Bìoball air-loidhne

Filipʋ‑dunyʋä 3 - GOD - u2

Sä nyɩkpɔ kä ‑kʋ 'nɩ ɔ yi lä Laagɔ dëlüü 'yi gëë nä

¹ Bhelie ‑yä bhɛŋwnɩänyɩ‑, 'klüü ‑ɩ ‑too ylä ‑mɔɔ 'nɩ n 'kanyɩ lä soo nä, ɩmɩɩ‑ plöö‑ lä nynä ‑mä, a ‑yä Kwlienyɔ sɔɔ' 'jɛnyɩlɩɩ 'mnö nä, ‑pʋpɛ kʋ'anyɩ pleyii. Wälɩɩ' ‑lɩɩ n ya'anyɩ wɛzä lä jɩjlä nä, n yi'anyɩ 'kɔɔkɔ ɩɩ' ‑säkä ‑säkä jɩjlä. Ɩɩ' ‑wʋ 'naa ‑za 'tɛ. Anyɩa ‑za nä, ɩ ‑ŋwa 'kʋ nynä n kla'anyɩ sɔɔ.

² Nyɩkpaa' ‑lʋa ‑wa nämnö lä gbenyenyii 'mnö nä. Kä wa ‑kʋ lä nynä goyuë. 'Kʋ ‑döölɩɩ ‑jlämaa waa' ‑saa ‑wʋ nëkʋ nä, a luënʋwa ‑kä!

³ Wa kä cii‑ nynä ‑mä nyɩkpa döö‑ 'kʋ nä, ‑anyɩ lä. ‑Anyɩ bʋbɔ lä Laagɔ ʋʋ' 'Wugɔɔ 'mnö. ‑Anyɩ, Zozi Klisö‑ ‑a täkpɔ lä 'mʋ nä, ɔmɔ ‑a gëë 'kʋ. ‑Aa lä mii 'nɩ ‑a 'gä ‑a yëku dë 'tɛɛ.

⁴ ‑Amʋ nä, n yi bhä ci nynä ‑mä n 'kä n yëku dë 'tɛɛ. Nyɩkpaa' ‑nänʋä ‑kʋ ‑lɔɔ 'nɩ sä wa 'tɛɛ‑ lä wa yëku dë nä wa täkpɔ sɔɔ 'mʋ. Sɔɔ n kä bhä n yëku 'kʋ 'bhlü nä, 'naa wälɩ yi bhä mɛmä 'nɩ n yiwa bhä 'kʋ zi.

⁵ ‑Ɔnöza bhää? Wa ‑gänö'ö lä nä, ɩɩ' ‑ngbaatäna ylʋʋ 'kʋ, kwa döö'ö 'kʋ. N ‑glö 'Yizlɛyuu' 'yɛkɛ 'yɛkɛ. ‑A tɩtɩää' ‑lɔɔ wa laa lä Bɛzamɛɛ nä, ɔɔ' 'lɔlʋkpä 'kʋʋ nyɩkpɔ‑ n plöö lä nä, n ‑glö Eblëëyu. 'Nɩ n tɩtɩä ‑glö 'sɩɩ Eblëënyʋä. ‑Ɔ gä bhɛ 'sɩɩ Moyizöö' ‑Jlämaa' 'klʋkpää' 'ŋʋlɩɩ' 'pɛlʋʋ nä, n ‑glö bhlä Falizɩɛnyʋaa' ‑jɛnyɩɛ 'mnö nyɩkpɔ nä, kä n ŋʋa‑ 'klʋkpää.

⁶ N kään bhlä kpänyɩ ‑Jlämaa 'kʋ nä, kä n ‑gbä 'nɩ 'cɔcɩnyʋa nii‑ nyäkälɩ 'kädɩ. ‑Jlämaa' 'klʋkpä‑ŋʋlɩɩ' ‑za nä, nyɩkpɔ nö'ö ‑wʋ wälɩklë yëku fä.

⁷ ‑Mä ‑nɩnɩ 'fɩɩn n wloo bhlä nynä 'naa ‑bʋzʋɛ nä, Klisö 'mnö kä n wlui ylä ‑pɛɛ nynä ɩɩ' ‑wʋ gba ‑kä.

⁸ ‑Ɛɛɛ! 'Ylʋzɔɔ' ‑nɩnɩ 'fɩɩn, n kɩ yɩ wloo nä, 'naa ‑za ɩɩ' yɩɔ gba ‑kä. ‑Ɔnöza bhää? N yä Zozi Klisö yibhë, 'nɩ ɔ plöö‑ yɩ 'naa Kwlienyɔ. Ɩ ‑kä 'ŋnö nä, ‑lʋʋ ‑amʋ 'titi yi bhlä kään nä, ʋmʋ nn' 'mänyɩ yɩɔ ‑mä, Zozi Klisö 'mɔ n 'manyɩ yɩ kpänyɩ. N yä yɩ ‑lɔɔ ‑lɩyɩ 'fɩɩn gwë ‑sä. 'Nɩ n wlui yɩ 'sɩɩ nynä ‑paplɩɩ ‑yä Klisö 'mɔ n 'kä yɩ kään.

⁹ N ‑yɔsɔ 'kä 'nägäsä 'jɛnyɩ. Nn' ‑läyɩɔ ci nynä ‑mä n ‑glö 'yigënyɔ ‑Jlämaa' 'kʋgëlɩɩ 'pɛlʋʋ. ‑Mä 'naa pɔlötɛtɛɛ n ‑kä lä Klisöö' ‑za nä, ɛmɛɛ‑ 'gä ylä gbä ‑yä n 'kä 'yigënyɔ 'plö. Nyɩkpaa' ‑lʋa ‑wa ‑kä lä Klisöö' pɔlötɛtɛ nä, wamä Laagɔ‑ wloo lä nynä 'yigënyʋä.

¹⁰ 'Naa 'klëa ‑bhlo n ylä lä nä, amää‑ plöö‑ ylä nynä ‑mä n 'kä Klisö yibhë. Ɩyä 'päwaa‑ ‑gbä 'nɩ ɔ ‑glɔɔ lä 'kuëë nä, n 'ka 'sɩɩ yibhë. ‑Ɛɛɛ! 'Klüü n ylä lä nä, ɩmɩ plöö‑ lä nynä ‑mä, n ‑waa nynä 'kwlɩ bhɩänö'ö ɔmɔ 'bhisäkʋ ‑yä, 'naa 'kwiee ‑yä ɔɔ' ‑lɛɛ 'sɔ mʋʋ yëkuu'.

¹¹ Ɩyä 'kuaa' glɔɔylʋʋ 'kʋ nä, ‑amʋ ‑mä 'sɩɩ n 'kä 'kuëë glɔɔmʋ.

Pɔlʋ lä dä ɔ 'kä lä bhɩä nä ‑lɔɔ ɔ wloo

¹² Nn' ‑wʋ cii‑ nynä ‑mä, n yä wɛzä 'naa sämɩɩ' 'wlusääda ŋëë. 'Nɩ nn' ‑wʋ 'sɩɩ cii‑ nynä ‑mä n yä ‑lɩɩ 'fɩɩn ‑zɔɔ bhɩä. N paa ‑lätee. N paa ‑lätee ‑yä, sä Zozi Klisö ‑nʋ 'nɩ, ɔ nii'i lä nä, n 'kä 'sɔɔ 'tlänyɩ ‑yä n 'kä ‑ajɛɛkpaa 'ni.

¹³ Bhɛŋwnɩä ‑yä bhelienyɩ‑, 'nn bhobho ‑wʋ sä n yä wɛzä ‑ajɛɛkpaa 'ni nä. A ni yi ‑a! Wälɩklë ‑bhlo n nʋ lä nä, amää‑ plöö‑ lä nynä ‑mä, klëë' wälɩɩ 'fɩɩn ‑ɩ yä bhɛ lä ‑mɔɔ 'kʋ 'plö nä, kä n bii yɩ 'kʋ. 'Nɩ ‑mɔɔ yikʋʋ' ‑lɩɩ ‑za, n bhlää ylä 'kʋ ‑yä n 'kɩ 'ni.

¹⁴ Kä n paa 'nɩ n mʋ lä 'wlusääda ‑yä, ‑mɔɔ Laagɔduu' ‑ajɛɛkpaa Laagɔ 'kä lä Zozi Klisö 'kʋgënyʋa 'nyɛ nä, n 'ka 'nimʋ.

¹⁵ Na, ‑anyɩmɔɔ‑ yä lä Laagɔwälɩɩ 'mnö ‑glɛɛ nä, a ‑ya kään bhobho‑wluu ‑bhlo. 'Kɩ kä 'sɩɩ ‑kʋ nynä ‑mä 'klüü ‑nɩnɩ ‑kʋ ‑mɔɔ 'nɩ a bhobhui anyɩa' sä nä, Laagɔ 'titi yi'anyɩ dɩgälɩɩ' 'ŋʋ.

¹⁶ Naa, ‑a nää‑ yɩ ‑kaaa 'nɩ dä ‑a yä ylä ‑lää ŋëë nä, a ‑ya gëë yɩ ‑blɔɔ ‑bhlo 'yii.

¹⁷ Bhɛŋwnɩä ‑yä bhelienyɩ‑, anyɩ 'fɩɩn, a nʋ ‑amʋ 'bhisäkʋ. ‑A ya'anyɩ wɛzä 'sëplo 'nyɛ. 'Nɩ nyɩkpaa' ‑nänʋä ‑kʋ ‑lɔɔ 'nɩ wa gëë‑ ‑anyɩa 'sëploo 'kʋ nä, a wluwa ‑yä a 'gë ‑lɔɔ' 'sëploo 'kʋ.

¹⁸ N ‑sonö'anyɩ wälɩklënä 'futu 'futu. 'Nɩ ‑zɩkää 'titi, 'naa 'tutulɔɔ sonö'anyɩma lä bʋkʋ. N nä nyɩkpa ‑bhutukpä ‑kʋ 'nɩ wa nää yɩ nynä Klisöö' 'kusuu' ‑zɔbhlɛgbänyʋä.

¹⁹ ‑Mä ‑lɔɔ' nyɩkpaa nä, waa' bhɩäda 'mää‑ plöö‑ ylä nynä ‑mä too ‑kää wa mʋ lä. Sä wa ‑waa lä lülɩ nä, waa' 'gwɩɩ 'mɩɩ‑ plöö‑ waa' ‑laagwɩ. 'Nɩ nʋnʋgbɩɩ‑ 'gwa bhlä zoo 'kʋ kamä nä, ɩmɩ wa täkpɔ 'mʋ. 'Nɩ waa' pɔlöö ‑kʋ 'kɔɔkɔ ‑mää 'ylʋzɔɔ' kʋkʋlɩɩ 'kʋ.

²⁰ ‑Mä ‑anyɩ nä, Laagɔduu' nyɩkpa ‑a plöö‑ lä nä, Kwlienyɔ Zozi Klisö, ‑ɔ plöö‑ lä Puënyɔɔ ‑a ‑bɛɛ lä nä, ɔ yi ‑mɔɔ Laagɔɔ' ‑bha 'nɩ ɔ yi yi.

²¹ Klisö kä ‑yi nä, ɔ yi gbä 'nɩ ‑anyɩa ‑paplɩ‑yɛkɛnɛ, ɛ yi jɩjlä 'nɩ ɛ yi ɔɔ' 'klʋagba‑yɛkɛɛ 'bhisäkʋ 'plö. 'Nɩ 'zaazɩ ɔ ‑kä ‑lɔɔ' 'päwa. 'Nɩ ɔɔ' 'päwaa, amää‑ pɩä lä 'kɔɔnʋ 'mnö ‑lɩɩ 'fɩɩn 'kʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan