Bìoball air-loidhne

Efɛzɩ‑dunyʋä 5 - GOD - u2

Zëlüü 'mnö nämnölɩ

¹ Laagɔɔ' 'yua ‑lʋa ʋ ‑waa lä kpänyɩ nä, wamä a plöö‑ lä. Nä, a nʋ Laagɔ 'bhisäkʋ.

² A kʋ ‑wawʋʋ 'mnö. Kä Klisö ‑wamänö‑anyɩ lä nä, 'ɩzä ɔ ‑sä lä ɔ yëku Laagɔ delü 'cibhi 'kʋ ‑anyɩa ‑za. 'Nɩ ɔɔ' 'cibhie nä, ɛ ‑glö 'nägä‑cibhii' lɛɛ‑ pä lä 'ŋwänɩ Laagɔ dëlü nä.

( 1 Tesa 4.1‑8 ; 1 Kolɛ 6.9‑11 )

³ Laagɔɔ' nyɩkpa‑ a plöö‑ ylä nä, 'klüü ‑nɩnɩ ‑kʋ yɩ ‑lɔɔ 'nɩ ɩɩ' yɩɔ 'kʋ ‑ŋwa nynä ‑mä wa 'ninö'anyɩmɩ 'mnö. Kɩ plöö‑ ylä nynä ‑mä 'klʋ 'tɛtʋʋ, a ‑tanʋ yɩ 'yi! Aa' kʋ ‑läyɩɔ gbenyenyii 'mnö. Aa' tään ‑läyɩɔ nynä ‑mä a 'kä ‑lɩɩ 'fɩɩn kään anyɩ ‑bhloo' ‑za.

⁴ Aa' ‑sää ‑läyɩɔ 'klʋtɛtʋsä 'mʋ, aa' ‑sää ‑läyɩɔ ‑käpä ‑käpäsä 'mʋ, aa' ‑sää ‑läyɩɔ dëbësä 'mʋ. ‑Ɔ gä yɩ 'mʋ ‑säädä ‑kʋ nä, ɔ 'pä yɩ Laagɔ ‑aŋukwä.

⁵ A ni, ɩ ‑ŋwa 'kʋ nynä ‑mä a yibhë wälɩklënä. ‑Ɔ nää lä ‑käpä ‑käpäsä nä, ɩyä ‑ɔnö zëkpëë ‑wʋ lä ‑kplɔɔ nä, ɩyä ‑ɔ ‑waa lä ‑lɛɛ ‑guguëlɩ ɔmɔ ‑bhloo' ‑za nä, Klisö ‑yä Laagɔ 'sɔɔ 'Leyiduu 'mnö jaa ‑lɔɔ' nyɩkpɔɔ 'nöa ‑lä lümʋ. Nyɩkpɔɔ' lɔɔ ‑waa lä nynä ‑mä ɔ 'kä ‑lɩɩ 'fɩɩn kään ɔ yëku ‑bhloo' ‑za nä, kɔ ‑kʋ lä nynä ‑kpläkplö‑laagwɩɩ' bʋbɔnyɔ.

⁶ Nyɩkpɔɔ' 'bhlü ‑lä 'flɛ nëë' mɛnɔ 'kʋ 'nɩ ɔ 'kanyɩ 'nyigë. ‑Nɩnɩ 'fɩɩn 'mɩɩ‑ ‑kä lä 'ŋnö 'nɩ ‑waa 'ŋʋ ‑wʋ lä Laagɔ 'klʋkpää nä, Laagɔɔ' gbʋgblɛɛ yinʋwa lä.

⁷ ‑Lɔɔ' nyɩkpa‑cëa nä, a ‑yʋwa 'sɔɔ kʋʋ ‑lä 'kʋ.

⁸ Tɛɛtɛɛ nä, anyɩa' zëkpëa 'cucuu 'mnö a ‑kʋ bhä. ‑Mä ‑pɛpɛɛ dä a ‑kʋ ylä ‑lää Kwlienyɔ 'mnö nä, a glö yɩ zëlu. Nä, a nää yɩ nynä zëlüü' 'yuë.

⁹ Zëlü 'mɩɩ‑ wlʋa lä plɛkʋnanɔ, ‑yä 'yigëëlɩ, ‑yä ‑nʋawlɛ.

¹⁰ A kä ‑lɔɔ ‑kʋ nä, a bɩä ‑yä, saa 'fɩɩn‑ yi lä Kwlienyɔɔ' 'tʋ kamä nä, a nʋ sɔɔ.

¹¹ Nʋnʋgbɩɩ 'fɩɩn ‑ɩ nʋɔ lä 'cucuu 'mnö nä, ɩɩ' wlʋa ‑wʋ wälɩklü 'nänä ‑bhlo 'coo. Nä, aa' kʋmʋɩ ‑lä 'mnö ‑mä a slɩɩ në.

¹² 'Klüü 'fɩɩn wa nʋʋ lä ziziodä nä, kɩ ‑kä zoo 'kʋ nä ɩɩ' ‑wʋ 'kwläkwlä 'sää cisä ‑kä.

¹³ Nä, nyɩkpɔ kä ‑lɔɔ' nʋnʋgbɩɩ nëkʋ fä nä, ɩ yi zëlügä ghlä 'nɩ ɩ yi 'yi nio wɩa.

¹⁴ Lʋʋ ‑ʋʋ ‑wʋ lä ziziodä ‑nʋɔ nä, ʋ ‑glö zëlü. Ɩmɩɩ‑ ‑kä 'ŋnö 'nɩ ɩ ‑jɩjlɔ lä 'sɩɩ nynä ‑mä, ‑Mɔɔ mɔɔ‑ ŋɔɔ lä nä, ‑n glɔɔ yɩ! ‑N glɔɔ yɩ 'kuëë ‑yä Klisöö' 'kä‑ä 'kʋ ŋänɩä.

¹⁵ Nä, a kä ‑lɔɔ ‑kʋ nä, a fä anyɩa' 'nämʋʋ plɛkʋ! Aa' kʋ lä zëkpëkʋ nynä dëbënyʋä ‑mä a 'fikamä!

¹⁶ 'Tänyɩnɛ Laagɔ nyɩ'anyɩ ylä nä, a kpelionɩɛ 'kʋ ‑yä a nämnö 'fikee 'mnö. ‑Ɔnöza bhää? 'Tänyɩnɛ ‑a ‑kʋ ylä 'mnö nä, kpänyɩ‑ ɛ ‑nyuu.

¹⁷ Ɩ ‑kä ylä 'ŋnö nä, aa' bhobho ‑läyɩɔ dëbësä ɩyä 'klüü Kwlienyɔɔ ylä lä nä, a 'nui 'nägäsä 'mʋ.

¹⁸ Aa' loo ‑lä nʋ 'kʋ 'nɩ ʋ 'kanyɩ 'bhlä. Ɔnöza bhää? Nyɩkpɔɔ' lɔɔ nʋ bhlä lä nä, ɔɔ' ‑wʋ ɔ yëkuu' kläsä ‑yi. Kplɔɔkplɔɔ‑wugɔɔ ʋmʋʋ‑ ‑lä yie'anyɩ 'mnö 'kʋ.

¹⁹ A kä 'wlu 'wlää‑ nä, a bhlɩ Laagɔɔ' lɔlɔɔ' 'bɔɔgʋʋ 'mnöö 'lɩɩ. Ɩyä ‑Laagɔlɩɩ 'fɩɩn Kplɔɔkplɔɔ‑wugɔɔ paa'anyɩ lä pleyii nä, a bhlɩɩ 'sɩɩ. A ‑sä pleyi ‑yä a bhlɩ ‑yä a fään Kwlienyɔ 'ŋnu.

²⁰ ‑Lɩɩ 'fɩɩn ‑a 'Bä Laagɔ nʋ lä nä, ɩ kään 'ŋnö ‑yä a 'pʋ 'kɔɔkɔ ‑aŋukwä ‑yä a bhään Laagɔ Kwlienyɔ Zozi Klisöö 'ŋnöö 'mnö.

²¹ Anyɩmɔɔ‑ ‑kä lä Klisöö' 'klʋkpää nä, a 'ŋʋŋʋʋ 'klʋkpää.

'Ŋwadi ‑yä 'ŋnɔ sɔ ‑kʋ 'lɔlʋkpä 'kʋ
( Kolɔ 3.18‑19 ; 1 Pɩɛ 2.18‑25 ; 3.1‑7 )

²² Anyɩ 'ŋwnɩa, anyɩmɔɔ‑ nöö‑ lä wlie nä, sa ŋʋ lä Kwlienyɔɔ 'klʋkpää nä, a 'ŋʋ 'sɩɩ sɔɔ a ‑nyetie 'klʋkpää!

²³ Sä Klisö plöö‑ lä 'cɔcɩnyʋaa' 'cifi nä, sɔɔ ŋwadi plöö‑ lä ɔ 'ŋnɔɔ 'cifi. 'Nɩ 'cɔcɩnyʋa plöö‑ lä Klisöö' 'yɛkɛɛ. 'Nɩ Klisö plöö‑ lä 'cɔcɩnyʋaa' Puënyɔ.

²⁴ Naa, sä 'cɔcɩɛ lä lä ɛ yëku ‑dʋdʋkʋ 'nɩ ɛ ŋʋ lä Klisö 'klʋkpää nä, ɩ ‑ŋwa 'kʋ nynä ‑mä anyɩ 'ŋwnɩä ‑mä 'sɩɩ, a ‑lä sɔɔ a yëku ‑dʋdʋkʋ ‑yä a 'ŋʋ a ‑nyetie 'klʋkpää ‑lɩɩ 'fɩɩn 'mnö.

²⁵ Anyɩ ŋwadie, anyɩmɔɔ‑ nöö‑ lä 'ŋwnɩä nä, sä Klisö ‑waa lä 'cɔcɩɛ 'nɩ ɔ ‑sä lä ɔ yëkuu' zëkpë ɛɛ' ‑za nä, anyɩmä 'sɩɩ, a wamä sɔɔ a 'ŋwnɩä.

²⁶ Kä Klisö ‑nʋ lä sɔɔ ‑yä, 'nyuu 'mnö ɩyä ɔɔ' ciciwälɩ 'mnö ɔ 'kä 'cɔcɩnyʋa kpɔlʋä.

²⁷ Kɔ ‑nʋ lä 'sɩɩ sɔɔ ‑yä 'cɔcɩɛ kɔ dëlü ‑ŋëë nä, ɔmɔ 'titi 'kä ɛɛ' 'klʋagba 'yi 'ni. Ɛɛ' kä 'kpɔ yëku kään, ɩyä ɛɛ' kä jɛlɩ 'pä, ɩyä ɛɛ' kä ‑kä 'foclo yëku kään ‑yä ɛ 'kä kplɔɔlɩɩ 'mnö kʋ ‑yä gbëgëdëë' kɛ yëku 'kʋ.

²⁸ Nä, ŋwadie ‑kä 'nɩ sä wa ‑waa lä wa yëku nä, wa 'kä sɔɔ wa 'ŋwnɩä wamä. Ŋwadii' lɔɔ ‑ɔ ‑waa lä ɔ 'ŋnɔ nä, ɔ yëku 'titi ɔ ‑waa lä.

²⁹ ‑Ɛɛɛ, nyɩkpɔɔ' ‑läzä ɔ yëkuu' 'yɛkɛ zɔbhlɛmä. Kɔ nyɩɛ lülülɩɩ 'nɩ ɔ klänɩɛ wlɩɩ' 'nägäsä. Sɔɔ Klisö nʋ lä 'sɩɩ 'cɔcɩɛɛ' ‑za.

³⁰ 'Cɔcɩɛɛ 'mɛɛ‑ plöö‑ lä Klisöö' 'yɛkɛɛ. 'Nɩ ‑anyɩ, ‑a plöö‑ lä Klisöö' 'yɛkɛɛ nëmüü.

³¹ Ɩɩ' ‑kä 'ŋnö nä, ŋwadi yi ɔ 'bä ‑yä ɔ 'nɔ 'sɔ yëku ‑bha 'nɩ ɔ ‑yä ɔ 'ŋnɔ 'sɔ yi 'jɛnyɩ 'nɩ wa yi 'yɛkɛɛ ‑bhlo 'plö.

³² ‑Lää' wälɩnɩ nä, ɩ ‑glö wälɩɩ' lɩɩ‑ ‑zizio lä nä. ‑Amʋ nä, kä n ci ylä nynä ‑mä, Klisö ‑yä ɔɔ' 'cɔcɩɛ 'sɔɔ yëkuu' wälɩ lä.

³³ Kɩ plöö‑ ylä nynä ‑mä 'wli nä, sɔ ‑waa lä ɔ yëku nä, ɔ wamä sɔɔ ɔ 'ŋnɔ. Ɩyä 'ŋnɔ nä, ɔ 'ŋʋ ɔ ‑nyoto 'klʋkpää'.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan