhlä nynä ‑mä wa yi Yizakö gään 'nɩ ɔ ‑gänöɔ lä nä, sɔɔ a ‑gänöɔ lä 'sɩɩ.

²⁹ ‑Mɔɔ ‑gɔgɔbhlää' nä, 'yuo Ablaamʋ ‑gänö lä ɔɔ' 'yɛkɛɛ 'mnö nä, kɔ ŋʋʋ‑ kpänyɩ ‑lɔɔ ɔ ‑gänö lä Laagɔɔ' 'wugɔɔ 'mnö nä, nyäkälɩɩ'. Nä, ‑pɛpɛɛ, sɔɔ ‑säkä ‑säkä ɩ plö lä 'sɩɩ 'kʋ.

³⁰ ‑Maa, säsä Laagɔ‑bɔɔgʋʋ cii‑ bhä? Ʋ lä ‑n 'tlü geyuŋnɔɔ ‑yä ɔ ‑yowli 'sɔ ‑mä, geyuŋnɔɔ' 'yuo ‑yä 'ŋnɔɔ‑ ‑wʋ lä geyuŋnɔ plöö‑ nä, 'sɔɔ ‑lä jaa ‑bhlo 'kʋ 'wlää.

³¹ Nä bhelie ‑yä bhɛŋwnɩänyɩ‑, ‑anyɩ, ‑aa ‑wʋ geyuŋnɔɔ' 'yuë plöö‑. 'Ŋnɔɔ ‑wʋ lä geyuŋnɔ plöö‑ nä, ɔɔ' 'yuë ‑a plöö‑ lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan