Bìoball air-loidhne

Galatɩnyʋä 1 - GOD - u2

Bhäälɩ

¹ ‑Amʋ Pɔlʋ nä, nyɩkpɔ 'kʋ nn' ‑wʋ ‑ghlää, 'nɩ nyɩkpɔ‑ nö'ö ‑wʋ 'sɩɩ ‑lobho. ‑Mä Zozi Klisö ‑yä ‑a 'Bä Laagɔ ‑ɔ ‑gälɩä lä Zozi Klisö 'kuëë' nä, wamää‑ ‑lobho'o lä. Nä ‑amʋʋ‑ jɩjlä'anyɩ lä.

² Bhelia ‑yä bhɛŋwnɩa ‑wa ‑yä ‑amʋ 'sɔ ‑kʋ lä ‑mää nä, wa ‑yä ‑amʋ sɔɔ‑ 'jɛnyɩ 'nɩ ‑a ‑jɩjlä'anyɩ lä 'bɔɔgʋnʋ, anyɩ ‑mɔɔ Galatɩ‑bhlɩɛ 'mnö 'cɔcɩnyʋa.

³ ‑A 'Bä Laagɔ, ɩyä ‑anyɩa Kwlienyɔɔ Zozi Klisö pa'anyɩ 'nyu, ɩyä wa 'nyɩ'anyɩ 'kʋ wɔtɔlɩ.

⁴ Klisö nä, kɔ ‑sä lä ɔ yëkuu' zëkpë ‑yä ɔ 'ka‑anyɩ ‑anyɩa nyenyii nëë' ‑sä. Ɔ ‑sanyɩ 'kɔɔnʋ 'mnö gbenyenyii' 'päwa nëë'. Sɔɔ ‑a 'Bä Laagɔ ylä bhlä.

⁵ 'Klʋagbaa ŋëë Laagɔ 'kɔɔkɔɔ ‑za! Ɩ kʋ sɔɔ!

'Nägädöö ‑bhlü ‑bhlo

⁶ Laagɔ laa'anyɩ lä nä, ‑jlɔ a nii‑ lä Klisö 'mnö. Nä, sɩ 'plömɔ ‑plömɔ lä 'kʋ 'nɩ a 'täkä‑ lä sɔɔ 'fäfä Klisö kee, 'nɩ a poo lä 'nägädöö' 'yigädalɩɩ 'nyukwli nä, sɔɔ 'ninie'e plɛkʋ!

⁷ N sonö'anyɩ nynä 'Nägädöö' 'yigädalɩɩ ‑wʋ bʋkʋ ‑kʋ. Nyɩkpa‑ ‑yi lä 'nɩ ‑wa 'bhläbhlänö'anyɩ lä wälɩ 'wluu. Kwa ghlää lä sɔɔ ‑yä wa 'kä Klisöö 'Nägädöö 'cɩcɩ.

⁸ ‑Mä kä n mʋ'anyɩ ylä soo ‑kää nynä nyɩkpɔ ka'anyɩ ‑mɔɔ yëku ‑yi nä, ‑anyɩ 'titii‑ yi bhä 'sɩɩ ‑mɔɔ yi ‑o, ‑Laagɔzuzu yi bhä kwlii ‑o, 'Nägädöö ‑lɩɩ ‑a ‑sänö'anyɩ lä nä, nyɩkpɔɔ' lɔɔ‑ gɩ 'kʋ mɩä‑ 'nɩ ‑ɔ ga'anyɩ 'nägädöö 'yigädalɩɩ ‑sää nä, ‑lɔɔ' nyɩkpɔɔ 'kplë yɔ slää!

⁹ ‑A ya'anyɩ wɛzä soo, 'nɩ ‑pɛpɛɛ n cii ylä bʋkʋ nynä ‑mä, 'Nägädöö ‑a ‑sänö'anyɩ lä nä, nyɩkpɔ kɩ 'kʋ mɩä‑ 'nɩ ɔ ka'anyɩ 'nägädöö 'yigädalɩɩ ‑sää nä, ‑lɔɔ' nyɩkpɔɔ 'kplë yɔ slää!

¹⁰ 'Klünö n ci lä nä, nyɩkpa kä'ä wamä nä, ɩɩ' ‑zä n cii bhä ‑a? Yio! Laagɔ kä'ä wamä nä, ɩmɩ n tään. Nyɩkpaa' ‑wawʋ n kä bhä tään nä, nn' ‑lä bhɔɔ ci nynä ‑mä n 'kä Klisöö' gänʋnyɔ 'plö.

Säsä Pɔlʋ 'plöö‑ bhä Klisöö' lobho lobhonyɔɔ
( Nʋnʋ 22.3‑16 ; 26.9‑20 ; 9.1‑20 , 23 , 30 )

¹¹ Bhelie ‑yä bhɛŋwnɩänyɩ‑, kä n sonö'anyɩ lä. Kwlienyɔɔ' 'Nägädöö n ‑sänö'anyɩ lä nä, ‑ɛɛ ‑wʋ 'ylʋzɔkʋnyʋää' wlʋa wlʋa lɩɩ‑.

¹² Nyɩkpɔ‑ nö'ö 'mɩ ‑wʋ 'sɩɩ cɩa, 'nɩ nyɩkpɔ‑ nö'ö 'mɩɩ ‑wʋ ‑të. ‑Mä Zozi Klisö‑panö‑ 'mɩɩ.

¹³ 'Naa ‑gɔgɔbhlää' zëkpëa, a nu sä nyɩkpa ci lä aa' ‑za nä. 'Zufʋ‑jlämaa' 'kʋgëlɩɩ 'pɛlʋʋ' nä, 'nn bhɔɔ 'kʋ mʋsä ‑kä. Laagɔɔ' 'cɔcɩɛ 'mnö nyɩkpaa kä n klʋwa bhä kpänyɩ nyenyisä. 'Nɩ n tään bhä 'sää 'titi nynä n 'kä 'cɔcɩɛ nuë.

¹⁴ 'Zufʋnyʋa' ‑jläma 'kʋgëlɩɩ 'mnö, kä n ‑zi bhä ‑a ‑liesɩ ‑bhutukpä 'kʋ. 'Nɩ 'bäsɩɩ ‑lɔɔ' 'pɛlʋʋ 'mnö nä, n zi bhä 'sɩɩ ‑abhunyʋää' ‑lɛɛ bhutukpä 'kʋ.

¹⁵ ‑Maa, wa nö'ö ‑lätee ‑gään 'nɩ, ‑ɔ ‑sä'ä 'nɩ ‑ɔ ŋʋʋ'ʋ lä 'naa dä nä, ɔɔ' plɛkʋmɛnɔɔ 'mnö, 'tänyɩɩ ɔ lä'ä ylä nä,

¹⁶ kɔ panö'ö ɔ ‑Yowli. Kɔ panö 'mɔɔ lä ‑yä, lowubhlɩ 'kʋʋ nyɩkpa, n 'kwä ɔ ‑Yowlinɔɔ' yëkuu' wälɩɩ soo. Nä nn' ‑wʋ nyɩkpɔ dɩgälɩ 'ylää, 'nɩ nn' ‑wʋ 'sɩɩ nyɩkpɔ 'kʋ ‑kä,

¹⁷ 'nɩ nyɩkpaa' ‑lʋa Klisö laa‑ lä tɛɛ ɔɔ' lobho lobhonyʋa nä, n 'nʋwa ‑wʋ 'sɩɩ Zolizalɛmʋduu' yëku ‑mʋ. Kä n ‑mʋ Aläbʋbhlɩ 'kʋ, 'fɩa 'nɩ n yi Damasöduu' 'ylɩbhɔ.

¹⁸ 'Ylʋbɔ taa plöö‑ 'fɩa 'nɩ n ‑mʋ lä Zolizalɛmʋduu' ‑yä n 'kä bhɛ Pɩɛlö yibhë. N ‑kʋɔ yëku 'sɔlɩcü 'sɔ.

¹⁹ ‑Lɔɔ n 'nii‑ lä Kwlienyɔɔ ɔ bheli Zakö 'yi. Nn' yɩɔ bʋkʋ ‑mɔɔ Klisöö' lobho lobhonyʋaa' 'yigädalɔɔ nii‑.

²⁰ Wälɩnɩ n jɩjlä'anyɩ lä nä, ɩ ‑glö nyaasäsä. Laagɔ dëlü n ‑kʋ 'nɩ n cii lä, ‑mä 'nn ci ‑wʋ ‑kpläkplö wälɩ.

²¹ ‑N ‑bha lä ‑lɔɔ nä, kä n ‑mʋ Siliibhlɩ 'kʋ 'nɩ n ‑mʋ 'sɩɩ Silisiibhlɩ 'kʋ.

²² ‑Mä Zudee‑lëkpëa 'mnö 'cɔcɩnyʋa nä, wa nö'ö bhɔɔ 'nägäsä ‑yi.

²³ Wa yä bhɛ 'flɛ 'naa yëkuu' wälɩ 'nu. Wa yä bhɛ 'nu nynä ‑mä, a ni nyɩkpɔɔ ‑ɔ ‑gbä 'nɩ 'cɔcɩnyʋa nii‑ lä nyäkälɩ 'kädɩ ‑lɔɔ' 'tänyɩɛ 'mnö nä. ‑Anyɩa pɔlötɛtɛɛ ɔ ylää‑ bhä nynä ‑mä ɔ 'kä nuë nä, ɔ ‑yä yɩ ‑pɛɛ ɛɛ' 'Nägädöö' bienyɔɔ' 'plöö.

²⁴ Ɩ ‑kä bhɛ 'ŋnö 'nɩ 'cɔcɩnyʋä fään bhä Laagɔ 'ŋnu 'naa ‑za.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan