Bìoball air-loidhne

Efɛzɩ‑dunyʋä 6 - GOD - u2

'Yuë ‑yä 'bäsɩ ‑yä wa 'nɔsɩ 'sɔɔ pää wälɩ

¹ 'Yuënyɩ‑, a 'ŋʋ a 'bäsɩ ‑yä a ‑nɔɔsɩ 'klʋkpää ‑mä sɔɔ Kwlienyɔ ylänö'anyɩ lä. 'Nɩ ɩmɩɩ‑ gëë‑ lä 'sɩɩ ‑lɔɔ 'yii.

² Kä Laagɔɔ' ‑Jlämaa ci lä nynä ‑mä, ‑n 'ŋʋ ‑n 'bä ‑yä ‑n ‑nɔɔ 'sɔ 'klʋkpää. ‑Jlämänä, amä ‑bhlo 'coo Laagɔ ‑gbɛɛ lä wälɩklë kätää' nynä a yi nʋɔ.

³ ‑Lɔɔ' wälɩklëa 'mää‑ plöö‑ lä nynä ‑mä, 'tänyɩɩ ‑n 'gä lä ‑Jlämaa 'klʋkpää 'ŋʋ nä, ‑N yi 'nää kʋ 'nɩ ‑n yi zëkpë 'kʋ gwlɛɛ.

⁴ 'Nɩ anyɩ 'bäsɩɩ ‑mä 'sɩɩ, aa' sie ‑lä anyɩa' 'yua plɛkʋ! Wa kä wälɩklë ‑nʋ 'nɩ a 'nö nää‑ nä, a slʋwa në, ɩyä sä Kwlienyɔ ylä lä nä, a 'pänʋwa sɔɔ dɩgälɩ.

⁵ Anyɩmɔɔ‑ ‑kʋ lä 'sɩɩ käänyʋä yëku nä, a 'ŋʋ kpänyɩ anyɩa' käänyʋä 'klʋkpää. A kään pɔlö 'nänɛ ɩyä ‑n ‑näsä Klisö‑a ŋʋ bhlä 'klʋkpää nä, yëku tɩtɛnö'anyɩ waa' klälɩɩ' ‑za.

⁶ Aa' ‑bɛɛ ‑lä 'fɩa nynä ‑mä 'tänyɩɩ wa ‑kʋ lä ‑lɔɔ nä, ‑lɔɔ ‑tɛɛ a 'kwa ‑gä nʋ ‑yä wa 'kanyɩ ‑kä ‑kpacɛ klä. ‑Mä a nʋ anyɩa' käänyʋä ‑gä nynä nyɩkpaa' ‑lʋa ‑wa nʋ lä Klisö ‑gä nä. Wamä nä, kwa gbään plɛkʋ 'nɩ wa nʋ sä Laagɔ ‑waa lä nä.

⁷ A gbään plɛkʋ ‑yä a nʋwa ‑gä ‑n ‑näsä Kwlienyɔ a nʋ bhlä ‑gä nä.

⁸ ‑Mä a ni 'yi naa, nyɩkpɔ yi käänyɔ kään ‑o, ɔɔ' ‑lä käänyɔ kään ‑o, lʋʋ' lʋʋ ɔ yi lä 'nägäsä nʋ nä, ɔ yiu ‑mɔɔ Kwlienyɔɔ yëku ʋʋ' bɔɔ‑pälɩɩ ŋëë.

⁹ Anyɩmɔɔ‑ ‑kä lä ‑gänʋnyʋä nä, a klʋwa 'sɩɩ 'nägäsä. Aa' fʋwa ‑lä wälɩ‑nyenyi yëku. ‑Mä a yibhë sɔɔ nynä anyɩ, ɩyä anyɩa' ‑gänʋnyʋa 'sɔ, a kä Käänyɔɔ ‑bhlo 'nɩ ɔ ‑kʋ ‑mɔɔ Laagɔduu' 'nɩ ɔɔ' gbäzö ‑wʋ nyɩkpaa'.

A 'bhɛɛ Laagɔɔ' tëvëlɩɩ ‑yä a 'kä vë

¹⁰ Bhɩädää' 'klüü 'mɩɩ‑ plöö‑ ylä nynä ‑mä, Kwlienyɔɔ' 'tɛtɩ 'kädɩɩ ŋënö'anyɩ 'kʋ ‑yä a 'kä 'fɩ kään.

¹¹ 'Dëvloo' ‑kpläkplaa' ‑za nä, a bhɛɛ Laagɔɔ' tëvëlɩɩ 'fɩɩn ‑mä, ‑lɔɔ a ‑yʋsɔ yi ‑kä 'kʋ bhläälɩ mii.

¹² A ni tʋʋ' ‑lʋʋ ‑a vë lä nä, ‑a ‑yä nyɩkpɔ 'sɔɔ‑ vuu ‑wʋ lä. ‑Zizinyenyii' lɩɩ‑ ‑kä lä 'sää 'tɛtɩ kpänyɩ 'nɩ ‑ɩ pɩä lä 'kɔɔnʋ kʋ nä, 'nɩ ‑ɩ ‑kä lä 'kämälɩɩ' 'päwaa nä, 'nɩ ‑ɩ bhɛɛ‑ lä ‑mää 'ylʋzɔɔ' 'cucuu 'tɛtɩɩ 'fɩɩn nä, ɩyä ‑zizinyenyinɩ 'fɩɩn ‑ɩ ‑nyuu lä 'sää gbʋʋsä 'mnö 'nɩ ‑ɩ ‑kʋ lä ŋɔkʋ nä, ɩmɩ ‑a ‑yɩ 'sɔ vë lä.

¹³ ‑Nɩnɩ ‑kä ylä 'ŋnö nä, Laagɔɔ' tëvëlɩɩ 'fɩɩn, a bhɛnönɩ yɩ a yëku yëku ‑yä 'tänyɩɩ ‑lɔɔ' ylʋʋ nyënyuu kä ‑ŋëë nä, a 'kɩ 'kʋ 'bhlü ‑yä a 'kä a yëku 'kʋ bhlää ‑yä, a 'kä ‑lɔɔ' tʋʋ sɩä ‑yä a 'kä 'kɔɔkɔ 'tɛtɩɩ 'mnö 'nynigo.

¹⁴ Nä, a 'nynigo 'nägäsä 'kʋ! ‑Nʋawlɛɛ, a nɛnɩɛ 'mnö nynä 'bɛtʋ. A plä 'yigëgbɩ 'mnö nynä anyɩa' tëvë‑kotu.

¹⁵ 'Kʋ wɔtɔlɩɩ' 'Nägädöö' bielɩɩ 'tɛtɩɩ, a plɩɩ 'mʋ nynä 'süü.

¹⁶ A kään pɔlötɛtɛ 'tänyɩɩ 'fɩɩn 'mnö ‑mä ɛmɛɛ‑ plöö‑ lä anyɩa' tëvë‑kpluu lʋʋ‑ yi'anyɩ lä 'kʋ zizie nä. Ʋ yi gbä 'nɩ ‑zuzunyënyuu' jeeli‑sloo yi ŋomo.

¹⁷ Laagɔɔ' puëlɩɩ 'gbi'anyɩ 'wlu nynä tëvë‑wugblë. Ɩyä Kplɔɔkplɔɔ‑wugɔɔ' ‑jlɛɛ ‑ɛ plöö‑ lä Laagɔwälɩɩ nä, a bhɛnɩɛ.

¹⁸ 'Tänyɩɩ 'fɩɩn 'mnö, Kplɔɔkplɔɔ‑wugɔɔ klänö'anyɩ ‑yä a bhibhie ‑ya a slä Laagɔ 'wlu. A nʋ sɔɔ ‑yä aa' ‑sä ‑lä ‑lɔɔ wlɩ, ɩyä a bhibhie 'kɔɔkɔ 'cɔcɩnyʋa 'fɩɩn 'wlu.

¹⁹ A bhibhie 'sɩɩ 'naa 'wlu ‑yä n kä cidä ‑kʋ nä Laagɔ kä'ä wälɩ nëë' 'pä ‑yä n 'kä 'tɛtɩ kään ‑yä, Kwlienyɔɔ' 'Nägädöö 'mnö wälɩɩ‑ ‑zizio lä ‑mɔɔ nä, n 'kɩ ‑sää wɩa.

²⁰ 'Nägädönöö' bienyɔ n plöö‑ lä nä, ɩɩ' ‑zä wa ŋʋʋ'ʋ lä ‑mää ‑jɩɩ' ‑säklonö 'mnö. Nä, a bhibhie 'naa 'wlu ‑yä, sä n 'kɩ bhlä 'sää 'titiclö ci nä, n 'kɩ sɔɔ ci.

Bhlüüdaa' bhää‑wälɩ

²¹ N ‑kʋ lä ‑mää nä, 'ɩɩ sä 'naa zëkpëa plö lä 'kʋ nä, ɩyä ‑lʋʋ n nʋ lä ‑mää nä, ‑wawa‑bhelio wa laa lä Tisikö 'nɩ ‑ɔ nʋ lä Kwlienyɔɔ' lebhee 'nägäsä nä, ɔ ka'anyɩ ‑mɔɔ yëku ‑yi nä, ɔ yi'anyɩ 'naa yëkuu' 'döö 'fɩɩn ‑sää.

²² Kä n ‑sɔɔ su yëku 'nɩ n lobhuo lä ‑yä sä ‑a ‑kʋ lä ‑mää nä, ɔ 'kanyɩ sɔɔ 'dö ‑sää, ɩyä ɔ 'kanyɩ 'sɩɩ 'tɛtɩɩ 'ŋʋ.

²³ Laagɔ ‑ʋ plöö‑ lä ‑a 'Bä nä, ɩyä Zozi Klisö ɔ plöö‑ lä ‑anyɩa Kwlienyɔ nä, wa gbä ‑yä bhelia ‑yä bhɛŋwnɩa 'fɩɩn 'ni 'kʋ wɔtɔlɩ. Wa 'ŋʋwa ‑wawʋ pleyii ‑yä wa kään 'sɩɩ pɔlötɛtɛ.

²⁴ Bhelia ‑yä bhɛŋwnɩa 'fɩɩn ‑wa ‑waa lä ‑anyɩa Kwlienyɔɔ Zozi Klisö nä, 'nɩ ‑wanö ‑wawʋʋ ‑ʋʋ ‑wʋ lä 'kʋ bhɩäsä ‑kä nä, Laagɔɔ' 'nyupälɩɩ ŋënʋwa 'kʋ wamä 'fɩɩn!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan