Bìoball air-loidhne

Galatɩnyʋä 3 - GOD - u2

‑Jlämaa' 'tänyɩɛ ‑yä pɔlötɛtɛɛ' 'tänyɩɛ

¹ Anyɩ Galatɩnyʋä nä, aa' ‑wʋ 'fika! ‑Ɔ ‑nyimü'anyɩ bhä 'wluu? 'Nɩ Zozi Klisö wa ‑bhoo lä 'kusu 'yii nä, ‑a panö'anyɩmɔ ylä wɩa nä!

² Kä n ylä'anyɩ yɩ wälɩklë ‑bhlo 'kʋ nynä ‑mä, Kplɔɔkplɔɔ‑wugɔɔ ‑ʋ kwlinö'anyɩ lä 'kʋ nä, Moyizöö' ‑Jlämaa 'mä a ŋʋʋ‑ 'klʋkpää nä ɩɩ' ‑zä ʋ kwlinö'anyɩ 'kʋ ‑a? ‑maa, pɔlötɛtɛɛ' 'Nägädöö ‑a nuu‑ lä nä, ɩɩ' ‑zä bhä ‑a?

³ 'Nɩ sɩ ‑kʋ bhä 'nɩ aa' bhä 'fika ‑a? A cie‑ ‑kɛ Kplɔɔkplɔɔ‑wugɔɔ' 'tɛtɩ 'mnö 'kʋ, 'nɩ a 'kä bhä 'yɛkɛɛ 'tɛtɩɩ 'mnö 'kʋ bhɩä ‑a?

⁴ Nʋnʋgbɩɩ 'fɩɩn ‑ɩ ‑nʋɔ lä anyɩ nëëdë nä, 'flɛ ɩ ‑nʋɔ bhä ‑a? Nn' bhobho ‑wʋ sɔɔ. Ɩɩ' ‑lä 'flɛ 'plö!

⁵ Laagɔ‑ nyɩ'anyɩ lä Kplɔɔkplɔɔ‑wugɔɔ nä, ɩɩ' 'yiziziogbɩ ‑ɩ nʋɔ lä anyɩ nëëdë nä, ‑Jlämaa 'mä a ŋʋʋ‑ 'klʋkpää nä, 'ɩɩ ‑zä ɩ nʋɔ ‑a? ‑maa, 'Nägädöö a ‑känö lä pɔlötɛtɛ 'kʋ nä, ɩɩ' ‑za ‑lɔɔ' 'yiziziogbɩɩ ‑nʋɔ ‑a?

‑Jlämaa' gbä ‑wʋ 'nɩ nyɩkpɔ 'kä 'yigëënyɔ 'plö

⁶ Ablaamʋ nä, kɔ ‑kä bhlä Laagɔɔ' pɔlötɛtɛ nä, ɩɩ' ‑zä Laagɔ lɔɔ‑ lä 'yigëënyɔ.

⁷ Nä wälɩklënä, ɩ ‑ŋwa 'kʋ nynä ‑mä a 'nua 'mʋ. Kɩ plöö lä nynä ‑mä nyɩkpaa‑ ‑kä lä pɔlötɛtɛɛ nä, wamää‑ plöö‑ lä Ablaamʋʋ' 'lɔlʋnyʋä 'titi.

⁸ 'Nɩ Laagɔ‑bɔɔgwɩɩ yɩ wɛzä ci. Ɩ cio nynä ‑mä ‑waa ‑wʋ lä 'Zufʋnyʋä plöö‑ nä waa' pɔlötɛtɛɛ 'mnö ‑mɔɔ Laagɔ 'kä ghlää ‑yä ʋ 'kwa 'yigëënyʋä laa. Ɩ ‑jɩjlɔ nynä ‑mä, Laagɔ ‑soo Ablaamʋ, ʋ lä 'Bhlɩɩ 'fɩɩn 'mnö nyɩkpaa, ‑mɔɔ 'mnö wa 'kä lä ghlää ‑yä wa 'kä 'nyupälɩ 'ni.

⁹ Nä, nyɩkpaa 'fɩɩn‑ ‑kä lä pɔlötɛtɛ nä, Laagɔ yiwa 'nyu 'pä wa ‑yä pɔlötɛtɛ‑känyɔ Ablaamʋ 'sɔ.

¹⁰ ‑Ɛɛɛ, nyɩkpaa 'fɩɩn‑ ŋʋʋ‑ lä waa' pɔlötɛtɛɛ ‑Jlämaa 'mnö nä, 'kplë yʋwa slää. ‑Mɔɔ Laagɔ‑bɔɔgwɩɩ 'mnö nä, kɩ ‑jɩjlɔ lä nynä ‑mä, ‑Jlämaa 'mnö wälɩɩ 'fɩɩn, nyɩkpɔɔ' lɔɔ ‑ɔɔ 'ŋʋɩ ‑wʋ lä 'tänyɩ 'fɩɩn 'mnö 'klʋkpä nä, ‑lɔɔ' nyɩkpɔɔ 'kplë yɔ slää.

¹¹ 'Nɩ 'zaazɩ nä, ‑Jlämaa' 'klʋkpä‑ŋʋlɩɩ' gbä ‑wʋ 'nɩ nyɩkpɔ 'kä Laagɔ dëlü 'yi gëë. Kɩ ‑jɩjlɔ lä 'sɩɩ nynä ‑mä, nyɩkpɔɔ' lɔɔ‑ ‑kä lä Laagɔɔ' pɔlötɛtɛ nä, ɔ ‑glö yɩ 'yigëënyɔ nä, ɔɔ' pɔlötɛtɛɛ yio 'pʋpʋɛ 'nyɛ.

¹² ‑Mä ‑Jläma nä, a ‑yä pɔlötɛtɛɛ 'sɔ mʋʋ ‑wʋ yëkuu'. Kɩ ‑jɩjlɔ lä nynä ‑mä, nyɩkpɔ lɔɔ‑ ŋʋ lä ‑Jlämaa 'fɩɩn 'mnö wälɩklüü 'klʋkpä 'nä, ɔmɔ, ‑Jlämaa yio 'pʋpʋɛ 'nyɛ.

¹³ ‑Mä Klisö nä, kɔ bhlüü‑ lä ‑anyɩa ‑muzue 'kʋ 'nɩ ɔ yi‑anyɩ lä ‑Jlämänaa' ‑muzuee 'mnö ‑sä. Kɩ ‑jɩjlɔɔ lä nynä ‑mä, nyɩkpɔɔ' lɔɔ‑ 'kuu‑ lä su 'yii nä, ɔ ‑glö 'kplünyɔ.

¹⁴ Kɩ plöö‑ lä sɔɔ 'kʋ ‑yä nyɩkpaa' ‑lʋa ‑wʋ lä 'Zufʋnyʋä plöö‑ nä, wa 'kä Zozi Klisö 'mnö ghlää ‑yä wa 'kä Ablaamʋ 'bhisäkʋ 'nyʋpälɩ 'ni. Naa, ‑anyɩa pɔlötɛtɛɛ 'mnö, ‑a yi ‑mɔɔ ghlää 'nɩ, sä Laagɔ cii‑ lä nynä ‑mä ʋ yi‑anyɩ 'nyɛ nä, ‑a yi sɔɔ 'ni. Ɩmɩɩ‑ plöö‑ lä Kplɔɔkplɔɔ‑wugɔɔ.

Ablaamʋʋ' 'lɔlʋnyʋa 'mää‑ plöö lä Klisö ɩyä ‑wa ‑kä lä pɔlötɛtɛ nä

¹⁵ Bhelie ‑yä bhɛŋwnɩänyɩ‑, n 'kä ‑mää 'ylʋzɔɔ' panalɩ 'kʋ 'bhlü ‑yä n 'kanyɩ soo. ‑Anyɩa ‑lɔɔ 'mnö nä, nuwälɩɩ' lɩɩ nyɩkpɔ ‑të lä nä, waa' ‑sɩɩ ‑wʋ ‑lɔɔ, 'nɩ waa' 'pänɩ ‑wʋ 'sɩɩ 'kʋ.

¹⁶ Naa, 'klüü Laagɔ cii‑ lä nynä ‑mä ʋ yi nʋ nä, Ablaamʋʋ' 'lɔlʋnyʋä‑ ʋ sä bhlä. Ɩ ‑wʋ cio nynä ‑mä, nyɩkpaa ‑bhutukpää' 'lälɩ. 'Lɔlʋ ‑bhlo ʋ ‑zɛɛ lä, ʋ lä ‑Mɔɔ ‑yä ‑naa 'lɔlʋ. Kɩ plöö‑ lä nynä ‑mä Klisö ʋ sä bhä.

¹⁷ A ni sä n ylä lä nynä n 'kä ci nä, 'klüü lɩɩ Laagɔ yä lä sä 'ŋʋ nä, 'ylʋbɔɔ' gwlɩ ‑ngbüü' 'ci ‑mɔɔnä ‑yä 'ylʋbɔɔ' glʋ 'nɩ 'kʋgbä (430) plöö‑ yɩ 'fɩa 'nɩ Moyizö ‑Jlämaa ŋënɩ‑ lä kätää'. Nä, sä Laagɔ yä bhɛ ‑lä ‑lɔɔ wälɩklüü sä 'ŋʋ nä, Moyizöö' ‑Jlämaa 'nɩ ‑läyɩɔ ‑lɔɔ ‑sä.

¹⁸ ‑Jläma 'mää‑ gä bhä ci nynä ‑mä ‑a yi Laagɔɔ' jaa lü nä, sä Laagɔ cii‑ lä nynä ʋ yi nʋ nä, sɔɔ bhɛ ‑pɛ gba ‑kä. ‑Bhlɛ sä Laagɔ cii‑ bhlä nynä ‑mä ʋ yi nʋ nä, sɔɔ ʋ ‑ghlää lä 'mnö 'nɩ ʋ nyɛɛ‑ lä Ablaamʋ 'nää.

¹⁹ Nä ‑Jlämaa' gba bhä ‑pɛɛ? Ka 'pänöɔ‑ lä ‑lɔɔ 'kʋ ‑yä a 'kä gbä 'ylʋzɔkʋnyʋää' 'focloo 'kä yi nio. A yi ‑kʋ ‑aaa 'nɩ Ablaamʋʋ' 'lɔlʋnyɔɔ Laagɔ sä bhlä nä, ɔ yi 'wlʋ. 'Nɩ ‑Laagɔzizii nä, nëkʋcinyɔ 'kʋ ɩ ‑ghlää lä 'nɩ ɩ pana‑ lä ‑Jlämaa.

²⁰ Nä, nëkʋcinyɔ nä, nyɩkpa 'sɔ pää' ɔ kʋ lä. ‑Mä Laagɔ ‑bhlü lä ‑bhlo nä ʋʋ' tään ‑wʋ nëkʋcinyɔ.

Moyizöö' ‑Jlämaa' gba

²¹ Nä kɩ sä bhä ‑zɔɔ nynä ‑mä ‑Jlämaa ‑yä sä Laagɔɔ' cii‑ lä nä, sɔɔ' mʋʋ ‑wʋ yëkuu' ‑a? Yio! ‑ɛɛ ‑wʋ sɔɔ. ‑Mä kä ‑Jlämaa kä bhä zëkpë 'titi 'nyɛ nä, nyɩkpaa 'fɩɩn 'ga bhlä 'klʋkpää' 'ŋʋ nä, wa yi bhä Laagɔ dëlü 'yigëënyʋä 'plö.

²² ‑Mä kä Laagɔ‑bɔɔgʋʋ sonö‑anyɩ lä nynä ‑mä, gbenyenyii' 'päwaa 'mää‑ pɩä lä 'kɔɔnʋ 'fɩɩn 'kʋ. Kɩ ‑kʋ lä sɔɔ ‑yä nyɩkpaa ‑kä lä Zozi Klisöö' pɔlötɛtɛ nä, sä Laagɔ cii‑ bhlä nynä ʋ yiwa 'nyɛ nä, wa 'kä sɔɔ 'ni.

²³ 'Fɩa ‑yä ‑a 'gä pɔlötɛtɛɛ' 'tänyɩɛɛ plä nä, kä ‑Jlämaa ŋʋ‑anyɩ bhä ‑jɩɩ' 'nɩ ‑a ‑bɛɛ bhlä Laagɔ ‑yä ʋ 'ka‑anyɩ ‑lɔɔ' pɔlötɛtɛɛ pana.

²⁴ Nä ‑Jlämaa ka ‑bɛnö‑anyɩ bhlä 'klʋ 'nɩ ‑a ‑bɛɛ bhlä Klisöö' yi‑tänyɩɛ ‑yä ‑anyɩa pɔlötɛtɛɛ 'kä gbä ‑a 'gä Laagɔ dëlüü 'yigëënyʋä 'plö.

²⁵ ‑Pɛpɛɛ nä, pɔlötɛtɛɛ' 'tänyɩɛ 'mnö ‑a ‑kʋ ylä nä, ‑aa tään yɩɔ 'klʋ ‑bɛɛnyɔ.

²⁶ ‑Ɛɛɛ, pɔlötɛtɛɛ‑ 'jɛnyɩnö'anyɩ lä a ‑yä Zozi Klisö 'sɔ nä, ɛmɛ 'mnö, anyɩ 'fɩɩn plöö‑ yɩ Laagɔɔ' 'yuë.

²⁷ Nä, anyɩmɔ 'fɩɩn ‑ɔ ŋʋʋ‑ lä Klisöö' 'ŋnöö 'mnö 'nyu 'wlu nä, a ‑yä Klisö 'sɔ yä 'jɛnyɩ, nä sɔ ‑kʋ ylä nä, sɔɔ a ‑kʋ ylä 'sɩɩ.

²⁸ Kɩ yɩɔ lä plöö‑ nynä ‑mä ‑nɔnɔ plöö‑ 'Zufʋyu 'nɩ ‑nɔnɔ plöö‑ 'Glɛköyu. ‑Nɔnɔ plöö‑ geyu 'nɩ ‑nɔnɔɔ' ‑wʋ geyu plöö‑ ‑o. ‑Nɔnɔ plöö‑ ŋwadi 'nɩ ‑nɔnɔ plöö‑ 'ŋnɔ. Kɩ plöö‑ ylä nynä ‑mä Zozi Klisö 'mnö, anyɩ 'fɩɩn plöö‑ yɩ ‑bhlo.

²⁹ A kä Klisöö' lʋä plöö‑ nä, anyɩ‑ plöö‑ lä Ablaamʋʋ' 'lɔlʋnyʋa. Nä, jaa ‑anö wälɩ Laagɔ cii‑ lä nä, anyɩ ʋ 'ka lä 'nyɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan