Bìoball air-loidhne

Filipʋ‑dunyʋä 1 - GOD - u2

Bhäälɩ

¹ ‑Amʋ Pɔlʋ, n ‑yä Timotee, ‑anyɩ Zozi Klisöö' ‑gänʋnyʋa, ‑anyɩ‑ jɩjla'anyɩ lä 'bɔɔgʋnʋ. Anyɩ Filipʋduu' 'cɔcɩnyʋa 'fɩɩn, anyɩmɔɔ‑ ‑yä Zozi Klisö 'sɔ 'jɛnyɩ‑ lä nä, anyɩ‑ ‑a jɩjlä lä 'bɔɔgʋnʋ. ‑A jɩjlʋ 'sɩɩ 'cɔcɩɛɛ nëkʋʋ' kʋnyʋaa' ‑za. 'Nɩ ‑a jɩjlʋ 'sɩɩ 'cɔcɩɛɛ 'tienyʋaa' kläänyʋaa' ‑za.

² ‑A 'Bä Laagɔ ɩyä ‑anyɩa Kwlienyɔɔ Zozi Klisö, waa' 'nyupälɩɩ ŋënö'anyɩ 'kʋ! Ɩyä waa' 'kʋ wɔtɔlɩ kʋ'anyɩ yëku!

Pɔlʋ bhää Laagɔ Filipʋduu' 'cɔcɩnyʋaa' ‑za

³ 'Tänyɩɩ 'fɩɩn 'mnö anyɩa' wälɩ bhlünö'ö lä pleyi nä, kä n bhään 'naa Laagɔ.

⁴ 'Tänyɩɩ 'fɩɩn 'mnö n bhibhie lä Laagɔ anyɩ 'fɩɩn ‑za nä, kä ‑jäkä kʋ'ʋ pleyii 'nɩ n bhibhie.

⁵ Cie yɩ ‑mɔɔ tɛɛtɛɛylʋʋ 'kʋ ‑yä ŋëë ‑zɩkä nä, Laagɔɔ' 'Nägädöö' bielɩɩ' ‑za, sa ‑yi'i lä 'kʋ nä,

⁶ n ‑känɩ plɛkʋ nynä ‑mä Laagɔɔ ‑ʋ cie lä ‑lää' 'nägä‑lebhenɛ anyɩ nëëdë 'kʋ nä, ʋ yie nʋ ‑aaa 'nɩ ʋ yie ‑zɔɔ bhɩä Zozi Klisöö' yiylʋʋ 'kʋ.

⁷ Ɩ ‑ŋwa bhä 'zaazɩ 'kʋ nynä ‑mä n bhobho bhä 'sää anyɩ 'fɩɩn ‑za. ‑Ɔnöza bhää? Ka känö'ö gbʋ. 'Nɩ a ‑klänö'ö Laagɔwälɩɩ' bielɩɩ 'mnö. 'Nɩ ‑zɩkä, dä n ‑kʋ lä ‑mää ‑jɩɩ' nä, a klänö'ö ‑lätee. 'Nɩ 'tänyɩɛ 'mnö n bhlää bhlä Laagɔɔ' 'Nägädöö ‑za 'kʋ, 'nɩ n ŋʋ bhlä ɩɩ' 'mnö ‑nʋawlɛɛ sä nä, a ‑klänö'ö 'sɩɩ.

⁸ Laagɔ ‑yi 'sɔɔ, 'nɩ ʋ yi 'sɩɩ 'naa ‑dläfʋɛ lü nynä ‑mä kä n ‑waa'anyɩ kpänyɩ Zozi Klisöö' ‑wawʋʋ 'mnö.

⁹ A 'ni 'naa bhibhielɩɩ 'mnö wälɩklëa n 'ylää lä Laagɔ anyɩa' ‑za nä. N 'ylää Laagɔ nynä anyɩa' pleyii ‑wawʋʋ zumë ‑yä ʋ 'mɩä 'kʋ. A 'fikamä anyɩa' ‑wawʋʋ 'mnö ‑yä a yibhë dɩgälɩ.

¹⁰ ‑Lɔɔ a yi ‑kä mii 'nɩ 'klüü' lɩɩ‑ nää lä nä, a yii yibhë ‑yä Klisöö' yiylʋʋ 'kʋ nä, a 'kä kplɔɔ ‑yä ɩ 'kanyɩ gbʋʋ' ‑sä.

¹¹ Zozi Klisö yi gbä 'nɩ, a yio dëlü 'nynigo a ‑yä 'nää bhutukpa 'sɔ. 'Nɩ ɩ yi Laagɔɔ' 'klʋagba ‑yä ʋʋ' 'ŋnufäälɩ nʋ.

Pɔlʋ ‑kʋ ‑jɩɩ' ‑mä Laagɔɔ' 'Nägädöö mʋ 'yikʋ

¹² Bhelie ‑yä bhɛŋwnɩänyɩ‑, n ‑waa nynä ‑mä a yibhë sɔɔ nynä wälɩɩ ‑ɩ ‑ŋënö'ö lä nä, ‑nʋawlɛɛ 'mnö, ɩ ‑gbä 'nɩ Laagɔɔ' 'Nägädöö ‑mʋ 'yikʋ.

¹³ A ni 'yi ‑a, ‑gɔmnɔɔ' lebhe‑nʋnyʋa 'fɩɩn, ɩyä 'yigädadöö 'fɩɩn nyɩkpaa ‑kʋ lä ‑mɔɔ nä, wa ‑yi sɔɔ nynä ‑mä Klisöö' ‑gänʋlɩɩ' ‑zä n ‑kʋ lä ‑jɩɩ'.

¹⁴ 'Cɔcɩ‑bheliaa' bhutukpä nii lä 'yi 'nɩ n ‑kʋ lä ‑jɩɩ' nä, kä waa' pɔlötɛtɛɛ glɛ lä. Ɩ ‑kä 'ŋnö 'nɩ wa ‑kä yɩ 'tɛtɩ, 'nɩ ‑ŋänöö' 'bhlʋwa yɩɔ 'nɩ wa ci yɩ Laagɔwälɩɩ.

¹⁵ N ‑yi sɔɔ nynä 'zaazɩ, ‑nänʋä ‑kʋwa nëëdë 'nɩ Klisöö' wälɩɩ, wa cii luëzüsä ɩyä 'kʋ bhlääsä. ‑Mä ‑nänʋä ‑kʋ 'sɩɩ ‑lɔɔ 'nɩ waa' pleyii ‑kplɔ 'nɩ wa ci Klisöö' wälɩɩ.

¹⁶ Wamä nä, Laagɔɔ' ‑wawʋʋ 'mnö wa nʋʋ lä lebhee. Wa ‑yi sɔɔ nynä ‑mä, kä n ‑kʋ lä ‑mää ‑yä n 'kä Laagɔɔ' 'Nägädöö' ‑za 'kʋ bhlää.

¹⁷ ‑Mä ‑mɔɔ ‑lʋäyɩ nä, luëzüsä‑ wa cii lä Klisöö' wälɩɩ. Waa' bhobhosaa' ‑wʋ ‑kplɔɔ. Wa bhobho nynä ‑mä sɔɔ wa yi nʋ 'nɩ 'naa ‑jɩɩ' 'kwlɩkabhɩa yi 'kʋ 'ŋʋnöɔ.

¹⁸ ‑Mä ɩɩ' ‑wʋ 'tɛ. Waa' nʋnʋgbɩɩ yi bhɛ kplɔɔ ‑o, ɩɩ' ‑lä bhɛ kplɔɔ ‑o, Klisöö' wälɩɩ cio 'kɔɔkɔ nä, ɩ nʋ 'naa ‑pʋpɛ. 'Nɩ ‑lɔɔ' ‑pʋpɛɛ, n yie ‑lätee nʋ.

¹⁹ ‑Ɔnöza bhää? N ‑yi sɔɔ nynä ‑mä, anyɩa' bhibhielɩɩ, ‑yä Zozi Klisöö' 'Wugɔɔ 'tɛtɩɩ ʋ nyɛɛ'ɛ lä nä, ɩ yi gbä 'nɩ ‑nɩnɩ 'fɩɩn, n yii 'pʋlɩ 'mnö 'nii.

²⁰ Naa, wälɩklëa ‑laa n ‑bɛɛ lä, 'nɩ n 'tɛɛ‑ lä kpänyɩ dë nynä ‑mä ‑a yi glää nä, a ‑kä 'ŋnö 'nɩ wälɩklë nö'ö yɩɔ bʋkʋ zoo 'kʋ ‑kä. ‑Mä ‑pɛpɛɛ ‑yä 'kɔɔkɔɔ ‑za nä, kä n yi ‑nɩnɩ 'mnö 'pʋʋ ‑o, kä n yii 'mnö 'kuu‑ ‑o, ‑wa ni lä 'naa zëkpëa 'yi nä, wa yi sɔɔ yibhë nynä ‑mä kä Klisö 'ghlü.

²¹ ‑Amʋ 'naa zëkpëa nä, Klisö‑ plöa lä. 'Nɩ kä n kä 'sɩɩ kuu‑ nä, 'kwie plöö‑ 'naa ‑za ‑bʋzʋɛ.

²² ‑Mä kɩ kä plöö‑ nynä ‑mä n kʋ ‑lätee 'ylʋzɔɔ ‑mä, n yi wälɩklë nʋ 'nɩ a yi ‑lätee nyɩkpaa' ‑za gba kään nä, sä n 'kɩ lä klä nä, 'nn yɩɔ sɔɔ ‑yi.

²³ Wälɩklü 'sɔ bibinö'ö 'wlu 'kʋ. N ‑waa nynä n 'kä zëkpë 'kʋ ‑bha ‑yä, n ‑yä Klisö 'sɔ 'kä 'kʋ kʋʋ. Ɩmɩɩ‑ yi lä 'nägäwälɩ 'plö.

²⁴ ‑Mä ɩ ‑ŋwa 'kʋ nynä n kʋ ‑lätee zëkpë 'kʋ anyɩa' ‑za.

²⁵ Sä n ‑känɩ lä plɛkʋ nä, n ‑yi 'sɔɔ ‑mä n yi ‑lätee zëkpë 'kʋ kʋ 'nɩ n ‑yä anyɩ 'fɩɩn 'sɔ yi ‑lɔɔ kʋ. N 'kanyɩ klää ‑yä a 'kä 'yikʋ mʋ, ɩyä anyɩa' pɔlötɛtɛɛ 'mnö ‑jäkä 'kanyɩ pleyi kʋ.

²⁶ Ɩyä tänyɩɩ' n 'kanyɩ ylä bʋkʋ yëku ‑yi nä, a 'kä yɩ Zozi Klisö 'mʋ täkpɔ 'naa ‑za.

Pɔlʋ lä 'cɔcɩnyʋa bhlää Laagɔɔ' 'Nägädöö ‑za 'kʋ
( 1 Tesa 2.12‑16 ; Eblëë 10.32‑36 )

²⁷ Nä, anyɩa nʋnʋgbɩɩ ‑yä Klisöö' 'Nägädöö 'sɔ mʋʋ yëkuu' ‑yä, kä n yi'anyɩ bhɛ 'yi 'ni kää yi ‑o, 'nn ‑lä ‑lɔɔ kʋ ‑o, n 'nu nynä ‑mä ka 'jɛnyɩ‑ 'wugɔɔ ‑bhlo 'mnö. 'Nɩ pɔlötɛtɛɛ Klisöö' 'Nägädöö nyɩ'anyɩ lä nä, a 'jɛnyɩ‑ 'nɩ a bhlänɩɛ 'kʋ ‑yä ɛɛ' kä 'foclo bhlü.

²⁸ Aa' ‑taa lä a yëku 'yi 'nɩ anyɩa' ‑zɔbhlɛgbänyʋa 'kanyɩ guë. ‑Lɔɔ ɩ yiwa lä pana nynä ‑mä ‑gbäsɩ wa mʋʋ lä nä, too ‑kää wa mʋ lä. ‑Mä anyɩa' ‑za nä, ɩ pana nynä ‑mä a yä 'pʋ. Laagɔ, ʋmʋʋ‑ ‑gbä 'nɩ ɩ ‑kʋ lä sɔɔ.

²⁹ Laagɔ 'mʋʋ‑ gbä 'nɩ a nʋ lä Klisö ‑gä. Ʋmʋʋ‑ gbä lä 'sɩɩ 'nɩ a ‑kä lä ɔɔ' pɔlötɛtɛ, 'nɩ 'kwlɩ bhɩänö'anyɩ ɔɔ' ‑za.

³⁰ ‑Pɛpɛɛ, n ‑yi yɩ sɔɔ nynä ‑mä Laagɔɔ' 'Nägädöö ‑ɩnö dä n bhlää bhlä tɛɛ 'kʋ nä, a ‑kʋmʋ yɩ ‑pɛɛ 'nɩ ‑a bhlää lä däbhloo' 'kʋ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan