Efɛzɩ‑dunyʋä 3 - GOD - u2

'Klüü Laagɔ ‑zizie bhlä 'kʋ nä kʋ panɩ‑ Klisö 'mnö

¹ Anyɩmɔɔ‑ ‑wʋ lä 'Zufʋnyʋa plöö‑ nä, ‑amʋ Pɔlʋ nä, Zozi Klisöö' ‑jɩnyɔ n plöö‑ ylä anyɩa' ‑za.

² Laagɔɔ' plɛkʋmɛnɔɔ 'mnöö ‑tëbhuu ʋ nyɛɛ'ɛ lä anyɩa' ‑za nä, n bhobho nynä ‑mä a yiu.

³ Kä Laagɔ panö'ö wälɩɩ' lɩɩ‑ ‑zizio bhlä 'kʋ nä. ‑Lɔɔ' wälɩɩ' 'klü n bha lä 'sɩɩ jɩjlä dä.

⁴ Nä Klisöö' yëkuu' wälɩɩ‑ ‑zizio lä 'kʋ nä, a kä 'naa jɩjlälɩɩ zɛɛ nä, a yi sɔɔ yibhë nynä ‑mä wälɩɩ n cii‑ lä nä kä n ‑yii 'nɩ n cii lä.

⁵ ‑Mɔɔ ‑gɔgɔbhlää' nä, Klisöö' yëkuu' wälɩklünö ‑ɩ ‑zizio bhlä 'kʋ nä, Laagɔ 'nɩ bhɔɔ 'ylʋzɔkʋnyʋä paa‑. ‑Mä 'tänyɩnɛ 'mnö kä Laagɔɔ' Kplɔɔkplɔɔ‑wugɔɔ panɩ‑ ʋʋ' lobho lobhonyʋa ‑yä ʋʋ' 'plɔfɛtɩnyʋa.

⁶ Klisöö' yëkuu' wälɩɩ ‑ɩ ‑zizio bhlä 'kʋ nä, a ni yɩ ɩmɩ. Kɩ plöö‑ lä nynä ‑mä, Laagɔɔ' 'Nägädöö ‑gbä 'nɩ nyɩkpaa ‑wa ‑yä Klisö 'sɔ yä ylä 'jɛnyɩ‑ nä, waa' ‑lefɩɩn, ‑waa ‑wʋ 'Zufʋnyʋä plöö‑ nä, wa ‑yä 'Zufʋnyʋä 'sɔ plöö‑ yɩ 'cë ‑bhlo. Wa ‑glö yɩ 'yɛkɛɛ ‑bhlo 'mnö nyɩkpa. 'Nɩ wa ‑känö yɩ ‑jaa ‑bhlo 'kʋ. Sä Laagɔ ŋʋʋ‑ lä nynä ‑mä ʋ yia Klisö 'mnö nʋ nä, ʋ yiwa sɔɔ 'nyɛ.

⁷ Laagɔɔ' plɛkʋmɛnɔɔ 'mʋʋ‑ ‑gbä 'nɩ n 'plöö‑ ʋʋ' ‑gänʋnyɔɔ' ɩyä ʋʋ' 'tɛtɩɩ 'mnö n 'kä Kwlienyɔɔ' 'Nägädöö ‑sää.

⁸ ‑Amʋʋ‑ plöö‑ lä kplɔɔkplɔɔnyʋa 'fɩɩn nëëdëë' ‑lɛ 'tɩkɩɩlɛɛ. ‑Mä sɔɔ ɩ ‑kʋ 'nɩ Laagɔɔ' plɛkʋmɛnɔɔ ‑gbä 'nɩ nyɩkpa 'fɩɩn‑ ‑wʋ lä 'Zufʋnyʋä plöö‑ nä, Klisöö' 'nää ‑aa ‑wʋ lä 'kʋ mʋsä ‑kä nä, n sänʋwa yɩ aa 'mnö 'Nägädöö.

⁹ Laagɔ ‑ʋ plöö‑ lä ‑lɩɩ 'fɩɩn nʋnyɔɔ nä, wälɩɩ ʋ zizie bhlä 'kɔɔkɔ 'kʋ nä, kʋ nyɛɛ'ɛ ‑tëbhu nynä ‑mä, n gätɩ ‑yä n cii wɩa sɩ 'kä lä nʋɔ nä.

¹⁰ Ɩyä ‑pɛpɛɛ nä, Klisöö' 'cɔcɩɛ 'kä gbä ‑yä kʋkʋlɩɩ 'fɩɩn ‑ɩ 'kämä lä 'nɩ ‑ɩ ‑kä lä ‑mɔɔ ŋäkʋʋ' 'pawä nä, ɩ 'kä sɔɔ yibhë nynä ‑mä kä Laagɔɔ' dɩgälɩɩ ‑zu 'nɩ ɩ ‑kʋ nü nü nü 'kʋ.

¹¹ Sä Laagɔ ŋʋʋ‑ bhlä 'kɔɔkɔ 'wlu nynä ‑mä ʋ yi nʋ nä, ‑anyɩa Kwlienyɔɔ Zozi Klisö 'kʋ ʋ ‑ghlää 'nɩ ʋ ‑nʋ lä sɔɔ.

¹² Nä, ‑a ‑yä Klisö 'sɔɔ 'jɛnyɩlɩɩ, ɩyä pɔlötɛtɛɛ ‑a ‑kä lä ɔɔ' ‑za nä, ɩ gbä 'nɩ a gä Laagɔ dëlü mʋ nä, plɛɛ' belio‑anyɩ yɩɔ 'mʋ.

¹³ Ɩmɩɩ‑ ‑kä 'ŋnö 'nɩ n sonö'anyɩ ylä nynä ‑mä, a kään 'tɛtɩ! Nä 'kwlɩkabhɩa n ni lä anyɩa' ‑za nä, a yi gbä 'nɩ anyɩ a yi 'klʋagba 'mnö kʋ ‑mä plɛɛ' 'kpɔsʋ'anyɩ ‑lä.

Klisöö' ‑wawʋʋ

¹⁴ Ɩmɩɩ‑ ‑kä lä 'ŋnö 'nɩ n pä lä ‑A 'Bä Laagɔ dëlü ‑kokoowli glu.

¹⁵ Kʋkʋlɩɩ 'fɩɩn‑ ‑kʋ lä ŋäkʋ nä, ɩyä ‑lɩɩ 'fɩɩn‑ ‑kʋ lä ‑mää ‑dʋdʋkʋ nä, ɔmɔɔ‑ wlʋɩ‑ lä.

¹⁶ Sä Laagɔɔ' 'klʋagbaa' 'mnö leylüü' ‑wʋ lä 'bɛ nä, ʋ ghlää ʋʋ' 'Wugɔɔ 'mnö ‑yä ʋ 'nyɩ'anyɩ 'tɛtɩ ‑yä ɩ 'kä gbä anyɩa' 'cɔcɩ‑zëkpëa 'kä ‑mɔɔ see 'nägäsä.

¹⁷ Ɩyä Klisö ghlää anyɩa' pɔlötɛtɛɛ 'mnö ‑yä ɔ kʋ'anyɩ pleyi. Ɩyä a 'ŋʋ sikplii ‑yä a see ‑wawʋʋ 'mnö 'nägäsä sä.

¹⁸ Ɩ yi gbä 'nɩ kplɔɔkplɔɔnyʋa 'fɩɩn a ‑yʋwa 'sɔ yi Klisöö' ‑wawʋʋ 'mʋ 'nu. Sä ɔɔ' ‑wawʋʋ' 'klʋ woonɔ ‑kʋ lä nä, 'nɩ ʋʋ' 'kʋ tlʋnɔɔ ‑kʋ lä nä, 'nɩ ʋʋ' 'wlu tlʋnɔɔ ‑kʋ lä nä, 'nɩ ʋʋ' 'mʋ tlʋnɔɔ ‑kʋ lä ä, a yi sɔɔ 'mʋ 'nu.

¹⁹ Klisöö' ‑wawʋʋ nyɩkpɔ 'nʋʋ ‑lä yibhë 'nɩ ɔ 'kʋ ‑mɔɔ bhɩä. ‑Mä anyɩ a yiu yibhë 'nɩ Laagɔɔ' 'nää yi anyɩa' zëkpëa 'mnö 'kʋ yie.

²⁰ Laagɔ 'mʋʋ‑ ‑kä lä 'päwaa‑ zi lä ‑lɩɩ 'fɩɩn 'kʋ nä. 'Nɩ ‑lɔɔ' 'päwaa nä, ‑anyɩ 'kʋ ʋ ghlänöa 'nɩ a nʋ lä lebhe. Ɩ ‑kä 'ŋnö 'nɩ sä ‑a bhobho lä 'nɩ sä ‑a 'ylänʋ lä nä, ʋ yi sɔɔ nʋ 'nɩ ʋ yi nëkʋ 'tɔtɔɔ.

²¹ 'Klʋagba ŋëë Laagɔ 'kʋ! 'Cɔcɩɛ ‑yä Zozi Klisö 'sɔɔ 'jɛnyɩlɩɩ 'mnö 'klʋagba, a ŋëë Laagɔ 'kʋ 'tänyɩɩ 'fɩɩn 'mnö, ɩyä 'kɔɔkɔɔ ‑za! Ɩ kʋ sɔɔ!

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan