Bìoball air-loidhne

Efɛzɩ‑dunyʋä 2 - GOD - u2

Laagɔ nyɛ Klisö 'mnö zëkpë
( Kolɔ 2.12‑13 ; 3.1‑3 ; Titö 3.3‑8 )

¹ Anyɩ nä, a yä bhɛ anyɩa' nyenyii ‑yä anyɩa 'focloo 'mnö 'kuu.

² Tɛɛtɛɛ nä, ɩmɩ 'mnö a nämnö bhlä. Sä zëkpëa 'tienö'anyɩ bhlä nä, sɔɔ a nää bhlä. ‑Zuzunyënyuu ‑ʋ plöö‑ lä zëkpü ‑kɔfʋʋ' 'kämänyɔɔ nä, ʋmʋ a nʋ bhlä ‑gä. ‑Zuzunyënyuyɩ 'mʋʋ‑ 'tie ylä ‑pɛpɛɛ' nyɩkpaa ‑wa cɩcɩɔ lä Laagɔ 'yii nä.

³ 'Nɩ ‑anyɩ ‑mä 'sɩɩ, kä ‑anyɩ 'fɩɩn ‑kʋ bhlä ‑lɔɔ' nyɩkpa‑cëa 'bhisäkʋ. Sä ‑anyɩa pɔlöö sonö‑anyɩ bhlä nynä ‑mä ‑a nʋ nä, sɔɔ ‑a nʋ bhlä. Sä ‑anyɩa 'yɛkɛɛ ylä bhlä nä, 'nɩ ‑anyɩa bhobhowluu sonö‑anyɩ bhlä nä, sɔɔ ‑a nää bhlä. ‑Anyɩa kʋkʋsaa ‑kä bhlä 'ŋnö nä, kä Laagɔ 'kä‑anyɩ bhlä ʋʋ' gbʋgblɛɛ yëku fään wamä 'bhisäkʋ.

⁴ ‑Mä 'zaazɩ nä Laagɔɔ' ŋäzöplɛɛ' ‑wʋ 'kʋ 'mʋsä ‑kä. Kʋ ‑wamänö‑anyɩ ‑aaa 'nɩ ʋ 'tɔtɔɔ nëkʋ.

⁵ Ɩ ‑kä 'ŋnö nä, ‑anyɩmɔɔ‑ yä bhɛ lä ‑anyɩa nyenyii' 'focloo 'mnö 'kuu nä, ʋ sa‑anyɩ 'kwiee 'mnö 'nɩ ʋ nyɩ‑anyɩ zëkpë ‑a ‑yä Klisö 'sɔ 'kä 'kʋ kʋʋ. ‑Ɛɛɛ, Laagɔɔ' plɛkʋmɛnɔɔ 'mnö a 'nii‑ lä ‑lɔɔ nëë' ‑bhalɩ.

⁶ ‑A ‑yä Zozi Klisö 'sɔɔ 'jɛnyɩlɩɩ 'mnö, ‑mɔɔ Laagɔ ‑ghlää 'nɩ ʋ ‑gbä 'nɩ ‑a ‑glɔɔ lä 'kuëë. 'Nɩ ʋ nyɩ‑anyɩ lä ‑mɔɔ Laagɔduu' säkʋdä ‑a yä Klisö 'sɔ ‑yä ‑a ‑yɔsɔ 'kä 'leyisä 'kämä.

⁷ ‑Mä 'nää 'fɩɩn ʋ nʋnö‑anyɩ lä Zozi Klisö 'mnö nä, ‑mɔɔ 'yikʋʋ 'tänyɩɩ 'mnö, a yi pana nynä ‑mä kä Laagɔ nää‑ plɛkʋ kpänyɩ.

⁸ Laagɔɔ' plɛkʋmɛnɔɔ 'mnö a nii‑ lä ‑lɔɔ nëë' ‑bhalɩ. Pɔlötɛtɛɛ a ‑kä lä Laagɔɔ' ‑za nä, ɛmɛɛ‑ ‑gbä 'nɩ ɩ plöö‑ lä sɔɔ 'kʋ. Anyɩ 'titii‑ ‑wʋ a yëku ‑lɔɔ nëë' ‑sä ‑mä Laagɔ‑ nyɩ'anyɩ lä ‑lɔɔ' ‑jlɔɔ.

⁹ Nä ‑anyɩa 'tɛtɩ‑ aa ‑wʋ 'kʋ bhlüü‑ 'nɩ ‑a 'gä ‑lɔɔ ‑a yëku nëë' ‑sä. Ɩ ‑kä 'ŋnö nä, nyɩkpɔɔ' ‑wʋ ‑kä 'nɩ ɔ 'kä yɩ täkpɔ.

¹⁰ Laagɔ nä, ʋʋ' nʋnʋlʋʋ ‑a plöö‑ lä. Kʋ ‑nʋnö‑anyɩ lä Zozi Klisö 'mnö ‑yä ‑a 'gä 'nägägbɩ nʋ. 'Nɩ Laagɔ yä wɛzä 'sɩɩ 'ŋʋ nynä ‑mä ‑a yi ‑lɔɔ' 'nägägbɩɩ nʋlɩ mii.

Laagɔ yä ‑anyɩ 'jɛnyɩ Zozi Klisö 'mnö

¹¹ Saa ‑kʋ bhlä tɛɛ nä, a luë sɔɔ dä 'kʋ ‑nä! 'Zufʋnyʋä nä, kä wa dö 'kʋ. 'Nɩ ‑lɔɔ 'kpɔflɩɩ wa bhɛnɩ‑. Ɩmɩɩ‑ ‑kä 'ŋnö 'nɩ wa ci lä nynä ‑mä wamä kä wa döö‑ 'kʋ. ‑Mä anyɩ, sä aa' ‑wʋ lä 'Zufʋnyʋä plöö‑, 'nɩ aa ‑wʋ lä ‑lɔɔ' 'kpɔflɩɩ bhɛɛ nä, ɩɩ' ‑zä wa sonö'anyɩ lä nynä ‑mä aa' ‑döö ‑wʋ 'kʋ.

¹² ‑Lɔɔ' 'tänyɩɛ 'mnö nä, aa' bhɔɔ Klisö anyɩa' zëkpëa 'mnö ‑kä. A ‑glö bhlä lowie nä, aa' bhɔɔ 'Ylizlɛnyʋä nëëdëë' kʋkʋsä ‑kä. 'Nɩ wa ‑yä Laagɔ 'sɔ pää' mɛnʋʋ 'mnö 'nää Laagɔ ŋʋʋ‑ lä ‑mɔɔ nä, wa nö'anyɩma bhɔɔ 'mnö ‑zɛnö. Ka ‑kʋ bhlä 'flɛ ‑mää 'ylʋzɔɔ nynä nyɩkpaa' lʋä ‑wʋ wälɩklë dë 'tɛɛ nä, 'nɩ ‑waa bhɔɔ lä 'sɩɩ Laagɔ ‑yi nä.

¹³ ‑Mä ‑pɛpɛɛ nä, anyɩmɔɔ‑ ‑tlʋ bhlä Laagɔ dä fɛɛn nä, Zozi Klisö, a ‑yä yɩ ɔɔ' doluu 'mnö ghlää a yä Laagɔ yëku 'mɛ.

¹⁴ ‑Ɛɛɛ, Klisö 'mɔɔ‑ plöö‑ lä ‑anyɩa' 'kʋ wɔtɔlɩ. Nyɩkpaa' ‑lʋa ‑wʋ lä 'Zufʋnyʋä plöö‑ nä, ɩyä ‑wa plöö‑ lä 'Zufʋnyʋä nä, ɔmɔɔ‑ 'jɛnyɩnʋwa‑ lä 'nɩ wa plöö‑ ylä 'cë ‑bhlo. ‑Zɔbhlɛzʋʋ' gbü‑papʋʋ ‑ʋ säsänʋwa bhlä nä, Klisö 'kwie yʋ wlä ‑yä wa 'kä 'jɛnyɩ.

¹⁵ Kɔ ‑sä ylä ‑lɔɔ Moyizöö' ‑Jlämaa ‑yä aa' 'kämälɩɩ' 'tɛtɩɩ 'sɔ. 'Nɩ ɔ bhlüü‑ yɩ 'Zufʋnyʋä 'kʋ, 'nɩ ɔ bhlüü‑ yɩ ‑waa ‑wʋ lä 'Zufʋnyʋä plöö‑ nä 'kʋ, 'nɩ ɔ yiwa ɔ yëku 'mnö 'jɛnyɩ ‑yä wa 'kä ‑bhlo 'plö. Sɔɔ Klisö ‑nʋ 'nɩ ɔ yiwa lä 'kʋ wɔtɔlɩ 'pää 'ŋʋ.

¹⁶ Klisö nä, ɔɔ' 'kusuu 'yii 'kwie 'mnö ɔ ‑ghlää 'nɩ ɔ yiwa lä 'jɛnyɩ 'nɩ ɔ yi lä gbä 'nɩ wa ‑yä Laagɔ 'sɔ yi lä glää. Ɔɔ' 'kwiee 'mɛɛ‑ ‑sɩä lä zɔbhlɛzʋʋ.

¹⁷ Anyɩmɔɔ‑ ‑sä bhlä Laagɔ gwë nä, ɩyä ‑lʋa ‑wa mɛɛ‑ bhlä Laagɔ yëkʋ nä, kɔ ‑yi 'nɩ 'Nägädöö‑ nyɛ lä 'kʋ wɔtɔlɩɩ nä, ɔ ‑sänʋwanyɩ.

¹⁸ Klisö 'kʋ ‑anyɩ 'fɩɩn ghlää lä 'nɩ ‑a ŋëë lä ‑A 'Bä Laagɔ dëlü 'Wugɔɔ ‑bhlo 'mnö.

¹⁹ Nä, anyɩ aa yɩɔ lowie plöö‑, 'nɩ aa' yɩɔ 'sɩɩ 'plöplönyʋä plöö‑. Laagɔɔ' kplɔɔkplɔɔnyʋä a plöö‑ ylä. A ‑glö yɩ Laagɔɔ 'lɔlʋkpönyʋä.

²⁰ Kwlienyɔɔ' lobho lobhonyʋa ‑yä Laagɔɔ 'plɔfɛtɩnyʋa, ‑bhutuu wa pään lä glu nä, ʋmʋ a 'plömʋ lä 'sɩɩ. 'Nɩ Zozi Klisö 'titi plöö‑ lä ‑bhutuu' glu‑päändaa' cɛkʋbhëa.

²¹ Nä, ‑lɔɔ' ‑bhutuu ‑a ‑yä Klisö 'sɔɔ 'jɛnyɩlɩɩ 'mnö, ‑mɔɔ ʋ ‑kä lä sä. Kʋ slɔɔ 'nɩ ʋ mʋ lä 'yikʋ 'kɔɔkɔ ‑yä ʋ 'kä Kwlienyɔɔ' kplɔɔkplɔɔ‑bhutu 'plö.

²² Anyɩmä 'sɩɩ, a ‑yä Klisö 'sɔɔ 'jɛnyɩlɩɩ 'mnö, a ‑yä ‑mɔɔ' ‑lʋa 'sɔ yä ‑bhutunʋ 'mnöö lʋä 'plö. Ʋ ‑glö ‑bhutuu' lʋʋ Laagɔ 'Wugɔɔ ‑kʋ lä 'mnö.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan