Bìoball air-loidhne

Filipʋ‑dunyʋä 2 - GOD - u2

Klisö ‑lä ɔ yëku ‑dʋdʋkʋ nynä ‑gänʋnyɔ

¹ A ‑yä Klisö 'sɔ 'jɛnyɩ‑ lä nä, ɩ nyɩ'anyɩ bhä 'tɛtɩ ‑a? Ɔɔ' ‑wawʋʋ bhlü'anyɩ bhä plɛɛ' ‑a? A ‑yä Kplɔɔkplɔɔ‑wugɔɔ 'sɔ 'jɛnyɩ‑ bhä ‑a? A ‑kä bhä a ‑liesɩɩ' ‑wawʋ ‑yä waa' plɛkʋmɛnɔ pleyii ‑a?

² Nä, anyɩa 'mʋ 'nunulɩ gbä ‑yä 'naa ‑jäkaa 'kä nëë slää. A kään ‑wawʋ ‑bhlo pleyii, a kään plɛ ‑bhlo ‑yä a kään bhobhowlu ‑bhlo.

³ Aa' tään ‑lä nynä anyɩ ‑bhlo 'gä 'ni. Aa' tään ‑lä nynä anyɩ ‑bhlo nyɩkpa lä wloo. A ‑lä a yëku ‑dʋdʋkʋ. A kä ‑lɔɔ ‑kʋ nä, a bhobho nynä ‑mä, a ‑liesɩ kään gbʋ 'nɩ wa zi'anyɩ.

⁴ Nyɩkpɔɔ' tään ‑lä ɔ yëku bhloo' ‑bʋzʋɛ ‑mä, ɔ tään 'sɩɩ ɔ ‑liesɩɩ' ‑bʋzʋɛ.

⁵ Anyɩ ‑bhlobhlo 'pää nä, anyɩa' nʋnʋgbɩ pana nynä ‑mä ka ‑yä Zozi Klisö 'sɔ 'jɛnyɩ‑.

⁶ Klisö nä, kɔ ‑yä Laagɔ 'sɔ ‑bhlü. Ɔ ‑glö bhä 'kɔɔkɔ Laagɔ, ‑Mä ɔ ‑yä Laagɔ 'sɔɔ 'yigëlɩɩ nä, Ɔ 'nɩɩ ‑wʋ luëzüü' ‑plää nynä ‑mä 'Sëëti, ɔmɔɔ‑ plöö‑ Laagɔ.

⁷ Kɔ ‑sää ɔ yëku 'kʋ 'Nɩ ɔ ‑klä ɔ yëku nynä ‑gänʋnyɔ. 'Nɩ ɔ ‑klä 'sɩɩ ɔ yëku nyɩkpɔ 'bhisäkʋ,

⁸ Ɔ ‑lä ɔ yëku ‑dʋdʋkʋ. Ɔ ŋʋʋ‑ Laagɔ 'klʋkpää' ‑kaaa 'Nɩ ɔ ŋoo‑ 'nɩ ɔ 'ninɩ‑ 'kwiee, 'Kusu 'yii 'kwiee ɔ kuu‑ lä.

⁹ Ɩmɩɩ‑ ‑kä 'ŋnö 'nɩ Laagɔ ŋʋɔ‑ lä 'kʋzi‑këkpë 'kʋ. 'Nɩ ʋ ŋʋɔ‑ lä 'ŋnöö ‑lɩɩ ‑ɩ zi lä 'ŋnöö 'fɩɩn 'kʋ nä.

¹⁰ Ɩyä Zozii' 'ŋnöö 'mnö nä, 'Ŋʋʋ yɩ ‑mɔɔ ŋɔkʋ, Ɩyä ‑mää ‑dʋdʋkʋ, Ɩyä ‑mɔɔ glu nä, Kʋkʋlɩɩ 'fɩɩn‑ ‑kʋ lä nä, Kɩ 'kä Zozii dëlü ‑kokoowli glu 'pä ‑Yä ɩ 'kɔ bʋbɔ,

¹¹ Ɩyä nyɩkpɔ nyɩkpɔ 'kä wälɩ nëë' ‑sä ‑yä, Ɔ 'kä ci nynä ‑mä Zozi Klisö 'mɔɔ‑ plöö‑ Kwlienyɔ. Ɩyä ‑nɩnɩ 'fɩɩn 'kä ɔ 'Bä Laagɔ 'ŋnu fään.

'Cɔcɩnyʋa lie nynä zëkpë ‑mää 'ylʋzɔɔ

¹² Ɩ ‑kʋ ylä sää nä, 'naa ‑wawanyʋänyɩ‑, 'tänyɩɩ n ‑kʋ'anyɩ bhlä yëku nä, 'ɩɩ sa ŋʋʋ'ʋ bhlä 'kɔɔkɔ 'klʋkpää nä, 'nn yɩɔ ‑lɔɔ ‑kʋ oo, ‑mä a nʋ ‑lätee sɔɔ. Anyɩa 'cɔcɩ‑zëkpëa pana nynä ‑mä ka guu‑ Laagɔ 'nɩ a ŋʋʋ 'sɩɩ kpänyɩ 'klʋkpää ‑yä ʋ 'kanyɩ ‑kä puë.

¹³ Laagɔ nä, ʋmʋʋ‑ gbä lä 'nɩ a ci lä nynä a yi lʋʋ 'cënänä nʋ. 'Nɩ ʋmʋʋ‑ gbä lä 'sɩɩ 'nɩ, sä ʋ ‑waa lä nä, a mii lä sɔɔ nʋlɩ.

¹⁴ ‑Lɩɩ 'fɩɩn a nʋ lä nä, a nʋɩ ‑yä aa' 'ŋuŋuë lä 'mnö. Aa' cɩcɩɔ ‑lä 'sɩɩ.

¹⁵ Nyɩkpaa' ka'anyɩ ‑kä gbëgëdü yëku 'ŋʋ. A 'kä kplɔɔ nynä Laagɔɔ' 'yuë ‑yä waa' ka'anyɩ ‑kä gbenyenyi yëku 'nii ‑mä, ‑pɛpɛɛ' 'bhlɛsʋnʋ 'mnö nä, ‑kpläkplönyʋä ‑yä nyɩkpa‑nyonyuë 'sɔ nëëdë a ‑kʋ ‑lä. Nä, ɩ ‑ŋwa 'kʋ nynä ‑mä, sä zeli ŋänɩä lä nä, ‑mää 'ylʋzɔɔ a ŋänɩä 'sɔɔ.

¹⁶ Laagɔɔ' Nägädöö ‑ɩ nyɛ lä 'pʋpʋɛ nä, a ‑sänɩ nyɩkpa. ‑Ɩyä Klisöö' yiylʋʋ 'kʋ nä, n 'kanyɩ 'mʋ täkpɔɔ. Kɩ ‑kʋ ylä nynä ‑mä, 'nn ‑wʋ 'flɛflɛ‑lebhe nʋ. 'Nɩ 'klwɩ nö'ö ‑wʋ 'sɩɩ 'flɛ ‑bhɩä.

¹⁷ Kɩ kä ‑kʋ nynä ‑mä, 'naa doluu 'mʋʋ‑ yi sä jɛɛ nä, 'nɩ ʋ yi anyɩa' pɔlötɛtɛɛ' 'cibhie 'kʋ pää nynä Laagɔɔ' bʋbɔ bʋbɔlʋʋ nä, ‑lɔɔ' ‑jäkaa n yia nʋ. N ‑yä anyɩ 'fɩɩn 'sɔ yi ‑lɔɔ' ‑jäkaa nʋ.

¹⁸ Nä, anyɩ ‑mä 'sɩɩ, a nʋ 'naa ‑jäkä! A ‑yä ‑amʋ 'sɔ nʋ ‑lɔɔ' ‑jäkaa.

Timotee ‑yä Epafloditö 'sɔ mʋ ‑Laagɔ‑lebhe 'kʋ

¹⁹ N 'tɛɛ lä Kwlienyɔ Zozii dë nä, ɩ yi gbä 'nɩ n yi'anyɩ 'ylönö Timotee yëku lobho ‑yä, anyɩa yëkuu' 'döö ɔ kä'ä lä ‑lä nä, ɩ kä'ä 'tɛtɩɩ 'ŋʋ.

²⁰ 'Nɩ ‑ɔnö yɩ Timotee ‑bhlo nä, nyɩkpɔɔ' yɩɔ bʋkʋ ‑lää 'kʋ 'nɩ, sä n bhobho lä nä, ɔ 'kä sɔɔ bhobho 'nɩ ɔ 'kä bʋkʋ sää 'titi anyɩa' wälɩ 'mänyɩ.

²¹ ‑Mɔɔ' ‑lʋa 'fɩɩn wa yëkuu' wälɩ‑ känʋwa yëku ‑mä waa' 'mänyɩ ‑wʋ Zozi Klisöö' wälɩ.

²² Anyɩ 'titi a yi 'klüü Timotee ‑nʋ lä 'nɩ ‑ɩ pana lä nynä ‑mä ɔ ‑kä dë 'tɛɛ sä nä. Timotee nä, ‑n ‑näsä 'yuo ‑yä ɔ 'bä 'sɔ nʋʋ lä lebhe 'kʋ nä, kɔ ‑yä ‑amʋ 'sɔ nää sɔɔ 'nɩ ‑a ‑bie Kwlienyɔɔ' 'Nägädöö.

²³ Nä, sä 'naa yëkuu' wälɩɩ 'kä lä 'kʋ 'plö nä, n kä yɩ 'nää sɔɔ ‑yibhë nä, Timotee 'mɔ n 'kanyɩ lä yëku lobho.

²⁴ 'Nɩ n ‑kään 'sɩɩ Kwlienyɔ plɛkʋ nynä ‑mä, ɔ yi gbä 'nɩ ‑amʋ 'titi, n yi'anyɩ 'ylönöö 'yi 'ni kää yi.

²⁵ 'Nɩ n bhobho nynä ‑mä, bhelio Epafloditö, kä n 'kanyɩmɔ lä yëku ‑lä. Epafloditö nä, ɔ ‑glö bhelii' lɔɔ n ‑yɔsɔ nämnö lä 'kʋ 'nɩ n ‑yɔsɔ nʋ lä lebhe nä. Ɔ ‑yä ‑amʋ 'sɔ 'jɛnyɩ‑ 'nɩ ‑a bhlää lä 'Nägädöö' ‑za 'kʋ. 'Nɩ bʋkʋ, 'tänyɩɛ 'mnö a ‑yi'i lä 'kʋ, 'nɩ a tlënö'ö lä nä, Epafloditönɔ 'mɔ a ‑lobho bhlä 'sɩɩ.

²⁶ A nuu‑ lä ɔɔ' gupa‑wälɩɩ nä, kɩ ‑kamänöɔ yëkuu. Ɩ ‑kä 'ŋnö 'nɩ ɔ tään kpänyɩ nynä ɔ 'kanyɩ bʋkʋ 'yi 'ni kää yi anyɩ 'fɩɩn.

²⁷ ‑Ɛɛɛ, ɔɔ' bhɔɔ 'zaazɩ ‑yä, ɔ ‑too 'pɛpɛ 'nɩ ɔɔ' ‑wʋ kuu‑. Laagɔɔ' ‑bɔɔ 'nɩ ʋ yibhënöɔ‑ lä ŋäzö. 'Nɩ ɔmɔ ‑bhlo ʋʋ' ‑wʋ 'sɩɩ ŋäzö yibhë ‑mä, ‑amʋ Laagɔ yibhë lä 'sɩɩ ŋäzö nynä 'naa plɛɛ' beliolɩɩ' kä ‑kä kpänyɩ 'kʋ 'ŋʋnöɔ.

²⁸ Ɩ ‑kä 'ŋnö nä, kä n la'anyɩmɔ lä 'fäfä ‑yä anyɩ ‑mä 'sɩɩ, a kɔ 'yi nii nä a 'kä ‑pʋpɛ nʋ. Ɩ yi 'sɩɩ gbä 'nɩ plɛɛ‑ belio'o lä 'mʋ nä, ɛ yi 'kʋ tëtë.

²⁹ Ɔ kä ‑yi nä, sä wa gboo lä 'cɔcɩ‑bheli 'kʋ nä, a gbonöɔ sɔɔ 'kʋ ‑pʋpɛsä. Epafloditö 'bhisäkʋʋ' nyɩkpa‑cëa nä, a 'ŋʋwa kpänyɩ 'klʋkpää.

³⁰ ‑Ɔnöza bhää? Epafloditö nä, Klisöö' lebhee' ‑za, 'pɛpɛ 'nɩ ɔɔ' ‑wʋ lä kuu‑. 'Tänyɩɩ a ‑tään lä nynä ‑mä a kä'ä klää nä, wopëa a 'kä bhlä tlëë nä, aa' mii bhɔɔ aa' ‑lälɩ. Kä Epafloditö ‑sä ɔ yëkuu' zëkpëa 'nɩ ɔ ‑yi lä anyɩa' bhlëë'.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan