Bìoball air-loidhne

Galatɩnyʋä 2 - GOD - u2

Zolizalɛmʋduu' 'cɔcɩnyʋa yä 'kʋ 'ŋʋnöɔ

¹ ‑Mä, 'ylʋbɔ 'kʋgbä ‑mɔɔnä plöö‑ 'fɩa ‑käkäkä, 'nɩ n yi lä Zolizalɛmʋduu' 'ylɩbhɔ n ‑yä Banabasö 'sɔ. N mʋ bhlä nä, n ‑fämʋ 'sɩɩ Titö.

² Nä, sä Laagɔ panö'ö lä nä, sɔɔ n nää‑. Nyɩkpaa' ‑wʋ lä 'Zufʋnyʋä plöö‑ nä, sä n ‑sänʋwa lä Kwlienyɔɔ' 'Nägädöö nä, n ‑mʋ lä ‑mɔɔ Zolizalɛmʋduu' nä, kä n ‑sää sɔɔ ‑mɔɔ 'cɔcɩnyʋa. Sä nn' 'ylä bhɔɔ lä nynä ‑mä 'naa lebhee n yä bhlä bhɔ 'nɩ n ‑kʋ lä ‑lätee 'kʋ nä, ɛɛ' kä lä 'nyuu bhlüü‑ nä, kä n ‑mʋ 'nɩ n ‑yä ‑mɔɔ' 'cɔcɩɛ 'mnö 'klʋkpää' kʋnyʋa 'sɔ 'nii‑.

³ 'Nɩ 'naa 'kʋnämʋnyɔɔ Titö ‑ɔ plöö‑ lä 'Glɛköyuo nä, nyɩkpɔ 'nöɔ ‑wʋ kutu kutu ‑klä nynä ɔ ‑döö 'kʋ.

⁴ ‑Mä ‑kpläkplö bhelie ‑kʋ‑anyɩ bhä nëëdë nynä ‑anyɩa ‑zɔbhlɛgbänyʋä. Ɩyä sä Zozi Klisö ‑sanyɩ lä ‑Jlämaa' geylüü 'mnö nä, wa 'kä sɔɔ bɩä. Wa ylä bhä nynä ‑mä wa 'ka‑anyɩ ‑Jlämaa' 'klʋkpä‑ŋʋlɩɩ' geyulɛɛ' 'ŋʋ.

⁵ Nä ‑a 'nʋwa ‑wʋ 'kwläkwlä 'sää 'casɩ nyɛɛ‑. Kä ‑a ‑nʋ lä sɔɔ ‑yä 'Nägädöö' ‑nʋawlɛɛ 'mɛ a 'kä pleyi bhɛnö.

⁶ 'Cɔcɩɛɛ' ‑tëbhu‑känyʋa 'kädʋä ‑kʋ bhä ‑lɔɔ. Waa' ‑tëbhu‑käälɩɩ 'mɩɩ bhɔɔ 'sɩɩ kpänyɩ wälɩ plöö‑. Sä Laagɔɔ' gbäzö ‑wʋ lä nyɩkpaa' nä, wa nö'ö ‑wʋ ‑soo nynä ‑mä n nʋ wälɩklëë' 'cënänä.

⁷ ‑Mä wa ‑bɩä lä wälɩnɩ nä, wa nii‑ 'yi nynä ‑mä ‑waa ‑wʋ lä 'Zufʋnyʋä plöö‑ nä, Laagɔ ‑lobho'o 'zaazɩ nynä ‑mä n ‑sänʋwa Kwlienyɔɔ' 'Nägädöö. 'Nɩ Laagɔ ‑lobho lä Pɩɛlö nynä ‑mä ɔ ‑sänɩ 'Zufʋnyʋa.

⁸ Laagɔ‑ ‑gbä lä 'nɩ Pɩɛlö plöö‑ lä ʋʋ' lobho lobhonyɔ 'nɩ ɔ ‑sänɩ lä 'Zufʋnyʋä, 'nɩ ‑amʋ n plöö‑ lä ʋʋ' lobho lobhonyɔ 'nɩ n ‑sänɩ lä ‑mɔɔ 'yigäda‑bhlɩɩ 'mnö nyɩkpaa.

⁹ Zakö ‑yä Pɩɛlö ‑yä Zään 'sɔ nä, wamää‑ plöö‑ lä ‑tëbhu ‑käänyʋa 'cɔcɩɛ 'tënö‑ lä nä. 'Nɩ 'nää Laagɔ nyɛɛ'ɛ lä nä, wa ‑yibënöa. Ɩ ‑kä 'ŋnö nä, n ‑yä Banabasö 'sɔ kä wa ‑tlaa‑anyɩ wlɩ ‑yä wa 'ka‑anyɩ pana nynä ‑tëbhuu Laagɔ nyɩ‑anyɩ lä nä, wa ‑yʋsɔ 'sɔ plöö‑ 'zaazɩ. Kɩ ‑kʋ bhɛ lä nynä ‑mä ‑anyɩ‑ 'gä mʋ ‑yä ‑a 'gä 'yigädabhlɩɩ 'mnö nyɩkpaa mʋʋ, ɩyä wamä wa 'kä 'Zufʋnyʋa mʋʋ.

¹⁰ ‑Mä wa ‑sonö‑anyɩ nynä ‑a gä mʋ nä ‑a 'nä bë lä 'cɔcɩɛ 'mnö ŋäzönyʋaa' wälɩ 'kʋ. 'Nɩ ‑lɔɔ' 'klüü wa 'ylänö‑anyɩ lä nä, n ‑nʋɩ 'nägäsä.

Atɩɔsöduu' 'cɔcɩnyʋa yä 'mʋ doo

¹¹ ‑Mä 'tänyɩɩ Sefasö ‑yi lä Atɩɔsöduu' nä, ɔ ‑nʋ wälɩklë 'nɩ n 'nöa ‑wʋ ŋomä 'nɩ n ‑fɔɔ nëkʋ ‑jlëë'. Ɔɔ' bhɔɔ 'nää ‑nʋ.

¹² Sɩɩ ‑kʋ bhlä naa, nyɩkpaa Zakö ‑lobho bhlä ‑mɔɔ Atɩɔsöduu' nä, 'fɩa ‑yä wa 'kä ‑mɔɔ yi nä, 'cɔcɩnyʋa‑ bhɔɔ lä 'Zufʋnyʋä plöö‑ nä, kä Sefasö ‑yʋwa 'sɔ lüü bhä 'kʋ. ‑Mä 'tänyɩ bhelia Zakö ‑lobho lä nä wa ‑yi ylä nä, 'cɔcɩ‑bhelia ‑waa ‑wʋ lä 'Zufʋnyʋä plöö‑ nä, kä Sefasö ‑sʋwa bhɛ gwë. Ɔ ‑yʋwa nämʋ bhɛ 'kʋ. Ɔ gu bhɛ 'Zufʋnyʋa' ‑jlämaa' ‑za nä, ɔ ‑yʋwa 'sɔ lüü bhɛ 'kʋ.

¹³ 'Nɩ ‑mɔɔ' bhelia 'fɩɩn‑ plöö‑ bhlä 'Zufʋnyʋä nä, wa nämʋ‑ 'sɩɩ Sefasö 'bhisäkʋ ‑lɔɔ' ‑kpläkpla 'mnö. 'Nɩ Banabasö 'titi n ‑yɔsɔ ‑mʋ bhlä nä, wa ‑nyimüo‑ 'wlu 'nɩ ɔ nämʋ‑ 'sɩɩ sɔɔ.

¹⁴ ‑Mä n nii‑ lä 'yi nynä ‑mä sä Sefasö nää bhɛ lä nä, sɔɔ ‑yä 'Nägädöö' ‑nʋawlɛɛ 'sɔ ‑mʋʋ bhɔɔ yëkuu nä, kä n sonö'ɔnyɩ nyɩkpaa 'fɩɩn 'klʋ. N nä ‑mä, ‑mɔɔ plöö‑ lä 'Zufʋyu nä, ‑waa ‑wʋ lä 'Zufʋnyʋä plöö‑ nä, ‑n nää‑ ‑kɛ 'fɩa wamä 'bhisäkʋ 'nɩ ‑nn bhɔɔ 'Zufʋnyʋaa' ‑jlämaa 'kʋ gëë‑. 'Nɩ ‑pɛpɛɛ, ‑n tään ylä nynä ‑mä bhelia ‑wʋ lä 'Zufʋnyʋä plöö‑ nä, 'sëëti ‑mä wa nää 'Zufʋnyʋa bhisäkʋ. ‑Ɔnöza bhää?

Pɔlötɛtɛɛ ‑bhlo puë lä nyɩkpaa 'fɩɩn

¹⁵ ‑Anyɩ nä, 'Zufʋnyʋä ‑a plöö‑ lä. 'Yigädäbhlɩ 'kʋʋ nyɩkpaa ‑waa ‑wʋ lä ‑Jläma ‑yi nä, wamä ‑aa ‑wʋ plöö‑.

¹⁶ 'Nɩ, ‑a ‑yi 'sɔɔ nynä ‑mä pɔlötɛtɛɛ nyɩkpɔ ‑kä lä Zozi Klisöö' ‑za nä, ɛmɛɛ‑ yi gbä 'nɩ Laagɔ yi lä ‑lɔɔ' nyɩkpɔ wloo nynä ‑mä 'yigëënyɔ. Moyizöö' ‑Jlämaa' 'kʋgëlɩɩ gbä ‑wʋ 'nɩ nyɩkpɔ 'kä 'yi gëë. ‑Nɩnɩ ‑kä 'ŋnö 'nɩ ‑anyɩ ‑mä 'sɩɩ, ‑a ŋʋʋ‑ lä ‑anyɩa pɔlötɛtɛɛ Klisö 'kʋ ‑yä ‑a 'gä 'yigënyʋä 'plö. Moyizöö' ‑Jlämaa' 'klʋkpä‑ŋʋlɩɩ 'mnö ‑aa ‑wʋ ‑ghlää. Laagɔ dëlü nä, ‑Jlämaa 'klʋkpä‑ŋʋlɩɩ 'mnö ‑mɔɔ nyɩkpɔɔ' ghlää ‑wʋ 'nɩ ɔ 'kä 'yi gëë.

¹⁷ ‑Anyɩ na, kä ‑a tään lä nynä ‑mä ‑a gä kplɔɔ Klisöö' 'ŋnöö 'mnö. 'Nɩ nyɩkpa ka‑anyɩ wloo nynä ‑mä nyenyinyʋä nä, sɩ sä bhä ‑zɔɔ? Kɩ plöö‑ bhä nynä ‑mä Klisö 'mnö nyenyii ghlää bhä ‑a? Yio, ɩɩ' ‑wʋ sɔɔ ‑kʋ!

¹⁸ ‑Jlämaa n yä bhɛ lä kee 'täkä nä, n ka bʋkʋ 'mnö 'ylɩbhɔ‑ nä, n yëku n klaa lä gbʋ.

¹⁹ Moyizöö' ‑Jlämaa n ‑bha ylä 'mnö nä, kɩ plöö‑ lä nynä ‑mä n yä aa' ‑za 'ku, 'nɩ n ‑kʋ ylä zëkpë 'kʋ Laagɔɔ' ‑za, 'nɩ n ‑yä Klisö 'sɔ yä ylä 'sɩɩ 'kusuu 'yi 'kuu.

²⁰ N ‑kʋ ylä zëkpë 'kʋ nä, ‑amʋ 'titii‑ yɩɔ ‑kʋ ‑mä, Klisö ‑kʋ'ʋ ylä 'mnö. Nä, ‑mää 'ylʋzɔɔ', 'naa zëkpënä 'mnö Laagɔ ‑Yowlii' pɔlötɛtɛ n ‑kä ylä. Kɔ ‑wamänö'ö 'nɩ ɔ nyɛɛ‑ ɔ yëkuu' zëkpë 'naa ‑za.

²¹ 'Nɩ Laagɔɔ' 'nää 'kädänä ʋ nyɛɛ'ɛ lä nä, n 'ylä ‑wʋ nynä ‑mä a 'plö 'flɛ. ‑Ɛɛɛ, Moyizöö' ‑Jlämaa 'mää‑ gä gbä 'nɩ nyɩkpɔ kä bhä Laagɔ dëlü 'yi gëë nä, kä Klisö kuu‑ lä 'flɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan