Bìoball air-loidhne

Efɛzɩ‑dunyʋä 4 - GOD - u2

Zozi Klisö 'mnö 'jɛnyɩlɩ ‑kʋ lä
( Kolɔ 3.12‑14 ; Wlɔmʋ 12.4‑8 ; 1 Kolɛ 12.4‑31 )

¹ Nä, ‑amʋ Pɔlʋ, ‑amʋ Kwlienyɔɔ' ‑jɩnyɔɔ, n slä'anyɩ 'wlu. Laagɔ ya'anyɩ ylä laa nä, sää‑ ‑ŋwa lä 'kʋ 'nɩ ʋ ‑waa nynä ‑mä a nää nä, a nää yɩ sɔɔ.

² A ‑lä a yëku ‑dʋdʋkʋ! A wɔtɔmä plɛ ‑yä a yibhë ‑bɛɛsä. Ɩyä anyɩa' 'kʋʋ nyɩkpɔ nyɩkpɔ yibhë ɔ ‑liee' kläsä ‑wawʋʋ 'mnö!

³ Kplɔɔkplɔɔ‑wugɔɔ ya'anyɩ ylä 'jɛnyɩ nä, 'kʋ wɔtɔlɩ kʋ'anyɩ 'pää ‑yä a nʋ saa 'fɩɩn a 'kä ‑lɔɔ' 'jɛnyɩlɩɩ 'mnö 'kʋ!

⁴ A ni Kwlienyɔɔ 'yɛkɛɛ nä, ɛ ‑bhlü ‑bhlo, 'nɩ ɔɔ' 'Wugɔɔ ‑bhlü 'sɩɩ ‑bhlo. 'Nɩ Laagɔ laa'anyɩ lä 'sɩɩ nä, wälɩklëa' ‑laa a yi lä plɛkʋ ‑känö nä, a ‑bhlü ‑bhlo.

⁵ Kwlienyɔɔ ‑bhlü ‑bhlo, pɔlötɛtɛɛ ‑bhlü ‑bhlo, 'nɩ 'nyuu 'wlu‑ŋʋlɩɩ ‑bhlü 'sɩɩ ‑bhlo.

⁶ Laagɔ ‑bhlü ‑bhlo. Ʋmʋʋ‑ plöö‑ lä nyɩkpaa 'fɩɩn wa 'Bä, 'nɩ ‑ʋ 'kämä lä ‑lɩɩ 'fɩɩn, 'nɩ ʋ gbä 'nɩ ‑lɩɩ 'fɩɩn nʋɔ lä, 'nɩ ʋ ‑kʋ 'sɩɩ nyɩkpaa 'fɩɩn pleyii.

⁷ Kä Laagɔ nyɛ nyɩkpɔ nyɩkpɔ 'nää, ‑mä sä nyɩkpɔ nyɩkpɔ ni lä nä, Klisö‑ ‑nyäka lä sɔɔ.

⁸ A ni ɩ ‑jɩjlɔ Laagɔ‑bɔɔgʋʋ 'mnö nynä ‑mä 'Tänyɩɩ ɔ gblää lä ‑mɔɔ ŋäkʋ fɛɛn fɛɛn nä, Kɔ ‑sɩä tʋ 'nɩ ɔ ŋʋʋ ‑jɩnyʋä. 'Nɩ ‑lɩɩ 'fɩɩn 'Dëvlo bhlüü‑ bhlä 'kʋ nä, Ɔ ‑sɔɔnyɩ 'nɩ ɔ ‑yɩ 'sɔ gblää‑. 'Nɩ ɔ yii lä 'ylʋzɔkʋnyʋä dëë.

⁹ Naa, wa kä ci nynä ‑mä ɔ gblää‑ nä, sɩ sä bhä ‑zɔɔ? Kɩ sä lä ‑zɔɔ nynä ‑mä ɔ yä bhɛ kwli. Kɔ kwlii‑ 'sää 'titi 'nɩ ɔ mʋ ‑dʋdʋʋ 'mnö glu fɛɛn.

¹⁰ Ɔmɔ mɔɔ‑ kwlii‑ bhlä nä, ɔɔ' ‑säkä ‑säkä, ɔmɔɔ‑ gblää‑ lä 'sɩɩ 'nɩ ɔ mʋ lä ŋɔkʋ fɛɛn fɛɛn 'nɩ ‑ɔ ‑zii lä ‑laagwɩɩ 'fɩɩn 'wlu. Kɩ ‑nʋɔ lä sɔɔ ‑yä ɔ 'kä 'kɔɔn 'fɩɩn 'mnö kʋ yie.

¹¹ Ɔ laa‑ nyɩkpaa‑ nü nü nü nynä wa 'kɔ ‑gä nʋ. Ɔ laa‑ ‑nänʋä ‑yä wa 'kä ɔɔ' lobho lobhonyʋä 'plö. Ɔ laa‑ ‑nänʋä ‑yä wa 'kä ɔɔ' 'plɔfɛtɩnyʋä 'plö. Ɔ laa‑ ‑nänʋä ‑yä wa 'kä ɔɔ' 'Nägädöö bienyʋä 'plö. Ɔ laa‑ ‑nänʋä ‑yä wa 'kä 'cɔcɩnyʋa 'tienyʋä 'plö. Ɔ laa‑ ‑nänʋä ‑yä wa 'kä 'cɔcɩnyʋa cɩa.

¹² ‑Nɩnɩ 'fɩɩn nä, kä Klisö ‑nʋɩ lä ‑yä 'cɔcɩnyʋa 'kä mii wa 'kä Laagɔɔ' lebhee 'nägäsä nʋ. Ɩyä wa 'kä gbä Klisöö' 'cɔcɩɛ ‑ɛ plöö‑ lä ɔɔ' 'yɛkɛɛ nä, ɛ 'kä 'tɛtɩ kään.

¹³ Ɩ yi gbä 'nɩ ‑anyɩ 'fɩɩn, ‑a yi nʋ ‑kaaa 'nɩ ‑a yi pɔlötɛtɛɛ ‑bhlo 'mnö 'jɛnyɩ. 'Nɩ Laagɔ ‑Yowli nä, ‑a yio säbhlo ‑säbhlo yibhë. ‑Lɔɔ a yi lä pɔlötɛtɛɛ 'mnö ‑glɛɛ 'nɩ a yi lä Klisöö 'bhisäkʋ ŋëë.

¹⁴ ‑Aa ‑läyɩɔ kʋ nynä 'yuë. Cɩalɩɩ' 'yigädalɩɩ 'nö‑anyɩ ‑läyɩɔ fämʋ 'nɩ ‑a 'gä pee ‑yä ‑vʋvɔlʋ 'ka‑anyɩ dää 'fɩɩn fämʋ. ‑Wa cɩa lä ‑kpläkplaa 'nɩ ‑wa 'nyigë lä wa ‑liesɩ nä, wa 'nö‑anyɩ ‑läyɩɔ 'nyigë.

¹⁵ ‑Nʋawlɛɛ 'mɛ ‑a 'gä ylä ‑wawʋʋ 'mnö cii. Ɩyä ɛ 'kä gbä ‑a 'gä 'bhʋä ‑lɩɩ 'fɩɩn 'mnö, ɩyä ‑a 'gä ŋëë nynä Klisö. Klisönɔ 'mɔɔ‑ plöö‑ lä 'wluu.

¹⁶ Klisö 'mɔɔ‑ gbä lä 'nɩ ‑anyɩa 'yɛkɛɛ' nëmüü 'fɩɩn ‑känö ‑känö lä sä, 'nɩ ɩ 'jɛnyɩ‑ lä 'nägäsä. Nëmüü 'fɩɩn‑ ‑kʋ lä nyɩkpɔ 'yɛkɛɛ nä, ɩ ‑kä gënödö. 'Nɩ nëmüü 'fɩɩn kä 'sɩɩ 'nägäsä ɩɩ' lebhee nʋ nä, kä 'yɛkɛɛ bhʋä 'nɩ ɛ kään 'tɛtɩ. 'Nɩ ‑nɩnɩ 'fɩɩn nä, ‑wawʋʋ 'mnö ɩ nʋɔ lä.

¹⁷ 'Klüü ‑lɩɩ n 'ylänö'anyɩ ylä 'sää 'titi nä, 'nɩ n pɩä lä 'kʋ Kwlienyɔɔ' 'ŋnöö 'mnö nä, ɩmɩɩ‑ plöö‑ lä nynä ‑mä, anyɩ nä, aa' nää ‑läyɩɔ nynä nyɩkpaa' lʋä‑ ‑wʋ lä Laagɔ ‑yi. ‑Lɔɔ' nyɩkpa‑cëa nä, waa' bhobhosa ‑glö 'flɛ.

¹⁸ 'Nɩ waa bhobhowluu ‑kʋ 'cucuu. Nä zëkpëa' ‑laa ‑a plöö‑ lä Laagɔɔ' ‑laa nä, wa 'nöa ‑wʋ 'mnö ‑kʋmʋ. ‑Ɔnöza bhää? Waa' ‑wʋ Laagɔ yëkuu' wälɩklë ‑bhlo 'coo ‑yi. 'Fɩa 'nɩ waa' pɔlöö gbɔɔ‑ 'klʋ.

¹⁹ Sää‑ nää‑ lä nä, 'nɩ sää‑ ‑nyuu lä nä, waa' ‑wʋ sɔɔ 'mʋ ‑yii ‑yii. Kwa nää lä 'flɛ sä wa ‑waa lä nä. Wa ‑kʋ gbenyenyii 'fɩɩn 'mnö, 'nɩ wa mʋmʋ ‑mɔɔ klä.

²⁰ ‑Mä waa' kʋkʋsa ‑yä sa ‑a cɩa'anyɩ lä Klisö 'mnö nä, 'sɔɔ mʋʋ ‑wʋ yëkuu.

²¹ N ‑yi sɔɔ nynä ‑mä a yä wɛzä Klisöö' yëkuu' wälɩ 'nu, 'nɩ ‑nʋawlɛɛ ‑ɛ ‑yä Zozii' zëkpëa 'sɔ mʋʋ lä yëkuu nä, wa ya'anyɩmɛ wɛzä cɩa.

²² Ɩ ‑kä ylä 'ŋnö nä, a ‑taa yɩ anyɩa' tɛɛtɛɛdaa' zëkpëa 'yi. Tɛɛtɛɛ nä, sa bhobho bhlä nä, kä sɔɔ 'nyigënö'anyɩ bhlä 'nɩ anyɩa' zëkpëa bhusu bhlä. Nä, ɩ ‑ŋwa yɩ 'kʋ nynä ‑mä anyɩa' tɛɛtɛɛ' zëkpëa nä, a ‑saa yɩ a yëku yëku.

²³ A ‑taa yɩ a yëku 'yi ‑yä Laagɔɔ' 'Wugɔɔ 'kä gbä anyɩa' pɔlöö 'kä 'cɩcɩ ‑yä ɩ 'kä ‑lɛɛ leli 'plö.

²⁴ Zëkpü‑lëlëa, a plaa 'mʋ nynä 'kotu. A kä kʋ nynä nyɩkpa‑loluë lʋä Laagɔ wlʋa‑. ‑Mä, ‑nʋawlɛɛ a nuu‑ lä nä, kɛ gbä 'nɩ nyɩkpɔ kplɔɔ 'nɩ ɔ gëë 'yi.

²⁵ ‑Nɩnɩ ‑kä ylä 'ŋnö nä, a ‑taa ‑kpläkplaa 'yi! A kä ‑lɔɔ ‑kʋ nä, a sonö ‑sonö ‑nʋawlɛ ‑mä ‑a ‑glö 'yɛkɛɛ ‑bhloo' nëmü.

²⁶ A kä gbʋgblɛ 'pä nä, ɛɛ' gbä lä 'nɩ a 'kä nyenyi nʋ. Gbʋgblɛɛ' kʋ'anyɩ ‑lä pleyii ‑aaa 'nɩ 'ylʋ 'kɛ 'yii bhlüü.

²⁷ Aa' ‑taa lä a yëku 'yi 'nɩ ‑zuzunyënyu 'kanyɩ pleyi nyima.

²⁸ Anyɩ nëëdë nyɩkpɔɔ' lɔɔ‑ gä bhä ghlü nä, ɔɔ' ghlü ‑läyɩɔ! Ɔ bhlü ɔɔ' wlɩɩ 'kʋ ‑yä ɔ nʋnɩ lebhee' ‑yä ɔ 'kä 'nää 'ni, ɩyä ɔ 'kä ‑kä 'sɩɩ ŋäzönyʋä klää.

²⁹ Wälɩklü ‑nyënyëë' ghlänö'anyɩ ‑lä nëë'! Wälɩklëë' laa a yi lä ci 'nɩ ‑a yi lä nyɩkpɔ klää 'nɩ ‑a yi lä nyɩkpɔ 'nää nʋ nä, amä a laa ci.

³⁰ Aa' 'kpɔsʋ ‑lä Kplɔɔkplɔɔ‑wugɔɔ plɛ ‑mä ʋmʋ Laagɔ bhlüü‑ lä 'kʋ 'nɩ ʋ yi'anyɩ lä 'ylɩ ‑sä ‑yä a 'kä yibhënöɔ. Ʋmʋ 'kʋ Laagɔ ‑ghlää 'nɩ ʋ ŋʋʋ‑ lä nynä ‑mä, 'tänyɩ yi ŋëë 'nɩ a yi sää 'klwaklwä nyenyii' ‑säklöö 'mnö ‑bha.

³¹ Nä, a 'nä bhɛnö ‑lä wälɩ‑nyënyi pleyii. Plɛkʋ 'nä si'anyɩ lä 'nɩ a 'kä ‑käpä ‑käpägbɩ nʋ. Aa' kään ‑lä 'kɛsɛ, 'nɩ aa' 'bhɩsɛ ‑lä 'sɩɩ. A ‑bha nyenyi‑zëkpëa 'mnö.

³² A nʋʋ a ‑liesɩ 'nägägbɩ yëku. A kään yɩ plɛkʋmɛnɔ a ‑liesɩɩ' ‑za. A cie ‑cie ‑mä, sɔɔ Laagɔ ‑ghlää lä Klisö 'mnö 'nɩ ʋ ‑cienö'anyɩ lä.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan